Oseas 2:1-23
2 Rü ngẽma ngunexü̃ i nagu nawoeguxü̃ rü pema rü ngẽma peenexẽgüxü̃ tá ñaperügügü: —Marü ínangugü i taenexẽgü i Tupanaarü duü̃xü̃gü —ñaperügügü tá. Rü ngẽma peeya̱xgüxü̃ rü tá ñaperügügü: —Marü ínangugü i taeya̱xgü i ngechaü̃tümüxü̃güxü̃ —ñaperügügü tá.
Tupanana nixĩgachi ga Iraéanecüã̱xgü
2 Rü nüma ya Cori ya Tupana rü ñanagürü: —Pa Iraétanüxü̃x, ¡ípenaxuaxü̃ i ngẽma pechixü̃ane i ñoma peérüxü̃ ixĩxü̃! Erü norü duü̃xü̃gü rü marü choxna nixĩgachi, rü ngẽmaca̱x i pechixü̃ane rü marü tama choxrü nixĩ rü choma rü marü tama norü Tupana chixĩ. ¡Rü norü duü̃xü̃gümaxã nüxü̃ pixu nax naxoexü̃ nax ñoma wüxi i ngexü̃ i ngeãẽcürüxü̃ chixexü̃ naxügüxü̃! ¡Rü namaxã nüxü̃ pixu nax nüxna yaxĩgachixü̃ i ngẽma tupananetagü i nüxü̃ nangechaü̃güxü̃!
3 Rü ngẽxguma taxũtáma nüxü̃ naxoegu i ngẽma tupananetachicüna̱xãgü rü tá nüxna chanayaxu i guxü̃ma i nüxü̃́ ngẽxmagüxü̃. Rü ngẽma nachixü̃ane rü noxri nango̱xgurüxü̃ tá chayaxĩxẽxẽ nax taxuxü̃ma nüxü̃́ ngẽxmaxü̃. Rü ñoma naxnücüane i ngearü dexáã́xü̃rüxü̃ tá chayaxĩxẽxẽ nax ngẽmaãcü ta̱xawamaxã nayuexü̃ca̱x i ngẽma choxna ixĩgachixü̃.
4 Rü taxũtáma namaxã chixãũxãchi i norü duü̃xü̃gü, erü ngẽma duü̃xü̃gü rü ñoma ngexü̃ i ngeãẽcüwa ngóexü̃rüxü̃ nixĩgü.
5 Rü pechixü̃ane rü ñoma wüxi i nge i ngeãẽcürüxü̃ taxuwama name. Rü ngĩma rü ngĩgürügü: “Paxa tá naxca̱x chadau i ngẽma chomaxã maxẽxü̃, erü ngẽmagü nixĩ i choxna naxãgüxü̃ i paũ rü dexá rü chauxchiru i carnéruta̱xanaxca̱x rü línuchinaxca̱x rü chíxü̃ rü axexü̃”, ngĩgürügü.
6 Rü ngẽmaca̱x i choma rü tá tuxugümaxã chanapota i ngĩrü nama rü tá ngĩxü̃ íchapoxexü̃ nax tama nüxü̃ yangauxü̃ca̱x i ngẽma nama i nagu yaxũxü̃.
7 Rü tá nawe irüxũ i ngẽma yatügü i namaxã namaxü̃xü̃ rü tá naxca̱x idau, natürü taxũtáma nüxü̃ iyangau. Rü ngẽmaca̱x düxwa tá ngĩãẽwa ngĩgürügü: “Naxca̱x tá chataegu ya yimá nüxíraü̃cü ya chaute yerü gumámaxã nixĩ ga mexü̃ choxü̃ ngupetüxü̃ ñu̱xmaarü yexera”, ngĩgürügü.
8 Natürü nümagü i ngẽma Iraétanüxü̃ rü ngẽma ngeruxü̃ nixĩgü nax tama nüxü̃ nacua̱xgüégaxü̃ nax choma yixĩxü̃ ga nüxna chanaxãxü̃ i trigu rü bínu rü chíxü̃ rü diẽru rü úiru. Natürü nümagü rü yema diẽrumaxã rü úirumaxã nanaxügü ga norü tupananetagü ga Baáchicüna̱xãgü.
9 Rü ngẽmaca̱x i choma rü ngẽxguma norü buxwa nanguxgu rü tá chanade i ngẽma chorü trigu rü chorü bínu. Rü tá chanade i ngẽma naxchiru i carnéruta̱xanaxca̱x rü línuchinaxca̱x i nüxna chaxãchiréxü̃ nax tama nangexchiruxü̃ca̱x.
10 Rü ngẽma norü tupananetagüpe̱xewa tá chanapuxü̃ i guxü̃táma i ngẽma nüxna chaxãxü̃. Rü ngẽmaãcü tá chanaxãneexẽxẽ i ngẽma duü̃xü̃gü, rü taxúetama choxna tanachu̱xu.
11 Rü ngẽxguma nawa nanguxgu i norü petagü i ngü̃chigaarü ngunexü̃gu naxügüxü̃ rü ngẽma petagü i tauemacü ya ngexwacaxü̃cügu naxügüxü̃ rü guxü̃ma i ngẽma togü i norü petagü, rü marü taxũtáma nataãẽgü, erü choma rü tá ngẽxma nüxü̃ chayacua̱xẽxẽ i norü taãxẽ.
12 Rü ngẽma duü̃xü̃gü nüxü̃ nacua̱xgügu nax norü tupananetagü yixĩxü̃ i nüxna naxãxü̃ i ngẽma norü igunecü rü úbanecügu. Natürü i choma rü tá chayanaxoxẽxẽ rü maxẽnecüxü̃ tá chayaxĩxẽxẽ. Rü ngẽma naeü̃gü i naixnecücüã̱xgü tá nanangõ̱xgü i ngẽma duü̃xü̃gü.
13 Rü tá chanapoxcue i ngẽma duü̃xü̃gü naxca̱x ga yema ngunexü̃gü ga nagu norü tupananeta ga Baáchicüna̱xãgüca̱x pumarate̱xe yagugüxü̃. Rü yexguma rü ãneramaxã rü nachagümaxã nügü ninga̱xãẽgü nax nüxü̃ yacua̱xüü̃güxü̃ca̱x ga yema norü tupananeta ga Baáchicüna̱xãgü. Rü yemaca̱x choxü̃ inarüngümae. Rü chomax ya Cori ya Tupana nixĩ i nüxü̃ chixuxü̃ i ngẽma —ñanagürü.
Tupana rü tá Iraéanecüã̱xgüaxü̃́ nüxü̃ narüngüma i norü pecadugü
14 Rü ñanagürü ta: —Natürü i chomax, rü wena tá chaugüna chayapuexẽxẽ i ngẽma Iraéanecüã̱xgü. Rü chianexü̃wa tá chanagagü nax ngéma mea namaxã chidexaxü̃ca̱x rü wenaxarü choxü̃ nangechaü̃güxü̃ca̱x.
15 Rü choma rü wena táxarü nüxü̃ chanatáeguxẽxẽ i norü úbanecügü, rü ngẽma doxonexü̃ i Acóxarü metachinüanexü̃ ga noxri Guxchaxü̃chicagu ãégaxü̃ rü Taãẽchicaxü̃ tá chayanguxuchixẽxẽ. Rü ngẽma naanewa tá choxü̃ nangechaü̃gü i ngẽma Iraéanecüã̱xgü yexguma Equítuanewa ínachoxü̃gurüxü̃.
16 Rü ngẽxguma rü tá: “Pa Cuxü̃ Tangechaxü̃cüx”, ñanagürügü choxü̃ rü tama “Pa Torü Yora i Baáx”, ñanagürügü. Rü choma i Cori ya Tupana nixĩ i nüxü̃ chixuxü̃ i ngẽma.
17 Rü tá nüxna chanachu̱xu nax tagutáma wena namaxã nadexaãchigüxü̃ca̱x i ngẽma tupananeta i Baágüéga.
18 Rü ngẽma ngunexü̃gügu rü ngẽma Iraéanecüã̱xgüxü̃ tá charüngü̃xẽxẽxü̃. Rü ngẽma naeü̃gü i düraexü̃, rü werigü, rü ãxtapegü rü tá ichanangüxmüexẽxẽ nax tama ngẽma duü̃xü̃güxü̃ nachixeãẽgüxü̃ca̱x. Rü tá ichanaxoxẽxẽ ya würagü rü taragü. Rü ngẽma norü uanügü rü tá ichanangüxmüexẽxẽ nax tama wena naxca̱x íyaxü̃ãchixü̃ca̱x, rü ngẽmaãcü i chorü duü̃xü̃gü rü nataãẽgüxü̃ca̱x.
19 Rü ngẽmaãcü, Pa Iraéanecüã̱xgüx, choma rü tá wena pexü̃ chade nax guxü̃gutáma choxrü pixĩgüxü̃ca̱x. Rü ngẽmaãcü tá aixcümaxü̃chi choxrü pixĩgü ngẽma mugü nüxü̃ ixuxü̃rüxü̃, erü poraãcü pexü̃ changechaü̃.
20 Rü chorü duü̃xü̃güxüchi tá pexü̃ chixĩgüxẽxẽ, rü tagutáma pexü̃ íchawogü. Rü ngẽxguma i pema rü tá choxü̃ pecua̱x nax perü Tupana chixĩxü̃.
21 2:21-22 Rü choma ya perü Tupana nixĩ i nüxü̃ chixuxü̃ i ngẽma, Pa Iraéanecüã̱xgüx. Rü ngẽxguma nawa nanguxgu i ngẽma ngunexü̃ rü choma rü tá chanapuxẽxẽ nax ngẽmaãcü naxügüxü̃ca̱x i penetügü rü namuxü̃ca̱x i ngẽma trigugü rü bínugü rü chíxü̃gü. Rü ngẽmaãcü Yereéarü metachinüanexü̃wa wena táxarü mea nayae i nanetügü.
22 Nüü̃ nadau 2:21
23 Rü choma rü wena táxarü chorü naanewa chanangexmagüxẽxẽ i chorü duü̃xü̃gü. Rü wena táxarü choxü̃́ nangechaü̃tümüxü̃gü. Rü pema i chorü duü̃xü̃gü i Iraéanecüã̱xgümaxã tá nüxü̃ chixu rü ñachagürü tá: “Pema rü marü chorü duü̃xü̃gü pixĩgü”, ñachagürü tá. Rü ngẽxguma i pemax rü ñaperügü tá: “Cuma nixĩ i torü Tupana quixĩxü̃”, ñaperügü tá —ñanagürü ya Tupana.
