Oseas 4:1-19
4 Pa Iraéanecüã̱xgüx ¡iperüxĩnüe i ngẽma pemaxã nüxü̃ yaxuxü̃ ya Cori ya Tupana! Nüma rü pemaxã nanu, erü petanüwa rü marü tataxuma ya texé ya tümamücümaxã ixaixcümáxe, rü bai ya texé ya aixcüma naxǘxe i ngẽma Tupanamaxã nüxü̃ tixuxü̃, rü bai ya texé ya aixcüma Tupanaxü̃ cuáxe.
2 Rü tamuxũchi ya natüca̱xma Tupanaégagu ixunetaxe rü nataxüchi i dora, rü máeta, rü ngĩ̱x, rü namu i nai i ngexü̃maxã ipegüxü̃, rü nügü daixü̃, rü máetagüechaxü̃.
3 Rü ngẽmaca̱x i ñaa nachixü̃ane rü poraãcü ngechaü̃ nüxü̃́ nangu̱x rü naanegüwa rü taxuxü̃ma narüxü. Rü duü̃xü̃gü rü nida̱xawee rü nayue, rü ngẽxgumarüxü̃ ta i ngẽma naeü̃gü i naixnecücüã̱x rü werigü rü choxnigü i márcüã̱x rü nigúetanü.
Cori ya Tupana rü chacherdótegüxü̃ nixugü
4 Rü nüma ya Cori ya Tupana rü ñanagürü: —Dücax, Pa Chacherdótex, cugagu nixĩ i ngẽma guxchaxü̃ i nagu nanguxü̃ i ngẽma cuchixü̃ane. Rü tama name i toguena cunaxu i ngẽma chixexü̃.
5 Rü cuma rü ngunecü tátama nagu cungu i ngẽma guxchaxü̃. Rü nüma ya yima orearü uruü̃neta rü chütacü cuxrüxü̃tátama nagu nangu. Rü choma rü tá chanadai i curü duü̃xü̃gü.
6 Rü chorü duü̃xü̃gü rü chixexü̃gu nayi rü nayue erü tama chorü mugüxü̃ nacua̱xgü. Rü ngẽma rü cugagu nixĩ, Pa Chacherdótex, erü cuma rü ta nüxü̃ cuxo i chorü mugü. Rü ngẽmaca̱x i choma rü ta cuxü̃ chaxo nax chorü chacherdóte quixĩxü̃. Erü cumax rü nüxü̃ icurüngüma i chorü ucu̱xẽgü rü ngẽmaca̱x i choma rü tá ta nüxü̃ icharüngüma i ngẽma cutaagü.
7 Rü ngẽxguma yexera yamuxgu i ngẽma chacherdótegü, rü yexera chixexü̃ chope̱xewa naxügü. Nümagü rü choxna nixĩgachi rü tama chauga naxĩnüe. Rü ngẽmaca̱x i choma rü taxũtáma namaxã chataãxẽ rü tá chanaxãneexẽxẽ.
8 Rü nüma i ngẽma chacherdótegü rü duü̃xü̃güarü pecadumaxã nataãẽgü erü ngẽxguma ngẽma duü̃xü̃gü norü pecadugüca̱x ngéma nagagügu ga naxü̃nagü nax chacherdóte nada̱i̱xü̃ca̱x rü ínaguxü̃ca̱x i ngẽma ãmaregü, rü ngẽxguma i nüma i chacherdótegü rü naxãwemügü rü mea nachibüe.
9 Rü ngẽmaca̱x i choma rü duü̃xü̃güxü̃ chapoxcuexü̃rüxü̃ tátama chanapoxcue i ngẽma chacherdótegü naxca̱x i nacüma i chixexü̃.
10 Rü ngẽma chacherdótegü rü marü choxna naxĩgü, rü ngẽmaca̱x rü woo nachibüegu rü tá nataiyaeama. Rü woo ngexü̃gü i ngĩxü̃nemaxã taxegüxü̃maxã namaxẽxü̃gu, rü tagutáma naxãxacügü.
11 Rü ngẽma nax ngexü̃ i ngĩxü̃nemaxã taxegüxü̃maxã namaxẽxü̃gagu rü ñu̱xũchi nax bínumaxã nangãxẽxü̃gagu rü chorü duü̃xü̃gü nüxü̃ inarüngümae i ngẽma mexü̃ i ĩnü.
12 Rü ngẽma chorü duü̃xü̃gü rü ínatüe erü naxchicüna̱xãgü i nainaxca̱xmare ixĩgüxü̃na nacagü nachiga i ta̱xacü tá yixcüra ngupetüxü̃. Rü naxü̃nearü ngúchaü̃, rü nüxü̃ napora, rü ngẽmagagu ngexü̃gü i ngĩxü̃nemaxã taxegüxü̃maxã namaxẽ rü ngẽmaãcü choxna nixĩgachitanü.
13 Rü ma̱xpǘnegüwa rü ngẽma naigü i taxü̃arü gáuxchipetawa norü tupananetagüca̱x ínanagugü i pumarate̱xegü rü norü ãmaregü. Rü ngẽmaca̱x pexacügü rü peneã̱xgü rü ngeãẽgüxü̃ nixĩgü.
14 Natürü i choma rü taxũtáma chanapoxcue i ngẽma pexacügü rü ngẽma peneã̱xgü naxca̱x nax togü i yatügümaxã namaxẽxü̃, erü pemax rü ta namaxã pemaxẽ i ngẽma togü i ngexü̃gü i ngẽxguma ngẽma tupananetagüxü̃ picua̱xüü̃gügu. Rü ngẽmaãcü ngẽma duü̃xü̃gü i cua̱x nüxü̃́ taxuxü̃ rü guxchaxü̃gu nayi.
15 Pa Iraéanecüã̱xgüx, pema rü woo nüxü̃ picua̱xüü̃güamagu i ngẽma tupananetagü, natürü tama chanaxwa̱xe nax ngẽma Yudáanecüã̱xgü rü ta nagu naxĩxü̃ i ngẽma nacümagü i chixexü̃. ¡Rü taxṹ i nüxü̃ picua̱xüü̃güxü̃ i ngẽma naxchicüna̱xãgü i Guirigáwa rü Bex-abéü̃wa ngẽxmagüxü̃! ¡Rü taxṹ i chauégagu ipexunetaxü̃!
16 Rü ngẽma Iraéanecüã̱xgüx, rü marü tama chauga naxĩnüechaü̃ ñoma wüxi i wocaxacü i tama íyapuxchaü̃xü̃rüxü̃. ¿Ñuxãcü tá chanachibüexẽxẽ nawa i naane i maxẽ i mexü̃ nawa rüxügüxü̃ ñoma carnéruxacügüxü̃ chachibüexẽẽxü̃rüxü̃?
17 4:17-18 Ngẽma Iraéanecüã̱xgü* rü tama nüxü̃ narüxoechaü̃ nax nüxü̃ yacua̱xüü̃güxü̃ i ngẽma tupananetachicüna̱xãgü. ¡Ngexrüma nax nüxicatama inarüchó! Rü nangãxẽ rü naxca̱x nadaugü i ngẽma ngexü̃gü i ngĩxü̃nemaxã taxegüxü̃ rü namaxã namaxẽ. Rü ngẽma mexü̃arü yexera naxca̱x nadaugü i ngẽma chixexü̃.
18 Nüü̃ nadau 4:17
19 Rü wüxi ya buanecü ya tacü tá nayagagü. Rü ngẽma nax ngẽma tupananetachicüna̱xãgüxü̃mare yacua̱xüü̃güxü̃gagu rü tá naxãnee —ñanagürü ya Tupana.
Notas
^ 4:4 Efraíü̃.
