Oseas 5:1-15
5 5:1-2 Rü Cori ya Tupana rü ñanagürü ta: —¡Choxǘ iperüxĩnüe, Pa Chacherdótegüx! ¡Rü choxü̃́ iperüxĩnüe, Pa Iraéanecüã̱xgüx! ¡Rü choxü̃́ iperüxĩnüe Pa Ãẽ̱xgacügütanüxü̃ i Iraéanemaxã Icua̱xgüxü̃! Choma rü tá pexü̃ chapoxcue erü peyawomüxẽẽgü i chorü duü̃xü̃gü, rü yexeraãcü chixexü̃gu penayixẽxẽ i ngẽma Iraéanecüã̱xgü. Rü pemax, rü penamu nax yima ngutaque̱xepataü̃gü ya Mispáwa rü Tabóxwa ngẽxmagünewa tupananetagüxü̃ yacua̱xüü̃güxü̃.
2 Nüü̃ nadau 5:1
3 Pa Iraéanecüã̱xgüx, choma rü mea nüxü̃ chacua̱x i ngẽma perü chixexü̃gü. Rü pemax, Pa Efraíü̃tanüxü̃x, ñoma wüxi i ngexü̃ i ngĩxü̃nemaxã taxexü̃rüxü̃ pixĩgü. Rü pemax, Pa Iraéanecüã̱xgüx, rü pegütama chixexü̃gu peyixẽxẽ.
4 Rü ngẽma chixexü̃ i nagu namaxẽxü̃ i Iraéanecüã̱xgü rü ngẽma nixĩ i nüxü̃́ nanaguxchaxẽẽxü̃ nax norü Tupanaca̱x nawoeguxü̃. Rü tama nüxü̃ narüxoechaü̃ nax norü tupananetagüxü̃ yacua̱xüü̃güxü̃ rü ngẽmaca̱x nüxü̃́ naguxcha nax Tupanaxü̃ nacua̱xüü̃güxü̃.
5 Rü ngẽma Iraéanecüã̱xgü rü nügü nicua̱xüü̃gü rü nügü ínarütagü. Rü ngẽmagagu rü tá naxca̱x ínangu i guxchaxü̃. Rü ngẽma Efraíü̃tanüxü̃ rü norü chixexü̃gu tátama nayi. Rü ngẽma Yudáanecüã̱xgü rü tá ta noxrütama chixexü̃gu nayi.
6 Natürü wüxi i ngunexü̃gu rü tá Cori ya Tupanaca̱x nadaugü rü naxca̱x tá nanadai rü nayagu i ãmaregü i wocagü rü carnérugü. Natürü taxũtáma nüxü̃ inayangaugü erü nüma ya Tupana rü marü nüxna nixũgachi.
7 Rü nümagü i Iraétanüxü̃ rü tama Cori ya Tupanaxü̃ nangechaü̃gü. Rü togüaxü̃́ ãxãcüxü̃rüxü̃ nixĩgü erü tupananetagüxü̃ nicua̱xüü̃gü. Rü ngẽmagagu wüxitama ya tauemacügu rü ngẽma norü naanewa ngẽxmagüxü̃ i nanetügü rü tá nayue.
Tupana rü tá Iraéanecüã̱xgüxü̃ rü Yudáanecüã̱xgüxü̃ napoxcu
8 ¡Rü Guibeáwa peyacue ya cornéta, rü Ramáwa rü ta peyacue nax nangutaque̱xegüxü̃ca̱x i duü̃xü̃gü! ¡Rü Bex-abéü̃wa rü tagaãcü duü̃xü̃gümaxã nüxü̃ pixu nax nügü namexẽẽgüxü̃ca̱x nax daiwa naxĩxü̃ca̱x! ¡Rü Bẽyamíü̃tanüxü̃maxã nüxü̃ pixu nax nügü namexẽxẽgüxü̃ca̱x!
9 Pa Iraétanüxü̃x, ngẽma pemaxã nüxü̃ chixuxü̃ rü aixcüma tá nixĩ iyanguxü̃. Rü ngẽxguma nawa nanguxgu nax pexü̃ chapoxcuxü̃ rü ngẽma Efraíü̃ane rü natüchixica tá ínayaxü —ñanagürü.
10 Rü ñanagürü ta: —Ngẽma Yudáanearü ãẽ̱xgacügü, rü ñoma naaneca̱x ngĩ́xü̃rüxü̃ nixĩgü erü Iraéanegu nachocu. Rü ngẽmaca̱x chorü numaxã tá poraãcü chanapoxcue.
11 Rü ngẽma Efraíü̃tanüxü̃ rü guxchaxü̃wa nangẽxmagü erü tama naga naxĩnüe i chorü mugü rü nüxü̃ nicua̱xüü̃güama i ngẽma tupananetagü.
12 Rü ngẽmaca̱x i choma rü tá chayanaxoxẽxẽ i ngẽma Efraíü̃tanüxü̃ rü Yudáanecüã̱xgü. Rü ñoma mürapewa i nawe ngṍxü̃rüxü̃ tá nixĩgü.
13 Rü ngẽxguma Efraíü̃tanüxü̃ rü Yudáanecüã̱xgü nüxü̃ daugügu nax taxü̃ i guxchawa nangẽxmagüxü̃, rü Efraíü̃tanüxü̃ rü tá Achíriaanearü ãẽ̱xgacüna ngü̃xẽẽca̱x nayacagü. Natürü nüma i Achíriaanearü ãẽ̱xgacü rü taxũtáma nüxü̃ narüngü̃xẽxẽ.
14 Rü choma rü ñoma wüxi i leóü̃rüxü̃ tá naxca̱x chixũ i ngẽma Efraíü̃tanüxü̃ rü Yudáanecüã̱xgü. Rü wüxi i leóü̃xacürüxü̃ tá nüxna chayuxu rü tá nagu chawagü. Rü nawena yáxü̃wa tá chanaga rü taxúetátama choxna tanapu.
15 Rü ñu̱xũchi chopataca̱x tá chataegu, rü ngéma tá changexma ñu̱xmatáta nümatama nüxü̃ yacua̱xãchitanü nax chixexü̃ naxügüxü̃. Rü ngẽxguma ngúxü̃ yangegügu rü tá aixcüma cha̱u̱xca̱x nada̱u̱xgu —ñanagürü ga Tupana.
