Oseas 6:1-11
6 Rü Tupana rü ñanagürü ta: —Ngẽma Iraéanecüã̱xgü rü ñanagürügü tá: “Pa Chomücügüx, ¡ngĩxã guxãma Cori ya Tupanaca̱x tawoegu! Rü woo nümatama tüxü̃ nawoone rü guxchaxü̃ tüxna naxã, natürü wena táxarü tüxü̃ nawoeguxẽxẽ nax ngẽmaãcü itaãẽgüxü̃ca̱x. Rü nüma rü ngúxü̃ tüxü̃ ningexẽẽgü, natürü tá tüxü̃́ inanaxoxẽxẽ i ngẽma ngúxü̃ i ingegüxü̃.
2 Rü ngẽmaãcü paxa tá inayanaxoxẽxẽ i ngẽma ngúxü̃ i ingegüxü̃ rü tá tüxü̃ ínarüdagüxẽxẽ nax mea nape̱xewa imaxẽxü̃ca̱x.
3 ¡Rü ngĩxã pora taxüe nax aixcüma Cori ya Tupanaxü̃ icuáxü̃ca̱x rü naga ixĩnüexü̃ca̱x! Rü nüma ya Cori ya Tupana rü aixcüma tá taxca̱x ínangu ñoma üa̱xcü guxü̃guma ínguxü̃rüxü̃ rü ñoma pucü guxü̃guma waixü̃mü iwaimüanexẽẽcürüxü̃”, ñanagürügü tá —ñanagürü ya Tupana.
Cori ya Tupana rü Iraéanecüã̱xgüxü̃ nangãxü̃
4 Rü nüma ya Cori ya Tupana rü ñanagürü: —¿Ta̱xacü tá pemaxã chaxü Pa Efraíü̃tanüxü̃x? ¿Rü ta̱xacü tá pemaxã chaxü Pa Yudáanecüã̱xgüx? Rü ngẽma nax choxü̃ pengechaxü̃xü̃ rü ñoma caixanexü̃ i ẽxü̃wa paxaãchi ngóxü̃rüxü̃ nixĩ, rü yima cherena ya ngunetüxü̃ paxaãchi rüngucürüxü̃ nixĩ.
5 Rü yema chorü orearü uruü̃gü ga petanüwa chamugüxü̃wa pemaxã nüxü̃ chixu nax pexü̃ tá chapoxcuxü̃, natürü ga pema rü tama iperüxĩnüe rü yemaca̱x pexü̃ chadai. Rü yemaacü chorü poxcu rü aixcüma pewa nangu ñoma ngóonexü̃ irügoxü̃rüxü̃.
6 Rü ngẽma choma pexü̃́ chanaxwa̱xexü̃ nixĩ nax aixcüma choxü̃ pengechaü̃xü̃, rü ngexrüma nax ta̱xacürü naxü̃nagü cha̱u̱xca̱x pedaixü̃. Rü ngẽma chanaxwa̱xexü̃ nixĩ nax aixcüma choxü̃ pecuáxü̃ nax perü Tupana chixĩxü̃ rü ngexrüma i ta̱xacürü ãmare i cha̱u̱xca̱x nax ípeguxü̃.
7 Natürü i pemax i chorü duü̃xü̃gü nax pixĩgüxü̃ rü Adáü̃rüü̃tama pixĩgü. Rü tama chauga pexĩnüe rü tama peyanguxẽxẽ i ngẽma uneta i chomaxã pexüxü̃.
8 Rü ngẽma duü̃xü̃gü i ĩane ya Garaáxcüã̱xgü rü chixexü̃arü üruü̃gü nixĩgü rü máetatanüxü̃ nixĩgü.
9 Rü ngẽma chacherdótegü rü ngĩ́ta̱xagüxü̃ nixĩgü erü Chiquéü̃wa daxü̃ i namagu tüxü̃ nana̱i̱xgü rü tüxü̃ nima̱xgü ya yíxema duü̃xẽ ya ngéma üpetüxe.
10 Iraéanewa rü nüxü̃ chadau i ngẽma chixexü̃chixü̃. Ngẽma Efraíü̃tanüxü̃ rü tupananetagüxü̃ nicua̱xüü̃gü. Rü guxü̃ma i ngẽma Iraéanecüã̱xgü rü ta ngẽxgumarüxü̃ nixĩgü.
11 Rü pemax, Pa Yudáanecüã̱xgüx, rü marü nüxü̃ chaxuneta i ngẽma ngunexü̃ i nagu tá pexü̃ chapoxcuexü̃. Natürü ngẽmawena rü ngẽma chorü duü̃xü̃gü rü tá nachixü̃aneca̱x nawoegu —ñanagürü ya Tupana.
