Oseas 7:1-16
7 Rü Tupana rü ñanagürü: —Chomax, rü yexguma chanamexẽẽgu ga chorü duü̃xü̃gü ga Iraéanecüã̱xgü rü mea nango̱x ga Efraíü̃tanüxü̃arü chixexü̃ rü Chamáriaarü duü̃xü̃güarü pecadugü. Erü guxü̃ma i nümagü rü nidorae rü duü̃xü̃güxü̃ nawomüxẽxẽ. Rü ñoma ngĩ́ta̱xagüxü̃rüxü̃ ĩpatagügu nachocu nax nangĩ̱xgüxü̃ca̱x. Rü ĩanearü namagüwa duü̃xẽgüna nanapuxü̃ i tümaarü ngẽmaxü̃gü.
2 Rü nümagü rü tama nagu narüxĩnüe nax choma nüxü̃ chadauxü̃ i guxü̃ma i ngẽma chixexü̃gü i naxügüxü̃. Rü ngẽma norü chixexü̃gagu tá nixĩ i chanapoxcuexü̃, erü meama nüxü̃ chadau i guxü̃ma i ngẽma naxügüxü̃.
Nacüma i chixexü̃ i ãẽ̱xgacügü nagu ĩxü̃
3 Rü nüma i duü̃xü̃gü rü norü diẽrumaxã rü womüxẽẽmaxã nanataãẽxẽxẽ i norü ãẽ̱xgacü rü norü ngü̃xẽẽruü̃gü.
4 Rü guxü̃ma i nümagü rü ñoma wüxi i yatü i to i ngexü̃ca̱x naxma̱xna ixũgachixü̃rüxü̃ choxna nixĩgachi. Rü wüxi i paũarü üruxü̃ rü nayanaixẽxẽ i norü paũarü guruxü̃. Rü ngẽxguma nanañumü i norü paũchara rü ínayanguxẽxẽ nax yapuxgüxü̃ rü yoxni nanaiecha i norü paũarü guruxü̃. Rü ngẽxgumarüxü̃ ta nixĩ i ngẽma duü̃xü̃gü erü tama nixogü i norü ngúchaü̃ nax chixexü̃ naxügüxü̃.
5 Rü ngẽxguma nawa nanguxgu nax peta naxüxü̃ i nachixü̃anearü ãẽ̱xgacü, rü ngẽma norü ngü̃xẽẽruü̃gü rü bínumaxã nanangãxẽẽgü. Rü nüma ya ãẽ̱xgacü rü norü ngãxü̃maxã nüxü̃ narümoxẽ i duü̃xü̃gü i nüxü̃ cugüexü̃.
6 Natürü nümagü i ngẽma norü ngü̃xẽẽruü̃gü rü ñoma paũarü guruxü̃ i naiechaxü̃rüxü̃ nixĩgü nax ãẽ̱xgacümaxã nanueechaxü̃. Rü nagu narüxĩnüe nax ñuxãcü tá yama̱xgüãxü̃. Rü chütacü napee, natürü moxü̃ãcü wena nagu narüxĩnüe nax ñuxãcü tá yama̱xgüãxü̃.
7 Rü guxü̃ma i nümagü rü ñoma paũarü guruxü̃ i naiechaxü̃rüxü̃ nixĩgü nax norü ãẽ̱xgacügümaxã nanueechaxü̃. Rü guxü̃ma i norü ãẽ̱xgacügüxü̃ nadai. Natürü taxuxü̃ma i ngẽma ãẽ̱xgacügü rü chorü ngü̃xẽẽca̱x ínaca.
Iraéanecüã̱xgü rü Tupanana nixĩgachitanü
8 Rü ngẽma Iraéanecüã̱xgü i Efraíü̃tanüxü̃ rü togü ga nachixü̃anecüã̱x i tama choxü̃́ yaxõgüxü̃maxã naxãmücügü. Rü ngẽmaca̱x ñoma paũ i rünga̱xmaecüwaxü̃rüxü̃ nixĩgü.
9 Rü ngẽma to i nachixü̃anecüã̱xgü rü naechita nüxna nanayaxu i ngẽma Efraíü̃tanüxü̃arü pora. Rü düxwa napuxerumare i ngẽma Efraíü̃tanüxü̃, natürü tama nüxü̃ nacua̱xégagü nax marü yangearü poraáxü̃.
10 Rü woo choma rü Iraéanecüã̱xgüarü Tupana nax chixĩxü̃ rü tama cha̱u̱xca̱x nawoegu rü tama cha̱u̱xca̱x nadaugü. Rü ngẽma nax nügü yacua̱xüü̃güxü̃gagu rü tama cha̱u̱xca̱x nawoegu.
11 Rü ngẽma Iraéanecüã̱xgü i Efraíü̃tanüxü̃ rü ñoma muxtucu i nu ne nañaxü̃ rü ngearü cuááxü̃rüxü̃ nixĩgü. Rü ngẽmaca̱x Equítuanecüã̱xgüna ngü̃xẽẽca̱x nacagü, rü ñu̱xũchi Achíriaanecüã̱xgüna ngü̃xẽẽca̱x nacagü.
12 Natürü ngẽxguma ngẽma ngü̃xẽẽca̱x nadaugügu rü choma rü tá íchanayauxü̃ ñoma werigü yütagu íyauxü̃xü̃rüxü̃. Rü ñu̱xũchi tá chanapoxcue nagagu i ngẽma norü chixexü̃gü.
13 Rü taxü̃ i ãũcümaxü̃ tá nixĩ naxca̱x i ngẽma chorü duü̃xü̃gü yerü choxna nixĩgachitanü. Rü tá guxchaxü̃ naxca̱x ínangu erü tama chauga naxĩnüechaü̃. Rü choma rü íchamemarechire̱x nax íchananguxü̃xẽẽxü̃ca̱x, natürü i nümagü rü tama chomaxã nixaicümagü rü doraxü̃ chomaxã nixugümare.
14 Rü ngẽxguma yada̱xaweegu rü ngúxü̃ yangegügu, rü norü pechicaxü̃güwa ngü̃xẽẽca̱x choxna nacagüe, natürü tama aixcüma norü ngúchaü̃maxã choxna nacagüe. Rü nügü nayapiexẽxẽ nax ngẽmaãcü tríguca̱x rü bínuca̱x ínacagüxü̃ca̱x. Natürü tama aixcüma chauga naxĩnüe.
15 Rü choma rü mea chanangúexẽxẽ rü pora nüxna chaxã, natürü i nümagü rü chixexü̃gu chomaxã narüxĩnüe.
16 Rü tama cha̱u̱xca̱x naxĩ rü ñoma würa ya wü̃xü̃nerüxü̃ nixĩgü. Rü naxchicüna̱xãgüca̱xama nawoegu nax nüxü̃ yacua̱xüü̃güxü̃ca̱x. Rü ngẽma norü ãẽ̱xgacügü rü nügü nicua̱xüü̃gü rü nügü ínarüporae, natürü daigu tá nayuemare. Rü ngẽxguma i ngẽma Equítuanecüã̱xgü rü tá nüxü̃ nacugüe —ñanagürü ya Tupana.
