Oseas 8:1-14
8 Rü ñanagürü ta: —¡Pa Dauxü̃taeruxü̃x, nagu icue i curü cornéta! Erü ñoma wüxi i ĩyü i nawemü tüxü̃ iyaxuxü̃rüxü̃ ñomama nixĩ i ngẽma uanügü i chorü duü̃xü̃güarü daiwa ĩxü̃. Rü ngẽma guxchaxü̃ tá naxca̱x ínangu i chorü duü̃xü̃gü erü tama nayanguxẽẽgü i ngẽma uneta ga namaxã chaxüxü̃ rü tama naga naxĩnüe i chorü mugü.
2 Rü ngẽxguma ngẽma guxchaxü̃ tá naxca̱x ínguxgu rü aita tá cha̱u̱xca̱x naxüe rü ñanagürügü tá: “¡Aixcümaxü̃chi nixĩ i Iraétanüxü̃arü Tupana quixĩxü̃!” ñanagürügü tá.
3 Natürü nüma i ngẽma Iraéanecüã̱xgü rü nüxü̃ naxoe i ngẽma mexü̃. Rü ngẽmaca̱x i norü uanügü rü tá nawe ningẽxü̃tanügü.
4 Rü ngẽma duü̃xü̃gü rü ngẽxguma nachixü̃anearü ãẽ̱xgacügüxü̃ naxunetagügu rü tama choxna nacagü. Rü ngẽxguma nüxü̃ naxunetagügu i ngẽma tá namaxã icua̱xgüxü̃, rü tama chorü ucu̱xẽca̱x ínacagü. Rü nügüca̱x nanaxügü i naxchicüna̱xãgü i úirunaxca̱x rü diẽrumünaxca̱x. Rü ngẽmamaxã nügütama nachixexẽẽgü.
5 Pa Chamáriacüã̱xgüx, ¡marütama nax pecadu pexüexü̃! Choma rü pemaxã chanu erü nüxü̃ picua̱xüü̃gü i ngẽma wocaxacüchicüna̱xã i Chamáriawa ngẽxmaxü̃. ¿Rü ñuxguratáta chope̱xewa pegü pimexẽẽgüxü̃?
6 ¡Pa Iraéanecüã̱xgüx, ngẽma wocaxacüchicüna̱xã i Chamáriawa ngẽxmaxü̃ rü tama aixcüma Tupana nixĩ. Rü wüxi i yatü i ngẽmaxü̃arü üruü̃xü̃ cuáxü̃ nanaxümare. Natürü i choma rü tá íraxü̃gu chanapuxãchixẽxẽ.
7 Rü ngẽma chixexü̃ i nagu naxĩxü̃ i ngẽma Iraéanecüã̱xgü rü natüca̱xmamare nixĩ rü ñoma buanecürüxü̃ nixĩ. Rü choma rü tá naxca̱x íchananguxẽxẽ i wüxi ya tacü ya buanecü ya íxã̱ũ̱xẽmacü. Rü ngẽma norü naanegüwa rü taxũtáma nixo i norü trigu rü taxũtáma nangẽxma i norü arína. Rü ngẽxguma ngürüãchi nüxü̃́ yaxo̱xgu, rü to i nachixü̃anecüã̱x tá namaxã naxãwemügü.
8 Rü ngẽma Iraéanecüã̱xgü rü to i nachixü̃aneme̱xẽwa tá nangẽxmagü. Rü ngẽma togü i nachixü̃anecüã̱xgü rü tá nüxü̃ nacugüe rü taxuwama nanamexẽxẽ.
9 Rü ngẽma Iraéanecüã̱xgü rü choxna nixĩgachi. Rü ñoma wüxi i búru i naixnecücüã̱x i nu ne naxũmarexü̃rüxü̃ nixĩgü. Rü ngẽma Efraíü̃tanüxü̃ rü Achíriaanewa naxĩ nax naxca̱x nadaugüxü̃ca̱x i norü ngü̃xẽxẽ. Rü ngéma nanana i norü ãmaregü nax ngẽmaãcü Achíriaane nüxü̃ rüngü̃xẽẽgüxü̃ca̱x.
10 Natürü woo ngẽma Achíriaanecüã̱xgüaxṹ naxütanügüãxgu natürü choma rü ngẽma togü i nachixü̃anegügu tá chanawoone. Rü ñuxre ya taunecü rü taxũtáma nüxü̃́ nangẽxma i noxrütama ãẽ̱xgacügü.
11 Rü ngẽmaãcü tá nüxü̃ nangupetü i ngẽma Iraéanecüã̱xgü nagagu i ngẽma muxü̃ i norü tupananetagüarü ãmarechicagü i nawa pecadu naxügüxü̃.
12 Rü choma rü nüxna chanaxã i muxü̃ma i chorü mugü, natürü i nümagü rü nüxü̃ naxoe.
13 Rü nümagü rü norü me nixĩ nax ãmare cha̱u̱xca̱x nada̱i̱xü̃ rü nax nangõ̱xgüãxü̃ i namachi i ngẽma naxü̃nagü i cha̱u̱xca̱x ínaguxü̃. Natürü i choma ya Cori ya Tupana rü tama namaxã chataãxẽ. Rü choma rü nüxü̃ chacua̱x i ngẽma norü pecadugü, rü ngẽmaca̱x tá chanapoxcue rü wena táxarü Equítuanecüã̱xgüme̱xẽwa chanangexmagüxẽxẽ.
14 Ngẽma Iraétanüxü̃ rü nanaxü ya ĩpatagü ya mexẽchine, natürü choxü̃ inarüngümae nax choma yixĩxü̃ i chanangóexẽẽxü̃. Rü ngẽma Yudáanecüã̱xgü rü nanaxü ga muxü̃nema ya ĩanegü ya meama ípoxegugüne. Natürü i choma rü tá íchanagu ya guxü̃nema ya yima ĩanegü —ñanagürü ya Tupana.
