Oseas 9:1-17
9 Rü Ochéa rü ñanagürü: —Pa Iraéanecüã̱xgüx, ¡taxṹ i petaãẽgüxü̃! ¡Taxũ i perü taãẽmaxã peyuxnagütanüxü̃ naxrüxü̃ i ngẽma togü i nachixü̃anecüã̱xgü! Pema rü taxü̃ i chixexü̃ pexü erü nüxna pixĩgachitanü ya perü Tupana rü tupananetagüxü̃mare picua̱xüü̃gü. Rü ñoma ngexü̃gü i naxü̃nemaxã taxexü̃rüxü̃ pixĩgü, erü guxü̃ma i nachicagü i trigu nawa pepúxü̃ pexü̃́ nangúchaü̃ nax penayauxtanüxü̃ naxca̱x i ngẽma chixexü̃ i pexüxü̃.
2 Rü ngẽmaca̱x, Pa Iraéanecüã̱xgüx, rü nataxutama i perü trigugü rü perü bínu. Rü ngẽma ngexwaca̱xü̃xü̃ i perü bínu rü taxũtáma ningu.
3 Rü pemax, Pa Iraéanecüã̱xgüx, rü wena táxarü Equítuaneca̱x pewoegu. Rü Achíriaanewa tá penangõ̱x i õna ya Tupana pexna chu̱xuxü̃. Rü marü taxũtáma nawa pemaxẽ i ngẽma naane ya Tupana pexna ãxü̃.
4 Rü ngéma rü tá pexü̃́ nataxu i bínu nax Tupanaarü ãmareétügu penabaxü̃ca̱x. Rü ngẽma íxraxü̃ i paũ i pengṍxü̃ rü ngechaü̃ãcü tá penangõ̱x ñoma texé yu̱xgurüxü̃. Rü texé ya yíxema nangõ̱xgüe rü tá Tupanape̱xewa tixãũãchi rü taxucürüwama Tupanapata ya taxü̃newa tangugü.
5 Rü ngẽma ípewoonexü̃wa rü tá pexü̃́ naguxcha nax penaxüchigaxü̃ i ngẽma perü petagü i namaxã Tupanaxü̃ picua̱xüü̃güxü̃.
6 Rü ngẽxguma naxcha̱xwa pibuxmügu i ngẽma poxcu rü ngẽma Equítuanecüã̱xgü rü tá pexü̃ ínayauxü̃, rü norü ĩane ya Ménfigu tá pexü̃ nata̱xgü. Rü ngẽma perü meruü̃gü i diẽrumünaxca̱x rü yima pepatachicawa rü naxcu rü chuchuxü̃ tá narüxügü.
7 Pa Iraéanecüã̱xgüx, marü nawa nangu i ngẽma ngunexü̃gü nax Tupana pexü̃ napoxcuexü̃ naxca̱x i perü chixexü̃gü i taxüchixü̃. Rü pemax, Pa Iraéanecüã̱xgüx, rü tá nüxü̃ pecua̱x nax marü pexca̱x ínanguxü̃ i ngẽma perü poxcu. Pema rü ñaperügügü: “Ngẽma orearü uruxü̃ rü nangeãxẽmare, rü tama naãxẽxü̃ nacua̱x”, ñaperügügü. Natürü ngẽmaãcü pidexagü erü perü chixexü̃maxã penapagü rü poraãcü naxchi pexai ya yimá orearü uruxü̃.
8 Pa Iraéanecüã̱xgüx i Efraíü̃tanüxü̃x, Tupana rü pexca̱x nua nanamu ya yimá norü orearü uruxü̃ nax pemaxã nüxü̃ yaxuxü̃ca̱x i ngẽma ãũcümaxü̃. Natürü i pemax rü toxyepe̱xe naxca̱x pexü. Rü woo i Tupanapata ya taxü̃newa rü naxchi pexaie.
9 Rü ngẽma perü chixexü̃gü rü nataxüchi naxrüü̃tama ga yema Guibeáwa ngupetüxü̃. Natürü Tupana rü taxũtáma nüxü̃ narüngüma i ngẽma perü chixexü̃gü rü perü pecadugü rü ngẽmaca̱x tá pexü̃ napoxcue —ñanagürü.
Iraéanecüã̱xgü rü ngúxü̃ tá ningegü nagagu i norü pecadugü
10 Rü Tupana rü ñanagürü: —Yexguma noxri Iraéxü̃ ichayangauxgu, rü poraãcü chataãẽxü̃chi ñoma wüxi i duü̃xü̃ i chianexü̃wa úbaxü̃ yangauxü̃rüxü̃. Rü ngẽma perü o̱xigü rü ñoma nüxíra i buxuxü̃ i igunecüarü orüxü̃ nixĩgü nax cha̱u̱xca̱x namexü̃. Natürü yexguma Baá-peúwa nangugügu rü yema tupananeta ga Baáxü̃ nicua̱xüü̃gü. Rü nügü nixãũãchi naxrüxü̃ i ngẽma naxchicüna̱xãgü i nüxü̃ nangechaü̃güxü̃.
11 Rü ngẽma nax yamuxü̃ i Iraéanecüã̱xgü rü ñoma wüxi i weri igoexü̃rüxü̃ tá nüxna inarütaxu. Rü naxma̱xgü rü taxũtáma tauemacü tüxü̃ inarütaxu rü taxũtáma titacharaxü̃ rü taxũtáma tixíraxacügü.
12 Rü woo ngẽxguma yaxãxacügügu, rü choma rü tá nüxna chanayaxu i norü maxü̃ rü tá nayue. Rü ngẽxguma nüxna chixũgachigu i ngẽma Iraéanecüã̱xgü rü naxca̱x rü tá wüxi i taxü̃ i ngechaü̃ nixĩ.
13 Rü nüxü̃ chadau i ngẽma Iraéanecüã̱xgü nax wüxi i naane i mexü̃wa nangẽxmagüxü̃, yema Tíruanecüã̱xgürüxü̃. Natürü ngẽma Iraéanecüã̱xgü rü yuwa tá nanamugü i naxacügü —ñanagürü.
14 Rü Ochéa rü ñanagürü: —¡Pa Chorü Tupanax, ẽcü napoxcue i ngẽma duü̃xü̃gü! ¡Rü ẽcü yangexacügüxẽxẽ i ngẽma naxma̱xgü! ¡Rü ngẽxguma ngürüãchi yaxãxacügu, rü ẽcü yangegüneníü̃xẽxẽgü! —ñanagürü.
Tupana rü Iraéanecüã̱xgümaxã nanu
15 Tupana rü ñanagürü: —Pemax, Pa Iraéanecüã̱xgüx, rü Guirigáwa nixĩ ga penaxüxü̃ ga naguxü̃raü̃xü̃ ga chixexü̃. Rü yéma nixĩ ga ichaxügüxü̃ nax pexchi chaxaixü̃. Rü ngẽma perü chixexü̃gagu rü tá pexü̃ íchawoxü̃ i chorü naanewa. Rü marü taxũtáma pexü̃ changechaü̃ erü guxü̃ma i perü ãẽ̱xgacügü rü tama chauga naxĩnüe.
16 Rü pemax, Pa Iraéanecüã̱xgüx, rü guxchaxü̃wa pengẽxmagü, rü ñoma wüxi i nai i marü ipaxchuma̱xãxü̃ rü marü tama oxü̃rüxü̃ pixĩgü! ¡Rü woo pixãxacügügu, rü choma rü tá chanayuexẽxẽ! —ñanagürü ya Tupana.
17 Rü ñanagürü ga Ochéa: —Ngẽma duü̃xü̃gü rü tama chorü Tupanaga naxĩnüechaü̃. Rü ngẽmaca̱x i nüma ya Tupana rü tá nüxü̃ naxo. Rü togü i nachixü̃anegügu tá nanawoone, rü ngéma rü tá nu ne nanaxĩmare —ñanagürü.
