Filipenses 3:1-21
3 Rü ñu̱xma Pa Chauenexẽgüx, rü chanaxwa̱xe i petaãẽgü erü tórü Coriarü duü̃xü̃gü pixĩgü. Rü yema ore ga noxri pexca̱x chaxümatüxü̃ rü tama choxü̃́ nawa̱xtümüü̃ nax wena pexca̱x chanaxümatüxü̃ erü aixcüma pexü̃́ name i ngẽma ore.
2 ¡Rü pegüna peda̱u̱x nüxna i ngẽma duü̃xü̃gü i chixexü̃gu maxẽxü̃, rü ngẽma orearü uruü̃güneta, rü ngẽma nüxü̃ ixuxü̃ rü ngẽxguma tama yigü íiwíecha̱xmüxü̃pe̱xechiraü̃gu rü taxucürüwama Tupanape̱xewa time!
3 Natürü yíxema aixcüma Tupanape̱xewa imexe, rü yixema tixĩgü. Rü Tupanaxü̃ ticua̱xüü̃gü i Naãxẽ ya Üünexü̃arü ngü̃xẽẽmaxã. Rü tataãẽgü erü Ngechuchu ya Cristuarü duü̃xü̃gü tixĩgü. Rü tama tayaxõgü nax ngẽma yigü íiwíecha̱xmüxü̃pe̱xechiraü̃xü̃ca̱x Tupanape̱xewa imexü̃.
4 Rü ngẽxguma chi aixcüma Tupanape̱xewa imexgu nawa i ngẽma nax íwiecha̱xmüü̃pe̱xechiraü̃xü̃, rü choma chi waxi nixĩ i guxü̃ i togüarü yexera choxü̃́ nangẽxma i ta̱xacüca̱x chayaxõxü̃ i ngẽma Yudíugücüma. Rü tataxuchima ya togue ya chorü yexera yaxṍxe i ngẽmachiga.
5 Yerü yexguma 8 ga ngunexü̃ choxü̃́ yexmagu nax chabuxü̃, rü choxü̃ ínawíecha̱xmüü̃pe̱xechiraü̃gu, erü Iraétanüxü̃ i Bẽyamíü̃tanüxü̃ chixĩ. Rü chaunatü rü chaué rü Iraétanüxü̃ tixĩgü, rü ngẽmaca̱x i choma rü Iraétanüxü̃xü̃chi chixĩ. Rü Parichéuchire̱x chixĩ rü meama chanaxaure ga yema Iraétanüxü̃güarü mugü.
6 Rü yema nax mea chayanguxẽẽchaü̃xü̃ca̱x ga yema Yudíugüarü mugü, rü yemaca̱x nawe chingẽchigü ga yema duü̃xü̃gü ga Ngechuchuaxü̃́ yaxõgüxü̃. Rü yema nax aixcüma mea chanaxaurexü̃ca̱x ga yema mugü, rü yemaca̱x taxucürüwama texé choxü̃ tixu nax tama chaxaurexü̃.
7 Natürü guxü̃ma ga yema ü̃pa cha̱u̱xca̱x mexü̃, rü ñu̱xma rü taxuwama choxü̃́ name yerü marü íchanata̱x nax Cristuaxü̃́ chayaxõxü̃ca̱x.
8 Rü ñu̱xma nax Ngechuchu ya Cristu ya chorü Corixü̃ chacuáxü̃, rü cha̱u̱xca̱x rü guxü̃ma ga yema ü̃pa nagu chixũxü̃ rü taxuwama name. Rü guxü̃ma ga yema mugü ga noxri nagu chixũxü̃ rü marü nüxü̃ charüxo nax Cristuwe charüxũxü̃ca̱x. Rü ñu̱xma nax Cristuwe charüxũxü̃ rü cha̱u̱xca̱x rü ñoma guxchirerüxü̃ nixĩ ga yema ü̃pa nagu chixũxü̃
9 Rü yema nax Cristuarü duü̃xü̃ chixĩxü̃ca̱x nixĩ i nüxü̃ charüxoxü̃ ga yema Yudíugücümagü ga noxri nagu chixũxü̃. Rü tama ngẽma nax chamecümaxü̃ca̱x rü ẽ̱xna mugü chaxaurexü̃ca̱x nixĩ nax chamexü̃ i nape̱xewa. Rü ñu̱xma rü Tupanape̱xewa chame erü Cristuaxü̃́ chayaxõ. Rü ngẽma nax Cristuaxü̃́ chayaxõxü̃ca̱x nixĩ i nügüca̱x choxü̃ namexẽẽxü̃ ya Tupana.
10 3:10-11 Rü ngẽma ñu̱xma chanaxwa̱xexü̃ nixĩ nax aixcüma Cristuxü̃ chacuáxü̃ rü chowa nax nangẽxmaxü̃ i Tupanaarü pora ga wena Cristuxü̃ írüdaxẽẽxü̃. Rü yema ngúxü̃ nax yangexü̃ ga nüma rü nax nayuxü̃ rü ngẽxgumarüü̃tama i choma rü íchamemare nax naxca̱x ngúxü̃ chingexü̃ rü naxca̱x chayuxü̃ nax yixcaama choma rü ta yuwa ícharüdaxü̃ca̱x.
11 Nüü̃ nadau 3:10
Pauru nanaxwa̱xe nax Cristuca̱x namaxü̃xü̃ ñu̱xmatáta Tupanaxü̃tawa nangu
12 Rü ñu̱xma rü tama chanaxwa̱xe i nagu perüxĩnüe nax guxü̃xü̃ chacuáxü̃ i Cristuchiga, rü ẽ̱xna guxü̃wama nax chamexü̃. Natürü naxca̱x chadauama nax Ngechuchu ya Cristuarü ngúchaü̃ chaxüxü̃ca̱x, yerü yemaca̱x nixĩ ga nüma ga cha̱u̱xca̱x nadauxü̃ ga noxrix.
13 Pa Chauenexẽgüx, ñu̱xma rü tauxta nawa changu i ngẽma naxca̱x chadauxü̃. Natürü ngẽma chaxüxü̃ nixĩ nax nüxü̃ charüngümaxü̃ i guxü̃ma ga yema noxri nagu chixũxü̃. Rü ñu̱xma rü chaugü chaporaxẽxẽ nax nawa changuxü̃ca̱x i ngẽma chope̱xewaama ngẽxmaxü̃.
14 Rü ngẽmaca̱x i ñu̱xma rü pora chaxü nax Cristuca̱x chamaxü̃xü̃ ñu̱xmatáta daxũguxü̃ i naanewa changu. Erü chanayauxchaü̃ i ngẽma ãmare ya Tupana daxũguxü̃ i naanewa naxca̱x taxca̱x ngẽmaxü̃ i yixema nax Ngechuchu ya Cristuarü duü̃xü̃gü ixĩgüxü̃.
15 Rü guxãma ya yíxema marü aixcüma Cristuaxü̃́ yaxõgüxe, rü name nixĩ i ngẽmagutama tarüxĩnüe. Natürü ngẽxguma chi texé i petanüwa toõcü nagu tarüxĩnügu, rü Tupana tá tüxü̃ nüxü̃ nacua̱xẽxẽ i ngẽmachiga.
16 Rü ngẽma inaxwa̱xexü̃ nixĩ nax aixcüma nagu imaxẽxü̃ i ngẽma ore i marü nüxü̃ icuáxü̃.
17 Pa Chauenexẽgüx, chanaxwa̱xe i nagu pexĩ i ngẽma nacüma i mexü̃ i pexü̃ nüxü̃ chadauxẽẽxü̃. ¡Rü naxca̱x pedauxü̃tae i nacüma i ngẽma togü i duü̃xü̃gü i toxrüxü̃ mea maxẽxü̃!
18 Rü marü mue̱xpü̱xcüna pemaxã nüxü̃ chixu, rü ñu̱xma rü chaxauxãcüma wena pemaxã nüxü̃ chixu rü nangẽxma i muxü̃ma i duü̃xü̃gü i Cristuarü curuchaarü uanüãcüma maxẽxü̃.
19 Natürü ngẽma duü̃xü̃gü rü tá napoxcue. Rü ngẽma naxü̃nearü ngúchaü̃ nixĩ i namaxã natupanaã̱xgüxü̃. Rü woo nüxü̃ nacua̱xchire̱x nax wüxi i ãne nax yixĩxü̃ i ngẽma chixexü̃ i naxügüxü̃, natürü nügü namaxã nicua̱xüü̃gü. Rü ñoma i naanearü ngẽmaxü̃guxicatama narüxĩnüe.
20 Natürü i yixema rü daxũguxü̃ i naanewa tüxü̃́ nangẽxma i tachica. Rü ítanangu̱xẽxẽ nax daxũguxü̃ i naanewa taxca̱x ne naxũxü̃ ya tórü Cori ya Ngechuchu ya Cristu ya tórü Maxẽxẽẽruxü̃.
21 Rü ñaa taxü̃ne i yuxwa̱xexü̃ rü nüma ya Cristu tá nanaxüchicüxü nax naxü̃ne i üünexü̃rüxü̃ yixĩxü̃ca̱x. Rü ngẽma norü pora i namaxã guxü̃étüwa nangẽxmaxü̃maxã tá nixĩ i naxüchicüüãxü̃ i ngẽma taxü̃ne nax noxrürüxü̃ yixĩxü̃ca̱x.
