Filipenses 4:1-23
4 Pa Chauenexẽgüx ya Pexü̃ Changechaü̃güxe, poraãcü pexü̃ chadauxchaü̃. Rü pema ya pexü̃ changechaü̃güxe rü chorü taãxẽ pixĩgü. Rü pema nixĩ i chorü ãmare ya Tupana choxna ãxü̃ pixĩgüxü̃. Rü chanaxwa̱xe i guxü̃guma mea tórü Coriaxü̃́ peyaxõgü rü taguma nüxü̃ pexoe.
2 Rü nüxü̃ chaca̱xaxü̃ i taeya̱xgü i Ebódia rü Chíntique nax nügümaxã nangüxmüexü̃ca̱x, erü nümagü rü tórü Coripe̱xewa nügüeya̱xgü nixĩgü.
3 Rü cumax, Pa Chomücü ya Mecü i Wüxigu Tupanaarü Puracüwa Chomaxã Puracücüx, rü cuxna naxca̱x chaca nax nüxü̃ curüngü̃xẽẽxü̃ca̱x i ngẽma taxre i taeya̱xgü. Erü nümagü rü wüxigu chomaxã rü Creméntemaxã rü ngẽma togü i chomücügü i Tupanaarü poperawa marü ngo̱xégagüxü̃maxã napuracüe i Tupanaarü orearü uwa.
4 Rü chanaxwa̱xe nax guxü̃guma tórü Corimaxã petaãẽgü. Rü wena pemaxã nüxü̃ chixu, rü ¡petaãxẽgü!
5 Rü chanaxwa̱xe i mea pemaxẽ nax guxü̃ma i duü̃xü̃gü pexü̃ nacua̱xgüxü̃ca̱x nax aixcüma mexü̃ i duü̃xü̃gü pixĩgüxü̃. ¡Rü nüxna pecua̱xãchie nax tórü Cori rü paxa tá nataeguxü̃ nax núma naxũxü̃!
6 ¡Rü taxuca̱xma penaxĩ̱xãchiãẽgü! ¡Rü perü yumüxẽwa Tupanamaxã nüxü̃ pixu i guxü̃ma i ngẽma pexü̃ ngupetüxü̃! ¡Rü naxca̱x ípeca rü moxẽ nüxna pexã!
7 Rü ngẽmaãcü nüma ya Tupana rü tá pexna nanaxã i norü taãxẽ i guxü̃ma i taãxẽ i nüxü̃ icuáxü̃arü yexera mexẽchixü̃. Rü ñu̱xma nax Ngechuchu ya Cristuarü duü̃xü̃gü pixĩgüxü̃, rü ngẽma taãxẽ ya Tupana pexna ãxü̃ rü tá ínanapoxü̃ i perü maxü̃negü rü perü ĩnügü nüxna i ngẽma chixexü̃.
Name nixĩ i nagu tarüxĩnüe i guxü̃ma i ngẽma mexü̃ ixĩxü̃
8 Rü ñu̱xma Pa Chauenexẽgüx, rü name nixĩ i nagu perüxĩnüe i guxü̃ma i ngẽma ore i aixcüma ixĩxü̃, rü guxü̃ma i ngẽma nacüma i taxucürüwama texé chixri nachiga idexaxü̃. Rü name nixĩ i nagu perüxĩnüe i guxü̃ma i ngẽma ore i aixcüma mea iwéxü̃, rü guxü̃ma i ngẽma Tupanape̱xewa mexü̃, rü guxü̃ma i nacümagü i duü̃xü̃gü namaxã taãẽxü̃, rü guxü̃ma i ngẽma nacümagü i duü̃xü̃gü mea nachiga idexagüxü̃. Rü ngẽmaãcü name nixĩ i nagu perüxĩnüe i guxü̃ma i ngẽma nacümagü i mexü̃ nax nüxü̃ icua̱xüü̃güxü̃.
9 Rü chanaxwa̱xe i aixcüma nagu pemaxẽ ga yema pexü̃ changúexẽẽxü̃, rü yema pexü̃ namaxã chixucu̱xẽgüxü̃, rü yema chauxü̃tawa nüxü̃ pexĩnüexü̃, rü yema nüxü̃ pedauxü̃ nax chanaxüxü̃. Rü ngẽxguma ngẽmaãcü penaxü̱xgu, rü petanüwa tá nangẽxma ya Tupana ya tamaxã irüngüxmücü rü tüxü̃ taãẽxẽẽcü.
Pirípucüã̱x ga yaxõgüxü̃ rü diẽrumaxã Pauruxü̃ narüngü̃xẽxẽgü
10 Rü ñu̱xma rü Corimaxã poraãcü chataãxẽ erü wenaxarü choxna pecua̱xãchie rü choxü̃ perüngü̃xẽxẽ. Rü choma nüxü̃ chacua̱x rü pema rü guxü̃guma choxü̃ perüngü̃xẽẽchaü̃, natürü tama pexü̃́ nayexma ga tauxcha nax penaxüxü̃ca̱x ga yema.
11 Rü tama ngẽma nax ta̱xacü choxü̃́ taxuxü̃ca̱x nixĩ i pemaxã nüxü̃ chixuxü̃ i ngẽmachiga. Erü choma rü woo ta̱xacü choxü̃ ngupetügu rü marü chomaxã nixü nax namaxã chataãẽxü̃ i ngẽma choxü̃́ ngẽxmaxü̃.
12 Rü nüxü̃ chacua̱x nax ñuxãcü yixĩxü̃ ega choxü̃́ nataxu̱xgu, rü ñuxãcü nax yixĩxü̃ ega choxü̃́ namuxgu. Rü marü chomaxã nixü nax namaxã chataãẽxü̃ i ngẽma choxü̃́ ngẽxmaxü̃. Rü ngẽxguma changaxpütüwegu, rüe̱xna chataiyaxgu rü chataãxẽ. Rü ngẽxguma choxü̃́ namuxgu, rü ẽ̱xna choxü̃́ nataxu̱xgu rü choma rü chataãxẽ.
13 Rü Cristu nixĩ ya choxü̃ poraxẽẽcü, rü ngẽmaca̱x chomaxã nanguxü̃ nax chanaxüxü̃ i guxü̃ma i ngẽma Tupana naxwa̱xexü̃ nax chanaxüxü̃.
14 Natürü ga pema rü wüxi ga mexü̃ choxü̃́ pexügü yerü choxü̃ perüngü̃xẽẽgü ga yexguma guxchaxü̃wa chayexmagu.
15 Rü pemax, Pa Yaxõgüxü̃ i Pirípucüã̱x, rü meama nüxü̃ pecua̱x rü yexguma noxri Machedóniaanewa nüxü̃ chixuxgu ga Tupanaarü ore, rü yexguma yéma ichaxũãchigu, rü pexicatama nixĩ ga perü diẽrumaxã choxü̃ perüngü̃xẽẽgüxü̃, rü nataxuma ga togü ga choxü̃ rüngü̃xẽẽgüxü̃.
16 Rü yexguma Techarónicaarü ĩanewa chayexmagu, rü pema rü taxree̱xpü̱xcüna yéma cha̱u̱xca̱x penamugü ga diẽru nax choxü̃ perüngü̃xẽẽgüxü̃ca̱x.
17 Rü ñu̱xma nax ngẽma ñachaxü̃ rü tama naxca̱x chadau nax wena diẽru choxna pexãxü̃, natürü ngẽma aixcüma chanaxwa̱xexü̃ nixĩ nax Tupana pexü̃́ yamuxẽẽxü̃ i perü diẽru.
18 Rü ñu̱xma rü marü choxü̃́ nangẽxma i guxü̃ma i ta̱xacü i chanaxwa̱xexü̃, rü aixcüma ngẽmaarü yexera choxü̃́ nangẽxma. Rü ñu̱xma nax Epaporudítu núma nangexü̃ i perü ãmare, rü taxuxü̃ma choxü̃́ nataxu. Rü ngẽma perü ãmare i cha̱u̱xca̱x núma pemuxü̃, rü Tupanape̱xewa rü ñoma wüxi i pumara i yixĩxü̃rüxü̃ nixĩ, rü nüma rü poraãcü namaxã nataãxẽ.
19 Rü ngẽmaca̱x ya chorü Tupana rü guxü̃ma i ngẽma mexü̃gü i nüxü̃́ ngẽxmaxü̃wa tá pexna nanaxã i guxü̃ma i pexü̃́ taxuxü̃. Rü ngẽmaãcü tá nanaxü erü Ngechuchu ya Cristuarü duü̃xü̃gü pixĩgü.
20 Rü name nixĩ i guxü̃guma nüxü̃ ticua̱xüü̃gü ya Tanatü ya Tupana. Rü ngẽmaãcü yixĩ.
Pauru rü norü moxẽmaxã nanagu̱xẽxẽ ga norü popera
21 Rü chanaxwa̱xe i chauégagu nüxü̃ perümoxẽgü i guxü̃ma i ngẽma Ngechuchu ya Cristuaxü̃́ yaxõgüxü̃. Rü ngẽma taenexẽgü i chauxü̃tawa ngẽxmagüxü̃ rü pexü̃ narümoxẽgü.
22 Rü ngẽxgumarüxü̃ ta pexü̃ narümoxẽgü i guxü̃ma i ngẽma yaxõgüxü̃ i núma ngẽxmagüxü̃. Rü ngẽma yexera pexü̃ rümoxẽgüxü̃ nixĩ i taenexẽgü i Rómaarü ãẽ̱xgacüpatawa puracüexü̃.
23 Rü chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ i guxãma i pemax. Rü ngẽmaãcü yixĩ.
