Proverbios 10:1-32
10 Wüxi i nane i cua̱x nüxü̃́ ngẽxmaxü̃ rü wüxi i taãxẽ nixĩ tümaca̱x ya norü papa rü norü mama, natürü wüxi i nane i chixexü̃gu maxü̃xü̃ rü ngúxü̃ tüxü̃ ningexẽxẽ.
2 Ngẽma diẽru i ngĩ́ãcü iyaxuxü̃ rü taxuwama tüxü̃́ name, natürü ngẽma mexü̃ ixüxü̃ rü yuwa tüxü̃ ínanguxuchixẽxẽ.
3 Nüma ya Cori ya Tupana rü tama taiya tüxü̃ ningexẽxẽ ya yíxema duü̃xẽ ya mexü̃gu maxü̃́xẽ, natürü ngẽma duü̃xü̃ i chixexü̃gu maxü̃xü̃, rü taiya nüxü̃ ningexẽxẽ.
4 Yíxema tama puracüxe rü tangearü diẽruã̱x, natürü yíxema mea puracüxe rü tüxü̃́ nangẽxma i tümaarü diẽru.
5 Yíxema yabuxgǘxe i ngẽxguma yadauxgu i tümanetüarü o, rü tümaãẽxü̃ tacua̱x. Natürü yíxema peechaxe i ngẽxguma yadauxgu i tümanetüarü o, rü taxü̃ i ãne tá tinge.
6 Yimá yatü ya mea maxü̃cü, rü Tupana tá nüxü̃ narüngü̃xẽxẽ, natürü ngẽma yatü i chixexü̃gu maxü̃xü̃, rü norü chixexü̃ namaxã inacua̱x.
7 Yimá yatü ya mea maxü̃cü, rü mexü̃maxã nüxna tacua̱xãchi, natürü ngẽma yatü i chixexü̃gu maxü̃xü̃, rü duü̃xü̃gü rü paxa nüxü̃ inarüngümae.
8 Yíxema cua̱x tüxü̃́ ngẽxmaxe rü mea tanayaxu i mugü, natürü ngẽma naechita idexaxü̃, rü norü chixexü̃gagu inarütaxu.
9 Yimá yatü ya mea maxü̃cü rü taxuca̱xma namuü̃, natürü ngẽma chixexü̃gu maxü̃xü̃, rü norü chixexü̃gutama nangu.
10 Ngẽma ĩ́xgüxetüwa idoraxü̃ rü taxü̃ i chixexü̃ nawa nangẽxma, rü ngẽma naechita idexaxü̃ rü norü chixexü̃gu narütaxu.
11 Yimá yatü ya mea maxü̃cüarü ore rü maxü̃ tüxna naxã, natürü ngẽma yatü i chixexü̃gu maxü̃xü̃, rü ngẽma norü chixexü̃ namaxã inacua̱x.
12 Ngẽma nax yigüchi ixaiexü̃ rü dai ínanguxẽxẽ, natürü yigü nax ingechaxü̃xü̃, rü yigüxü̃́ nüxü̃ itarüngüma i guxü̃ma i tórü guxchaxü̃gü.
13 Yimá cua̱x nüxü̃́ ngẽxmacü, rü naã̱xwa ínaxũxũ i mexü̃ i dexa, natürü ngẽma chixexü̃gu maxü̃xü̃, rü naxca̱x ínamemare i cua̱i̱xyeca̱xwe̱xruxü̃.
14 Rü ngẽma duü̃xü̃gü i cua̱x nüxü̃́ ngẽxmaxü̃, rü tama naechita nidexamare, natürü ngẽma tama naãẽxü̃ icuáxü̃, rü nidexagüechamare, rü ãũcümaxü̃ ínanguxẽẽgü.
15 Ngẽma duü̃xü̃ i muarü diẽruã́xü̃, rü norü diẽru ínanapoxü̃, natürü yíxema ngearü diẽruã́xẽ, rü taxuxü̃ma tüxü̃ ínapoxü̃.
16 Rü norü natanü i ngẽma duü̃xü̃ i mexü̃ üxü̃ rü maxü̃ nixĩ, natürü norü natanü i ngẽma duü̃xü̃ i chixexü̃ üxü̃, rü guxchaxü̃ nixĩ.
17 Yíxema nayaxúxe i ucu̱xẽ rü maxü̃wa taxũ, natürü ngẽma tama irüxĩnüchaxü̃xü̃ rü yuwa naxũ.
18 Ngẽma idorata̱xáxü̃ rü tama nanango̱xẽxẽ ega ngẽxguma duü̃xẽchi naxaixgu, rü ngẽma tama naãẽxü̃ cuáxü̃ rü naxoregüta̱a̱x.
19 Ngẽma poraãcü idexaechaxü̃ rü poraãcü chixexü̃ naxü, natürü yíxema cua̱x tüxü̃́ ngẽxmaxẽ, rü nüxna tadau ya tümaarü conü.
20 Ngẽma norü dexa ya yimá yatü ya mecümacü, rü ñoma diẽrumü i mexẽchixü̃rüxü̃ nixĩ, natürü ngẽma norü ĩnü i ngẽma yatü i chixexü̃gu maxü̃xü̃, rü taxuwama name.
21 Rü yimá yatü ya mecümacü rü naã̱xwa ínaxũxũ i mexü̃ i ucu̱xẽgü tümaca̱x ya duẽxẽgü, natürü ngẽma tama naãxẽxü̃ cua̱xgüxü̃, rü norü chixexü̃gagu nayue.
22 Cori ya Tupanaarü ngü̃xẽxẽ rü taãxẽ tüxna naxã, rü taxuxü̃ma i ta̱xacürü ngúxü̃ taxca̱x ínanguxẽxẽ.
23 Ngẽma yatü i tama naãxẽxü̃ cuáxü̃, rü norü taãxẽ nixĩ nax chixexü̃ naxüxü̃, natürü yimá yatü ya naãẽxü̃ cuácü, rü namaxã nataãxẽ i ngẽma cua̱x i mexü̃.
24 Ngẽma yatü i chixexü̃gu maxü̃xü̃, rü ngẽma yexera naxca̱x namuü̃xü̃ tá nixĩ i ngẽma naxca̱x ínguxü̃, natürü ngẽma duü̃xü̃ i naãẽxü̃ cuáxü̃, rü tá nüxna nangu i ngẽma nüxü̃́ ngúchaü̃xü̃.
25 Ngẽma yatü i chixexü̃gu maxü̃xü̃ rü tá inarütaxu i ngẽxguma naxca̱x ínanguxgu i guxchaxü̃gü i ñoma buanecü ya taxüchicürüxü̃ ixĩxü̃, natürü yimá yatü ya mea maxü̃cü, rü taguma inayangu i ngẽxguma guxchaxü̃ naxca̱x ínguxgu.
26 Ngẽma yatü i oxü̃, rü norü corica̱x rü ñoma binágre i ngúchiáxü̃ i tapütawa nangu̱xẽẽxü̃rüxü̃ nixĩ, rü ñoma wüxi i üxüema i taxetüwa caixgüxü̃rüxü̃ nixĩ.
27 Yimá yatü ya Tupanaxü̃ ngechaü̃cü, rü tá nama̱x i norü maxü̃, natürü ngẽma yatü i chixexü̃gu maxü̃xü̃ rü tá nanoxre ya norü taunecü.
28 Rü ngẽma duü̃xü̃gü i mea maxẽxü̃, rü tá naxca̱x ínangu i taãxẽ, natürü ngẽma duü̃xü̃gü i chixexü̃gu maxẽxü̃, rü tá naxca̱x ínangu i ngẽma taxuwama mexü̃.
29 Cori ya Tupana rü ínanapoxü̃ i ngẽma duü̃xü̃gü i mexü̃gu maxẽxü̃, natürü ngẽma duü̃xü̃gü i chixexü̃gu maxẽxü̃, rü nayanaxoxẽẽgü.
30 Tagutáma chixexü̃gu nangu ya yimá yatü ya mea maxü̃cü, natürü ngẽma duü̃xü̃ i chixexü̃gu maxü̃xü̃, rü paxatáma inarütaxu i ñoma i naanewa.
31 Yimá yatü ya cua̱x nüxü̃́ ngẽxmacü, rü naã̱xwa ínaxũxũ i ore i cua̱x nüxü̃́ ngẽxmaxü̃, natürü ngẽma chixexü̃gu maxü̃xü̃, rü tá ínawíearü conüã̱x.
32 Yimá yatü ya mea maxü̃cü rü nüxü̃ nixu i ore i taãxẽ tüxna ãxü̃, natürü ngẽma chixexü̃gu maxü̃xü̃, rü chixexü̃ i orexü̃xicatama nixu.
