Proverbios 13:1-25
13 Wüxi i nane i naãẽxü̃ cuáxü̃, rü mea nanatüarü ucu̱xẽ nayaxu. Natürü ngẽma tama ixĩnüchaü̃xü̃, rü nüxü̃ naxo i ngẽma ucu̱xẽ i mexü̃.
2 Yíxema mexü̃maxã idexaxe, rü mexü̃ i õna tangõ̱x. Natürü ngẽma duü̃xü̃ i chixexü̃gu maxü̃xü̃, rü norü poxcuca̱x nadau.
3 Yíxema tümaarü conüna dauxe, rü tügünatama tadau. Natürü ngẽma idexaechaxü̃, rü nügütama inayarütauxẽxẽ.
4 Ngẽma oxü̃, rü nüxü̃́ nangúchaü̃mare i ngẽmaxü̃gü, natürü taguma nüxü̃́ nangẽxma. Natürü ngẽma puracüxü̃, rü nüxü̃́ nangẽxma i norü ngẽmaxü̃gü.
5 Yimá yatü ya mexü̃gu maxü̃cü, rü nüxü̃ naxo i ngẽma dora. Natürü ngẽma yatü i chixexü̃gu maxü̃xü̃, rü taxúema namaxã tataãxẽ, rü poraãcü ãne ninge.
6 Yimá yatü ya mexü̃ i nacümagu maxü̃cü, rü ngẽmatama nacüma ínanapoxü̃. Natürü ngẽma pecadugu maxü̃xü̃ rü ngẽmatama pecadugu nayu.
7 Nangexma i duü̃xü̃gü i ngearü diẽruã̱xgüxü̃, natürü nügü nango̱xẽẽgü ñoma yadiẽruã́xü̃rüxü̃. Rü nangẽxma i togü i diẽruã̱xgüxü̃, natürü tama nügü ngo̱xẽẽgüxü̃ nax yadiẽruã́xü̃.
8 Ngẽma diẽruã́xü̃, rü ngẽma norü diẽru nixĩ i ãũcümaxü̃wa ínapoxü̃xü̃. Natürü ngẽma ngearü diẽruã́xü̃, rü taguma nüxü̃ naxĩnü nax texé naxãũxũnexü̃.
9 Ngẽma mexü̃gu maxẽxü̃, rü ñoma omü i báixemaxü̃rüxü̃ nixĩgü. Natürü ngẽma chixexü̃gu maxẽxü̃, rü ñoma omü i oxü̃rüxü̃ nixĩgü.
10 Ngẽma nügü icua̱xüxü̃xü̃ rü daica̱x nadau. Natürü ngẽma tama nügü icua̱xüü̃güxü̃, rü cua̱x nüxü̃́ nangẽxmagü.
11 Ngẽma diẽru i womüxẽẽãcü tüxü̃́ ngẽxmaxü̃, rü paxaãchiruü̃mare nixĩ. Natürü ngẽma diẽru i naxca̱x ipuracüãcü tüxü̃́ ngẽxmaxü̃, rü tá tüxü̃́ nimuetanü.
12 Ngẽma írüngu̱xẽẽxü̃ i tama paxa ínguxü̃, rü poraãcü naxca̱x taxoegaãxẽ, natürü ngẽxguma yanguxgu i ngẽma írüngu̱xẽẽxü̃, rü taãxẽ tüxna naxã.
13 Yíxema tama naga ĩnüxe i ucu̱xẽ, rü tügünatama ngechaü̃ taxã. Natürü yíxema naga ĩnüxe i ucu̱xẽ, rü tá tanayaxu i tümaarü natanü.
14 Ngẽma norü ngu̱xẽẽtae i ngẽma duü̃xü̃ i cua̱x nüxü̃́ ngẽxmaxü̃, rü maxü̃wa tüxü̃ naga, rü yuwa tüxü̃ ínanguxuchixẽxẽ.
15 Ngẽma duü̃xü̃ i mexü̃ i ucu̱xẽ ixãxü̃, rü duü̃xü̃gü namaxã nataãẽgü. Natürü ngẽma duü̃xü̃gü i chixexü̃ i ucu̱xẽ ixãgüxü̃, rü nügütama yuwa nagagü.
16 Ngẽma duü̃xü̃ i naãẽxü̃ cuáxü̃ rü mea nagu narüxĩnü i ngẽma naxüxü̃. Natürü ngẽma duü̃xü̃ i naechitamare maxü̃xü̃, rü nügü namaxã nicua̱xüxü̃ i ngẽma chixexü̃ i naxüxü̃.
17 Ngẽma orearü ngeruxü̃ i chixexü̃ rü guxchaxü̃ ínanguxẽxẽ. Natürü yimá orearü ngeruxü̃ ya ixaixcümacü, rü tüxü̃ nataãẽxẽxẽ.
18 Yíxema nüxü̃ oxe i ucu̱xẽ i mexü̃, rü tá tangearü diẽruã̱x, rü duü̃xü̃gü rü tá chixri tümachiga nidexagü. Natürü yíxema naga ĩnüxe i ucu̱xẽ i mexü̃, rü duü̃xü̃gü tá tümamaxã nataãẽgü.
19 Ngẽxguma yanguxgu i ngẽma írüngu̱xẽẽxü̃, rü taãxẽ tüxna naxã. Natürü ngẽma duü̃xü̃gü i naechitamare maxẽxü̃, rü tama nüxna nixĩgachichaü̃ i ngẽma chixexü̃.
20 Ngẽxguma duü̃xü̃gü i nüxü̃ cuáxü̃maxã cuxãmücügu, rü tá cunayaxu i cua̱x. Natürü ngẽxguma ngẽma duü̃xü̃gü i naechitamare maxẽxü̃maxã cuxãmücügu, rü tá icuyarütaxu.
21 Pecaduã̱xgüxü̃we ningẽchigü i ngẽma chixexü̃. Natürü ngẽma mexü̃gu maxẽxü̃, rü mexü̃maxã tá nüxü̃́ naxãtanü.
22 Ngẽxguma nayu̱xgu ya yimá yatü ya mecümacü, rü nataagüarü tá nixĩ i norü ngẽmaxü̃gü. Natürü yimá yatü ya pecadugu maxü̃cüarü ngẽmaxü̃gü, rü nawena rü duü̃xü̃gü i mea maxẽxü̃arü tá nixĩ.
23 Yimá yatü ya ngearü diẽruã́cüarü naanewa rü nangẽxma i nabü. Natürü ngextá naane íchu̱xuxü̃wa rü nataxuma i nabü.
24 Texé ya tama tümanexü̃ rüwe̱xãchixẽxẽ, rü tama nüxü̃ tangechaü̃. Natürü yíxema nüxü̃ ngechaü̃xe, rü tanawe̱xãchixẽxẽ.
25 Yimá yatü ya mecümacü, rü guxü̃guma mea nachibü. Natürü ngẽma chixexü̃gu maxü̃xü̃ rü nataiya.
