Proverbios 18:1-24
18 Ngẽma duü̃xü̃ i nügüguxicatama rüxĩnüxü̃, rü naxca̱x nadau i ngẽma nümatama nanaxwa̱xexü̃, rü tama toguearü ucu̱xẽ nayaxu.
2 Ngẽma duü̃xü̃ i tama naãẽxü̃ cuáxü̃, rü tama nüxü̃́ nangúchaü̃ nax nangúxü̃, rü ngẽma íxraxü̃ i nüxü̃ nacuáxü̃maxãtama nügü nicua̱xüxü̃.
3 Ngẽma ãne rü wüxigu chixexü̃maxã ínangu, rü ngẽma yigü nax icua̱xüü̃xü̃ rü namaxã ínangu i ĩnü i taxúema naxca̱x tamaxã taãẽxü̃.
4 Ngẽma norü ore i ngẽma yatü i cua̱x nüxü̃́ ngẽxmaxü̃, rü ñoma natü i mátamaxü̃rüxü̃ nixĩ. Rü ngẽma norü ore rü ñoma natü i nagoxü̃chíüxü̃rüxü̃ nixĩ, rü ñoma puchu i taxü̃ i dexá nawa ngẽxmaxü̃rüxü̃ nixĩ, erü taxü̃ i cua̱x nawa nangẽxma.
5 Ngẽma ãẽ̱xgacügü i guxchaxü̃arü mexẽẽruü̃gü rü wüxi i chixexü̃ naxügü ega yange̱xgüãgu i ngẽma duü̃xü̃ i aixcüma chixexü̃ üxü̃ rü tama tümaga naxĩnüegu ya yíxema mexü̃ ǘxe.
6 Ngẽma tama naãẽxü̃ cuáxü̃, rü norü dexamaxã nu ínanguxẽxẽ, rü ngẽma norü dexagagu rü poraãcü cua̱xi ninge.
7 Rü ngẽma tama naãẽxü̃ cuáxü̃, rü norü dexagütama nixĩ i chixexü̃gu nanguxẽẽxü̃, rü ngẽma naã̱xwa ixũxũxü̃ i dexamaxãtama ñoma nügü nawẽxnaxãxü̃rüxü̃ nixĩ.
8 Ngẽma oregüta̱xáxü̃arü ore rü ñoma wüxi i maixcuraxü̃rüxü̃ nixĩ, rü tauxchaãcü duü̃xü̃güarü maxü̃wa nixücu.
9 Rü ngẽma duü̃xü̃gü i oexü̃ rü ngẽma duü̃xü̃gü i chixexü̃ ügüxü̃ rü nügüenexẽ nügü nixĩgüxẽxẽ.
10 Naéga ya Cori ya Tupana, rü wüxi i poxü̃ruxü̃ i poraxü̃ nixĩ. Rü ngẽmaca̱x ngẽma mexü̃gu maxü̃xü̃ i duü̃xü̃, rü naxca̱x nixũ nax naxü̃tagu nügü yanacúxü̃ca̱x.
11 Ngẽma duü̃xü̃ i diẽruã̱xü̃chixü̃, rü norü diẽruna narüyoe. Rü nüma nagu naxĩnügu, rü ngẽma norü diẽru tá ínanapoxü̃ ñoma wüxi ya ĩane ya meama ípoxegunerüxü̃.
12 Ngẽma yigü nax icua̱xüü̃xü̃ rü guxchaxü̃ taxca̱x ínanguxẽxẽ, natürü ngẽma tama nügü icua̱xüü̃xü̃, rü duü̃xü̃gü rü tá namaxã nataãxẽ.
13 Tama taãẽxü̃ tacua̱x rü wüxi i ãne nixĩ ega yaxtacüma tüxü̃ ichoxü̃gagu ya wüxi ya duü̃xẽ naxü̃pa nax nüxü̃ ixĩnüxü̃ i tümaarü dexa.
14 Yíxema ida̱xawexe, rü tümaarü taãxẽ tüxü̃ ínarüdaxẽxẽ. Natürü ngẽxguma taxoegaãẽgu ¿rü texé tá tüxü̃ ítarüdaxẽxẽ?
15 Ngẽma duü̃xü̃gü i cua̱x nüxü̃́ ngẽxmagüxü̃ rü ngẽma naãẽxü̃ icuáxü̃, rü nüxü̃ inayangaugü i ngẽma cua̱x i naxca̱x nadaugüxü̃.
16 Wüxi i ãmaremaxã rü cuxca̱x niwãxnagü i guxü̃ma i ĩã̱xgü, rü ngẽmaãcü tauxchaãcü naxü̃tawa cungu i ngẽma duü̃xü̃gü i tachigagüxü̃.
17 Ngẽma duü̃xü̃ i nüxíra ãẽ̱xgacüpe̱xewa nügüétüwa idexaxü̃, rü nanaxaixcümaraxü̃ i ngẽma nüxü̃ yaxuxü̃. Natürü ngẽxguma ngéma nanguxgu i ngẽma ínaxuexü̃, rü nayaxãneãchixẽxẽ nax dora yixĩxü̃ i norü ore i ngẽma nüxíra nügüétüwa idexaxü̃.
18 Ngẽma guxchaxü̃gü rü name nixĩ i Tupaname̱xẽgu tanaxǘ, rü ngẽmaãcü tá inarüxo nax duü̃xü̃gü nügü choxü̃gagüxü̃.
19 Wüxi ya ĩane ya mea ípoxegunegu nax cuxücuxü̃arü yexera naguxchaxüchi nax cunangüxmüxẽẽxü̃ i wüxi i cumücü i guxchaxü̃ namaxã cuxü̃́ ngẽxmaxü̃. Erü ngẽma guxchaxü̃gü, rü nügüna nanayáxü̃guxẽxẽ i duü̃xü̃gü ñoma wüxi ya ãẽ̱xgacüpataarü ĩã̱x i fierumena̱xãnaxca̱xrüxü̃.
20 Wüxíechigü, rü ngẽma tümaã̱xwa ixũxũxü̃ i oregagu tá tanayaxu i mexü̃ rüe̱xna poxcu.
21 Yimá tórü conü nüxü̃ ixuxü̃ i oregagu nixĩ nax imaxẽxü̃ rüe̱xna iyuexü̃. Rü yíxema idexaxüchixe rü tümaarü oregagu ngúxü̃ tinge.
22 Ngẽxguma wüxi i ngecü ngĩxü̃ icuyangauxgu cuxma̱xruxü̃, rü ngẽma rü guxü̃arü yexera rümemaexü̃ nixĩ i nüxü̃ icuyanga̱u̱xü̃. Ngẽmawa nüxü̃ cucua̱x nax aixcüma Tupana cuxü̃ rüngü̃xẽẽxü̃.
23 Yíxema ngearü diẽruã́xẽ rü meama ngẽma diẽruã́xü̃na diẽruca̱x taca. Natürü ngẽma diẽruã́xü̃, rü numaxã tüxü̃ nangãxü̃.
24 Nangexma i tamücügü i tama aixcüma tüxü̃ ngechaü̃güxü̃ i chixexü̃wa tüxü̃ gagüxü̃. Natürü nangẽxma i tamücügü i aixcüma tüxü̃ ngechaü̃güxü̃ taenexẽarü yexera.
