Proverbios 2:1-22
2 Pa Chaunex ¡naga naxĩnü i ñaa chorü ore, rü cugüãẽgu namaxã nanguxü̃ i chorü mugü!
2 ¡Ẽcü irüxĩnü i ñaa ore i cua̱x nawa iyaxuxü̃, rü cugü nüxna naxã nax cua̱x cuxü̃́ ngẽxmaxü̃ca̱x!
3 ¡Guxü̃ i curü ngúchaü̃maxã naxca̱x ínaca i cua̱x nax ngẽmaãcü cuãẽxü̃ cucuáxü̃ca̱x!
4 ¡Rü noxtacüma cugü inaxã nax naxca̱x cudauxü̃ i ngẽma cua̱x ñoma wüxi i diẽru rüe̱xna wüxi i ta̱xacü i tatanüxü̃ i icúxü̃ca̱x cudauxü̃rüxü̃!
5 Rü ngẽxguma rü tá nüxü̃ cucua̱x nax Cori ya Tupanaxü̃ cungechaü̃xü̃, rü tá cuãẽwa nangu nax Tupanaxü̃ cucuáxü̃.
6 Erü nüma ya Cori ya Tupana nixĩ i cua̱x tüxna ãcü, rü naã̱xwa nixĩ i íyachoxü̃tanücüüxü̃ i guxü̃ma i cua̱x.
7 Nüma ya Cori ya Tupana nixĩ i tüxü̃ nangü̃xẽẽxü̃, rü tüxna nadauxü̃ ya yíxema aixcüma nape̱xewa mea maxẽxe rü taxuxü̃ma i chixexü̃ ügüxe.
8 Rü tüxna nadau ya yíxema mexü̃ i nacümagu ĩxẽ, rü tüxü̃ ínapoxü̃ ya yíxema aixcüma naga ĩnüexe.
9 Ngẽxguma naga cuxĩnügu rü tá nüxü̃ cucua̱x i ngẽma nacüma i aixcüma we̱xguxü̃, rü tá naxca̱x cudau i ngẽma aixcüma mexü̃.
10 Rü tá aixcüma cuãẽxü̃ cucua̱x rü tá nüxü̃ cucua̱x i ngẽma taãxẽ i cua̱x cuxna ãxü̃.
11 Ngẽma nax aixcüma mea imaxẽxü̃ rü taãẽxü̃ icuáxü̃ rü ngẽma nixĩ i guxü̃gutáma chixexü̃na cuxü̃ ípoxü̃xü̃.
12 2:12-13 Ngẽma mexü̃ i cua̱x rü mexü̃ i ĩnü tá cuxü̃ ínapoxü̃ nüxna i ngẽma chixexü̃ i nacüma rü nüxna i ngẽma duü̃xü̃gü i chixexü̃ ügüxü̃ i nüxü̃ rüxoexü̃ i nacüma i mexü̃, rü nagu ĩxü̃ i nacüma i chixexü̃.
13 Nüü̃ nadau 2:12
14 2:14-15 Ngẽma duü̃xü̃gü rü nataãẽgü i ngẽxguma chixexü̃ naxügügu, rü nanaxüchíügü i ngẽma norü chixexü̃ i naxügüxü̃. Rü nümagü rü chixexü̃ i nacümagu naxĩ, rü nüxna ínachocu i ngẽma nacüma i mexü̃.
15 Nüü̃ nadau 2:14
16 Ngẽma cua̱x tá nixĩ i cuxü̃ ípoxü̃xü̃ nüxna i ngẽma ngexü̃ i ngeãẽxü̃ i norü dexamaxã chixexü̃wa cuxü̃ gaxchaü̃xü̃.
17 Ngẽma ngexü̃ rü norü patexü̃ ínata̱x, rü nüxü̃ inarüngüma i norü uneta ga Tupanape̱xewa naxüxü̃ ga yexguma iyangĩxgu.
18 Texé ya ngẽma nama i ngẽma ngexü̃patawa daxü̃gu tixũxgu rü yuwa nadaxü̃ i namagu tixũ.
19 Yíxema ngẽma ngexü̃patagu chocuxe rü marü chixexü̃gu tügü tayixẽxẽ, rü tagutáma wena nagu taxĩ i ngẽma nama i maxü̃wa tüxü̃ gaxü̃.
20 Pa Chaunex ¡ngẽma nama i mexü̃wa tüxü̃ gaxü̃gu ixũ! ¡Rü nagu ixũ i ngẽma nacümagü i aixcüma Tupanape̱xewa mexü̃!
21 Erü yíxema mea Tupanape̱xewa maxẽxe rü tama chixexü̃ ügüxe, rü tá nama̱x i tümaarü maxü̃ i ñaa naanewa.
22 Natürü ngẽma duü̃xü̃gü i chixexü̃gu maxẽxü̃ i tama Tupanaga ĩnüexü̃ rü tá ínawoxü̃ i ñaa naanewa.
