Proverbios 22:1-29
22 Ngẽma úiru rü diẽru tüxü̃́ ngẽxmaxü̃arü yexera name nax mexü̃ i tachiga tüxü̃́ ngẽxmaxü̃.
2 Ngẽma muarü diẽruã́xü̃ rü ngẽma ngearü diẽruã́xü̃, rü nawüxigu ya Cori ya Tupanape̱xewa, erü ngẽma taxre rü nüma nanango̱xẽxẽ.
3 Ngẽma naãẽxü̃ cuáxü̃, rü ngẽxguma nape̱xewa nangẽxmagu i wüxi i ãũcümaxü̃, rü naxcha̱xwa nixũgachi, natürü ngẽma naechitamare maxü̃xü̃ rü nawa naxũãma i ngẽma ãũcümaxü̃, rü nagagutama nagu nangu.
4 Ngẽxguma cugü ícurüxíxragu rü naga cuxĩnügu ya Tupana, rü nüma rü tá cuxna nanaxã i curü ngẽmaxü̃gü, rü tá cuxü̃ natachigaxẽxẽ, rü tá cuxna nanaxã i maxü̃!
5 Ngẽma nacüma i nagu naxĩxü̃ i ngẽma chixexü̃gu maxẽxü̃, rü ãũcümaxü̃maxã nanapa, natürü ya yíxema tümaarü maxü̃na dauxe, rü nüxna tixũgachi i ngẽma ãũcümaxü̃gü.
6 ¡Nabuxgutama, mexü̃ i ucu̱xẽmaxã naxuxcu̱xẽ i curü buxü̃, rü ngẽxguma naya̱xgu, rü tagutáma nüxü̃ inarüngüma!
7 Yíxema ingearü diẽruã́xẽtanüwa rü ngẽma diẽruã́xü̃ rü ãẽ̱xgacü nixĩ. Rü yíxema diẽruã́xü̃xü̃tawa diẽruca̱x íca̱xaxe, rü ngẽma diẽruã́xü̃me̱xẽwa tangexma.
8 Texé ya chixexü̃ ǘxe rü chixexü̃maxã tá tüxü̃́ naxãtanü. Rü yimá cua̱i̱xruxü̃ ya toguxena namaxã cunacua̱i̱xcane, rü yimamaxã tátama nixĩ ya Tupana i norü numaxã nüxna nacua̱i̱xcaãxü̃.
9 Yimá yatü ya mecümacü, rü Tupana rü mexü̃ tá namaxã naxuegu, erü yíxema ngearü diẽruã̱xgüxemaxã nangau i norü õna.
10 Ngẽxguma noxtacüma ícunamuxũchigu i ngẽma duü̃xü̃ i tama ixĩnüchaü̃xü̃, rü marü nataxutama i nu i duü̃xü̃gütanüwa, rü tá inayarüxo nax nügü nangaexü̃ rü nügümaxã naguxchigagüxü̃.
11 Nüma ya ãẽ̱xgacü rü tümamaxã nataãxẽ ya yíxema ixaixcümáxe, rü tümamaxã naxãmücü ya yíxema mexü̃ i oremaxã idexáxe.
12 Nüma ya Cori ya Tupana rü nüxna nadau i ngẽma duü̃xü̃ i naãẽxü̃ cuáxü̃, natürü ínanaxue i norü dora i nüxü̃ yaxuxü̃ i ngẽma idorata̱xáxü̃.
13 Ngẽma oxü̃, rü naxca̱x nadau nax nügü ínapoxü̃xü̃ nax tama napuracüxü̃ca̱x rü ñanagürü: —Ĩanearü namawa nangẽxma i wüxi i leóü̃ i choxü̃ ngṍxchaü̃xü̃ —ñanagürü.
14 Ngẽma ngexü̃ i natena ngeãẽxü̃arü chúxu, rü ñoma wüxi i ãxmaxü̃gu ingucuchigurüxü̃ nixĩ, rü ngẽmagu nixĩ i nayicuxü̃ i ngẽma yatügü ya Tupana poxcu namaxã ueguxü̃.
15 Ngẽma ngextü̱xügüxü̃arü ĩnü rü ngeãẽmare nixĩ, natürü cua̱ximaxã itayanawe̱xãchixẽxẽ nax nüxü̃ naxoxü̃ca̱x i ngẽma nacüma i chixexü̃.
16 Ngẽma diẽruã́xü̃ rü yíxema ngearü diẽruã́xẽaxü̃́ nangĩ̱x nax yexera nadiẽruã́xü̃ca̱x, rü ngẽmagagu düxwa tá ngearü diẽruã̱xwa nangu. Rü ngẽxgumarüxü̃ ta ya yíxema diẽruã́xü̃na ãmare ãxẽ rü ngearü diẽruã̱xwa tá tangu.
Ngẽma 30 i norü ucu̱xẽgü i ngẽma naãxẽxü̃ icuáxü̃
17 Name nixĩ i cunayaxu i norü ucu̱xẽgü i ngẽma duü̃xü̃gü i nüxü̃ cua̱xgüxü̃, ¡rü mea nagu rüxĩnü i ngẽma cuxü̃ changu̱xẽxẽxü̃!
18 Ngẽxguma cugüãẽgu namaxã cunguxü̃gu i ngẽma ucu̱xẽgü, rü tá cutaãxẽ, rü tá cuxü̃́ natauxcha nax toguemaxã nüxü̃ quixuxü̃.
19 Ñu̱xma rü cuxü̃ nüxü̃ chacua̱xẽxẽ i ngẽma ucu̱xẽgü nax aixcüma Cori ya Tupanana curüyoexü̃ca̱x.
20 22:20-21 Choma rü cuxca̱x chanaxümatü i 30 i ucu̱xẽgü i cua̱x nawa ngẽxmagüxü̃, nax ngẽmaãcü nüxü̃ cucuáxü̃ca̱x i ngẽma ore i aixcüma ixĩxü̃, rü we̱xguxü̃ tümamaxã nüxü̃ quixuxü̃ca̱x ya yíxema cuxna ca̱xaxe.
21 Nüü̃ nadau 22:20
-1-
22 22:22-23 Tama name i tümagu quidauxcüraxü̃ ya yíxema ngearü diẽruã́xẽ nagagu nax tangearü diẽruã́xü̃. Rü tama name i ãẽ̱xgacüpe̱xewa tüxü̃ ícuyaxuaxü̃ ya yíxema tama nüxü̃ cuáxe nax tügü ítapoxü̃xü̃. Erü nüma ya Cori ya Tupana tá nixĩ ya tüxü̃ ípoxü̃cü, rü tá tüxü̃ napoxcu ya yíxema ngearü diẽruã́xẽgu idauxcüraxü̃xẽ.
23 Nüü̃ nadau 22:22
-2-
24 22:24-25 Tama name i namaxã cuxãmücü, rü namaxã cunaxũane i ngẽma duü̃xü̃ i nuwa̱xexü̃ rü chixexü̃maxã idexaxü̃. Erü ngẽxguma namaxã cuxãmücügu, rü tá naxü̃tawa cungu̱x i ngẽma chixexü̃ i nacüma, rü tá cugütama cuchixexẽxẽ.
25 Nüü̃ nadau 22:24
-3-
26 22:26-27 Taguma name i cuxchiama cugü icuxã nax cunaxütanüxü̃ca̱x i togüarü ngetanü, erü ngẽxguma cuxü̃́ tataxu̱xgu ya diẽru nax tüxü̃ cutáeguxẽẽxü̃ca̱x ya yíxema diẽru, rü woo cuxchiãü̃ rü tá cuxna nayapugü.
27 Nüü̃ nadau 22:26
-4-
28 Tama name i togüarü naanewaama cunaxügachi i curü naanearü üyeane ga curü o̱xigü marü ixüxü̃.
-5-
29 Yíxema mea puracüxe, rü ãẽ̱xgacügüaxü̃́ tá tapuracü, rü taxũtáma ngexü̃rüüxü̃ i duü̃xü̃axü̃́ tapuracü.
