Proverbios 23:1-35
23 Ngẽxguma wüxi i cori cuxna uxgu nax naxü̃tawa cuchibüxü̃ca̱x ¡rü mea nagu rüxĩnü nax texéxü̃tawa cungexmaxü̃!
2 Ngẽxguma woo cutaiyaxüchigu ¡rü yáxna namaxã naxĩnü nax cutaiyaxü̃!
3 Rü tama name i cugüxü̃́ cunangúchaü̃xẽxẽ i ngẽma chíxü̃ i norü maixcuraxü̃gü, erü ngürüãchi ngẽmamaxã tá cuxü̃ nawomüxẽxẽ.
-7-
4 ¡Taxṹ i naxca̱x cuñuxãẽxü̃ nax cudiẽruã́xü̃, rü tama name i ngẽmagu curüxĩnüecha!
5 Erü ngẽxguma meama nagu rüxĩnügu, rü tama natai i tórü ngẽmaxü̃gü i tüxü̃́ ngẽxmagüxü̃, erü ñoma yaxãxpe̱xatüxü̃rüxü̃ tá inarütaxu, rü dawürüxü̃ tá nixüü̃.
-8-
6 23:6-7 Tama name i ngẽma duü̃xü̃ i aüxü̃arü mechawa cuyarüto, rü cuxü̃́ nangúchaü̃ i norü õnagü i chíxü̃, erü ngẽma õna, rü ñoma wüxi i nayae i cuxmanaawa ngẽxmaxü̃rüxü̃ tá nixĩ. Rü ngẽma duü̃xü̃ i cuxna uxü̃ nax naxü̃tawa cuchibüxü̃ca̱x rü cuxaxexü̃ca̱x, rü tama aixcüma cuxü̃ nangechaü̃xü̃ca̱x nixĩ i cuxna naxuxü̃.
7 Nüü̃ nadau 23:6
8 Rü yixcaama rü cugü tá namaxã cuxoxgü i ngẽma õna i cungṍxü̃, rü taxuwatáma cuxü̃́ name i ngẽma curü dexa i ngechaü̃ãcüma namaxã nüxü̃ quixuxü̃.
-9-
9 ¡Taxṹ i cunaxucu̱xẽxü̃ i ngẽma duü̃xü̃ i naechitamare maxü̃xü̃, erü nüma rü tá nüxü̃ nacugüama i ngẽma curü ucu̱xẽ i mexü̃!
-10-
10 Tama name i nüxü̃ cuxüpetü i ngẽma üyeane i nüxíramare ngẽxmaxü̃, rü tama name i tümaarü naanegu cuxücu ya taxcutagü.
11 Erü tüma rü tüxü̃́ nangẽxma i wüxi i poraxü̃ i tümaarü poxü̃ruxü̃, rü cumaxã tá nügü nadai nax tüxü̃ ínapoxü̃xü̃ca̱x.
-11-
12 ¡Nayaxu rü nagu namaxü̃ i ngẽma ngu̱xẽẽtae i mexü̃, rü ngẽma ucu̱xẽgü i cua̱xwa cuxü̃ gaxü̃!
-12-
13 23:13-14 ¡Taxṹ i cunangexrüxü̃ nax cunaxucu̱xẽxü̃ ya ngextü̱xücü! Rü ñuxre i cua̱xi i we̱xachixẽẽruxü̃, rü taxũtáma nayama̱x. Rü ngẽxguma icuyanawe̱xãchixẽẽgu, rü yuwa tá ícunanguxuchixẽxẽ.
14 Nüü̃ nadau 23:13
-13-
15 Pa Chaunex, ngẽxguma cua̱xwa cunguxgu, rü choma rü guxü̃ i duü̃xü̃güarü yexera tá taãxẽ chayaxu.
16 Poraãcü tá chataãẽxü̃chi i ngẽxguma cuxü̃ chaxĩnügu nax mexü̃ i oremaxã quidexaxü̃.
-14-
17 Tama name i quixãũxãchi naxca̱x i norü ngẽmaxü̃gü i ngẽma duü̃xü̃gü i chixexü̃gu maxẽxü̃, rü narümemae i aixcüma Cori ya Tupanaga cuxĩnü.
18 Erü ngẽxguma aixcüma Cori ya Tupanaga cuxĩnügu, rü ngẽma curü maxü̃ tá mexü̃wa naxũ rü ngẽma ícunangu̱xẽẽxü̃, rü tagutáma inarüxo.
-15-
19 Pa Chaunex, ¡irüxĩnü i chorü ucu̱xẽgü rü naxca̱x nangu̱x! ¡Rü nagu ixũ i ngẽma nacüma i mexü̃!
20 ¡Taxṹ i namaxã cuxãmücüxü̃ i ngẽma ngãxwa̱xegüxü̃ rü ngẽma taanügüxü̃ i taxü̃ i namachi ngõ̱xgüxü̃!
21 Erü ngẽma ngãxwa̱xegüxü̃, rü ngẽma itaanügüxü̃ rü tá ningearü diẽruã̱x. Rü ngẽma oexü̃ rü tá ngauxchiruãcüma namaxẽ.
-16-
22 ¡Tüxü̃ rüngü̃xẽxẽ ya cunatü ya maxü̃ cuxna ãxẽ, rü taxṹ i tüxü̃ cuxoxü̃ ya cué ega ngẽxguma taya̱xgu!
23 ¡Cugüãẽgu namaxã nanguxü̃ i ngẽma ore i aixcüma ixĩxü̃, rü taxṹ i nüxü̃ icurüngümaxü̃! ¡Rü nayaxu i ngẽma cua̱x, rü ngẽma ucu̱xẽ, erü name nax cuãẽxü̃ cucuáxü̃!
24 Yíxema papa ya tüxü̃́ nangẽxmacü ya tümane ya mecümacü rü cua̱x nüxü̃́ ngẽxmacü, rü poraãcü tataãxẽ rü tümanemaxã tügü ticua̱xüxü̃.
25 Ngẽmaca̱x, Pa Chaunex, rü name nixĩ i mea tüxna cudau, rü tüxü̃ cutaãẽxẽxẽ ya cunatü rü cué.
-17-
26 Pa Chaunex, ¡aixcüma chauga naxĩnü rü nagu ixũ i chaucüma!
27 Erü ngẽma ngexü̃ i naxü̃nearü ngúchaü̃gu maxü̃xü̃, rü ñoma wüxi ya puchu ya mátamacü rü i̱xmacürüxü̃ nixĩ.
28 Ngẽma ngexü̃ rü ñoma wüxi i ngĩ́ta̱xáxü̃rüxü̃ tüxü̃ ínicu̱xeü̃ nax tüxü̃ ínayauxü̃xü̃ca̱x ya yíxema ngéma chopetüxe. Rü ngẽmaãcü inanatauxexẽ i muxü̃ma i yatügü.
-18-
29 ¿Texé tixĩ ya yíxema ngúxü̃ ingexe? ¿Texé tixĩ ya yíxema ngéma ixãĩnecüǘxe? ¿Texé tixĩ ya yíxema nuca̱x dauxe rü ngechaü̃ ínguxeẽ́xẽ? ¿Rü texé tixĩ ya yíxema natüca̱xma napíxe? ¿Rü texé tixĩ ya yíxema dauxetüxe?
30 Yíxema tixĩ ya tama nüxü̃ oxe nax bínu tixaxüxü̃. Rü yíxema tixĩ ya nüxü̃́ ixügüxe i axchíügü i nawa i ngãxü̃xü̃.
31 ¡Taxṹ i nüxü̃ cudawenüxü̃ ya yimá bínu ya dauxchiücü ya copuwa iyi̱xachíücü, erü tá cuxü̃́ nachi̱xéga rü tauxchaãcü cuyaxaxü!
32 Natürü ngẽma nagu yacuáxü̃ ya yimá bínu nixĩ nax ñoma wüxi i ãxtape i tüxü̃ ngṍxü̃rüxü̃ ngúxü̃ tüxü̃ yangexẽẽxü̃.
33 Naguxü̃raü̃xü̃xü̃ tá cuxü̃ nadauxẽxẽ. Rü naguxü̃raxü̃xü̃gu tá cuxü̃ narüxĩnüxẽxẽ. Rü ore i taxuwama mexü̃maxã tá cuxü̃ nidexaxẽxẽ.
34 Ngẽma nax cungãxü̃xü̃ rü tá nagu cuxü̃ narüxĩnüxẽxẽ nax ñoma már arü ngãxü̃tüchíüwa rü wapuru ya buanecümaxã ixũxü̃nearü naxchirupawerutape̱xewa cungexmaxü̃.
35 Rü ngẽxguma cubaixãchigu rü ñacugürü tá: —Choxna nanacua̱i̱xcagü, natürü taxuxü̃ma chacua̱x. Choxü̃ nacua̱i̱xgü, rü tama chauãẽxü̃ chacua̱x. Natürü ngẽxguma pewa ícharüdaxgu rü tá wenaxarü bínune chadau —ñacugürü tá.
