Proverbios 25:1-28
25 Ñaagü nixĩ ga Charomóü̃arü ucu̱xẽgü ga Yudáanearü ãẽ̱xgacü ga Echequía norü duü̃xü̃güxü̃ wena ümatüxẽẽxü̃.
2 Nüxü̃ ticua̱xüü̃gü ya Tupana naxca̱x i ngẽma cua̱x i nüxicatama nüxü̃ nacuáxü̃. Rü nüxü̃ tangechaü̃gü i tachixü̃anearü ãẽ̱xgacügü, erü nümagü rü naxca̱x nadaugü nax nango̱xẽẽgüaxü̃ i ngẽma cua̱x i ẽxü̃guxü̃.
3 Taxucürüwa tanangugü i ngẽma dauxü̃wa ngẽxmaxü̃ i ngo̱xmaanexü̃. Rü taxucürüwa tanangugü i ngẽma ñoma i naanearü aixepewa ngẽxmaxü̃. Rü ngẽxgumarüxü̃ ta taxucürüwa nüxü̃ tacua̱x i ngẽma norü ĩnü i ngẽma nachixü̃anegüarü ãẽ̱xgacügü.
4 Ngẽma duü̃xü̃ i diẽrumüwa ta̱xacü üxü̃, rü noxri ngẽma diẽrumü nayagu nax ínayi̱xixü̃ca̱x i ngẽma norü ãũãchixü̃ nax diẽrumüxica íyaxüxü̃ca̱x. Rü ngẽmawa tá nanaxü i wüxi i copu i mexü̃.
5 Rü ngẽxgumarüxü̃ ta ya ãẽ̱xgacü rü ínanata̱xüchi i ngẽma norü duü̃xü̃ i chixexü̃gu maxü̃xü̃. Rü ngẽmaãcü tá mea inixũ i napatawa ya ãẽ̱xgacü, rü ngẽmaãcü tá inanawe̱x nax mea norü duü̃xü̃gümaxã inacuáxü̃.
6 Tama name i cugü quicua̱xüxü̃ i ãẽ̱xgacüpe̱xewa, rü tama name i duü̃xü̃gü i tachigagüxü̃ írütogüxü̃wa cuyarüto.
7 Erü ngẽxguma ngéma curütoxgu rü ngürüãchi tá wixwe üxü̃ i nachicawa cuxü̃ narütoxẽxẽ. Rü ngẽmaãcü ãne tá quinge nape̱xewa i ngẽma corigü. Rü narümemae nax icuyangu̱xuxẽẽxü̃ nax nüma ya ãẽ̱xgacü cuxna uxü̃ nax naxü̃tawa curütoxü̃ca̱x.
8 Rü ngẽxguma ta̱xacürü guxchaxü̃ ngẽxmagu, rü tama name i yaxtacüma guxchaxü̃arü mexẽẽruxü̃ ya ãẽ̱xgacüxü̃tawa nüxü̃ cuyarüxu. Erü ngürüãchi tá nangẽxma i to i nüxü̃ ixuxü̃ nax nataxuxü̃ma i chixexü̃ i texé üxü̃. Rü ngẽxguma i cuma rü taxucürüwama cugü ícupoxü̃.
9 ¡Rü cugü ínapoxü̃ i ngẽxguma texé cuxü̃ ixuxgu! Natürü tama name i nüxü̃ quixu ega texé cuxica ta̱xacüxü̃ cumaxã ixuxgu,
10 Erü ngẽxguma tá nüxü̃ quixuxgu rü ngürüãchi nangẽxma i bexma cuxü̃ ĩnüxü̃, rü ngẽxguma i cumax rü tá ãne quinge. Erü ngẽma cuchiga rü tá nango̱x rü taxucürüwama ñuxãcü tanamexẽxẽ.
11 Ngẽma ore i meama norü oragu nüxü̃ ixuxü̃, rü ñoma wüxi i manzanachicüna̱xã i úirunaxca̱x i diẽrumümaxã nga̱xãẽxü̃rüxü̃ nangúchaü̃xü̃chi.
12 Texé ya nüxü̃ ĩnüxe i ucu̱xẽ i cua̱x tüxna ãxü̃, rü ngẽma ucu̱xẽ rü ñoma wüxi i ãnera rü wüxi i nachagü i mexẽchixü̃ i úiruwa üxü̃rüxü̃ nixĩ nax tümaca̱x namexü̃ ya yíxema nayaxúxe.
13 Ngẽma orearü ngeruxü̃ i aixcüma norü coriga ĩnüxü̃, rü norü corixü̃ nataãẽxẽxẽ. Erü ngẽma orearü ngeruxü̃ rü ñoma wüxi ya buanecü nanaianeyane gáuxü̃maxã íngucürüxü̃ nixĩ.
14 Yíxema nüxü̃ ixuxe nax togüna ãmare taxãxchaü̃xü̃, natürü tama naxǘxe, rü ñoma waemaxü̃ i buanecü i ngearü pucüã́xü̃rüxü̃ tixĩ.
15 Ngẽxguma yáxna ixĩnügu, rü nu itarüxoxẽxẽ. Rü ngẽxguma mexü̃ i oremaxã nangãxü̃gu, rü nu itarüxoxẽxẽ.
16 Ngẽxguma beruremaxã curüxũxgu, rü tama name i taxüchine quixaxü. Erü ngẽxguma taxüchine quixaxüxgu, rü tá namaxã cugü cuxoxgü.
17 Ngẽxguma cumücüxü̃ta cunaxũanegu, rü tama name i yexü̃cürü naxü̃tawa cuxũecha, erü tá düxwa cuxü̃ narüchau, rü tá cuxchi naxai.
18 Texé ya tümamücüchiga chixri idexaxe, rü ngúxü̃ tüxü̃ tingexẽxẽ ñoma taramaxã rüe̱xna martiyumaxã rüe̱xna wüxi i ta̱xacü i ãmaguxü̃maxã tüxü̃ rüpi̱xẽẽxü̃rüxü̃.
19 Rü ngẽxguma guxchaxü̃ cuxü̃́ ngẽxmagu rü nüxna curüyoegu i wüxi i duü̃xü̃ i cuechitawa̱xexü̃, rü tá cuxü̃́ nangu̱x ñoma cupüta ya ãxmanerüxü̃ rü ñoma cupara ibüyenerüxü̃.
20 Ngẽxguma wüxi i duü̃xü̃ i guxchaxü̃wa ngẽxmaxü̃ca̱x cuwiyaegu, rü ñoma ngúchiáxü̃ norü o̱xrigu ibaxü̃rüxü̃ nixĩ naxca̱x i ngẽma curü wiyae. Rü ñoma nagáuaneyane ícucu̱xuchigurüxü̃ nixĩ i curü wiyae.
21 25:21-22 Ngẽxguma curü uanü taiyagu, ¡rü nachibüxẽxẽ! Rü ngẽxguma yata̱xawagu ¡rü naxaxẽxẽ! Rü nüma rü tá norü ãnemaxã nanadeãchichametü. Rü Cori ya Tupana rü tá cuxü̃́ nanaxütanü naxca̱x i ngẽma cuxüxü̃.
22 Nüü̃ nadau 25:21
23 Yimá buanecü ya nórtewaama ne ũcü rü pucü ínanguxẽxẽ. Rü yimá conü ya chixexü̃maxã idexacü rü nu ínanguxẽxẽ.
24 Ngẽxguma wüxi i ngexü̃ i chixecümaxü̃maxã cuxãxma̱xgu rü tama wüxi i taãxẽ nixĩ woo wüxi ya ĩpata ya taxü̃newa namaxã cungexmagu. Rü narümemae nax cuxrüwama to i nachicawa cungexmaxü̃.
25 Ngẽma ore i mexü̃ i yáxü̃wa ne ũxü̃ rü taãxẽ tüxna naxã. Rü ñoma ita̱xawayane dexá i gauxchíüxü̃ ixaxüxü̃rüxü̃ nixĩ.
26 Ngẽxguma yimá yatü ya taxuxü̃ma i chixexü̃ ücü namuü̃gu rü yadu̱xruxgu nape̱xewa i ngẽma chixexü̃ üxü̃, rü ñoma puchu i dexá i buxchíüxü̃ nawa ixũxũrüxü̃ nixĩ.
27 Tama name nax poraãcü berure ixaxüxü̃. Rü ngẽxgumarüxü̃ ta tama name nax texé tügütama icua̱xüxü̃xü̃.
28 Yimá ĩane ya ngearü poxegune rü ãũcümaxü̃wa nangẽxma. Rü ngẽxgumarüxü̃ tixĩ ya yíxema tama tügüna dauxe i tümacümawa.
