Proverbios 26:1-28
26 Tama name nax taunecügu gáuxü̃ rüyixixü̃, rü tama name nax napuxü̃ i ngẽxguma nanetüarü o ibuxgügu. Rü ngẽxgumarüxü̃ ta, tama name nax texé nüxü̃ icua̱xüü̃xü̃ i ngẽma naechitamare maxü̃xü̃.
2 Ngẽma weri i nu ne nañamarexü̃, rü ngẽma chiru i ngexchiãxü̃ rü taxuwama nangu erü nangechica. Rü ngẽxgumarüxü̃ ta taxũtáma tüxna nangu i ngẽma chixexü̃ i togü tamaxã ueguxü̃ ega taxuxü̃ma i chixexü̃ ixüxgu.
3 Ngẽma cowaru rü ítayapuxẽxẽ nax taga naxĩnüxü̃ca̱x, rü ngẽma búru rü tanaxütü̱xünagu nax we̱xgu yaxũxü̃ca̱x. Rü ngẽxgumarüxü̃ ta i ngẽma tama naãẽxü̃ icuáxü̃ i duü̃xü̃, rü name nax nacua̱xixü̃ nax iyanawe̱xãchixü̃ca̱x.
4 Ngẽma naechitamare maxü̃xü̃, rü tama name i chixexü̃maxã cunangãxü̃ nax tama naxrüxü̃ quixĩxü̃ca̱x.
5 Rü ngẽma tama naãẽxü̃ cuáxü̃, rü name nax wüxi i ore i tauxchaxü̃maxã cunangãxü̃ nax ngẽmaãcü nüma tama nagu naxĩnüxü̃ca̱x nax cua̱x nüxü̃́ ngẽxmaxü̃.
6 Ngẽxguma wüxi i tama naãẽxü̃ cuáxü̃xü̃ quimuxgu nax yangeãxü̃ca̱x i wüxi i curü ore, rü guxchaxü̃ca̱x cudau, rü ñoma cugü cuchexcutüxü̃rüxü̃ tá cuxü̃́ nixĩ.
7 Wüxi i yatü i poyeparaxü̃ rü taxuwama name. Rü ngẽxgumarüxü̃ ta i wüxi i naechitamare maxü̃xü̃arü ucu̱xẽ rü taxuwama name.
8 Taxuwama name ega maxgütaeruü̃wa yana̱i̱xgu ya nuta. Rü ngẽxgumarüxü̃ ta, taxuwama name nax wüxi i duü̃xü̃ i tama naãẽxü̃ cuáxü̃ nax nüxü̃ quicua̱xüxü̃xü̃.
9 Wüxi i duü̃xü̃ i ngãxü̃xü̃, rü tama nüxü̃ nacua̱x nax tuxugu nanguxü̃. Rü ngẽxgumarüxü̃ nixĩ i ngẽma tama naãẽxü̃ cuáxü̃ nax tama nüxü̃ nacuáxü̃ nax ta̱xacüchiga yixĩxü̃ i wüxi i ucu̱xẽ.
10 Naxãũcüma i wüxi i yatü i würamaxã guxãma ya yíxema napatawa chopetüxexü̃ imáxchaü̃xü̃. Rü ngẽxgumarüxü̃ ta naxãũcüma nax cuchiü̃wa cupuracüxẽẽxü̃ i wüxi i tama naãẽxü̃ cuáxü̃.
11 Wüxi i airu rü norü oxü wena nayade̱xexe. Rü ngẽxgumarüxü̃ ta i ngẽma duü̃xü̃ i tama naãẽxü̃ cuáxü̃, rü nacüma i chixexü̃ca̱x nataegu.
12 Wüxi i duü̃xü̃ i tama naãẽxü̃ cuáxü̃arü yexera nachixe i norü ĩnü i ngẽma nügügu rüxĩnüxü̃, nax guxãarü yexera nüxü̃ nacuáxü̃.
13 Ngẽma oxü̃ i duü̃xü̃ rü nügü ínaxüe nax tama napuracüxü̃ca̱x, rü ñanagürü: —Yéa ĩanearü namawa nangẽxma i wüxi i leóü̃ i choxü̃ ícu̱xeü̃xü̃ —ñanagürü.
14 Wüxi i ĩã̱x rü ngẽma norü chotaruxü̃maxã nixĩã̱xcüxü, rü ngẽma oxü̃ rü naxchiãü̃wa nixĩã̱xcüxü.
15 Ngẽma oxü̃ rü poratugu narüxu natürü norü omaxã tama nügüã̱xwa nanange i ngẽma õna.
16 Ngẽma oxü̃ rü nügü yaxuxgu rü nüma rü ngẽma 7 i mexü̃ i ucu̱xẽruü̃güarü yexera nüxü̃ nacua̱x.
17 Ngẽxguma togü nügümaxã nuegu, rü cuma rü icuxãxgu rü naxãũcüma. Rü ñoma wüxi i airu i düraxü̃ nachinügu iyaxuxü̃rüxü̃ nixĩ.
18 26:18-19 Duü̃xü̃ i ãũãẽxü̃ i chuxchi ya nawa iyuxü̃ne nuxica maxü̃nerüxü̃ nixĩ i ngẽma yatü i namücüxü̃ womüxẽẽxü̃ rü ñaxü̃: —Chaxĩnüca̱xwa̱xemare —ñaxü̃.
19 Nüü̃ nadau 26:18
20 Ngẽxguma nataxu̱xgu i naichacüxü rü yima üxü rü nixo. Rü ngẽxgumarüxü̃ ta ega taxúema oregüxü̃ ixuxgu rü nataxuma i nu.
21 Ã́xwemaxã namexetü ya üxü, rü naixchacüxümaxã niiyaura ya üxü. Rü ngẽma nuwa̱xexü̃ ínananguxẽxẽ i nu.
22 Ngẽma oregüta̱xáxü̃arü ore rü ñoma wüxi i maixcuraxü̃rüxü̃ nachi̱xichi, natürü poraãcü duü̃xü̃güãẽwa nixücu.
23 Ngẽma norü dexa i ngẽma duü̃xü̃ i chixexü̃gu rüxĩnüxü̃, rü namexẽchicüraxü̃, rü ñoma wüxi ya buetare ya waixü̃münaxca̱x ya diẽrumümaxã ichaxüchicürüxü̃ nixĩ.
24 Ngẽma aigu rüxĩnüxü̃, rü inayacu̱x nax naxaixwa̱xexü̃. Rü norü dexa rü nameneta, natürü naãẽwa rü chixexü̃gu narüxĩnü.
25 Tama name i nüxü̃́ cuyaxõ i ngẽxguma ngechaü̃gaxãcü cumaxã yadexa̱xgu, erü norü ĩnüwa rü chixexü̃gu cumaxã narüxĩnü.
26 Rü woo iyacúãgu i ngẽma nax aigu naxĩnüxü̃, natürü ngẽma norü chixexü̃ rü tá nango̱xoma i guxãpe̱xewa.
27 Texé ya wüxi i ãxmaxü̃ ǘxe rü tüma tátama nagu tingucuchi. Rü texé ya nuta ya tacüxü̃ cuxnetaxe nax yadixixü̃ca̱x, rü yimá nuta rü tá tümaétüwa nadixi.
28 Ngẽma idorata̱xáxü̃ rü naxchi naxai i ngẽma duü̃xü̃gü i womüxẽẽxü̃. Rü ngẽma nüxü̃ cuáxü̃ nax ore i mexcüraxü̃xü̃maxã nawomüxẽẽtaexü̃ rü guxchaxü̃ ínanguxẽxẽ.
