Proverbios 27:1-27
27 ¡Taxṹ i cugü quicua̱xüxü̃ naxca̱x i ngẽma moxü̃ cuxüxchaü̃xü̃, erü tama nüxü̃ cucua̱x i ta̱xacü tá cuxü̃ ngupetüxü̃ i moxü̃arü ngunexü̃gu!
2 Tama name i cugütama quicua̱xüxü̃, rü narümemae i togü cuxü̃ nicua̱xüü̃gü.
3 Yimá nutagü rü yimá naxnücü rü niya, natürü ngẽma norü nu i ngẽma chixexü̃gu maxü̃xü̃, rü narüyamae.
4 Ngẽma yigüchi nax ixaixü̃, rü ngúxü̃ tüxü̃ ningexẽxẽ, rü ngẽma nu rü tüxü̃ nachixexẽxẽ. Natürü ngẽma nax ta̱xacü inuxuxü̃ rü taxúema namaxã tapora.
5 Ega aixcüma nüxü̃ cungechaü̃gu i wüxi i duü̃xü̃, rü name nixĩ nax aixcüma cunaxucu̱xẽxü̃, rü tama nüxna cungeáxü̃.
6 Tama name i nüxna curüyoe i curü uanü i cuxü̃ chúxuxü̃. Rü narümemae nixĩ i nüxna curüyoe i ngẽma cumücü i aixcüma cuxü̃ ucu̱xẽxü̃.
7 Ngẽxguma tama itaiya̱xgu, rü woo ya berure rü tama tüxü̃́ nachi̱xéga. Rü yíxema taiyaxe, rü woo ngẽma üxüxü̃ rü tümaca̱x namaixcura.
8 Ñoma wüxi i weri i yáxü̃wa naxchiãü̃na ũxü̃rüxü̃ nixĩ i wüxi i yatü i norü naane i nagu nabuxü̃na yáxü̃wa nu ne naxũmarexü̃.
9 Ngẽma pumara i yixichixü̃ rü tüxü̃ nataãẽxẽxẽ. Rü ngẽxgumarüxü̃ nixĩ i ngẽma ucu̱xẽ i tamücü tüxna ãxü̃ rü taãxẽ tüxna naxã.
10 ¡Taxṹ i nüxna quixũgachixü̃ i cumücügü rüe̱xna cunatümücügü, rü tama name i curü guxchaxü̃gümaxã cuenexẽxü̃tawa cuxũ! Ngẽma cuenexẽ i cuxna yáxü̃guxü̃arü yexera cuxü̃́ name i ngẽma cumücü i curü ngaicamawa ngẽxmaxü̃.
11 Pa Chaunex, name nax cuxü̃́ nangẽxmaxü̃ i cua̱x, rü ngẽmaãcü tá choxü̃ cutaãẽxẽxẽ, rü tá choxü̃́ natauxcha nax mea chanangãxü̃xü̃ i ngẽma chixri chauchiga idexagüxü̃.
12 Ngẽma naãẽxü̃ cuáxü̃ rü ngẽxguma nape̱xewa nangẽxmagu i wüxi i ãũcümaxü̃ rü na̱xcha̱xwa nixũgachi nax tama nagu nanguxü̃ca̱x. Natürü ngẽma tama naãẽxü̃ cuáxü̃ rü nawa naxũãma i ngẽma ãũcümaxü̃, rü nagu nangu.
13 Cuma nax diẽru ngĩxü̃ cuxãxü̃ nüxna i wüxi i duü̃xü̃ i tama nüxü̃ cucuáxü̃, rü name i nüxna cunayaxu i wüxi i naxchiru i ngẽma nüxü̃ rüngü̃xẽẽxü̃. Rü cuxme̱xwa tá nangẽxma i ngẽma naxchiru ñu̱xmata ngĩxü̃ natáeguxẽxẽ i ngẽma diẽru.
14 Ngẽxguma ngunetüxü̃ tagaãcü nüxü̃ curümoxẽgu i wüxi i cumücü, rü nüma rü tá nüxü̃́ nawa̱xtümüxü̃, erü ñoma ta̱xacü namaxã quixugüxü̃rüxü̃ nixĩ.
15 27:15-16 Ngẽma ngexü̃ i natexü̃ chixeãẽechaxü̃, rü ñoma wexweanexü̃ruxü̃ nixĩ. Rü taxucürüwama ítayachaxãchixẽxẽ i ngẽma nacüma i chixexü̃, erü ñoma buanecü ya taxucürüwa íyachaxãchixẽẽcürüxü̃ nixĩ, rü ñoma chíxü̃ i ãchiü̃xü̃ i taxucürüwama taxme̱xwa ingexmaxẽẽxü̃rüxü̃ nixĩ.
16 Nüü̃ nadau 27:15
17 Ngẽma fieru rü to i fieruxü̃ nate̱xẽxẽ. Rü ngẽxgumarüxü̃ ta i taxre i duü̃xü̃gü rü nügü naxucu̱xẽgü nax mexü̃gu naxĩnüexü̃ca̱x.
18 Yíxema nüxna dauxe i tümaarü igunecü rü tá tanangõ̱x i norü o. Rü yíxema mea nüxna dauxe i tümaarü coriarü ngẽmaxü̃gü, rü tümaarü cori rü tá tümamaxã nataãxẽ.
19 Dexáchiügu idawenügu nixĩ i nüxü̃ idauxü̃ i tachametü nax nañuxraxü̃xü̃. Rü ngẽxgumarüxü̃ ta nacümawa nixĩ i nangóxü̃ i wüxichigü i duü̃xü̃arü ĩnü.
20 Ngẽma yu rü ngẽma naxma̱xü̃, rü taguma nüxü̃́ tingu ega woo ñuxre ya duü̃xẽ yuegu. Rü ngẽxgumarüxü̃ ta nixĩ ya yima yatüxetü nax taguma nüxü̃́ yanguxü̃ nax nüxü̃́ nangúchaü̃xü̃ ega ta̱xacüxü̃ nada̱u̱xgu.
21 Üxüwa tayagu i ngẽma úiru rü diẽrumü nax nüxü̃ icuáxü̃ca̱x rü aixcüma úiruxüchi rüe̱xna diẽrumüxüchi nax yixĩxü̃, Rü ngẽxgumarüxü̃ ta ya wüxi ya yatü ngẽxguma duü̃xü̃gü namaxã taãẽgügu. Rü ngẽmawa nüxü̃ tacua̱x nax wüxi ya yatü ya mecü yixĩxü̃.
22 Ngẽma duü̃xü̃ i tama naãẽxü̃ cuáxü̃, rü woo cunaxucu̱xẽgu rüe̱xna taxü̃ i guxchaxü̃ naxca̱x ínguxgu rü tagutáma naxüchicüxü i nacüma.
23 27:23-24 ¡Mea namaxã inacua̱x i curü carnérugü rü mea nüxna nadau. Erü ngẽma nax cudiẽruã́xü̃ rü ngẽma nax ãẽ̱xgacü quixĩxü̃, rü tama guxü̃guca̱x nixĩ!
24 Nüü̃ nadau 27:23
25 27:25-26 Ngẽxguma naxügügu rü yabaxcagu i ngẽma maxẽ, rü tá cuyachexe ya yimá maxẽ ya ma̱xpǘnewa ngẽxmagücü, rü tá nixãwemü i curü carnérugü. Rü ngẽxguma rü tá nixãxta̱xa rü ngẽma naxta̱xawa tá cuxchiru cuxü. Rü ngẽxguma curü cabraxacümaxã cutaxegu rü tá curü diẽruxü̃ cudau, rü ngẽma diẽrumaxã tá to i curü naaneca̱x cutaxe.
26 Nüü̃ nadau 27:25
27 Rü ngẽma curü cabragüwa tá cuxü̃́ nangẽxma ya nagünenixü̃ ya taxü̃ne. Rü yima tá quixaxü i cumax rü cuxacügü rü guxü̃ma i curü duü̃xü̃gü i cuxü̃́ puracüexü̃.
