Proverbios 4:1-27
4 Pa Chaunegüx ¡iperüxĩnüe i penatüarü ucu̱xẽgü rü naga pexĩnüe nax mea peãẽxü̃ pecuáxü̃ca̱x!
2 Choma rü pexna chanaxã i mexü̃ i ngu̱xẽẽtaegü rü ngẽmaca̱x tama name i nüxü̃ perüngümae i chorü ucu̱xẽgü.
3 Choma rü ta yexguma chabuxgu rü chaunatüme̱xẽwa chayexma, rü chaué rü poraãcü choxü̃ tangechaü̃.
4 Chaunatü rü choxü̃ naxuxcu̱xẽ rü ñanagürü choxü̃: —¡Cugüãẽgu namaxã nanguxü̃ i ñaa chorü ucu̱xẽgü i cumaxã nüxü̃ chixuxü̃, rü naga naxĩnü i ngẽma chorü ucu̱xẽgü rü ngẽmaãcü tá nama̱x i curü maxü̃!
5 ¡Nayaxu i ngẽma cua̱x nax mea cuãẽxü̃ cucuáxü̃ca̱x, rü taxṹ i nüxü̃ curüngümaxü̃ i ñaa chorü ore!
6 ¡Nayaxu i ngẽma cua̱x rü taxṹ i nüxna quixũgachixü̃, erü ngẽma cua̱x rü tá cuxü̃ ínapoxü̃!
7 ¡Guxü̃arü yexera nayaxu i cua̱x nax ngẽmaãcü mea cuãẽxü̃ cucuáxü̃ca̱x!
8 4:8-9 ¡Naga naxĩnü i ngẽma cua̱x rü duü̃xü̃gü tá cuxü̃ nicua̱xüü̃gü, rü cugüãẽgu namaxã nanguxü̃ rü duü̃xü̃gü tá cumaxã nataãxẽ! Ngẽmaãcü i ngẽma cua̱x rü curü meruxü̃ tá nixĩ ñoma wüxi i curü nga̱xcuerurüxü̃ —ñanagürü ga chaunatü.
9 Nüü̃ nadau 4:8
10 Pa Chaunex, ¡nayaxu i chorü ucu̱xẽ i cumaxã nüxü̃ chixuxü̃, rü cugüãẽgu namaxã nanguxü̃, rü ngẽmaãcü tá nama̱x i curü maxü̃ i ñoma i naanewa!
11 4:11-12 Choma rü ngẽma nacüma i cua̱x nawa ngẽxmaxü̃wa tá cuxü̃ chaga, rü nagu tá cuxü̃ chixũxẽxẽ i ngẽma nacüma i mexü̃ i ngextá taxuxü̃ma cuxü̃ íchixexẽẽxü̃wa, rü taxuguma ícurüpucutüxü̃wa ega woo poraãcü icuñaãchigu.
12 Nüü̃ nadau 4:11
13 ¡Nayaxu rü naga naxĩnü i ngẽma mexü̃ i ucu̱xẽ, rü taxṹ i nüxü̃ cuxoxü̃! ¡Nagu ixũ i ngẽma ucu̱xẽ, erü ngẽmawa nangẽxma i curü maxü̃!
14 ¡Taxṹ i namaxã cuxãmücüxü̃ i ngẽma duü̃xü̃gü i chixexü̃gu maxẽxü̃, rü taxṹ i nagu quixũxü̃ i ngẽma nacüma i chixexü̃!
15 ¡Nüxü̃ rüxo nax nagu quixũxü̃ i nacüma i ngẽma duü̃xü̃gü i chixexü̃ ügüxü̃, rü nüxna ixũgachi! ¡Paxa nüxna iña rü mexü̃waama naxũ!
16 Erü ngẽma duü̃xü̃gü rü tama nataãẽgü ega tama chixexü̃ naxügügu, rü tama napee ega taxúexü̃ma chixexü̃gu nangu̱xẽẽgügu.
17 Norü õna rü norü axexü̃ nixĩ i ngẽma chixexü̃ i naxügüxü̃ rü nax namáetagüxü̃.
18 Ngẽma mexü̃ i duü̃xü̃gücüma rü ñoma ngexwaca yangunegurüxü̃ nixĩ nax nangóxü̃, rü ngẽmaãcü yexera ningóchigü ñu̱xmata yangóonexü̃chi.
19 Natürü ngẽma nacüma i nagu naxĩxü̃ i ngẽma duü̃xü̃gü i chixexü̃gu maxẽxü̃, rü wüxi i ẽanexü̃ nixĩ, rü ngẽmaca̱x tama nüxü̃ nacua̱xgü nax ta̱xacügu yanapucutügüxü̃.
20 Pa Chaunex, ¡naga naxĩnü i ñaa chorü ucu̱xẽgü i cumaxã nüxü̃ chixuxü̃ rü nagu namaxü̃!
21 ¡Rü taxṹ i nüxü̃ cuyarüngümaxü̃, rü mea cugüãẽgu namaxã nanguxü̃!
22 Erü ngẽma chorü ucu̱xẽgü rü aixcüma maxü̃ tüxna naxã ya guxãma ya yíxema naga ĩnüexe, rü ngẽma chorü ucu̱xẽgü rü tümaxü̃neca̱x rü ñoma wüxi i üxüxü̃rüxü̃ nixĩ.
23 ¡Ñoma i naanewa rü guxü̃arü yexera nüxna nadau i curü ĩnü, erü ngẽma curü ĩnü nixĩ i maxü̃wa cuxü̃ gaxü̃!
24 ¡Rü nüxü̃ rüxo nax doraxü̃ quixuxü̃, rü nüxna ixũgachi i ngẽma ore i tama aixcüma ixĩxü̃!
25 ¡Mea cugüpe̱xeguama nadawenü, rü guxü̃guma mea nüxü̃ nadawenü i ngẽma cupe̱xewa ngẽxmaxü̃!
26 ¡Naxuãxẽ nax ngextá tá cungãxü̃, rü ngẽxguma guxü̃gutáma taianexü̃wa cunga!
27 ¡Taxṹ i nüxna quixũgachixü̃ i ngẽma mexü̃ i cucüma, rü nüxü̃ rüxo nax nagu quixũxü̃ i ngẽma nacüma i chixexü̃wa cuxü̃ gaxü̃!
