Proverbios 5:1-23
5 Pa Chaunex, ¡choxü̃́ irüxĩnü i ñaa ucu̱xẽ i cumaxã nüxü̃ chixuxü̃, rü nagu rüxĩnü i ñaa chorü ore i chorü cua̱xwa ne ũxü̃!
2 Ngẽmaãcü tá cuãẽxü̃ cucua̱x rü nüxü̃ cucuáãcüma tá quidexa.
3 Ngẽma ngexü̃ i ngĩxü̃nearü ngúchaü̃gu maxü̃xü̃ rü mexẽchixü̃ i dexamaxã nidexa erü nüxü̃ nacua̱xüchi nax tüxü̃ íyapuxẽẽxü̃.
4 Natürü ngẽxguma naga cuxĩnügu rü ñoma wüxi ya tuxchana quixaxüxü̃arü yexera tá nixĩ i naxüxüxü̃. Ñoma wüxi i taraarü yexera tá cuxü̃́ nangu̱x.
5 Rü ngẽma ngexü̃ i ngĩxü̃nearü ngúchaü̃gu maxü̃xü̃ga cuxĩnüxü̃ rü yuwa cuxü̃ naga, rü ngéma cumaxã nax íyaxũxü̃ rü curü ma̱xwa cuxü̃ naga.
6 Ngẽma ngexü̃ rü nüxü̃́ nanataxuraxü̃ nax mexü̃gu namaxü̃xü̃, rü tama nagu narüxĩnü i ngẽma norü ngúchaü̃ i naxüxü̃ nax yuwa nagaãxü̃.
7 Ngẽmaca̱x, Pa Chaunex, ¡chauga naxĩnü, rü taxṹ i nüxna quixũgachixü̃ i ngẽma cuxü̃ changu̱xẽxẽxü̃!
8 5:8-10 ¡Nüxna ixũgachi i ngẽma ngexü̃, rü bai i íxrarüwa napataarü ĩã̱xna cungaicamaxü̃ nax tama ngẽmaãcü chixexü̃gu cunguxü̃ca̱x, rü tama naxme̱xgu cunguxü̃ca̱x i duü̃xü̃ i tama nüxü̃ cucuáxü̃ i chixexü̃gu rüxĩnüxü̃! ¡Rü cugüna nadau nax tama wüxi i duü̃xü̃ i tama nüxü̃ cucuáxü̃ ngĩxü̃ yaxuxü̃ca̱x i ngẽma diẽru i curü poramaxã rü curü puracügagu cuxü̃́ ngẽxmacü!
9 Nüü̃ nadau 5:8
10 Nüü̃ nadau 5:8
11 5:11-12 Ngẽxguma cuya̱xgu rü cuxune marü naturagu, rü cuma rü tá cugümaxã cuxaxu rü ñacurügü tá: —¿Tü̱xcüü̃ nüxü̃ chaxo ga yexguma choxü̃ naxucu̱xẽgügu? ¿Ta̱xacüca̱x ga tama chanayaxuxü̃ ga yexguma chomaxã nüxü̃ yaxugüegu nax chixexü̃ chaxüxü̃?
12 Nüü̃ nadau 5:11
13 Rü tama nüxü̃́ charüxĩnüchaü̃xü̃ ga chorü ngu̱xẽẽruü̃gü, rü tama naga chaxĩnü ga chorü ucu̱xẽruü̃gü.
14 Rü ñu̱xma nax marü chayaxü̃ rü taxuwama chame, rü guxü̃ma i duü̃xü̃güpe̱xewa chachixexü̃ —ñacurügü tá.
15 ¡Ẽcü ngĩxü̃ nangechaxü̃ i cuxma̱x, rü ngĩmaxãxicatama ngúchaü̃ naxü ñoma cuxrütama puchuwaxicatama cuxaxexü̃rüxü̃!
16 Tama name i wüxi i nge i tama cuxma̱x ixĩcümaxã cumaxü̃ ñoma wüxi i duü̃xü̃ i tama noxrütama puchucüã̱x i dexáwa axexü̃rüxü̃.
17 Ngẽma cuxma̱x rü cuxrüxicatama iyixĩ, rü tama togü i duü̃xü̃güca̱x iyixĩ.
18 Wüxi i mexẽchicü iyixĩ i cuxma̱x, rü name nixĩ i ngĩmaxã cutaãxẽ i ngẽma curü ngextü̱xüma̱x.
19 Rü ñoma wüxi i cowü i ngexü̃ i taãẽxü̃rüxü̃ iyixĩ, rü ngẽmaca̱x tagutáma inatauxẽxẽ nax cuxü̃ nameãẽxü̃, rü guxü̃gutáma cuxü̃ ingechaü̃.
20 Pa Chaunex ¿Tü̱xcüü̃ namaxã cumaxü̃ i wüxi i ngexü̃ i ãtéxü̃, rü tü̱xcüü̃ nüxna cunapa̱x i wüxi i ngexü̃ i tama cuxma̱x ixĩxü̃?
21 Nüma ya Cori ya Tupana rü nüxü̃ nacua̱x i nacüma i wüxichigü i duü̃xü̃, rü meama nüxü̃ nadau i guxü̃ma i ngẽma naxüxü̃.
22 Ngẽma duü̃xü̃ i chixexü̃ üxü̃, rü ngẽma norü chixexü̃ tátama nixĩ i guxchaxü̃gu nanguxẽẽxü̃, rü ngẽma norü chixexü̃tama nixĩ i nagu nachoxü̃ ñoma wüxi i naixnütagu nachoxü̃rüxü̃.
23 Ngẽma duü̃xü̃ i tama ucu̱xẽ yaxuxü̃ rü ngẽmagagu tá yuwa naxũ, rü ngẽma norü ngeãẽgagu rü tá inayarütaxu.
