Proverbios 6:1-35
6 Pa Chaunex, ngẽxguma cuxchiama cugü icuxãxgu nax nüxü̃ curüngü̃xẽẽxü̃ca̱x i cumücü nax to i duü̃xü̃na diẽruca̱x naca̱xaxü̃, rü guxchaxü̃wa cugü cungexmaxẽxẽ, erü ngẽxguma ngẽma cumücü tama naxütanüãgu i ngẽma diẽru i naxca̱x ínaca̱xaxü̃, rü tá cuxchiama ngĩxü̃ cuxütanü nüxü̃́ i ngẽma diẽru i ngĩxü̃ ixãxü̃.
2 Rü ngẽxguma ngẽma cuxü̱xgu rü cugütama quitoxyepe̱xe, rü curü oregagutama nagu cungu i ngẽma guxchaxü̃.
3 Pa Chaunex, nawa nax ícunguxuchixü̃ca̱x i ngẽma ngetanü, rü cumaxã nüxü̃ chixu, name nixĩ i paxa naxü̃tawa cuxũ i cumücü, ¡rü mea nüxü̃ naca̱a̱xü̃ nax cuxü̃ ínapiégaxü̃ca̱x nawa i ngẽma popera nax tama cugu nanguxü̃ca̱x i ngẽma norü ngetanü!
4 ¡Rü taxṹ icupexü̃, rü taxṹ i cunuxcüãẽxü̃ nax namaxã quidexaxü̃!
5 ¡Rü paxa nüxna ixũgachi i ngẽma cumücüarü ngetanü ñoma wüxi i cowü i cueneecücha̱xwa iñaxü̃rüxü̃, rü wüxi i weri i yütawa iñaxü̃rüxü̃!
Ucu̱xẽ naxca̱x i duü̃xü̃gü i oexü̃
6 Dücax, Pa Yatü i Oxü̃ ¡rü íyadau i ngẽma tachiwagü rü nangugü nax ñuxãcü napuracüexü̃, rü naxca̱x nangu̱x i ngẽma nacüma!
7 6:7-8 Ngẽma tachiwagü rü woo taxúema tanamu, rü taxúema namaxã nüxü̃ tixu nax ta̱xacü tá naxügüxü̃, natürü nüechama nüxü̃ nacua̱x nax norü õna nanutaque̱xegüxü̃ i taunecügu, rü ngẽxguma nüxü̃́ namuxgu rü namaxã nanguxü̃gü.
8 Nüü̃ nadau 6:7
9 Pa Yatü i Oxoxchixü̃x, marütama nax cupeechaxü̃ rü marütama nax icucaechaxü̃.
10 6:10-11 Ngẽma nax cupeechaxü̃ rü cugü cupa̱xcumüxü̃ nax mea cupexü̃ca̱x, rü ngẽmagagu tá cuxca̱x ínangu nax cungearü diẽruã́xü̃. Ñoma wüxi i yatü i ãxnexü̃ i cuxca̱x íyagoõchixü̃rüxü̃ tá cuxca̱x ínangu nax cungearü diẽruã́xü̃.
11 Nüü̃ nadau 6:10
Nacümagü i duü̃xü̃ i chixexü̃gu maxü̃xü̃
12 Ngẽma duü̃xü̃ i chixexü̃gu maxü̃xü̃ rü toguxexü̃ chixeẽ́ẽxü̃ rü ngextá ínaxũxü̃wa rü doraxü̃ nixuchigü.
13 Rü norü ĩ́xgüxetümaxã rü nacutüarü ĩã̱xcüxümaxã, rü naxme̱xarü unetamaxã tüxü̃ nawomüxẽxẽ ya toguxe.
14 Norü ĩnü rü poraãcü nachixe, guxü̃guma nagu narüxĩnü nax chixexü̃ naxüxü̃, rü naxca̱x nadau nax nügümaxã nanuexẽẽãxü̃ i duü̃xü̃gü nax nügü nada̱i̱xü̃ca̱x.
15 Ngẽmaca̱x i ngẽma duü̃xü̃ rü paxa tá naxca̱x ínangu i norü poxcu, rü ngürüãchi tá ngẽxma narüxo i guxü̃ma i ngẽma nüxü̃́ ngẽxmaxü̃, rü taxúetama naétüwa tachogü.
Ngẽma nacümagü ya Cori ya Tupana naxchi aixü̃
16 Nangexma i 6 rüe̱xna 7 i ngẽma Cori ya Tupana naxchi aixü̃.
17 6:17-19 Rü ñaagü nixĩ:yima naxetü ya nügü icua̱xü̃ne,rü yimá conü ya idoreta̱xácü, rüyima naxme̱x ya tüxü̃ imáxe ya duü̃xẽ ya taxuxü̃ma i chixexü̃ ǘxe, rüngẽma naãxẽ i chixexü̃gu rüxĩnüxü̃, rüyima nacutügü ya paxa ixüãchine nax chixexü̃ naxügüxü̃ca̱x, rüngẽma poxü̃ruxü̃neta i dorata̱xáxü̃, rüngẽma daica̱x dauxü̃ i naenexẽgümaxã.
18 Nüü̃ nadau 6:17
19 Nüü̃ nadau 6:17
Guxchaxü̃gü tá cuxca̱x ínangu ega nai i ngemaxã icupexgu
20 Pa Chaunex, ¡guxü̃guma cugüãẽgu namaxã nanguxü̃ i ngẽma cunatüarü ucu̱xẽgü rü ngẽma cué cuxü̃ ngu̱xẽẽxü̃!
21 ¡Cugüãxẽgu namaxã nanguxü̃ i ngẽma ucu̱xẽgü rü namaxã naxãchagü!
22 Rü ngẽxguma ngextá cuxũxgu rü ngẽma ucu̱xẽgü tá cumaxã inacua̱xgü, rü ngẽxguma cupexgu rü tá cuxna nadaugü, rü ngẽxguma pewa cubaixãchigu tá cuxü̃ naxucu̱xẽgü.
23 Ngẽma mugü rü ngu̱xẽẽtaegü rü ñoma wüxi i omü i naixü̃rüxü̃ tá cuxca̱x nanangóonexẽxẽ. Rü ngẽma ucu̱xẽgü rü tá cuxü̃ inayarüwe̱xãchixẽxẽ nax nawe̱xguxü̃ca̱x i curü maxü̃.
24 Rü ngẽma ucu̱xẽgü tá cuxü̃ ínapoxü̃ nüxna i ngẽma ngexü̃ i ngeãẽxü̃, rü tá cuxna nadau nüxna i norü dexa i mexcüraxü̃xü̃ i ngẽma ngexü̃ i natena chixri maxü̃xü̃.
25 ¡Taxṹ i norü mechametüca̱x, rü norü mexeneca̱x cugüxü̃́ cunangúchaü̃xẽxẽxü̃, rü taxṹ i cuxü̃ yayauxãxẽxü̃ ega cuxü̃ nadawenügu!
26 Erü ngẽma nge i naxü̃nemaxã taxexü̃ rü naxca̱x idau nax diẽru nayaxuxü̃ca̱x nax ngĩrü paũca̱x nataxexü̃ca̱x, natürü ngẽma ngexü̃ i chixri natena maxü̃xü̃ rü naxca̱x nadau nax wüxi ya yatü ya mecüxü̃ chixexü̃gu nanguxẽẽxü̃.
27 Texé ya tügüremügu ã́xwe ya naicü ingexe rü tá tixãxchiru.
28 Rü yíxema ã́xwe ya naicüétügu ixũxe rü tixacutü.
29 Yíxema texé ya namaxã maxü̃́xẽ i wüxi i ngexü̃ i natena chixri maxü̃xü̃ rü poxcu tá tümaca̱x ínangu.
30 Ngẽxguma wüxi i duü̃xü̃ norü taiyagagu düxwa nangĩ̱xgu rü taxúema naxchi taxai.
31 Natürü ngẽxguma chi texé íyanguéxü̃gu nax nangĩ́xü̃ rü nanaxwa̱xe nax 7 e̱xpü̱xcüna natáeguxẽẽxü̃ i ngẽma naxca̱x nangĩ́xü̃, rü naétü rü ta guxü̃ma i nüxü̃́ ngẽxmaxü̃maxã nanaxütanü.
32 Natürü yíxema ngexü̃ i ãtéxü̃maxã maxü̃́xẽ, rü tama tümaãẽxü̃ tacua̱x rü tügütama chixexü̃wa tangẽxmaxẽxẽ.
33 Taxü̃ i guxchaxü̃ tá tümaca̱x ínangu, rü duü̃xü̃gü rü tá chixri tümachiga nidexagü rü tá tüxü̃́ nangu̱x, rü nataxutama i ta̱xacü i tüxü̃́ ínapixü̃ i ngẽma chixexü̃ i taxüxü̃.
34 6:34-35 Erü yimá yatü ya naxma̱x chixri nüxna maxü̃cü rü tá poraãcü nanu, rü taxúegama naxĩnü ega naxütanügu nax naxma̱xca̱x nanuxü̃. Rü tama inaxĩnü ega namaxã namexẽẽchaü̃gu i ngẽma guxchaxü̃, rü tama inarüngüxmü ega woo muxü̃ i ãmare nüxna ixãxgu.
35 Nüü̃ nadau 6:34
