Proverbios 8:1-36
8 Ngẽma cua̱x rü tagaãcü taxca̱x naca, rü ngẽma ĩnü i mexü̃ rü tüxü̃ nüxü̃ naxĩnüxẽxẽ i naga.
2 Rü ngẽma cua̱x rü ma̱xpǘnegüchitaerugu nachinagü, rü ngẽma namagü nügüwa ídapetüxü̃gu nayachi.
3 Ngẽma ĩã̱xgü i ĩaneca̱x nawa ixücuxü̃wa duü̃xü̃güxü̃ nüxü̃ naxĩnüxẽxẽ i norü ore.
4 Rü ñanagürü: —Pa Yatügüx, pexca̱x nixĩ i ñaa chorü ore.
5 Pa Ngextü̱xücügü i Tama Ũãẽgüxü̃ rü Peechitamare Maxẽxe, ¡naxca̱x pengúe nax pexuãẽgüxü̃ rü aixcüma peãẽxü̃ pecuáxü̃!
6 ¡Choxü̃́ iperüxĩnüe i ngẽma tá pemaxã nüxü̃ chixuxü̃ i guxü̃arü yexera mexü̃ i taxucürüwa taxúema texé chixri nachiga idexaxü̃!
7 Ngẽma tá pemaxã nüxü̃ chixuxü̃ nixĩ i aixcüma ixĩxü̃ erü tama chorü me nixĩ nax doraxü̃ chixuxü̃.
8 Guxü̃ma i chorü ore rü aixcüma nixĩ rü nawa nataxuma i ta̱xacürü dora.
9 Tümaca̱x ya yíxema tümaãẽxü̃ cuáxe rü meama nango̱x i ngẽma chorü ore, rü taxucürüwa texé chixri nachiga tidexa.
10 Diẽruarü yexera rü úiru i mexẽchixü̃arü yexera nixĩ i namexü̃ nax cunayaxuxü̃ i ucu̱xẽgü rü cua̱x —ñanagürü.
11 Ngẽma cua̱x rü nutaacügü i ngã̱xãẽruü̃arü yexera namexẽchi, rü bai i ta̱xacü i ñoma i naanewa mexẽchixü̃gu tanangu.
12 Rü ñanagürü: —Choma i cua̱x rü namaxã chaxãmücü i nacüma i mexü̃, rü chauxü̃tawa nangẽxma i ngẽma ucu̱xẽgü i guxü̃arü yexera i mexü̃.
13 Yíxema Tupanaga ĩnüxe rü naxchi taxai i chixexü̃. Choma i cua̱x rü naxchi chaxai i ngẽma nacüma i nügü icua̱xüüxü̃, rü nacüma i nügü írütaxü̃, rü nacüma i chixexü̃ üxü̃, rü nacüma i dora.
14 Choma rü nagu charüxĩnü i ngẽma chaxüxchaü̃xü̃, rü chomatátama chanaxü i ngẽma nagu charüxĩnüxü̃, erü choxrü nixĩ i ngẽma mexü̃ i ĩnü rü ngẽma pora.
15 Chaugagu nixĩ i nangẽxmagüxü̃ i nachixü̃anegüarü ãẽ̱xgacügü, rü chaugagu nixĩ i naxügüãxü̃ i norü mugü. Guxü̃ma i ngẽma ãẽ̱xgacügü rü norü ngü̃xẽẽruü̃gü rü chaugagu nixĩ i duü̃xü̃gümaxã inacua̱xgüxü̃.
16 Rü ngẽma ãẽ̱xgacügü rü chaugagu nixĩ i norü duü̃xü̃gümaxã inacua̱xgüxü̃ rü naxümatügüãxü̃ i norü mugü i poxcuchiga ixĩxü̃.
17 Choma i cua̱x rü tüxü̃ changechaü̃ ya yíxema choxü̃ ngechaü̃güxe, rü yíxema cha̱u̱xca̱x daugüxe, rü choxü̃ itayangaugü.
18 Choma rü tüxna chanaxã i tümaarü ngẽmaxü̃gü rü tüxü̃ chicua̱xüxü̃, rü tüxü̃ chatachigaxẽxẽ, rü mexü̃ i ĩnü tüxna chaxã.
19 Ngẽma tüxna chaxãxü̃ rü úiru i mexẽchixü̃arü yexera narümemae, rü ngẽma tüxna chaxuaxü̃xü̃, rü diẽrumü i mexẽchixü̃arü yexera narümemae.
20 Choma i cua̱x rü nagu chixũ i nama i mea iwéxü̃, rü nacümagü i aixcüma mexü̃wa tüxü̃ gaxü̃gu chixũ.
21 Yíxema choxü̃ ngechaü̃güxe rü tüxna chanaxã i ngẽma tüxna üxü̃, rü ngẽmaxü̃gümaxã chanapaxẽxẽ ya tümapata.
22 Yexguma Cori ya Tupana inaxügügu ga norü puracü rü choxü̃xíra nango̱xẽxẽ naxü̃pa nax naxüaxü̃ ga guxü̃ma ga yema togü ga naxüxü̃. Noxriarü ügügu rü choxü̃ nango̱xẽxẽ naxü̃pa nax naxüaxü̃ ga ñoma ga naane.
23 Rü yemaacü noxriarü ügügu choxü̃ nango̱xẽxẽ naxü̃pa nax naxüaxü̃ ga ñoma ga naane.
24 Yexguma tauta naxü̱xgu ga márgü, rü taxtügü, rü natüxacügü, rü marü choxü̃ nango̱xẽxẽ.
25 Rü naxü̃pa nax naxüaxü̃ ga ma̱xpǘnegü rü ngüchitaeruü̃gü, nüma ga Cori ya Tupana rü marü choxü̃ nango̱xẽxẽ.
26 Yexguma tauta nango̱xẽẽãgu ga ñoma ga naane, rü naixnecügü, rü bai ga nachicute̱xe ga ñoma ga naane nawa üxü̃, rü choma rü chayexma.
27 Yexguma Cori ya Tupana naxü̱xgu ga ya̱u̱xtüweanexü̃ ga márétüwa ngẽxmaxü̃, choma rü woetama chayexma.
28 Yexguma naxǘãgu ga caixanexü̃gü ga dauxü̃wa yexmaxü̃, rü naxǘãgu ga ãxmaxü̃gü ga már arü dexá nawa ne ibaibexü̃ rü choma rü yéma chayexma.
29 8:29-30 Rü yexguma namuãgu ga yema már nax tama nachicawa yaxũgachixü̃ca̱x ga norü dexá, choma rü yéma chayexma. Rü yexguma naxüãgu ga ñoma ga naane, choma rü naxü̃tawa chayexma, rü taguma nacüwawa chataxu. Choma nixĩ ga norü taãxẽxẽẽruxü̃, rü guxü̃guma nape̱xewa chataãxẽ.
30 Nüü̃ nadau 8:29
31 Namaxã chataãxẽ ga ñoma ga naane ga naxüxü̃, rü namaxã chataãxẽ ga gumá yatü ga nango̱xẽẽãcü.
32 Rü ngẽmaca̱x, Pa Chaunegüx ¡choxü̃́ iperüxĩnüe rü chaucümagu pexĩ, rü tá petaãxẽgü!
33 ¡Penayaxu i chorü ucu̱xẽgü rü taxṹ i nüxü̃ pexoxü̃ i cua̱x!
34 Tataãxẽ ya yíxema choxü̃́ irüxĩnüxe rü guxü̃ i ngunexü̃gügu chopataarü ĩã̱xwa dauxü̃taexe.
35 Yíxema choxü̃ iyanga̱u̱xe rü nüxü̃ itayangau i maxü̃, rü ngẽxgumarüxü̃ ta nüxü̃ itayangau ya Cori ya Tupanaarü ngúchaü̃.
36 Natürü texé ya choxna ixũgachixe rü ãũcümaxü̃wa tügütama tangẽxmaxẽxẽ. Rü texé ya chauxchi aixe rü yuxü̃ tangechaü̃ —ñanagürü ga yema cua̱x.
