Proverbios 9:1-18
9 Ngẽma cua̱x rü naxüpata rü 7 nixĩ ga napataarü caxtagü.
2 Nanadai ga wocagü nax naxüaxü̃ca̱x ga taxü̃ ga õna, rü nanaxü ga wüxi ga bínu ga mexẽchicü, rü nanamexẽxẽ ga norü mecha nax yemaétüwa inaxǘaxü̃ca̱x ga norü õna.
3 Nüma ga cua̱x rü ĩanearü ma̱xpǘnegüwa nanamu ga naxü̃taxü̃gü nax yéma tagaãcü ngextü̱xügüxü̃na naxugüxü̃ca̱x:
4 9:4-5 Rü ñanagürü: —¡Nua pexĩ, Pa Ngextü̱xücügüx i Tauta Cua̱xwa Ngugüxü̃x —ñanagürü. Yexgumarüxü̃ ta nüxna naxu ga yema naechitamare maxẽxü̃, ñaxü̃maxã: —¡Nua pexĩ nax penangṍxü̃ca̱x i chorü paũ rü peyaxaxüxü̃ca̱x ya bínu ya pexca̱x chanamexẽxẽcü!
5 Nüü̃ nadau 9:4
6 ¡Nüxü̃ perüxoe nax chixexü̃gu pemaxẽxü̃, rü ngẽxguma tá pexü̃́ nangẽxma i maxü̃! ¡Rü duü̃xü̃gü i naãxẽxü̃ icuáxü̃ãcü pemaxẽ! —ñanagürü.
7 Ngẽxguma cunaxucu̱xẽgu i ngẽma tama irüxĩnüchaü̃xü̃, rü tá chixexü̃maxã cuxü̃ nangãxü̃, rü ngẽxguma cunaxucu̱xẽgu i ngẽma chixexü̃gu maxü̃xü̃, rü tá cuxü̃ nacugüama.
8 Ngẽxguma cunaxucu̱xẽgu i ngẽma tama ucu̱xẽ irüxĩnüchaü̃xü̃, rü tá cuxchi naxai, natürü ngẽxguma cunaxucu̱xẽgu i ngẽma naãẽxü̃ cuáxü̃ rü tá cumaxã nataãxẽ.
9 Ngẽxguma cunangu̱xẽẽgu i ngẽma duü̃xü̃ i cua̱x nüxü̃́ ngẽxmaxü̃, rü yexeraãcü tá nüxü̃́ nangẽxma i cua̱x, rü ngẽxguma cunangu̱xẽẽgu i wüxi i duü̃xü̃ i mecümaxü̃ rü tá yexeraãcü cua̱xwa nangu.
10 Norü ügü nax cua̱x tüxü̃́ ngẽxmaxü̃ rü ngẽma nixĩ nax Tupanaga ixĩnüxü̃. Rü ngẽxguma Tupanaga ixĩnügu, rü ngẽmawa nango̱x nax aixcüma taãẽxü̃ icuáxü̃.
11 Nagagu i ngẽma cua̱x rü tá nama̱x i curü maxü̃, rü tá nimuetanü ya curü taunecü.
12 Ngẽxguma cuãẽxü̃ cucua̱xgu rü mexü̃ tá cuyaxu. Natürü ngẽxguma tama ucu̱xẽ curüxĩnüchaü̃gu, rü cugüna tátama guxchaxü̃ cuxã.
13 Ngẽma ngexü̃ i ngeãẽmarexü̃ rü naxoregüta̱a̱x. Rü tama naãẽxü̃ nacua̱x, rü tama naxãne ega ta̱xacürü chixexü̃ naxü̱xgu.
14 Ĩanearü ma̱xpǘnewa napataa̱xwa wüxi i toruxü̃wa narüto i ngextá guxü̃ma i ĩanecüã̱x nüxü̃ ídauxü̃wa.
15 Rü tümaca̱x naca ya yíxema mexü̃gu rüxĩnüexe ya ngéma chopetüxe, rü ñanagürü:
16 9:16-17 —Pa Ngextü̱xücügü i Tama Cua̱x Pexü̃́ Ngẽxmagüxe, ¡rü ngĩxã chauchiü̃wa taxĩ! Rü ngẽma dexá i naxca̱x ingĩ́xü̃ rü narüchi̱xmae, rü ngẽma paũ i cúãcü ingṍxü̃ rü nachi̱x —ñanagürü tüxü̃ ya yíxema tama íxuãẽgüxe.
17 Nüü̃ nadau 9:16
18 Natürü yíxema tüxna naxugüxe rü tama nüxü̃ tacua̱xgü nax yuwa taxĩxü̃.
