Hechos 12:1-25
12 Rü yexgumaü̃cüxü inanaxügü ga ãẽ̱xgacü ga Eróde nax ínayauxü̃ãxü̃ ga ñuxre ga yaxõgüxü̃ ga Yerucharéü̃cüã̱x nax napoxcuexü̃ca̱x.
2 Rü norü churaragüxü̃ namu nax taramaxã Chantiágu ga Cuáü̃enexẽxü̃ yama̱xgüxü̃ca̱x.
3 Rü yexguma nüxü̃ nada̱u̱xgu ga Eróde nax norü me yixĩxü̃ ga Yudíugü ga yema nax naxüxü̃, rü norü churaragüxü̃ namu nax Pedruxü̃ rü ta yayauxgüxü̃ca̱x. Rü yema nangupetü nagu ga Yudíugüarü peta ga Üpetüchiga ga paũ ga ngearü pu̱xẽẽruü̃ã́xü̃ nagu nangõ̱xgüxü̃.
4 Rü yexguma Pedruxü̃ yayauxgügu, rü poxcupataü̃gu nayata̱xcuchi. Rü ñu̱xũchi ga Eróde rü nanamu ga ãgümücütücumü ga norü churaragü nax nüxna nadaugüxü̃ca̱x. Rü wüxitücumüwachigü rü nayexma ga ãgümücü ga churaragü. Rü yemaacü nanaxü ga Eróde, yerü nagu narüxĩnü ga yema petawena guxü̃ ga duü̃xü̃güpe̱xewa nax nagaãxü̃ca̱x ga Pedru nax yama̱xgüãxü̃ca̱x.
5 Rü yemaacü ga Pedru rü poxcupataü̃wa nayexma rü churaragü rü meama nüxna nadaugü. Natürü ga yema yaxõgüxü̃ ga Yerucharéü̃cüã̱x rü poraãcü nayumüxẽgü, rü Tupanana naxca̱x nacagü.
Tupana rü Pedruxü̃ ínanguxuchixẽxẽ ga poxcupataü̃wa
6 Rü yematama ga chütaxü̃gu naxü̃pa ga yema ngunexü̃ ga Eróde duü̃xü̃güpe̱xewa nagaxchaü̃xü̃, rü taxre ga churaragüarü ngãxü̃wa nape ga Pedru. Rü taxre ga cadénamaxã nichotachacüxü. Rü togü ga churaragü ga dauxü̃taexü̃ nüxna nadaugü ga poxcupataü̃arü ĩã̱x.
7 Rü ngürüãchi yema poxcupataü̃wa nango̱x ga wüxi ga Coriarü orearü ngeruxü̃ ga daxũcüã̱x. Rü poraãcü nangóone ga gumá poxcupataü̃wa. Rü yema orearü ngeruxü̃ rü Pedruxü̃ nacu̱xagü, rü nanabaixãchixẽxẽ. Rü ñanagürü: —¡Paxãma írüda! —ñanagürü. Rü yexgumatama íniwẽgü ga gumá cadéna ga Pedru namaxã ichotachacüücü.
8 Rü Pedruxü̃ ñanagürü ga yema orearü ngeruxü̃: —¡Icu̱xcuchichiru rü nacua̱i̱xcu i curü chapatu! —ñanagürü. Rü yemaacü nanaxü ga Pedru. Rü ñanagürü ta: —¡Icu̱xcuchi i curü gáuxü̃chiru, rü chowe rüxũ! —ñanagürü.
9 Rü nawe narüxũ ga Pedru. Rü tama nüxü̃ nacua̱x ga aixcüma nax yixĩxü̃ ga yema orearü ngeruxü̃ namaxã üxü̃. Rü naxca̱x rü nango̱xetümare.
10 Rü nüxü̃ nachopetü ga nüxíraxü̃xü̃ ga dauxü̃taexü̃, rü ñu̱xũchi ga yema to ga dauxü̃taexü̃. Rü yexguma nawa nangugügu ga yema ĩã̱x ga fierumena̱xãnaxca̱x ga ĩanearü namawa üxü̃, rü nüechama niwãxna. Rü ínachoxü̃. Rü yexguma marü to ga namawa nangugügu, rü nüxna inayarütaxu ga yema orearü ngeruxü̃.
11 Rü yexguma nüxü̃ nicua̱xãchi ga Pedru, rü nügümaxã ñanagürü: —Ñu̱xma waxi i nüxü̃ chacuáxü̃ nax aixcüma Cori ya Tupana núma namuxü̃ i norü orearü ngeruxü̃ nax Eródeme̱xẽwa choxü̃ napuxü̃, rü nawa choxü̃ ínanguxuchixẽẽxü̃ i guxü̃ma i ngẽma chomaxã naxügüchaü̃xü̃ i ngẽma Yudíugü i tama yaxõgüxü̃ —ñanagürü.
12 Rü yexguma yemaxü̃ yacua̱xãchigu ga Pedru, rü ngĩpatawa naxũ ga wüxi ga ngecü ga Maríagu ãégacü. Rü ngĩma iyixĩ ga Cuáü̃ ga Márcu naé. Rü yéma nangutaque̱xegü ga muxü̃ma ga duü̃xü̃gü ga yéma yumüxẽgüxü̃.
13 Rü ĩã̱xtüarü poxeguxü̃arü ĩã̱xwa, rü: —Tu tu tu —ñanagürü ga Pedru. Rü wüxi ga pacü ga Róde ga ngĩéga íiyadau.
14 Rü yexguma nagawa nüxü̃ nacua̱xgu nax Pedru yixĩxü̃, rü ngĩrü taãẽmaxã tama iyawãxna ga ĩã̱x rü íiyañamare nax nüxü̃ yanaxuxü̃ca̱x nax Pedru yixĩxü̃ ga ĩã̱xtüarü ĩã̱xgu chicü.
15 Rü yema yexmagüxü̃ rü: —Cungeãẽmare —ñanagürügü ngĩxü̃. Natürü ngĩma rü: —Aixcüma nixĩ —ngĩgürügü. Rü yexguma ñanagürügü: —Maneca tama nüma nixĩ. Rü norü dauruxü̃ i daxũcüã̱xmare nixĩ —ñanagürügü.
16 Natürü ga Pedru rü yoxni ĩã̱xwa: —Tu tu tu —ñanagürüama. Rü yexguma naxca̱x yawãxnaãgu rü nüxü̃ nadaugügu nax Pedru yixĩxü̃, rü naba̱i̱xãchie.
17 Natürü nüma naxunagüme̱xẽ, rü naxme̱xmaxã nayanachianexẽẽgü. Rü namaxã nüxü̃ nixu nax ñuxãcü Cori ínanguxuchixẽẽxü̃ ga poxcupataü̃wa. Rü ñanagürü ta: —¡Chantiágumaxã rü ngẽma togü i yaxõgüxü̃maxã nüxü̃ pixu i ngẽma ore! —ñanagürü. Rü yexguma inaxũãchi, rü tóxnamana naxũ.
18 Rü yexguma yangunegu, rü yema churaragü ga poxcupataü̃wa dauxü̃taegüxü̃ rü poraãcü nanaxĩ̱xãchiãẽgü yerü tama nüxü̃ nacua̱xgü ga ta̱xacü nax ngupetüxü̃ namaxã ga Pedru.
19 Rü yemaca̱x ga Eróde rü yema churaragüxü̃ namu nax Pedruca̱x yadaugüxü̃ca̱x. Rü yexguma taxuxü̃ma iyangaugügu, rü Eróde rü yema churaragügutama nayanguxẽxẽ nax nayuexü̃ca̱x. Rü yemawena ga Eróde rü ínaxũxũ ga Yudéaanewa, rü Checharéagu nayaxãchiü̃.
Nayu ga Eróde
20 Rü Eróde rü namaxã nanu ga Tírucüã̱xgü rü Chidóü̃cüã̱xgü. Natürü ga yema Tírucüã̱xgü rü Chidóü̃cüã̱xgü rü naxca̱x nadaugü nax ñuxãcü Eródexü̃ nangüxmüxẽẽgüxü̃, yerü Eródechiü̃anewa nixĩ ga nayauxgüãxü̃ ga nabü. Rü yemaca̱x ga yema Tírucüã̱xgü rü Chidóü̃cüã̱xgü rü wüxi ga Eródearü ngü̃xẽẽruxü̃ ga Bátumaxã naxãmücügü nax nüxü̃ nangü̃xẽẽxü̃ca̱x nax Eródemaxã yadexagüxü̃ca̱x.
21 Rü Eróde rü namaxã inaxuneta ga wüxi ga ngunexü̃ nax namaxã yadexaxü̃ca̱x. Rü yexguma yema ngunexü̃ ga nagu inaxunetaxü̃wa nanguxgu, rü yema Tírucüã̱x rü Chidóü̃cüã̱x rü Eródexü̃tawa nangugü. Rü nicuxcuchi ga Eróde ga norü ãẽ̱xgacüchiru, rü norü tochicaxü̃wa narüto, rü duü̃xü̃gümaxã nüxü̃ nixu ga norü ore ga nagu naxĩnüxü̃.
22 Rü yexguma ga guxü̃ma ga yema duü̃xü̃gü rü tagaãcü ñanagürügü: —Ñaa ãẽ̱xgacü rü tama duü̃xü̃arü dexárüxü̃ nixĩ i norü dexa, natürü ñoma Tupanaarü dexárüxü̃ nixĩ —ñanagürügü.
23 Natürü nüma ga Eróde rü tama Tupanana moxẽ naxã naxca̱x ga norü ngü̃xẽxẽ ga yexguma duü̃xü̃gümaxã yadexagu. Rü yemaca̱x wüxi ga Tupanaarü orearü ngeruxü̃ ga daxũcüã̱x rü yexgumatama Eródexü̃ nida̱xawexẽxẽ. Rü õxmigü nanangõ̱x, rü yemamaxã nayu.
24 Rü yoxni ga yema yaxõgüxü̃ rü guxü̃wama nüxü̃ nixugüe ga Cori ya Tupanaarü ore. Rü yemaacü guxü̃wama ninguchigü.
25 Rü yexguma marü yanguxẽẽãgu ga norü puracü ga Chauru rü Bernabé, rü ínachoxü̃ ga Yerucharéü̃wa, rü wenaxarü Antioquíaca̱x nawoegu. Rü nayagagü ga Cuáü̃ ga Márcugu ãégacü.
