Hechos 15:1-41
15 Rü yexgumaü̃cüxü rü nayexma ga ñuxre ga duü̃xü̃gü ga Yudéaanewa ne ĩxü̃ ga Antioquíawa ngugüxü̃. Rü nümagü inanaxügüe ga tüxü̃ nax nangúexẽẽxü̃ ga guxema yaxõgüxe ga Antioquíacüã̱x, rü ñanagürügü: —Ngẽxguma tama pegü ípewiü̃cha̱xmüü̃pe̱xechiraü̃gu yema Moiché tüxü̃ muxü̃rüxü̃ rü taxuacüma pexü̃́ nangẽxma i maxü̃ i taguma gúxü̃ —ñanagürügü.
2 Natürü ga Pauru rü Bernabé rü tama norü me nixĩ ga yema, rü yemaca̱x poraãcü nügü namaxã tachoxü̃gagü ga yema duü̃xü̃gü ga Yudéaanewa ne ĩxü̃. Rü düxwa Pauruxü̃ rü Bernabéxü̃ rü ñuxre ga togü ga Antioquíacüã̱x ga yaxõgüxü̃xü̃ naxunetagü nax Yerucharéü̃wa naxĩxü̃ca̱x nax yema ngúexü̃gü ga Ngechuchu imugüxü̃maxã rü yema yaxõgüxü̃arü ãẽ̱xgacügümaxã yamexẽẽgüãxü̃ca̱x ga yemachiga.
3 Rü yemaacü ga yema yaxõgüxü̃ ga Antioquíacüã̱x rü Yerucharéü̃wa nanamugü ga yema yatügü nax naxca̱x íyacagüxü̃ca̱x rü yamexẽẽgüãxü̃ca̱x ga yema wiecha̱xmüü̃pe̱xechiraü̃chiga. Rü Feníchiaanewa rü Chamáriaanewa nachopetü ga Pauru rü Bernabé. Rü yéma rü duü̃xü̃gümaxã nüxü̃ nixugüe nax yema tama Yudíugü ixĩgüxü̃ rü nüxü̃ nax naxoexü̃ ga nũxcümaü̃xü̃ ga nacümagü nax Tupanawe naxĩxü̃ca̱x. Rü yema oremaxã poraãcü nanataãẽxẽẽgü ga guxü̃ma ga yema yaxõgüxü̃.
4 Rü Yerucharéü̃wa nangugü ga Pauru rü Bernabé. Rü yema yaxõgüxü̃ rü yema ngúexü̃gü ga Ngechuchu imugüxü̃ rü yema yaxõgüxü̃arü ãẽ̱xgacügü rü meama nanayauxgü. Rü nüma ga Pauru rü Bernabé rü meama namaxã nüxü̃ nixugügü ga guxü̃ma ga yema Tupana nawa üxü̃ ga yexguma duü̃xü̃gümaxã nüxü̃ yaxugügügu ga norü ore.
5 Natürü ñuxre ga Parichéugü ga Ngechuchuaxü̃́ yaxõgüxü̃, rü inachigü, rü ñanagürügü: —Name nixĩ nax nügü ínawiü̃cha̱xmüü̃pe̱xechiraü̃güxü̃ i ngẽma tama Yudíugü ixĩgüxü̃ i ngexwaca yaxõgüxü̃, ngẽma Moichéarü mugü nüxü̃ ixuxü̃rüxü̃ —ñanagürügü.
6 Rü yexguma nangutaque̱xegü ga yema ngúexü̃gü ga Ngechuchu imugüxü̃ rü yema yaxõgüxü̃arü ãẽ̱xgacügü nax namexẽẽgüãxü̃ca̱x ga yema ore.
7 Rü nawena nax poraãcü nügümaxã yaporagatanücüüxü̃, rü inachi ga Pedru, rü ñanagürü nüxü̃: —Pa Chauenexẽgüx, pema nüxü̃ pecua̱x nax ü̃pamama Tupana choxü̃ yaxuxü̃ ga petanüwa nax yema duü̃xü̃gü i tama Yudíugü ixĩgüxü̃maxã nüxü̃ chixuxü̃ca̱x i ngẽma ore i mexü̃ i Ngechuchuchiga, nax nümagü rü ta yaxõgüãxü̃ca̱x.
8 Rü yimá Tupana ya guxãarü maxü̃xü̃ cuácü rü tüxü̃ nüxü̃ nadauxẽxẽ nax nadeaxü̃ i ngẽma duü̃xü̃gü i tama Yudíugü ixĩgüxü̃, yerü nüxna nanamu ga Naãxẽ ya Üünecü yema tüxna namuaxü̃rüxü̃.
9 Rü Tupanape̱xewa rü yixema i Yudíugü rü namaxã tawüxigu i ngẽma tama Yudíugü ixĩgüxü̃. Yerü nümagü rü ta Tupana nüxü̃́ nüxü̃ narüngüma ga norü pecadugü ga yexguma Ngechuchuaxü̃́ yaxõgüãgu.
10 ¿Rü ñu̱xma rü ta̱xacüca̱x Tupanaxü̃ penuxẽẽchaü̃, rü tü̱xcüü̃ penaxwa̱xe nax ngẽma ngexwaca yaxõgüxü̃ nagu ĩxü̃ i ngẽma nũxcümaü̃xü̃ i nacümagü i yixema tama tüxü̃́ tauxchaxü̃ nax nagu ixĩxü̃ rü woo i tórü o̱xigü rü tama nüxü̃́ tauxchaxü̃ nax nagu naxĩxü̃?
11 Natürü yixema rü tayaxõgü nax tórü Cori ya Ngechuchuarü ngechaxü̃gagu yixĩxü̃ nax tüxü̃́ nangẽxmaxü̃ i maxü̃ i taguma guxü̃. Rü ngẽxgumarüxü̃ ta nixĩ naxca̱x i tama Yudíugü ixĩgüxü̃ —ñanagürü ga Pedru.
12 Rü inanaxügü ga Bernabé rü Pauru nax yadexagüxü̃. Rü guxü̃ma ga yema duü̃xü̃gü rü inarüchianegü rü inarüxĩnüemare. Rü Bernabé rü Pauru rü namaxã nüxü̃ nixugüe nax ñuxãcü Tupana nüxü̃ rüngü̃xẽẽgüxü̃ nax naxügüã̱xü̃ca̱x ga mexü̃gü rü cua̱xruü̃gü ga Tupanaarü poramaxã naxügüxü̃ natanüwa ga yema duü̃xü̃gü ga tama Yudíugü ixĩgüxü̃.
13 Rü yexguma Bernabé rü Pauru igúegagügu, rü nüxí nidexa ga Chantiágu, rü ñanagürü: —Pa Chauenexẽgüx, ¡choxü̃́ iperüxĩnüe!
14 Pedru i Chimóü̃ rü tamaxã nüxü̃ nixu nax ñuxãcü Tupana inaxügüxü̃ nax nüxü̃ nangü̃xẽẽxü̃ ga yema duü̃xü̃gü i tama Yudíugü ixĩgüxü̃. Rü tamaxã nüxü̃ nixu ta nax ñuxãcü Tupana yema duü̃xü̃gütanüwa nadeaxü̃ ga ñuxre ga duü̃xü̃gü nax noxrü yixĩgüxü̃ca̱x.
15 Rü ngẽma Pedru nüxü̃ ixuxü̃ rü namaxã nawüxigu ga yema ore ga nũxcümaü̃güxü̃ ga orearü uruü̃gü ümatügüxü̃ ga ñaxü̃:
16 “Rü ngẽmawena rü tá chataegu, rü tá nüxü̃ charüngü̃xẽxẽ i Dabítaagü i Yudíugü.Rü woo nawoonemare i ñu̱xmax, natürü wena táxarü wüxiwa chanaxĩxẽxẽ,rü tá íchanadagüxẽxẽ nax noxrirüxü̃ naporaexü̃ca̱x.
17 Rü ngẽmaãcü tá nüxü̃ charüngü̃xẽxẽxü̃ nax ngẽma duü̃xü̃gü i tama Yudíugü ixĩgüxü̃ rü cha̱u̱xca̱x nadaugüxü̃ca̱x,wüxigu namaxã i chorü duü̃xü̃gü i Yudíugü i choma chadexü̃.
18 Rü yemaacü nüxü̃ nixu ga nüma ga Cori ya Tupana ga nũxcümama tüxü̃ nüxü̃ cua̱xẽẽcü ga yema”
—ñanagürü ga yema ore ga nũxcüma ümatüxü̃.
19 Rü ñanagürü ga Chantiágu: —Rü ngẽmaca̱x, Pa Chauenexẽgüx, rü cha̱u̱xca̱x rü tama name nax ngẽma nacümagü i guxchaxü̃maxã nüxü̃ ichixewexü̃ i ngẽma duü̃xü̃gü i tama Yudíugü ixĩgüxü̃ i nüxü̃ rüxoexü̃ i nũxcümaü̃xü̃ i nacümagü nax Tupanawe naxĩxü̃ca̱x.
20 Rü narümemae nixĩ i naxca̱x tanaxümatü i popera, rü ngẽmawa namaxã nüxü̃ tixu:– Tama name nax nangõ̱xgüãxü̃ i naxü̃nagümachi i duü̃xü̃gü norü tupananetachicüna̱xãgüca̱x daixü̃.– Rü tama name nax nai i ngexü̃maxã rü ẽ̱xna nai ya yatümaxã inapexü̃.– Rü tama name nax nangõ̱xgüãxü̃ i namachi i ngẽma naeü̃ rüe̱xna naxü̃na i wẽxnaxãxü̃ rüe̱xna natügu nguxü̃.– Rü tama name nax nangõ̱xgüãxü̃ ya nagü.
Rü ngexicatama nixĩ i inaxwa̱xexü̃ nax naxca̱x naxümatüxü̃ i ngẽma yaxõgüxü̃ i Antioquíawa ngẽxmagüxü̃.
21 Yerü woetama nũxcümama wüxichigü ga ĩanewa nayexma ga duü̃xü̃ ga namaxã ngu̱xẽẽtaexü̃ ga yema Moichéarü mugü ga ngutaque̱xepataü̃güwa nadaumatüxü̃ ga wüxichigü ga ngü̃chigaarü ngunexü̃gu —ñanagürü ga Chantiágu.
Popera ga yema duü̃xü̃gü ga tama Yudíugü ixĩgüxü̃ca̱x ümatüxü̃
22 Rü yema ore rü norü me nixĩ ga yema ngúexü̃gü ga Ngechuchu imugüxü̃, rü yema yaxõgüxü̃arü ãẽ̱xgacügü, rü guxü̃ma ga yema yaxõgüxü̃. Rü nügümaxã ñanagürügü: —¡Ngĩxã tatanüwa nüxü̃ taxuneta ya taxre ya tamücügü nax Antioquíawa namugüxü̃ca̱x namaxã ya Pauru rü Bernabé! —ñanagürügü. Rü nüxü̃ naxunetagü ga Yúda ga Barchabágu ãégaxü̃ rü Chíra. Rü nümagü ga Yúda rü Chíra rü ãẽ̱xgacügü nixĩ ga natanüwa ga yema yaxõgüxü̃ ga Yerucharéü̃wa yexmagüxü̃.
23 Rü namaxã yéma nanamugü ga popera ga ñaxü̃: “Pa Toenexẽgü i Tama Yudíugü Ixĩgüxe i Antioquíagu rü Chíriaanegu rü Chiríchiaanegu Ãchiü̃güxe, rü toma i peenexẽgü ya Ngechuchu toxü̃ imugüxe rü toma i yaxõgüxü̃arü ãẽ̱xgacügü ixĩgüxe, rü pexü̃ tarümoxẽgü.
24 Rü nüxü̃ tacuáchigagü rü ñuxre ga duü̃xü̃gü ga núma ne ĩxü̃ rü woo tama toma yéma tanamugü natürü nümagü rü yéma naxĩ rü Moichéarü mugümaxã pexü̃ nachixewegü rü yemaacü pexü̃ ínatüexẽxẽ.
25 Rü yemaca̱x guxãma ga toma rü wüxigu nagu tarüxĩnüe nax totanüwa nüxü̃ taxunetaxü̃ ga taxre ga taenexẽgü nax pexca̱x ngéma tanamugüxü̃ca̱x namaxã i taenexẽgü i nüxü̃ ingechaü̃güxü̃ i Bernabé rü Pauru.
26 Rü nümagü i Bernabé rü Pauru nixĩ ga poraãcü ãũcümaxü̃wa nayexmagüxü̃ naxca̱x ga tórü Cori ya Ngechuchu ya Cristu.
27 Rü ngẽmaca̱x pexca̱x ngéma tanamugü i Yúda rü Chíra nax nümagüxüchi pemaxã nüxü̃ yaxugüxü̃ca̱x rü pemaxã nango̱xẽẽgüãxü̃ca̱x i guxü̃ma i ngẽma poperagu pexca̱x taxümatüxü̃.
28 15:28-29 Erü Tupanaãxẽ i Üünexü̃ca̱x name, rü toxca̱x rü ta name nax ñaa ãgümücü i mugüxicatama peyanguxẽẽxü̃:– Tama name nax penangṍxü̃ i naxü̃nagümachi i tupananetachicüna̱xãgüca̱x daixü̃.– Rü tama name nax penangṍxü̃ i namachi i ngẽma naxü̃nagü i wẽxnaxãxü̃.– Rü tama name nax penangṍxü̃ ya nagü.– Rü tama name nax nai i ngexü̃maxã rüe̱xna nai ya yatümaxã ipepexü̃.
Rü mexü̃ tá pexügü ega penaxauregu i ngẽma mugü. Rü nuama pexna”, ñanagürü ga yema ore ga naxümatügüxü̃.
29 Nüü̃ nadau 15:28
30 Rü natanüxü̃xü̃ namoxẽgüguwena, rü inaxĩãchi ga yema yéma mugüxü̃, rü Antioquíawa naxĩ. Rü yexguma yéma nangugügu rü nanangutaque̱xexẽxẽ ga guxü̃ma ga yema yaxõgüxü̃ ga duü̃xü̃gü, rü nüxna nanaxãgü ga yema popera.
31 Rü yema yaxõgüxü̃ ga Antioquíawa yexmagüxü̃ rü yexguma yema poperaxü̃ nadaumatügügu rü nataãẽgü namaxã ga yema ucu̱xẽgü ga yexma ümatüxü̃.
32 Rü Yúda rü Chíra ga Tupanaarü orearü uruü̃gü nax yixĩgüxü̃, rü muxü̃ma ga oremaxã nayaxucu̱xẽgü ga yema yaxõgüxü̃, rü nüxü̃ narüngü̃xẽxẽ nax yexeraãcü yaxõgüãxü̃ca̱x.
33 Rü marü ñuxre ga ngunexü̃ yéma nayexmagüguwena, rü ínixĩ. Rü yema yaxõgüxü̃ ga Antioquíacüã̱x, rü taãẽãcüma Yúdaxü̃ rü Chíraxü̃ narümoxẽgü rü meama ínayamugü nax naxca̱x nawoeguxü̃ca̱x ga yema Yerucharéü̃cüã̱x ga noxri natanüwa namugüxü̃.
34 Natürü ga Chíra rü nagu narüxĩnü nax yexma Antioquíagu naxã́ũxü̃, rü yemaca̱x Yudáxicatama Yerucharéü̃ca̱x nataegu.
35 Rü Pauru rü Bernabé rü ta yexma narücho. Rü wüxigu namaxã ga muxü̃ma ga togü, rü nanangúexẽxẽ ga duü̃xü̃gü, rü namaxã nüxü̃ nixugügü ga Cori ya Tupanaarü ore i mexü̃.
Pauru rü wenaxarü inaxũãchi ga to ga nachixü̃anegüwa nax nangeaxü̃ ga Tupanaarü ore
36 Rü yexguma marü ñuxre ga tauemacü ngupetügu, rü nüma ga Pauru rü ñanagürü Bernabéxü̃: —¡Ngĩxã wenaxarü natanügu tanaxĩane i ngẽma yaxõgüxü̃ i guxü̃ne ya ĩane ga ngextá nüxü̃ ixüchigüxü̃wa ga Cori ya Tupanaarü ore nax nüxü̃ icuáxü̃ca̱x nax ñuxãcü nüxü̃ ínangupetügüxü̃! —ñanagürü.
37 Rü Bernabé rü nayagaxchaü̃ ta ga Cuáü̃ ga Márcu.
38 Natürü ga Pauru rü tama nanaxwa̱xe nax yagaãxü̃, yerü Panfíriawa nüxna naxo ga noxri, rü tama ínayaxümücü ga yema puracüwa.
39 Rü poraãcü nügümaxã niporagatanücüü naxca̱x ga yema, rü düxwa nügüna nixĩgü. Rü Bernabé nayaga ga Márcu, rü Chíperearü capaxũwa naxũ.
40 Natürü ga Pauru rü Chíraxü̃ niga. Rü yema Antioquíacüã̱x ga yaxõgüxü̃ rü naxca̱x nayumüxẽgü nax Tupana nüxü̃ rüngü̃xẽẽgüxü̃ca̱x. Rü yexguma inaxĩãchi.
41 Rü Chíriaanewa rü Chiríchiaanewa nachopetü, rü yéma Tupanaarü oremaxã nanataãẽxẽẽgü ga yema yaxõgüxü̃.
