Hechos 17:1-34
17 Rü ĩanegü ga Anfípori rü Aporóniawa nachopetü ga Pauru rü Chíra, rü ñu̱xũchi ĩane ga Techarónicawa nangugü. Rü yéma nayexma ga wüxi ga ngutaque̱xepataxü̃ ga Yudíugüarü.
2 Rü guma ngutaque̱xepataü̃wa naxũũxü̃ ga Pauru, yerü woetama yema nixĩ ga nacüma. Rü tomaepü̱x ga ngü̃xchigaarü ngunexü̃gu rü Tupanaarü ore ga ümatüxü̃chiga yema Yudíugümaxã yéma nidexa.
3 Rü meama naxca̱x nanango̱xẽxẽ ga yema ore, rü namaxã nüxü̃ nixu nax ta̱xacüca̱x nayuxü̃ ga Cristu rü tü̱xcüü̃ wena nax namaxü̃xü̃. Rü ñanagürü: —Yimá Ngechuchu i pemaxã nüxü̃ chixuchigacü, rü yimá nixĩ i aixcüma Cristu ixĩcü —ñanagürü ga Pauru.
4 Rü ñuxre ga Yudíugü ga yéma yexmagüxü̃ rü nayaxõgü, rü Pauru rü Chíratanügu naxãgü. Rü yexgumarüxü̃ ta Ngechuchuaxü̃́ nayaxõgü ga muxü̃ma ga Griégugü ga Tupanaxü̃ icua̱xüü̃güxü̃. Rü muxü̃ma ga ngexü̃gü ga tachigagüxü̃ rü ta nayaxõgü.
5 Rü yemaca̱x ga yema Yudíugü ga tama yaxõgüxü̃, rü nixãũxãchigü. Rü nanaxĩtaque̱xexẽxẽ ga ñuxre ga yatügü ga chixexü̃gu maxẽxü̃ ga oexü̃ ga ĩanearü namagüwa yexmagüxü̃. Rü yema Yudíugü rü yema oexü̃xü̃ naxucu̱xẽgü nax yema ĩanecüã̱x ga duü̃xü̃güxü̃ nanuexẽẽxü̃ca̱x. Rü Yachóü̃patawa nabuxmü ga yema duü̃xü̃gü nax Pauruca̱x rü Chíraca̱x nadaugüxü̃ca̱x, yerü yema muxü̃ma ga duü̃xü̃güpe̱xewa nanagagüchaü̃.
6 Natürü yexguma tama yexma nüxü̃ yangaugügu, rü Yachóü̃xü̃ niyauxgü, rü ñuxre ga yaxõgüxü̃xü̃ rü ta ínayauxü̃. Rü nayagáuxü̃tanü, rü guma ĩanearü ãẽ̱xgacügüpe̱xewa nanagagü. Rü tagaãcü ñanagürügü: —Ngẽma Pauru rü Chíra i guxü̃ i naanewa duü̃xü̃güxü̃ chixexẽẽgüxü̃, rü núma rü ta nangugü.
7 Rü Yachóü̃ nixĩ ga nayaxuxü̃ ga napatawa. Rü guxü̃ma i ngẽma yaxõgüxü̃ rü tama naga naxĩnüechaü̃ i tórü ãẽ̱xgacü ya Rómawa ngẽxmacüarü mugü, erü nüxü̃ nixugüe rü nangẽxma i to i ãẽ̱xgacü i Ngechuchu —ñanagürügü ga yema chixexü̃gü ga yatügü.
8 Rü yexguma yemaxü̃ naxĩnüegu ga duü̃xü̃gü rü guma ĩanearü ãẽ̱xgacügü rü poraãcü nanue.
9 Natürü ga Yachóü̃ rü namücügü rü diẽrumaxã nügü naxütanügü, rü yemaca̱x nayange̱xgü.
Pauru rü Chíra rü Beréawa nayexmagü
10 Rü yematama ga chütaxü̃gu rü yema yaxõgüxü̃ ga Techarónicacüã̱x rü ĩane ga Beréawa nanamugü ga Pauru rü Chíra. Rü yexguma yéma nangugügu, rü Yudíugüarü ngutaque̱xepataü̃wa naxĩ.
11 Rü yema togü ga Yudíugü ga Techarónicawa yexmagüxü̃arü yexera narümemaegü ga yema Yudíugü ga Beréacüã̱x. Rü norü ngúchaü̃maxã meama nanayauxgü ga yema ore. Rü guxü̃ ga ngunexü̃gu rü Tupanaarü ore ga ümatüxü̃wa nangúe nax mea nüxü̃ nacua̱xgüxü̃ca̱x rü aixcüma yixĩ ga yema ore ga Pauru rü Chíra namaxã nüxü̃ ixugüxü̃.
12 Rü muxü̃ma ga yema Beréacüã̱x ga Yudíugü rü Ngechuchuaxü̃́ nayaxõgü. Rü yexgumarüxü̃ ta ga muxü̃ma ga Griégugü ga yatüxü̃gü rü ngexü̃gü ga tachigagüxü̃, rü nayaxõgü.
13 Natürü yexguma yema Yudíugü ga Techarónicacüã̱x nüxü̃ cuáchigagügu nax Beréawa rü ta nüxü̃ nax yaxuxü̃ ga Tupanaarü ore ga Pauru, rü yéma naxĩ, rü nananuexẽxẽ ga yema ĩanecüã̱x ga duü̃xü̃gü.
14 Natürü yexguma yemaxü̃ nacuáchigagügu ga yema yaxõgüxü̃, rü paxãma Pauruxü̃ ínaxũxũxẽẽgü ga guma ĩanewa rü ñu̱xmata márpechinüwa nangugü. Natürü ga Chíra rü Timutéu rü Beréagu narücho.
15 Rü yema duü̃xü̃gü ga Pauruxü̃ íxümücügüxü̃, rü wapurugu ínayaxümücügü ñu̱xmata ĩane ga Aténawa nangugü, rü ñu̱xũchi Beréaca̱x nawoegu. Rü Pauru rü yema duü̃xü̃güxü̃ yéma namuga nax paxa naxü̃tawa naxĩxü̃ca̱x ga Chíra rü Timutéu.
Aténawa nayexma ga Pauru
16 Rü yexguma Pauru rü Aténawa Chíraxü̃ rü Timutéuxü̃ nangu̱xẽẽgu, rü tama nataãẽcüraxü̃ yerü nüxü̃ nadau nax guxü̃wama ga guma ĩanewa rü poraãcü naxchicüna̱xãmaxãmare natupanaã̱xgüxü̃.
17 Rü yemaca̱x ga Pauru rü Yudíugüarü ngutaque̱xepataü̃wa Cristuchigaxü̃ nixu namaxã ga yema Yudíugü rü namaxã ga yema togü ga tama Yudíugü ixĩgüxü̃ ga Tupanaxü̃ icua̱xüü̃güxü̃. Rü guxü̃ ga ngunexü̃gu rü ĩanearü plazawa rü ta Cristuchigaxü̃ nixu namaxã ga yema duü̃xü̃gü ga yéma ãmücüwa ĩxü̃.
18 Rü nayexmagü ta ga ñuxre ga yatügü ga Epicúriugüarü ngu̱xẽẽtaewa ngúexü̃, rü togü ga Etóicugüarü ngu̱xẽẽtaewa ngúexü̃. Rü nümagü rü inanaxügüe ga Paurumaxã nax yanaxutagagüxü̃. Rü ñuxre ga nümagü rü ñanagürügü: —¿Rü ta̱xacü nixĩ i nüxü̃ yaxuxü̃ i ñaa yatü i idexaechamarexü̃? —ñanagürügü. Rü togü nanangãxü̃gü, rü ñanagürügü: —Maneca wüxi i to i nachixü̃anecüã̱xarü tupanagüarü orearü uruxü̃ nixĩ —ñanagürügü. Rü yemaacü nidexagü ga yema duü̃xü̃gü, yerü Pauru rü nüxü̃ nixu ga ore ga mexü̃ ga Ngechuchuchiga rü wena nax namaxü̃xü̃chiga.
19 Rü düxwa norü ãẽ̱xgacügüarü ngutaque̱xechica ga Areópagu ãégaxü̃wa nanagagü. Rü yéma nüxna nacagü, rü ñanagürügü nüxü̃: —Toma nüxü̃ tacuáxchaü̃ nax ta̱xacürü ngu̱xẽẽtae i ngexwaca̱xü̃xü̃ yixĩxü̃ i ngẽma namaxã cungu̱xẽẽtaexü̃.
20 Erü toxca̱x rü wüxi i taguma nüxü̃ taxĩnüexü̃ nixĩ i ngẽma ore, rü nüxü̃ tacuáxchaü̃ nax ta̱xacüchiga yixĩxü̃ i ngẽma nüxü̃ quixuxü̃ —ñanagürügü.
21 Rü yemaacü nidexagü, yerü guxü̃ma ga Aténacüã̱x rü yema to ga nachixü̃anecüã̱xgü ga yexma ãchiü̃güxü̃, rü woetama norü me nixĩ nax nüxü̃ naxĩnüexü̃ ga yexwaca̱xüxü̃ ga oregü rü nachiga nax yadexagüxü̃. Rü yexicagu narüxĩnüe.
22 Rü yemaca̱x ga Pauru rü inachi norü ngãxü̃tanüwa ga yema duü̃xü̃gü ga yema Areópagu ngutaque̱xegüxü̃, rü ñanagürü: —Pa Aténacüã̱xgüx, nüxü̃ chadau nax poraãcü perü tupanagügu perüxĩnüexü̃.
23 Erü ngẽxguma perü ngutaque̱xechicagüwa chixüpetüchigügu, rü nüxü̃ chadau i naxchicüna̱xãgü i nüxü̃ picua̱xüü̃güxü̃. Rü wüxi i nachicawa namaxã chayarüxũ i wüxi i Tupanaarü ãmarearü guruxü̃ i nagu ümatüxü̃ i naéga i ñaxü̃: “Tupana ya tama nüxü̃ icuácü”, ñaxü̃. Rü yimá Tupana ya tama nüxü̃ pecuáãcüma nüxü̃ picua̱xüü̃gücü nixĩ ya choma pemaxã nüxü̃ chixuchigacü.
24 Rü gumá Tupana ga naxücü ga ñaa naane rü guxü̃ma i nawa ngẽxmagüxü̃, rü nüma nixĩ i norü yora yixĩxü̃ i daxũguxü̃ i naane rü ñoma i naane. Rü ngẽmaca̱x nüma rü tama duü̃xü̃gü üxü̃ne ya Tupanapatagügu naxãchiü̃.
25 Rü nüma ya Tupana rü taxuca̱xma nanaxwa̱xe i texéarü ngü̃xẽxẽ erü taxuxü̃ma nüxü̃́ nataxu. Rü nüma nixĩ i guxãna naxããxü̃ i maxü̃, rü buanecü ya namaxã ingü̃ãtanücüücü rü guxü̃ma i ta̱xacü i togü ñu̱xma ngẽxmagüxü̃.
26 Nüma rü wüxi ga duü̃xü̃watama nanaxü ga guxü̃ma ga duü̃xü̃gü nax guxü̃ i naanewa nangẽxmagüxü̃ca̱x. Rü nüma inaxuneta i ñuxgu tá nax nabuxü̃ i duü̃xü̃gü rü ngexta tá naxãchiü̃xü̃ i wüxichigü.
27 17:27-28 Rü yemaacü nanaxü ga Tupana nax duü̃xü̃gü naxca̱x daugüxü̃ca̱x rü ñoma ẽanexü̃wa ta̱xacüca̱x idaugüxü̃rüxü̃ ngürüãchi nüxü̃ iyangaugüxü̃ca̱x. Natürü nüma ya Tupana rü woetama guxü̃guma tüxna nangaicamachire̱x. Erü nagagu nixĩ i imaxẽxü̃ rü ixĩã̱xtanücüüxü̃ rü ingóexü̃, ngẽxgumarüxü̃ i ñuxre i perü poperaarü ümatüruü̃gü i poetagü nüxü̃ ixuxü̃rüxü̃ rü ñanagürügü: “Tupanaxacü tixĩgü”, ñanagürügü.
28 Nüü̃ nadau 17:27
29 Rü ñu̱xma nax Tupanaxacügü ixĩgüxü̃, rü tama name i nagu tarüxĩnüe rü Tupana rü wüxi i naxchicüna̱xã i úirumüwa rü ẽ̱xna diẽrumüwa rü ẽ̱xna nutawa ixüxü̃rüxü̃ nixĩ. Erü guxü̃ma i ngẽma naxchicüna̱xãgü rü nümatama i duü̃xü̃gü nagu naxĩnüexü̃ãcüma nanaxügü.
30 Rü nũxcüma ga duü̃xü̃gü rü naechitamare ínatüe, natürü nüma ga Tupana rü namaxã yáxna naxĩnü. Natürü i ñu̱xma ya Tupana rü nanamu i duü̃xü̃gü i guxü̃wama nax naxca̱x nadaugüxü̃. Rü nanamu nax nüxü̃ naxoexü̃ i nacüma i chixexü̃gü.
31 Yerü nüma ga Tupana rü marü nüxü̃ naxuneta i wüxi i ngunexü̃ i nagu tá aixcüma guxü̃ i ñoma i naanecüã̱x i duü̃xü̃güna naca̱xaxü̃ i norü maxü̃chiga. Rü marü nüxü̃ naxuneta ya wüxi ya yatü ya Ngechuchu, rü yimá tá nixĩ ya duü̃xü̃güna cacü. Rü Tupana rü guxãxü̃ma nüxü̃ nacua̱xẽxẽ ga yema ga yexguma Ngechuchuxü̃ wena namaxẽẽgu —ñanagürü ga Pauru.
32 Rü yexguma yema nax wena namaxẽxü̃chigaxü̃ naxĩnüegu ga duü̃xü̃gü, rü ñuxre ga nümagü rü Pauruxü̃ nacugüe. Natürü ga togü rü ñanagürügü: —To i ngunexü̃gu tá wena cuxü̃́ itarüxĩnüe i ngẽmachiga —ñanagürügü.
33 Rü yexguma ga Pauru rü natanüwa ínaxũxũ.
34 Natürü ñuxre ga duü̃xü̃gü rü Pauruwe narüxĩ, rü Ngechuchuaxü̃́ nayaxõgü. Rü natanüwa nayexma ga Dioníchiu ga wüxi ga Areópagutanüxü̃, rü wüxi ga ngecü ga Dámari ga ngĩéga. Rü ñuxre ga togü rü ta nayaxõgü.
