Hechos 18:1-28
18 Rü yemawena rü Aténawa inaxũãchi ga Pauru, rü ĩane ga Coríntiuwa naxũ.
2 Rü yéma namaxã inayarüxũ ga wüxi ga Yudíu ga Aquíragu ãégaxü̃. Nüma rü Póntoanecüã̱x nixĩ, rü yexwacax Itáriaanewa ne naxũ ngĩmaxã ga naxma̱x ga Prichíra. Rü yéma Coríntiuwa nayexma, yerü Rómaarü ãẽ̱xgacü ga Cláudiu nanamu nax Rómawa ínachoxü̃xü̃ca̱x ga guxü̃ma ga Yudíugü. Rü Pauru rü Aquíraxü̃tagu nanaxũane.
3 Rü nüma ga Pauru rü Aquírarüxü̃ rü Prichírarüxü̃ nüxü̃ nacua̱x nax naxchirunaxca̱x ga düxenüarü üwa napuracüxü̃. Rü yemaca̱x ga Pauru rü naxü̃tagu narüxã̱ũ̱x nax wüxigu nügümaxã napuracüexü̃ca̱x.
4 Rü guxü̃ ga ngü̃xchigaarü ngunexü̃gu rü Yudíugüarü ngutaque̱xepataü̃wa naxũũxü̃ ga Pauru, rü duü̃xü̃gümaxã nidexaxü̃, rü nayaxucu̱xẽgüxü̃. Rü yexgumarüxü̃ ta nayaxucu̱xẽgüxü̃ ga yema duü̃xü̃gü ga tama Yudíugü ixĩgüxü̃.
5 Rü yexguma Chíra rü Timutéu Coríntiuwa ngugügu ga Machedóniawa ne ĩxü̃, rü nüma ga Pauru inanaxügü nax guxü̃ ga ngunexü̃ nüxü̃ yaxuxü̃ ga Tupanaarü ore. Rü meama Yudíugüxü̃ nangúexẽxẽ nax Ngechuchu rü aixcüma Cristu yixĩxü̃.
6 Natürü nümagü ga yema Yudíugü rü inanaxügüe ga Paurumaxã nax nanuexü̃ rü namaxã naguxchigagüxü̃. Rü yexguma inapamüchiru ga Pauru. Rü yema nixĩ ga wüxi ga cua̱xruxü̃ naxca̱x ga yema duü̃xü̃gü nax yemawa nüxü̃ yacua̱xãchitanüxü̃ca̱x ga norü chixexü̃. Rü ñanagürü nüxü̃: —Pegagu tátama nixĩ nax ipeyarütauxexü̃, rü marü tama chaugagu nixĩ. Rü ñomaü̃cüü i choma rü tá ngẽma tama Yudíugü ixĩgüxü̃tanüwa chaxũ —ñanagürü ga Pauru.
7 Rü ínaxũxũ ga guma ngutaque̱xepataü̃wa. Rü yéma nayexma ga wüxi ga yatü ga Tíchiu ga Yúchugu ãégaxü̃. Rü nüma rü Tupanaxü̃ nangechaü̃ rü yexma ngutaque̱xepataü̃cüwagu naxãpata. Rü yemaxü̃tawa naxũ ga Pauru, rü yexma nape.
8 Rü Críspo ga ngutaque̱xepataü̃arü ãẽ̱xgacü rü naxma̱x rü guxü̃ma ga naxacügü rü Cori ya Ngechuchuaxü̃́ nayaxõgü. Rü yexgumarüxü̃ ta muxü̃ma ga Coríntiucüã̱xgü rü nayaxõgü ga yexguma nüxü̃ naxĩnüegu ga yema ore, rü ínabaiü̃.
9 Rü wüxi ga chütaxü̃ rü nango̱xetü ga Pauru. Rü Cori ya Tupana namaxã nidexa, rü ñanagürü: —¡Taxṹ i cumuü̃xü̃! ¡Rü nüxü̃ ixuama i chorü ore! ¡Rü taxṹ i curüchianexü̃!
10 Erü choma rü cuxü̃tagu changẽxma. Rü taxúetama chixexü̃ cumaxã taxü erü daa ĩanewa rü choxü̃́ nangẽxma i muxü̃ma i chorü duü̃xü̃gü —ñanagürü ga Tupana.
11 Rü yemaca̱x wüxi ga taunecüarü ngãxü̃ Coríntiuwa nayexma ga Pauru. Rü yéma yema duü̃xü̃gütanüwa namaxã nangúexẽẽtae ga Tupanaarü ore.
12 Natürü yexguma Acáyaanearü ãẽ̱xgacü yixĩxgu ga Garióü̃, rü yema Yudíugü rü wüxigu Pauruxü̃ niyauxgü, rü ãẽ̱xgacüpe̱xewa nanagagü.
13 Rü ñanagürügü nüxü̃ ga gumá ãẽ̱xgacü: —Ñaa yatü rü duü̃xü̃güxü̃ naxuxcu̱xẽ nax tama torü mugü nüxü̃ ixuxü̃ãcüma Tupanaxü̃ yacua̱xüü̃güxü̃ca̱x —ñanagürügü.
14 Rü Pauru marü nachonagüchaü̃, natürü nüma ga ãẽ̱xgacü ga Garióü̃ rü yema Yudíugüxü̃ nangãxü̃, rü ñanagürü: —Rü ngẽxguma chi wüxi i taxü̃ i chixexü̃ naxü̱xgu, rüe̱xna namáẽtagu, rü ngẽxguma chi nixĩ i choma i pexü̃́ ichaxĩnüxü̃, Pa Yudíugüx.
15 Natürü ngẽma pecümachiga rü perü mugüchiga rü perü ngu̱xẽẽtaechiga nax yixĩxü̃, rü choma rü tama nüxü̃ chacuáxchaü̃ i ngẽma. ¡Rü pematama penamexẽxẽ̱x! Rü choma rü tama ngẽmachigaarü ãẽ̱xgacü chixĩxchaü̃ —ñanagürü.
16 Rü yexguma ínanawoxü̃ ga yéma.
17 Rü yexguma ga yema duü̃xü̃gü rü Chótenexü̃ niyauxgü. Rü nüma rü Yudíugüarü ngutaque̱xepataü̃arü ãẽ̱xgacü nixĩ. Rü yema duü̃xü̃gü rü yexmatama ãẽ̱xgacü ga Garióü̃pe̱xegu Chótenexü̃ nacua̱i̱xgü. Natürü nüma ga Garióü̃ rü taxu ñanagürümare.
Pauru rü Antioquíaca̱x nataegu, rü ñu̱xũchi wenaxarü inaxũãchi nax norü tomaepü̱xcüna to ga nachixü̃anegüwa nangeaxü̃ ga Tupanaarü ore
18 Rü yemawena rü muxü̃ma ga ngunexü̃ yéma Coríntiuwa nayexma ga Pauru. Rü yixcaama nüxü̃ narümoxẽ ga yema yaxõgüxü̃ rü nüxna inaxũãchi. Rü ĩane ga Chencréawa naxũ namaxã ga Prichíra rü Aquíra. Rü Chencréawa naxü̃pa nax yachoü̃xü̃, rü nügü nidüpü̱xüeru ga Pauru yerü marü nayanguxẽxẽ ga wüxi ga uneta ga Tupanamaxã nüxü̃ yaxuxü̃.* Rü ñu̱xũchi Chencréaarü türewa wüxi ga wapurugu nichoü̃ nax Chíriaanewa naxĩxü̃ca̱x.
19 Rü yexguma Epéchiuwa nangugügu, rü Pauru nüxna nixũgachi ga Prichíra rü Aquíra, rü Yudíugüarü ngutaque̱xepataü̃wa naxũ. Rü yéma namaxã nidexa ga yema Yudíugü ga guma ngutaque̱xepataü̃wa ngutaque̱xegüxü̃xü̃.
20 Rü yema Yudíugü, rü nüxü̃ naca̱a̱xü̃gü nax muxü̃ma ga ngunexü̃gü yexma naxã́ũxü̃ca̱x, natürü ga nüma ga Pauru rü tama nanaxwa̱xe.
21 Rü yemaca̱x nüxü̃ narümoxẽ, rü ñanagürü nüxü̃: —Rü ngẽxguma Tupana naxwa̱xegu, rü wena táxarü pexca̱x chataegu —ñanagürü. Rü yemawena rü Epéchiuarü türewa nayarüxüe, rü inaxũãchi.
22 Rü Checharéaarü türewa nangu, rü yéma ínaxüe. Rü ñu̱xũchi Yerucharéü̃wa naxũ nax nüxü̃ yanamoxẽxü̃ca̱x ga yema yaxõgüxü̃ ga yéma yexmagüxü̃. Rü ñu̱xũchi Antioquíawa naxũ.
23 Rü yexguma marü ñuxre ga ngunexü̃ yéma Antioquíawa nayexmagu, rü wenaxarü inaxũãchi ga Pauru nax wüxichigü ga ĩane ga Gárataanewa rü Fríquiaanewa yexmagünewa íyadauxü̃ca̱x rü yataãẽxẽẽgüaxü̃ca̱x ga guxü̃ma ga yema yaxõgüxü̃ ga guma ĩanegüwa yexmagüxü̃.
Apóru rü Epéchiuwa nüxü̃ nixu ga Tupanaarü ore
24 Rü yexgumaü̃cüxü rü Epéchiuwa nangu ga wüxi ga Yudíu ga Apórugu ãégaxü̃. Rü nüma rü ĩane ga Areyandríacüã̱x nixĩ, rü nüxü̃́ natauxcha nax duü̃xü̃güpe̱xewa yadexaxü̃. Rü meama nüxü̃ nacua̱x ga Tupanaarü ore i ümatüxü̃.
25 Rü nüma ga Apóru rü mea nüxü̃ nacua̱x ga Cuáü̃ ga baiü̃ẽẽruü̃arü ngu̱xẽẽtae ga Cori ga Ngechuchuchiga. Rü nataãẽãcüma nidexa rü norü ngúchaü̃maxã nanangúexẽxẽ ga Ngechuchuchiga. Natürü Cuáü̃arü baiü̃ẽẽchigaxicatama nixĩ ga nüxü̃ nacuáxü̃.
26 Rü nüma ga Apóru rü tama namuü̃ãcüma inanaxügü nax yadexaxü̃ ga Yudíugüarü ngutaque̱xepataü̃wa. Natürü yexguma Apóruxü̃ naxĩnüegu ga Prichíra rü Aquíra, rü napatawa nanagagü nax yexeraãcü namaxã inanguxü̃xẽẽãxü̃ca̱x ga Ngechuchuchiga.
27 Rü yexguma Acáyaanewa naxũxchaü̃gu ga Apóru, rü yema yaxõgüxü̃ ga Epéchiucüã̱x nüxü̃ narüngü̃xẽẽgü. Rü popera yéma namugü naxca̱x ga yema yaxõgüxü̃ ga Acáyaanecüã̱x nax mea Apóruxü̃ nayauxgüxü̃ca̱x. Rü yexguma Acáyaanewa nanguxgu ga Apóru rü poraãcü nüxü̃ narüngü̃xẽxẽ ga yema duü̃xü̃gü ga Tupanaarü ngechaü̃gagu Ngechuchuaxü̃́ yaxõgüxü̃.
28 Rü guxü̃ ga duü̃xü̃güpe̱xewa nüxü̃ nüxü̃ naxĩnüxẽxẽ nax aixcüma ínatüexü̃ ga yema Yudíugü ga tama Ngechuchuxü̃ cua̱xgüchaü̃xü̃. Rü nümagü ga Yudíugü rü taxucürüwama nayaxãgü ga yema Apóru nüxü̃ ixuxü̃, yerü ga nüma ga Apóru rü Tupanaarü ore ga ümatüxü̃wa meama nüxü̃ nanawe̱x nax Ngechuchu rü aixcüma Cristu yixĩxü̃.
Notas
^ 18:18 Woetama yema nixĩ ga nacümagü ga Yudíugü ga yexguma yanguxẽẽgüãgu ga wüxi ga uneta ga Tupanamaxã nüxü̃ yaxuxü̃.
