Hechos 19:1-41
19 Rü yexguma Coríntiuwa nayexmayane ga Apóru, rü Pauru rü naxpü̱xanegu idaxü̃ ga namawa nixüpetü, rü Epéchiuwa nangu. Rü yexma nüxü̃ nayangau ga ñuxre ga yaxõgüxü̃.
2 Rü nüxna naca, rü ñanagürü nüxü̃: —¿Marü penayaxuxü̃ ga Tupanaãxẽ ya Üünecü ga yexguma peyaxõgügu? —ñanagürü. Rü nümagü nanangãxü̃, rü ñanagürügü: —Tama. Taguma nüxü̃ taxĩnüechiga nax ta̱xacü yixĩxü̃ i Tupanaãxẽ ya Üünecü —ñanagürügü.
3 Rü yexguma ga Pauru rü nüxna naca rü ñanagürü nüxü̃: —¿Texéaxü̃́ peyaxõgüxü̃ ga yexguma ípebaiü̃gu? —ñanagürü. Rü nümagü nanangãxü̃, rü ñanagürügü: —Toma nüxü̃́ tayaxõ ga yema Cuáü̃ ga baiü̃xẽẽruü̃arü ngu̱xẽẽtae —ñanagürügü.
4 Rü yexguma ga Pauru rü ñanagürü nüxü̃: —Cuáü̃ ínanabaiü̃xẽxẽ ga yema duü̃xü̃gü ga nüxü̃ rüxoexü̃ ga nacüma ga chixexü̃ rü Tupanaca̱x daugüxü̃. Natürü yema duü̃xü̃gümaxã nüxü̃ nixu ta nax nüxü̃́ yaxõgüãxü̃ca̱x ga Ngechuchu ga naweama ne ũcü —ñanagürü ga Pauru.
5 Rü yexguma yemaxü̃ naxĩnüegu ga yema yaxõgüxü̃ ga Epéchiuwa yexmagüxü̃ rü ínabaiü̃ naégagu ga Cori ya Ngechuchu.
6 Rü yexguma Pauru rü yema yaxõgüxü̃étügu naxǘxme̱xgu, rü nüxna nangu ga Tupanaãxẽ ya Üünecü, rü to ga nagawachigü nidexagü, rü nüxü̃ nixugüe ga Tupanaarü ore.
7 Rü 12 ga yatügü nixĩgü ga yema yaxõgüxü̃.
8 Rü tomaepü̱x ga tauemacü yéma nayexma ga Pauru. Rü Yudíugüarü ngutaque̱xepataü̃wa naxũũxü̃ rü tama namuü̃ãcüma nüxü̃ nixuuxü̃ ga Tupanaarü ore. Rü nanangúexẽxẽ nax aixcüma ãẽ̱xgacü yixĩxü̃ ya Tupana, rü nüxü̃́ nanangúchaü̃xẽxẽ nax Ngechuchuaxü̃́ yaxõgüãxü̃ca̱x.
9 Natürü nayexma ga ñuxre ga duü̃xü̃gü ga tama nüxü̃ cua̱xgüchaü̃xü̃ rü tama yaxõgüchaü̃xü̃. Rü nümagü inanaxügüe nax yema muxü̃ma ga duü̃xü̃güpe̱xewa chixexü̃ yaxugüexü̃ nachigagu ga Cori ya Ngechuchu. Rü yemaca̱x ga Pauru rü nüxna nixũgachi, rü tóxnamana nanagagü ga yema yaxõgüxü̃ nawa ga wüxi ga ngutaque̱xepataxü̃ ga Tiránuarü ngúepataü̃ ga naéga. Rü guxü̃ ga ngunexü̃gu namaxã nüxü̃ nixuchiga ga ore i mexü̃.
10 Rü yemaacü nanaxü ga taxre ga taunecü, rü yemaacü guxü̃ma ga Áchiaanecüã̱xgü ga Yudíugü rü Griégugü rü nüxü̃ naxĩnüe ga Cori ya Tupanaarü ore.
11 Rü Tupana rü Pauruxü̃ narüngü̃xẽxẽ nax naxüaxü̃ ga taxü̃gü ga cua̱xruü̃gü ga Tupanaarü poramaxã naxüxü̃.
12 Rü a̱i̱xrücü ga norü dechugü ga Pauru rü naxchirugü rü duü̃xü̃gü rü yema ida̱xaweexü̃xü̃tawa nanangegü. Rü yexguma yema ida̱xaweexü̃ nüxü̃ ingógügügu ga yema naxchiru rü ẽ̱xna dechu, rü naxca̱x nitaanegü. Rü yema duü̃xü̃gü ga ngo̱xoã̱xgüxü̃ rü ta naxca̱x nitaanegü.
13 Natürü nayexma ga ñuxre ga Yudíugü ga ĩanearü namagüwa ixĩẽtanüxü̃ rü duü̃xü̃güwa ínawoxü̃xü̃ ga ngo̱xogü. Rü nüxü̃ naxügü nax Cori ya Ngechuchuégagu ínawoxü̃ãxü̃ ga ngo̱xogü. Rü ñanagürügü: —Ngechuchu ya Pauru nüxü̃ ixuchigacüégagu pexü̃ tamu nax ípechoxü̃xü̃ca̱x —ñanagürügü ga yema Yudíugü.
14 Rü yema nixĩ ga naxügüxü̃ ga yema 7 ga nanegü ga yema Yudíu ga Echébagu ãégaxü̃. Rü nüma ga Echéba rü chacherdótegüarü ãẽ̱xgacü nixĩ.
15 Natürü wüxi ga ngunexü̃gu ga yexguma wüxi ga ngo̱xoxü̃ ínata̱xüchigüchaü̃gu, rü yema ngo̱xo nanangãxü̃, rü ñanagürü: —Nüxü̃ chacua̱x ya Ngechuchu, rü nüxü̃ chacua̱x ya Pauru nax texé yixĩxü̃. ¿Natürü i pema rü texégü pixĩgü? —ñanagürü.
16 Rü yexguma ga yema yatü ga ngo̱xoã́xü̃ rü yema duü̃xü̃gü ga ínata̱xüchigüchaü̃xü̃na nayuxu, rü nüxü̃ narüporamae ga guxü̃ma rü ínanagáuü̃xü̃negü. Rü yemaacü ngexchiruxü̃ma rü napíexü̃ma nibuxmü ga gumá ĩwa.
17 Rü guxü̃ma ga Yudíugü rü Griégugü ga Epéchiuwa yexmagüxü̃ rü nüxü̃ nacuáchiga ga yema. Rü poraãcü namuü̃e ga guxü̃ma. Rü yemaacü yexeraãcü natachiga ga naéga ga Cori ga Ngechuchu.
18 Rü muxü̃ma ga yema yaxõgüxü̃ rü yéma ningugüetanü, rü guxü̃ ga duü̃xü̃güpe̱xewa nüxü̃ nixugüe ga guxü̃ma ga norü chixexü̃ ga ü̃pa naxügüxü̃.
19 Rü muxü̃ma ga yema iyuüechiréxü̃, rü yéma nanana ga norü yuüpane ga nawa nangúexü̃, rü guxãpe̱xewa ínanagu. Rü yexguma nangugügüãgu ga natanü ga yema yuüpanegü, rü 50,000 tachinü ga diẽru ga tatanüxü̃wa nangu ga natanü.
20 Rü yemaacü ga Cori ya Tupanaarü ore, rü yexeraãcü nixũchigü, rü yexeraãcü duü̃xü̃gü nüxü̃ nadau nax naporaxü̃ ga yema ore.
21 Rü yemawena ga Pauru, rü nagu narüxĩnü ga Machedóniaanewa rü Acáyaanewaxíra nax naxũxü̃, rü ñu̱xũchi Yerucharéü̃wa nax naxũxü̃. Rü ñanagürü: —Yerucharéü̃wa tá chaxũ, rü yixcaama rü Rómawa rü tá ta chaxũ —ñanagürü.
22 Rü yemaca̱x nügüpe̱xegu Machedóniaanewa nanamugü ga taxre ga norü ngü̃xẽẽruxü̃ ga Timutéu rü Erástu. Natürü nüma ga Pauru rü ñuxre ga ngunexü̃ Áchiaanegu narüxã̱ũ̱x.
Nanue ga duü̃xü̃gü ga Epéchiuwa
23 Rü yexgumaü̃cüxü ga Epéchiuwa rü nanue ga duü̃xü̃gü nachigagu ga Cori ya Tupanaarü ore.
24 Rü yemaacü naxüpetü nagagu ga wüxi ga yatü ga diẽrumüwa puracüxü̃ ga Demétriugu ãégaxü̃. Rü nüma rü diẽrumüwa ínanaxüxü̃ ga tupana ga Artemíchaarü tupaucachicüna̱xãgü. Rü nüma ga Demétriu rü norü puracütanüxü̃ rü taxü̃ ga diẽru nayauxgü nawa ga yema puracü.
25 Rü nüma ga Demétriu rü nanangutaque̱xexẽxẽ ga norü puracütanüxü̃ namaxã ga yema togü ga yemawa puracüexü̃, rü ñanagürü nüxü̃: —Pa Chomücügüx, pema rü mea nüxü̃ pecua̱x nax ñaa puracüwa nixĩ i nayauxgüxü̃ i tórü diẽru.
26 Rü marü nüxü̃ pedaugü rü nüxü̃ pexĩnüe nax ngẽma Pauru yaxucu̱xẽgüxü̃ i duü̃xü̃gü, rü namaxã nüxü̃ yaxuxü̃ nax tama aixcüma tupanagü yixĩxü̃ i ngẽma tupanagü i yixema ixügüxü̃. Rü ngẽmaãcü muxü̃ma i duü̃xü̃güxü̃ nüxü̃ narüxoexẽxẽ nax tama tórü tupanagüaxü̃́ yaxõgüãxü̃ca̱x. Rü tama núma Epéchiuwaxicatama ngexü̃ nawagü natürü wixguxüchi guxü̃ i Áchiaanewa ngẽmaãcü chixri nayaxucu̱xẽgü i duü̃xü̃gü.
27 Rü pema nüxü̃ pecua̱x rü tórü puracüca̱x rü naxãũcüma i ngẽma. Rü wüxi i chixexü̃ ta nixĩ naxca̱x i tórü tupana i Artemíchaarü tupauca ya taxü̃ne. Rü ñu̱xma rü muxü̃ma i duü̃xü̃gü rü ngĩxü̃ nangechaü̃ i Artemícha i guxü̃ i Áchiaanewa rü guxü̃ i naanewa. Natürü ngẽma Pauruarü ucu̱xẽgagu rü düxwa taxuxü̃táma ngĩxü̃ nangechaü̃ i duü̃xü̃gü, rü ngẽmaãcü tá düxwa inarüxo i tórü puracü —ñanagürü ga Demétriu.
28 Rü yexguma yemaxü̃ naxĩnüegu, rü poraãcü nanue, rü tagaãcü ñanagürügü: —¡Namaxü̃ i Epéchiucüã̱xgüarü tupana i Artemícha! —ñanagürügü.
29 Rü guxü̃ma ga yema ĩanecüã̱xgü rü poraãcü yexma nanaxĩ̱xãchitanüãxẽ. Rü ínanayauxü̃ ga Gáyu rü Aristárcu ga Machedóniaanecüã̱xgü ga Paurumücügü, rü guma ĩanearü estádiuwa nanagauxü̃tanü.
30 Rü Pauru rü ta yexma naxücuchaü̃ nax yema duü̃xü̃gümaxã yadexaxü̃ca̱x, natürü yema yaxõgüxü̃ nüxna nanachu̱xu ga yexma nax naxücuxü̃.
31 Rü yema Áchiaanearü ãẽ̱xgacügütanüwa rü nayexma ga ñuxre ga Paurumücügü ixĩgüxü̃. Rü nümagü rü ta Pauruxü̃tawa namugagü nax tama yema estadiugu naxücuxü̃ca̱x.
32 Rü yoxni ga duü̃xü̃gü ga yema ínangutaque̱xegüxü̃wa rü nümaxü̃ rü wüxi ga oremaxã aita naxüe, rü togü rü to ga oremaxã aita naxüe. Yerü poraãcü nanue ga guxü̃ma ga yema duü̃xü̃gü ga yéma ngutaque̱xegüxü̃. Rü muxü̃ma rü tama nüxü̃ nacua̱xgü ga ta̱xacüca̱x nax nangutaque̱xegüxü̃.
33 Natürü yéma nayexma ga wüxi ga Yudíu ga Areyándrugu ãégaxü̃. Rü yema togü ga Yudíugü rü namaxã nüxü̃ nixu ga ta̱xacüca̱x nax nangutaque̱xexü̃. Rü duü̃xü̃güpe̱xewa nanamugü nax yadexaxü̃ca̱x rü naétüwa nachogüxü̃ca̱x ga yema Yudíugü ga yéma yexmagüxü̃. Rü nüma ga Areyándru rü naxunagüme̱xẽ nax iyanachianegüxü̃ca̱x ga duü̃xü̃gü, nax namaxã yadexaxü̃ca̱x.
34 Natürü yexguma nüxü̃ yacua̱xãchitanügu ga Areyándru rü Yudíu nax yixĩxü̃, rü guxü̃ma ga yema duü̃xü̃gü rü wüxigu tagaãcü aita naxüe. Rü taxre ga ora ninge ga nax tagaãcü ñagüxü̃: —¡Namaxü̃ i Epéchiucüã̱xgüarü tupana i Artemícha! —ñagüxü̃.
35 Rü düxwa yema ĩanearü ãẽ̱xgacü nanachiãchixẽxẽ ga yema muxü̃ma ga duü̃xü̃gü, rü ñanagürü nüxü̃: —Pa Epéchiucüã̱xgüx, guxü̃ma i duü̃xü̃gü nüxü̃ nacua̱x nax daa ĩane rü tórü tupana i tacü i Artemíchaarü tupauca ya taxü̃nearü dauruxü̃ nax yixĩxü̃. Rü guxü̃ma nüxü̃ nacua̱x nax núma tüxü̃́ nangẽxmaxü̃ i Artemíchachicüna̱xã i daxũwa rünguxü̃.
36 Rü ñu̱xma nax guxü̃ma nüxü̃ cuáxü̃ nax aixcüma yixĩxü̃ i ngẽma, rü name nixĩ nax pechiãchixü̃, rü taxuxü̃ma i chixexü̃ pexüexü̃.
37 Erü ñaa yatügü i nua pegagüxü̃, rü taxuxü̃ma i chixexü̃ ngĩmaxã naxügü i tórü tupana, rü tama chixexü̃ nixugüe ngĩchigagu.
38 Rü ngẽxguma chi Demétriu rü ngẽma namücügü i namaxã napuracüexü̃ rü nüxü̃́ nangẽxmagu i ta̱xacü i tama norü me ixĩxü̃, rü nangẽxma i ngutaque̱xechicagü i ngextá ãẽ̱xgacügü duü̃xü̃güxü̃ ícagüxü̃wa. Rü name nixĩ nax ngéma ãẽ̱xgacügüpe̱xewa namexẽxẽãxü̃ i ta̱xacü i tama norü me ixĩxü̃.
39 Rü ngẽxguma nangẽxmagu i ta̱xacü i to i perü guxchaxü̃gü, rü name nixĩ i ĩanearü ãẽ̱xgacügüarü ngutaque̱xewa penamexẽxẽ i ngẽma.
40 Erü ngẽma ñu̱xma ngupetüxü̃gagu rü ãũcümaxü̃wa tangexmagü rü ngürüãchi ãẽ̱xgacü ya tacümaxã tá tüxü̃ nixugüe nax guxchaxü̃ca̱x idaugüxü̃. Rü aixcüma taxumaama tanangãxü̃ i ãẽ̱xgacü ega tüxna nacaxgu naxca̱x i ñaa nax penuexü̃ —ñanagürü.
41 Rü yexguma marü yema ñaxguwena, rü ínayamugü ga yema duü̃xü̃gü.
