Hechos 20:1-38
20 Rü yexguma marü nangupetügu ga yema nax ínanuexü̃ ga duü̃xü̃gü, rü Pauru naxca̱x nangema ga yema yaxõgüxü̃ nax yaxucu̱xẽgüãxü̃ca̱x. Rü yexguma marü namaxã nüxü̃ nachaugu, rü nüxü̃ narümoxẽ, rü inaxũãchi ga Machedóniaanewa nax naxũxü̃.
2 Rü yexguma yema naanewa naxüpetügu, rü taãẽxü̃ ga oremaxã nayaxucu̱xẽgü ga yema yaxõgüxü̃ ga wüxichigü ga ĩanewa yexmagüxü̃. Rü yemaacü Griégugüchiü̃anewa nangu.
3 Rü yéma nayexma ga tomaepü̱x ga tauemacü. Rü yexguma marü inaxũãchichaü̃gu ga Chíriaanewa nax naxũxü̃, rü tama wapurugu nixũ yerü nüxü̃ nacuáchiga nax Yudíugü yama̱xgüchaxü̃xü̃. Rü yemaca̱x nagu narüxĩnü ga dauxchitagu nax nataeguxü̃, rü wenaxarü Machedóniaanewa nax naxüpetüxü̃.
4 Rü ínayaxümücügü ga Chópatro ga Beréacüã̱x ga Píru nane, rü Aristárcu rü Segundu ga Techarónicacüã̱xgü, rü Gáyu ga Dérbecüã̱x, rü Timutéu, rü Tíquicu, rü Trófimu ga Áchiaanecüã̱xgü.
5 Rü yema yatügü rü nüxíra tope̱xegu naxãgü, rü Tróawa toxü̃ nayarüngu̱xẽẽgü.
6 Rü nawena ga yema Yudíugüarü peta ga Üpetüchiga ga paũ ga ngearü pu̱xẽẽruü̃ã́xü̃ nagu nangõ̱xgüxü̃, rü wapurugu Pirípuwa itaxĩãchi. Rü wüxime̱e̱xpü̱x ga ngunexü̃ ngupetügu, rü Tróagu nüxü̃ tayangaugü ga yema tope̱xegu ãgüxü̃. Rü yexma tarücho ga 7 ga ngunexü̃.
Tróagu nanaxũane ga Pauru
7 Rü yema yüxüarü ngunexü̃gu rü tangutaque̱xegü namaxã ga yema yaxõgüxü̃ nax tanangṍxü̃ca̱x ga paũ ga bücuxü̃ yema Ngechuchu toxü̃ ngúexẽẽxü̃rüxü̃. Rü yema yaxõgüxü̃maxã nidexa ga Pauru. Rü nanama̱xẽxẽ ga norü dexa ñu̱xmata ngãxü̃cüwa nangu, yerü moxü̃ãcü inaxũãchichaü̃.
8 20:8-9 Rü guma ĩpataarü tomaepü̱xchiü̃wa yexmaxü̃ ga ucapuwa tangutaque̱xegü. Rü namu ga omü ga yéma naigüxü̃. Rü nayexma ga wüxi ga ngextü̱xücü ga Eutícu ga naéga. Rü yéma wüxi ga beü̃tánawa narüto. Natürü ga Pauruarü dexa, rü poraãcü nama̱x. Rü yemaca̱x ga gumá ngextü̱xücü rü poraãcü nayaxta, rü düxwa nipeãchi rü gumá ĩpataarü tomaepü̱xchiü̃wa yexmaxü̃ ga ucapuarü beü̃tánawa narüngu, rü ñaxtüanegu nangu. Rü yéma yucüma nanayauxgü.
9 Nüü̃ nadau 20:8
10 Rü ínarüxĩ ga Pauru, rü gumá ngextü̱xücüétügu nayangücuchi rü nüxna nana̱i̱xãchi. Rü ñu̱xũchi duü̃xü̃güxü̃ ñanagürü: —¡Taxṹ i peba̱i̱xãchiexü̃, erü namaxü̃ nixĩ! —ñanagürü.
11 Rü yexguma wenaxarü daxũ naxĩ, rü inanabücu ga yema paũ, rü nanangõ̱x. Rü wenaxarü nidexa ñu̱xmata yangune, rü yexguma inaxũãchi.
12 Rü gumá ngextü̱xücü rü maxü̃cü napatawa nanagagü. Rü yemaca̱x poraãcü nataãẽgü ga guxü̃ma ga yema yaxõgüxü̃ ga Tróawa yexmagüxü̃.
Tróawa inaxũãchi ga Pauru rü Mirétuwa naxũ
13 Rü Pauru rü dauxchitagu nixũchaü̃ ñu̱xmata ĩane ga Áchuwa nangu yerü yemaacü tomaxã inaxuneta. Natürü ga toma rü toxíra wapurugu itaxĩãchi ñu̱xmata Áchuwa tangugü nax yéma Pauruxü̃ tigaexü̃ca̱x.
14 Rü yexguma Áchugu Pauruxü̃ itayangauxgu, rü yéma toxü̃ nixüe. Rü tachopetü ga yéma ñu̱xmata Miterénewa tangugü.
15 Rü yéma itaxĩãchi rü moxü̃ãcü Quíuarü to̱xma̱xtawa tachopetü. Rü yemaarü moxü̃ãcü Chámoarü türewa tangugü. Rü yemaarü moxü̃ãcüama Mirétuwa tangugü.
16 Rü yemaacü ítixĩ yerü ga Pauru rü tama Áchiaanegu nanuxcüchaü̃. Yerü nanaxwa̱xe nax paxa Yerucharéü̃wa nanguxü̃ naxca̱x ga Pẽntecostéarü ngunexü̃. Rü yemaca̱x nagu narüxĩnü nax tama Epéchiugu íyadauxü̃.
Yaxõgüxü̃arü ãẽ̱xgacügü ga Epéchiucüã̱xmaxã nidexa ga Pauru
17 Natürü yexguma Mirétuwa tangugügu rü Epéchiuwa naxca̱x namuga ga Pauru nax naxü̃tawa naxĩxü̃ca̱x ga yema yaxõgüxü̃arü ãẽ̱xgacügü ga Epéchiucüã̱x.
18 Rü yexguma Pauruxü̃tawa nangugügu, rü nüma rü ñanagürü nüxü̃: —Pema nüxü̃ pecua̱x nax mea pepe̱xewa chamaxü̃xü̃ ga yexguma noxritama nua Áchiaanewa chaxũxgumama.
19 Rü guxü̃guma ga yexguma petanüwa chayexmagu, rü meama chanaxü ga Cori ya Tupanaarü puracü, rü taguma chaugü chicua̱xüxü̃. Rü woo muẽ̱xpü̱xcüna poraãcü changechaü̃gu, nagagu ga yema chixexü̃ ga chomaxã naxügüchaü̃xü̃ ga Yudíugü, natürü naétüwa chanaxüama ga yema puracü.
20 Rü taguma íchayachaxãchi ga pemaxã nüxü̃ nax chixuxü̃ ga guxü̃ma ga yema ore ga perü mexü̃ca̱x ixĩxü̃. Rü guxü̃ ga duü̃xü̃güpe̱xewa, rü pepatagüwa rü ta pexü̃ changúexẽxẽ ga yema ore.
21 Rü Yudíugümaxã rü yema tama Yudíugü ixĩgüxü̃maxã nüxü̃ chixu nax namexü̃ nax nüxü̃ naxoexü̃ca̱x ga norü chixexü̃gü rü Tupanaga naxĩnüexü̃ca̱x, rü nüxü̃́ nax yaxõgüãxü̃ca̱x ga tórü Cori ya Ngechuchu.
22 Rü ñu̱xma rü Yerucharéü̃wa chaxũ erü Tupanaãxẽ ya Üünecü rü ngéma choxü̃ namu. Natürü tama nüxü̃ chacua̱x nax ta̱xacü tá choxü̃ üpetüxü̃ i ngéma.
23 Rü ngẽma nüxü̃ chacuáxü̃ nixĩ nax Tupanaãxẽ ya Üünecü chomaxã nüxü̃ ixuxü̃ nax guxü̃nema ya ĩane i ngextá íchixũgüxü̃wa rü tá choxü̃ napoxcuexü̃ rü ngúxü̃ tá chingexü̃. Rü ngexicatama nixĩ i nüxü̃ chacuáxü̃.
24 Natürü tama ngẽma ãũcümaxü̃gu charüxĩnü erü nüetama nixĩ ega woo chayu̱xgu. Natürü ngẽma chanaxwa̱xexü̃ nixĩ nax taãẽãcüma chapuracüamaxü̃ nax mea chayanguxẽẽxü̃ca̱x i ngẽma puracü ga tórü Cori ya Ngechuchu choxna ãxü̃ rü nüxü̃ chixuxü̃ca̱x i norü ore i Tupanaarü ngechaxü̃chiga.
25 Rü ñu̱xma rü marü nüxü̃ chacua̱x rü tagutáma wena choxü̃ pedaugü i bai i wüxi i pema ga marü pemaxã nüxü̃ chixuxe nax aixcüma ãẽ̱xgacü yixĩxü̃ ya Tupana.
26 Rü ngẽmaca̱x i ñoma i ngunexü̃gu rü pemaxã nüxü̃ chixu rü marü tama chaugagu nixĩ ega texé petanüwa iyarütaxu̱xgu.
27 Erü marü meama pemaxã nüxü̃ chixu i guxü̃ma i ngẽma Tupana pexü̃́ naxwa̱xexü̃, rü taxuxü̃ma ichicu̱x.
28 Rü ngẽmaca̱x i ñu̱xma rü penaxwa̱xe nax pexuãẽgüxü̃ rü mea nüxna pedaugüxü̃ i guxü̃ma i yaxõgüxü̃ i petanüwa ngẽxmagüxü̃. Erü ngẽma nixĩ i Tupanaãxẽ ya Üünecü nagu pexü̃ mugüxü̃ nax nüxna pedaugüxü̃ca̱x i ngẽma Tupanaarü duü̃xü̃gü i yaxõgüxü̃ ya Ngechuchu nagümaxãtama naxca̱x taxexü̃.
29 Choma nüxü̃ chacua̱x rü ngẽxguma íchixũxgu, rü chowena tá pexca̱x nua naxĩ i togü i duü̃xü̃gü. Rü tá nanachixexẽxẽchaü̃ i ngẽma yaxõgüxü̃ ñoma airugü i idüraexü̃ i carnérugüxü̃ ngĩãchixẽẽxü̃rüxü̃.
30 Rü woo petanüwa tátama nangẽxmagü i nümaxü̃ i tá doramaremaxã nangúexẽẽxü̃ i ngẽma yaxõgüxü̃ nax nügüwe naxĩxẽẽãxü̃ca̱x.
31 ¡Pegüna pedaugü, rü nüxna pecua̱xãchie nax tomaepü̱x ga taunecügu rü ngunecü rü chütacü taguma íchayachaxãchixü̃ nax chaxauxãcüma pexü̃ chixucu̱xẽgüxü̃ ga wüxichigü!
32 Rü ñu̱xmax, Pa Chauenexẽgüx, rü Tupanana pexü̃ chamugü. Rü chanaxwa̱xe i naga pexĩnüe i norü ore i tüxü̃ nüxü̃ cua̱xẽẽxü̃ nax aixcüma poraãcü tüxü̃ nangechaü̃xü̃. Erü ngẽma norü ore tá pexü̃ naporaexẽxẽ nax tórü Corica̱x pemaxẽxü̃ca̱x rü pexü̃́ nangẽxmaxü̃ca̱x i pechica namaxã i guxü̃ma i duü̃xü̃gü ya Tupana dexü̃.
33 Choma rü taxuguma chaugüca̱x chanaxwa̱xe ga texéarü diẽru rü texéchiru.
34 Rü pematama mea nüxü̃ pecua̱x nax daa cho̱xme̱xmaxã chapuracüxü̃ naxca̱x ga yema choxü̃́ taxuxü̃ rü chomücügüaxü̃́ taxuxü̃.
35 Rü guxü̃guma mea pexü̃ changúexẽxẽ nax ngẽmaãcü pepuracüexü̃ nax nüxü̃ perüngü̃xẽẽxü̃ca̱x i ngẽma duü̃xü̃gü i nüxü̃́ nataxuxü̃. Rü name nixĩ nax nüxna pecua̱xãchiexü̃ i Cori ya Ngechuchuarü ore ga nümatama ñaxü̃: “Rü narümemae nixĩ i pema nax toguxena penaxãxü̃ rü tama i tüma pexna nax tanaxãxü̃” —ñaxü̃.
36 Rü yexguma yema ñaxguwena ga Pauru, rü inacaxã́pü̱xü rü wüxigu guxü̃maxã nayumüxẽ.
37 Rü guxü̃ma poraãcü naxauxe, rü Pauruna nanã̱ĩ̱xãchigü, rü nüxü̃ nachúxgü.
38 Yerü poraãcü nangechaü̃e naxca̱x ga yema ore ga namaxã nüxü̃ yaxuxü̃ ga: “Marü tagutáma wena choxü̃ pedaugü”, ñaxü̃. Rü nümagü ínayaxümücügü ñu̱xmata wapuruwa nangu.
