Hechos 21:1-40
21 Rü yexguma nüxna itaxĩãchi ga yema yaxõgüxü̃, rü wapurugu tichoü̃. Rü capaxũ ga Cosca̱x noxtacüma tixãü̃. Rü moxü̃ãcü rü Ródawa taxĩ. Rü yéma itaxĩãchi, rü Pátarawa tangugü.
2 Rü yexma nüxü̃ tayangau ga wüxi ga wapuru ga Feníchiawa ũxü̃ne. Rü nagu tichoü̃, rü itaxĩãchi.
3 Rü yixcaamaxü̃ra nüxü̃ tadaugü ga Chípere. Rü torü to̱xwecüwawaama naxǘ, rü nüxü̃ tachopetü. Rü itiñaxwetaxü̃ ñu̱xmata Chíriaanewa tangugü. Rü Tíruwa ítachoü̃ yerü yéma nixĩ ga ínanuü̃ãcuxü̃ ga gumá wapuru.
4 Rü yexma nüxü̃ tayangau ga yémacüã̱x ga yaxõgüxü̃, rü 7 ga ngunexü̃ yéma natanüwa tayexmagü. Rü Tupanaãxẽ ya Üünecü nayadexagüxẽxẽ ga yema yaxõgüxü̃, rü Pauruxü̃ ñanagürügü: —¡Taxṹ i Yerucharéü̃wa cuxũxü̃! —ñanagürügü.
5 Natürü yexguma nangupetügu ga yema 7 ga ngunexü̃gü, rü itaxĩãchi. Rü yema yaxõgüxü̃ rü towe narüxĩ. Rü naxma̱xmaxãchigü rü naxacügümaxãchigü toxü̃ ínixümücügü ga guxü̃ma ñu̱xmata guma ĩanearü türewa tangugü. Rü yexma naxnecügu tacaxgüápü̱xü, rü tayumüxẽgü.
6 Rü yexguma ga toma rü nüxü̃ tarümoxẽgü, rü tichoü̃ ga wapuruwa. Rü nümagü rü napataca̱x nawoegu.
7 Rü toma rü Tíruwa itaxĩãchi rü Toremáidawa tangugü. Rü yéma ítachoü̃, yerü yexma nayacua̱x ga wapurugu nax taxĩxü̃. Rü nüxü̃ tarümoxẽgü ga yema yaxõgüxü̃ ga yéma yexmagüxü̃, rü wüxi ga ngunexü̃ natanügu tarücho.
8 Rü moxü̃ãcü itaxĩãchi ga yéma, rü Checharéawa tangugü. Rü Ferípe ga Tupanaarü orearü uruü̃patawa taxĩ. Rü Ferípe nixĩ ga wüxi ga yema 7 ga norü ngü̃xẽẽruü̃gü ga Ngechuchuarü ngúexü̃gü ga yamugüxü̃. Rü yexma Ferípexü̃tagu tapegü.
9 Rü nüma nüxü̃́ iyexma ga ãgümücü ga naxacügü ga taguma ixãtecü ga Tupanaarü orexü̃ ixugüecü.
10 Rü yexguma marü ñuxre ga ngunexü̃ yéma tayexmagügu, rü Yudéaanewa ne naxũ ga wüxi ga Tupanaarü orearü uruxü̃ ga Agábugu ãégaxü̃.
11 Rü yexguma toxü̃tawa nanguxgu ga Agábu, rü nanayaxu ga Pauruarü goyexü̃. Rü namaxã nügü ninã̱ĩ̱xgücutü, rü nügü nináĩme̱x, rü ñanagürü: —Tupanaãxẽ ya Üünecü marü chomaxã nidexa rü ñanagürü: “Rü ñaãcü tá nayana̱i̱xgü i Yudíugü i Yerucharéü̃wa i ñaa goyexü̃arü yora. Rü ngẽma duü̃xü̃gü i tama Yudíugü ixĩgüxü̃na tá nanamugü” —ñanagürü.
12 Rü yexguma yema orexü̃ taxĩnüegu, rü toma rü yema Checharéacüã̱xgümaxã Pauruxü̃ taca̱a̱xü̃gü ga tama Yerucharéü̃wa nax naxũxü̃ca̱x.
13 Natürü nüma ga Pauru rü toxü̃ nangãxü̃ rü ñanagürü: —¿Tü̱xcüü̃ pexauxe rü choxü̃ pengechaü̃xẽxẽ? Choma rü íchamemare nax chinaíxü̃. Rü íchamemare ta nax Yerucharéü̃gu chayuxü̃ naxca̱x ya Cori ya Ngechuchu —ñanagürü.
14 Rü yexguma marü taxuacüma tanachu̱xugu, rü tachianemare, rü ñatarügü: —¡Ẽcü yangu i Cori ya Tupanaarü ngúchaü̃! —ñatarügügü.
15 Rü yemawena rü togü tamexẽẽgü, rü Yerucharéü̃wa taxĩ.
16 Rü towe narüxĩ ga ñuxre ga yaxõgüxü̃ ga Checharéacüã̱xgü, rü Machóü̃patawa toxü̃ nagagü. Rü nüma nixĩ ga wüxi ga Chíperecüã̱x ga ü̃pamama woetama yaxõxü̃. Rü naxü̃tagu tapegüxü̃.
Chantiáguxü̃tagu nanaxũane ga Pauru
17 Rü yexguma Yerucharéü̃wa tangugügu, rü yema yaxõgüxü̃ rü taãẽãcüma toxü̃ nayauxgü.
18 Rü moxü̃ãcü ga Pauru rü tomaxã Chantiáguxü̃tagu nanaxũane. Rü yéma nayexmagü ga guxü̃ma ga yema yaxõgüxü̃arü ãẽ̱xgacügü.
19 Rü nüxü̃ narümoxẽ ga Pauru, rü ñu̱xũchi meama namaxã nüxü̃ nixu ga guxü̃ma ga yema Tupana nawa üxü̃ ga yexguma yema tama Yudíugü ixĩgüxü̃maxã nüxü̃ yaxuxgu ga Tupanaarü ore.
20 Rü yexguma Pauruarü orexü̃ naxĩnüegu ga yema yaxõgüxü̃arü ãẽ̱xgacügü, rü Tupanaxü̃ nicua̱xüü̃gü. Rü ñanagürügü Pauruxü̃: —Dücax, Pa Toenexẽx, cuma nüxü̃ cucua̱x rü nangẽxma i muxũchixü̃ i Yudíugü i yaxõgüxü̃. Rü guxü̃ma i nümagü rü nanaxwa̱xegü nax nagu naxĩxü̃ i ngẽma mugü ga Moiché ümatüxü̃.
21 Natürü ga togü rü marü namaxã nüxü̃ nixugügü nax cuma rü cunangúexẽẽxü̃ i guxü̃ma i Yudíugü i togü i nachixü̃anewa ngẽxmagüxü̃, nax tama naga naxĩnüexü̃ca̱x i ngẽma mugü ga Moiché ümatüxü̃. Rü marü namaxã nüxü̃ nixugügü nax cunangúexẽẽxü̃ nax tama tüxü̃ ínawiü̃cha̱xmüü̃pe̱xechiraü̃xü̃ca̱x ya nanegü, rü tama naga naxĩnüexü̃ca̱x i tacümagü ga Moiché tüxü̃ muxü̃.
22 ¿Ta̱xacü tá ixüexü̃ i ñu̱xmax? Erü ngẽma duü̃xü̃gü rü aixcüma tá nüxü̃ nacua̱xgü nax marü nua cunguxü̃.
23 ¡Rü ngẽmaca̱x name nixĩ nax cunaxüxü̃ i ngẽma tá cumaxã nüxü̃ tixuxü̃! Nua totanüwa nangẽxma i ãgümücü i yatügü i yanguxẽẽchaü̃xü̃ i wüxi i uneta i Tupanamaxã nüxü̃ yaxuxü̃.
24 ¡Ngéma Tupanapata ya taxü̃newa nagagü, rü wüxigu namaxã yanguxẽxẽ i ngẽma tacüma ga Moiché tüxna ãxü̃, rü Tupanape̱xewa pegü peyamexẽxẽgü! ¡Rü nüxü̃́ naxütanü i ñuxregu nüxü̃́ naxãtanü nax yadüpü̱xüerugüxü̃ca̱x i ngẽma yatügü nax ngẽmaãcü yanguxẽẽgüãxü̃ca̱x i norü unetagü! Rü ngẽmawa rü guxü̃ma i ngẽma Yudíugü rü tá nüxü̃ nacua̱xgü nax aixcüma cuma rü ta naga cuxĩnüxü̃xü̃ i ngẽma mugü ga Moiché ümatüxü̃ rü tama aixcüma nax yixĩxü̃ ga yema ore ga cuchiga nüxü̃ yaxugüexü̃.
25 Rü ñu̱xũchi ngẽma yaxõgüxü̃ i tama Yudíugü ixĩgüxü̃, rü marü naxca̱x tanaxümatü ga torü ore nax tama nangõ̱xgüãxü̃ca̱x i namachi i togü norü tupanachicüna̱xãca̱x daixü̃, rü tama nax nangõ̱xgüãxü̃ca̱x ya nagü, rü tama nangõ̱xgüãxü̃ca̱x i naeü̃gü rü ẽ̱xna naxü̃nagü i wẽxnaxãxü̃, rü tama nai i ngexü̃maxã rü ẽ̱xna nai ya yatümaxã inapexü̃ca̱x —ñanagürügü.
Tupanapata ga taxü̃negu Pauruxü̃ niyauxgü
26 Rü yexguma ga Pauru rü yéma Tupanapata ga taxü̃newa nanagagü ga yema ãgümücü ga yatügü. Rü moxü̃ãcü rü Tupanape̱xewa nügü namexẽxẽ ga Pauru wüxigu namaxã ga yema yatügü. Rü ñu̱xũchi gumá Tupanapatagu namaxã naxücu nax chacherdótemaxã nüxü̃ yaxuxü̃ca̱x nax 7 ga ngunexü̃gu tá yixĩxü̃ nax yanguxẽẽgüãxü̃ ga yema norü uneta ga Tupanamaxã nüxü̃ yaxugüxü̃, rü yemawena rü tá inaxãgüãxü̃ ga norü ãmaregü ga Tupanaxü̃ namaxã yacua̱xüü̃güxü̃ ga wüxichigü.
27 Rü yexguma marü nagúxchaü̃gu ga yema 7 ga ngunexü̃, rü ñuxre ga Yudíugü ga Áchiaanecüã̱xgü rü Pauruxü̃ nadaugü ga Tupanapata ga taxü̃newa. Rü yema Yudíugü rü duü̃xü̃güxü̃ nanuexẽxẽ nax Pauruxü̃ yayauxgüxü̃ca̱x. Rü yemaca̱x Pauruna nayu̱xgu.
28 Rü tagaãcü aita naxüe ñaxü̃maxã: —Pa Tomücügü Pa Iraétanüxü̃güx, ¡Paxa toxü̃ perüngü̃xẽxẽx! Ñaa nixĩ i ngẽma yatü i guxü̃wama yangúexẽẽchigüxü̃ i duü̃xü̃gü nax taxchi naxaiexü̃ca̱x i yixema i Iraétanüxü̃, rü naxchi nax naxaiexü̃ca̱x i ngẽma mugü ga Moiché ümatüxü̃ rü naxchi naxaiexü̃ca̱x ya daa Tupanapata ya taxü̃ne. Rü naétü i ñu̱xmax rü nuxã daa Tupanapata ya taxü̃negu nanamucu i ñuxre i duü̃xü̃gü i tama tacümagu ĩxü̃, rü ngẽmaãcü nanaxüxaxẽxẽ i ñaa nachica i üünexü̃ —ñanagürügü.
29 Rü yema ñanagürügü yerü ü̃paacü Yerucharéü̃wa Paurumaxã nüxü̃ nadaugü ga Trófimu ga Epéchiucüã̱x ga tama Yudíu ixĩxü̃. Rü nüxü̃ nacua̱xgügu rü Pauru rü Tupanapata ga taxü̃negu nanaxücuxẽxẽ.
30 Rü guxü̃ma ga yema ĩanecüã̱xgü rü poraãcü nanue. Rü Tupanapata ga taxü̃neca̱x nibuxmü, rü Pauruxü̃ niyauxgü, rü Tupanapataarü ĩã̱xtüwa nanatúchigügü. Rü yexguma paxa nanawãxtagü ga gumá Tupanapataarü ĩã̱xgü.
31 Rü yexguma Pauruxü̃ yama̱xgüchaü̃gu ga duü̃xü̃gü, rü Rómacüã̱x ga churaragüarü ãẽ̱xgacüxü̃tawa nanguchiga ga ore nax guxü̃wama ga Yerucharéü̃wa rü nanuexü̃ ga duü̃xü̃gü.
32 Rü yexgumatama ga gumá churaragüarü ãẽ̱xgacü rü nanangutaque̱xexẽxẽ ga yema norü capitáü̃gü namaxã ga norü churaragü, rü paxa yema duü̃xü̃gü íyexmagüxü̃wa naxĩ. Rü yexguma gumá ãẽ̱xgacüxü̃ rü yema churaragüxü̃ nadaugügu ga duü̃xü̃gü, rü ínayachaxãchigü nax Pauruxü̃ yama̱xgüxü̃.
33 Rü yexguma ga gumá ãẽ̱xgacü rü Pauruca̱x nixũ rü nayayaxu. Rü nanamu nax taxre ga cadénamaxã yana̱i̱xgüãxü̃ca̱x. Rü nüxna naca nax texé yixĩxü̃, rü ta̱xacü naxüxü̃.
34 Natürü yema muxü̃ma ga duü̃xü̃gü rü toxica ga oremaxã aita naxüe ga wüxichigü. Rü yexguma taxuacüma mea nüxü̃ nacua̱xgu ga ta̱xacüca̱x nax nanuexü̃, rü gumá ãẽ̱xgacü rü nanamu nax churaragüpatawa Pauruxü̃ nagagüxü̃.
35 21:35-36 Rü yexguma churaragüpataarü toxṍõnewa nanguxgu ga Pauru, rü churaragü nayangetaü̃gü na̱xcha̱xwa ga yema muxü̃ma ga duü̃xü̃gü, yerü nanuexüchi, rü nawe nicaetanü rü ñanagürügü: —¡Yama̱xü̃chi! —ñanagürügü.
36 Nüü̃ nadau 21:35
Pauru rü duü̃xü̃güpe̱xewa nügüétüwa nidexa
37 Rü yexguma marü churaragüpatagu yamucuchigüchaü̃ãgu, rü Pauru rü Griégugawa gumá ãẽ̱xgacüna naca rü ñanagürü: —¿Cuxü̃́ namexü̃ nax cumaxã nüxü̃ chixuxü̃ i wüxi i ore? —ñanagürü. Rü nüma ga ãẽ̱xgacü nanangãxü̃ rü ñanagürü: —¿Ẽ̱xna nüxü̃ cucua̱x nax Griégugawa quidexaxü̃?
38 ¿Tama ẽ̱xna cuma yixĩxü̃ i ngẽma Equítuanecüã̱x ga ü̃paxüra duü̃xü̃güxü̃ cunuexẽxẽxü̃ nax ãẽ̱xgacümaxã nügü nada̱i̱xü̃ca̱x rü ñu̱xũchi chianexü̃wa ga cunagagüxü̃ ga 4,000 ga yatügü ga máẽtaxü̃gü? —ñanagürü.
39 Rü yexguma ga Pauru rü nanangãxü̃, rü ñanagürü: —Choma rü Yudíu chixĩ, rü Társucüã̱x chixĩ. Rü Chiríchiaanewa rü yima ĩane rü tachigane nixĩ. Rü ngẽxguma curü me yixĩxgu, rü cuxna chaca nax duü̃xü̃gümaxã chidexaxü̃ca̱x —ñanagürü.
40 Rü yexguma ga gumá ãẽ̱xgacü rü: —Ngü̃ —ñanagürü. Rü nüma ga Pauru, rü churaragüpataarü toxṍõnegu nachinagü, rü naxunagüme̱xẽ nax nachiãchixü̃ca̱x ga duü̃xü̃gü. Rü yexguma nachiãchiegu, rü Yudíugawa nidexa, rü ñanagürü nüxü̃:
