Hechos 22:1-30
22 —Pa Chautanüxü̃x Pa Iraétanüxü̃x, ¡rü choxü̃́ iperüxĩnüe i ngẽma ñu̱xma tá pemaxã nüxü̃ chixuxü̃ nax chaugüétüwa chidexaxü̃ca̱x! —ñanagürü.
2 Rü yexguma nüxü̃ naxĩnüegu nax Yudíugawa namaxã yadexaxü̃, rü yexeraãcü inayarüchianegü. Rü yexguma ga Pauru, rü ñanagürü:
3 —Choma rü Yudíu chixĩ, rü Chiríchiaanearü ĩane ga Társugu chabu. Natürü daa ĩane ya Yerucharéü̃wa chaya, rü Gamarié nixĩ ga chorü ngu̱xẽẽruxü̃. Rü meama nawa changu̱x ga guxü̃ma ga mugü ga nũxcümaü̃güxü̃ ga tórü o̱xigü nagu ĩxü̃. Rü guxü̃guma naxca̱x chadau nax guxü̃ma i chorü ngúchaü̃maxã Tupanaaxü̃́ chapuracüxü̃, ngẽxgumarüxü̃ i guxãma i pemax i ñu̱xmax.
4 Rü choma ga ü̃pa rü poraãcü nawe chingẽchigü ga yema Ngechuchuaxü̃́ yaxõgüxü̃ nax chanadaixü̃ca̱x. Rü íchanayauxü̃, rü chanapoxcue ga muxü̃ma ga yema yaxõgüxü̃ ga yatüxü̃gü rü ngexü̃gü.
5 Rü nüma ya chacherdótegüaru ãẽ̱xgacü rü guxü̃ma ya Tupanapata ya taxü̃nearü ãẽ̱xgacügü rü nüxü̃ nacua̱xgü nax aixcüma yixĩxü̃ i ñaa chorü ore. Yerü nümagü rü choxna nanaxã ga popera nax choxü̃ nangü̃xẽẽgüxü̃ca̱x ga tatanüxü̃ ga Yudíugü ga Damácuwa yexmagüxü̃. Rü yéma Damácuwa chaxũ nax naxca̱x chayadauxü̃ca̱x ga yema Ngechuchuaxü̃́ yaxõgüxü̃, rü nua Yerucharéü̃wa nax chanagagüxü̃ca̱x rü chanapoxcuexü̃ca̱x.
Pauru nüxü̃ nixu nax ñuxãcü Ngechuchuaxü̃́ yaxõõxü̃
6 Natürü yexguma namagu chixũyane rü marü chingaica̱xgu ga Damácuwa nax changuxü̃, rü meama tocuchigu nixĩ ga yexguma. Rü ngürüãchi wüxi ga omü ga poraxü̃ ga daxũwa ne báxixü̃ rü choxü̃ nabáxi.
7 Rü ñaxtüanegu chayangu, rü nüxü̃ chaxĩnü ga wüxi ga naga ga ñaxü̃ choxü̃: “Pa Chaurux, Pa Chaurux, ¿tü̱xcüü̃ i chowe quingẽchigüxü̃?” ñaxü̃.
8 Rü yexguma ga choma rü chanangãxü̃, rü ñacharügü: “¿Rü texé quixĩ Pa Corix?” ñacharügü. Rü nüma ga yema naga rü choxü̃ nangãxü̃, rü ñanagürü: “Choma nixĩ ya Ngechuchu ya Nacharétucüã̱x, rü chorü duü̃xü̃gü nixĩ i ngẽma nawe quingẽchigüxü̃”, ñanagürü choxü̃.
9 Rü yema chomücügü rü nüxü̃ nadaugü ga yema omü, rü naba̱i̱xãchiãẽgü, natürü tama nüxü̃ naxĩnüe ga yema naga ga chomaxã idexaxü̃.
10 Rü nüxna chaca, rü ñacharügü ga chomax: “¿Rü ta̱xacü tá chaxüxü̃, Pa Corix?” ñacharügü. Rü yexguma ñanagürü choxü̃ ga Cori: “¡Írüda, rü inachi, rü Damácuwa naxũ! Rü ngéma wüxi ya yatü tá cumaxã nüxü̃ nixu nax ta̱xacü tá cuxüxü̃”, ñanagürü ga nüma ga Cori.
11 Rü yexguma ga choma rü yema omüemamaxã chixoxetü, rü yemaca̱x ga yema chomücügü rü chauchacüügu yangĩgüãcüma choxü̃ nigagü, rü yemaacü Damácuwa changu.
12 Rü yéma nayexma ga wüxi ga yatü ga Ananíagu ãégacü. Rü nüma nixĩ ga wüxi ga yatü ga aixcüma Tupanaga ĩnücü, rü nüma rü meama nayanguxẽxẽ ga yema mugü ga Moiché ümatüxü̃. Rü guxü̃ma ga Yudíugü ga Damácuwa yexmagüxü̃, rü mea nachiga nidexagü.
13 Rü nüma ga Ananía rü choxü̃ ínayadau. Rü yexguma chauxü̃tawa nanguxgu rü ñanagürü choxü̃: “Pa Chauenexẽ, Pa Chaurux, ¡wenaxarü ingo̱xnaxẽtü!” ñanagürü. Rü yexgumatama wenaxarü chingo̱xnaxetü rü meama nüxü̃ chadau.
14 Rü yexguma ñanagürü ta: “Yimá Tupana ya nũxcümaü̃güxü̃ ga tórü o̱xigüarü Tupana cuxü̃ naxuneta nax nüxü̃ cucuáxü̃ca̱x i norü ngúchaü̃, rü nüxü̃ cudauxü̃ca̱x ya yimá Cristu ya aixcümacü, rü naã̱xwatama nüxü̃ cuxĩnüxü̃ca̱x i naga.
15 Erü cuma tá nixĩ i guxü̃ i duü̃xü̃gümaxã nüxü̃ quixuchigaxü̃ nax Tupanaxü̃ cudauxü̃ rü nüxü̃ cuxĩnüxü̃.
16 ¡Rü ñu̱xma rü marü taxuxü̃ma i ta̱xacü ícunangu̱xẽxẽ! ¡Rü írüda rü ínabaie! ¡Rü Cori ya Ngechuchuégagu naxca̱x ínaca nax cuxü̃́ nüxü̃ nangü̃maxü̃ca̱x i curü pecadugü!” ñanagürü choxü̃.
Pauru nüxü̃ nixu nax Tupana namuxü̃ nax yema tama Yudíugü ixĩgüxü̃tanüwa naxũxü̃ca̱x
17 22:17-18 Rü yexguma Yerucharéü̃ca̱x chataeguxgu, rü Tupanapata ya taxü̃newa chaxũ nax yéma chayumüxẽxü̃ca̱x. Rü chango̱xetü, rü nüxü̃ chadau ga Cori ya Tupana. Rü ñanagürü choxü̃: “¡Napaxaãxẽ, rü inaxũãchi i nua Yerucharéü̃wa! Erü duü̃xü̃gü rü taxũtáma naga naxĩnüe i ngẽma ore i chauchiga nüxü̃ quixuxü̃”, ñanagürü.
18 Nüü̃ nadau 22:17
19 Rü choma chanangãxü̃, rü ñacharügü nüxü̃: “Pa Corix, nüma i duü̃xü̃gü rü nüxü̃ nacua̱xgü nax choma yixĩxü̃ ga guxü̃ne ga ngutaque̱xepataü̃güwa chaxũxü̃ rü íchanayauxü̃xü̃ rü chanapoxcuexü̃ rü chayacuaixgüxü̃ ga yema cuxü̃́ yaxõgüxü̃.
20 Rü yexguma yama̱xgüãgu ga gumá curü duü̃ ga Estébaü̃ ga curü orearü uruxü̃, rü chomatama yéma chayexma, rü chorü me nixĩ ga nax yama̱xgüãxü̃. Rü choma nixĩ ga nüxna chadauxü̃ ga naxchiru ga yema yama̱xgüxü̃”, ñacharügü nüxü̃.
21 Natürü nüma ga Cori rü ñanagürü choxü̃: “¡Paxa cugü namexẽxẽ rü inaxũãchi! Erü yáxü̃guxü̃ i nachixü̃anegüwa tá cuxü̃ chamu i duü̃xü̃gü i tama Yudíugü ixĩgüxü̃tanüwa” —ñanagürü.
Churaragüarü ãẽ̱xgacüme̱xẽwa nayexma ga Pauru
22 Rü yexguma Pauru yema ñaxgu rü yexma nayacua̱xẽẽgü nax mea nüxü̃́ inaxĩnüexü̃ ga yema duü̃xü̃gü. Rü yexguma aita naxüeãcüma ñanagürügü: —¡Noxtacüma yama̱x! Rü name nixĩ nax nayuxü̃ rü ngẽxma nax yanaxoxü̃ —ñanagürügü.
23 Rü yexguma aita naxüegu, rü nanapaãmügü ga naxchiru, rü ãte̱xeanexü̃ daxũ niwogütanücüü.
24 Rü yexguma yemaxü̃ nada̱u̱xgu ga churaragüarü ãẽ̱xgacü, rü nanamu ga churaragüpatagu nax yamucuchigüãxü̃ca̱x ga Pauru. Rü nanamu nax nacua̱i̱xgüãxü̃ca̱x nax nüxü̃ yaxuxü̃ca̱x nax ta̱xacüca̱x yixĩxü̃ nax ngẽmaãcü nachigamaxã aita naxüexü̃ i duü̃xü̃gü.
25 Rü yexguma marü yana̱i̱xgüãgu nax nacua̱i̱xgüãxü̃ca̱x, rü Pauru nüxna naca ga yema capitáü̃ ga yéma yexmaxü̃, rü ñanagürü: —¿Ẽ̱xna pexme̱xwa nangẽxma nax penacuaxixü̃ i wüxi i Rómacüã̱x ega tama nüxna pecaxiragu? —ñanagürü.
26 Rü yexguma yemaxü̃ naxĩnügu ga capitáü̃, rü gumá churaragüarü ãẽ̱xgacüxü̃tawa naxũ, rü namaxã nüxü̃ nixu, rü ñanagürü: —¿Ta̱xacü tá cuxü? Erü ñaa yatü rü Rómacüã̱x nixĩ —ñanagürü.
27 Rü yexguma ga gumá churaragüarü ãẽ̱xgacü, rü Pauruca̱x nixũ, rü nüxna naca rü ñanagürü nüxü̃: —¿Aixcüma yixĩxü̃ nax Rómacüã̱x quixĩxü̃ i cumax? —ñanagürü. Rü nüma ga Pauru nanangãxü̃, rü: —Ngü̃ —ñanagürü.
28 Rü yexguma ga gumá churaragüarü ãẽ̱xgacü rü nanangãxü̃, rü ñanagürü: —Choma rü poraãcü choxü̃́ naxãtanü nax Rómacüã̱x chaugü chixĩxẽxẽxü̃ —ñanagürü. Rü yexguma ga Pauru rü nanangãxü̃ rü ñanagürü: —Natürü i choma rü woetama chorü bucüma Rómacüã̱x chixĩ —ñanagürü.
29 Rü yexgumatama nüxna nixĩgachi ga yema Pauruxü̃ cuaixgüchaü̃xü̃. Rü nümatama ga yema churaragüarü ãẽ̱xgacü rü yexguma nüxü̃ nacua̱xgu ga Rómacüã̱x nax yixĩxü̃ ga Pauru, rü namuü̃ yerü marü cadénamaxã nayana̱i̱xgü.
Yudíugüarü ãẽ̱xgacügütücumüpe̱xewa nayexma ga Pauru
30 Rü yema churaragüarü ãẽ̱xgacü meama nüxü̃ nacuáxchaü̃ ga ta̱xacüca̱x nax ínaxuaxü̃güãxü̃ ga yema Yudíugü. Rü yemaca̱x ga moxü̃ãcü rü nanamu nax nangutaque̱xegüxü̃ca̱x ga chacherdótegüarü ãẽ̱xgacügü rü guxü̃ma ga yema ãẽ̱xgacügütücumü ga Yudíugüarü. Rü nayawẽgü ga Pauruarü cadéna rü yéma ãẽ̱xgacügüpe̱xewa nanagagü.
