Hechos 23:1-35
23 Rü Pauru meama nüxü̃ nadawenü ga yema Yudíugüarü ãẽ̱xgacügütücumü, rü ñanagürü nüxü̃: —Pa Chautanüxü̃x, chomatama nüxü̃ chacua̱x nax guxü̃guma mea chamaxü̃ ga Tupanape̱xewa ñu̱xmata ñoma i ngunexü̃wa nangu —ñanagürü.
2 Rü yexguma ga yema chacherdótegüaru ãẽ̱xgacü ga Ananía rü nanamu ga yema Pauruarü ngaicamana yexmagüxü̃ nax naã̱xwa tayama̱xgüxü̃ca̱x.
3 Rü yexguma ga Pauru rü ñanagürü nüxü̃: —Tupana tá cuxü̃ napéa̱x, Pa Ãẽ̱xgacüx. Cuma rü düxétüwaxica cume natürü aixepena rü nachixe i curü maxü̃. Rü ñu̱xma rü ngéma curüto nax Moiché ümatüxü̃ i mugü nüxü̃ ixuxü̃ãcüma choxna cucaxü̃ca̱x. Natürü chixexü̃ cuxü erü cumatama rü tama naga cuxĩnü i ngẽma Tupana tüxü̃ muxü̃ rü cunamu nax choxü̃ napéa̱xü̃ca̱x —ñanagürü ga Pauru.
4 Rü yexguma ga yema yexmagüxü̃ rü ñanagürügü: —¿Tü̱xcüü̃ i ngẽmaãcü ta̱xacü namaxã quixugüxü̃ i chacherdótegüaru ãẽ̱xgacü ya Tupana nüxü̃ unetacü? —ñanagürügü.
5 Rü Pauru nanangãxü̃, rü ñanagürü: —Tama nüxü̃ chacua̱x, Pa Chautanüxü̃x, nax chacherdótegüaru ãẽ̱xgacü yixĩxü̃. Erü Tupanaarü ore i ümatüxü̃wa nüxü̃ tadau rü ñanagürü: “¡Tama curü ãẽ̱xgacümaxã chixexü̃ quixugü!” —ñanagürü.
6 Rü yexguma Pauru nüxü̃ cua̱xgu nax Chaduchéugü yixĩxü̃ ga nümaxü̃ ga ãẽ̱xgacügü rü togü rü Parichéugü nax yixĩxü̃, rü yema ãẽ̱xgacügüpe̱xewa tagaãcüma ñanagürü: —Pa Chautanüxü̃x, choma rü Parichéu chixĩ, rü Parichéu nane chixĩ. Rü choma rü chayaxõ nax wena tá namaxẽxü̃ i yuexü̃, rü ngẽmagagu choxü̃ ípexuãü̃gü i ñu̱xmax —ñanagürü.
7 Rü yexguma yema ñaxgu ga Pauru, rü yema Parichéugü rü Chaduchéugü rü inanaxügüe ga nügümaxã nax iyaporagaexü̃, rü yexma nügü nitoye ga yema ngutaque̱xewa.
8 Erü ngẽma Chaduchéugü nagu rüxĩnüegu rü tama wena namaxẽ i ngẽma yuexü̃, rü nataxuma i orearü ngeruü̃gü i daxũcüã̱x, rü nataxuma i naãxẽgü. Natürü ngẽma Parichéugü rü nayaxõgü nax nangẽxmaxü̃ i guxü̃ma i ngẽma.
9 Rü yemaca̱x guxü̃ma aita naxüe. Rü ñu̱xũchi ñuxre ga ngúexẽẽruü̃gü ga Moichéarü mugüwa ngu̱xẽẽtaegüxü̃ ga Parichéugütücumüwa ügüxü̃ rü inachigü, rü ñanagürügü: —Toxca̱x rü taxuxü̃ma i chixexü̃ naxü i ñaa yatü i Pauru. Bexmana wüxi i naãxẽ namaxã nidexa rü ẽ̱xna wüxi i orearü ngeruxü̃ i daxũcüã̱x —ñanagürügü.
10 Rü yexeraãcü ninuetanü ga yema duü̃xü̃gü. Rü yemaca̱x naxoegaãxẽ ga gumá churaragüarü ãẽ̱xgacü nax Paurugu nagáugügüchaü̃xü̃. Rü norü churaragüxü̃ namu nax yéma duü̃xü̃gütanüwa Pauruxü̃ napugüxü̃ca̱x rü wena churaragüpatawa nax nagagüãxü̃ca̱x.
11 Rü moxü̃ãcüarü chütaxü̃gu Pauruca̱x nango̱x ga Cori ga Tupana, rü ñanagürü nüxü̃: —¡Cugü naporaxẽxẽ! Rü ngẽxgumarüxü̃ i núma Yerucharéü̃wa choxü̃ nax quixuchigaxü̃, rü ngẽxgumarüxü̃ tá ta nixĩ i Rómawa nax choxü̃ quixuchigaxü̃ —ñanagürü ga Tupana.
Yudíugü naxca̱x nadaugü nax Pauruxü̃ yama̱xgüxü̃
12 Rü moxü̃ãcü, rü ñuxre ga Yudíugü rü nügümaxã inaxunetagü nax taxũtáma nachibüexü̃ rü naxaxegüxü̃ ñu̱xmatáta Pauruxü̃ yama̱xgü. Rü ñanagürügü: —Tachixexü̃gugü tá ega ta̱xacü ingõ̱xgügu naxü̃pa nax yamáxü̃ i Pauru —ñanagürügü.
13 Rü 40 arü yexera ga yatügü nixĩ ga yema nügümaxã ixunetagüxü̃.
14 Rü chacherdótegüarü ãẽ̱xgacügütanüwa rü Yudíugüarü ãẽ̱xgacügütanüwa naxĩ, rü ñanagürügü nüxü̃: —Marü togümaxã itaxuneta rü tachixexü̃gugü tá ega ta̱xacü tangõ̱xgügu naxü̃pa nax tayamáxü̃ i Pauru.
15 Rü name nixĩ i pema rü ngẽma togü i pexrüxü̃ ãẽ̱xgacügütücumüwa ügüxü̃, rü churaragüarü ãẽ̱xgacüna naxca̱x peyacagü nax wena moxü̃ pepe̱xewa nagagüãxü̃ca̱x i Pauru. ¡Rü namaxã nüxü̃ pixu nax penaxwa̱xexü̃ nax mea nüxü̃ pecuáxchaü̃xü̃ i nachiga! Rü toma rü tá marü ítamemare nax namagu tayamáxü̃ca̱x naxü̃pa nax ínanguxü̃ —ñanagürügü.
16 Natürü ngĩne ga Paurueya̱x rü nüxü̃ nacuáchiga ga Pauruxü̃ nax yama̱xgüchaxü̃xü̃, rü yemaca̱x churaragüpatawa naxũ nax Paurumaxã nüxü̃ yanaxuxü̃ca̱x.
17 Rü Pauru naxca̱x naca ga wüxi ga capitáü̃, rü ñanagürü nüxü̃: —¡Curü ãẽ̱xgacüxü̃tawa naga i ñaa ngextü̱xüxü̃, erü nüxü̃́ nangẽxma i ore i namaxã nüxü̃ yaxuxchaü̃xü̃! —ñanagürü.
18 Rü yema capitáü̃ rü norü ãẽ̱xgacüxü̃tawa nanaga ga yema ngextü̱xüxü̃. Rü ñanagürü nüxü̃: —Ngẽma poxcuxü̃ i Pauru rü cha̱u̱xca̱x naca, rü choxna naca nax nua cuxü̃tawa chanagaxü̃ca̱x i ñaa ngextü̱xüxü̃, erü nüxü̃́ nangẽxma i ore i cumaxã nüxü̃ yaxuxchaü̃xü̃ —ñanagürü.
19 Rü naxme̱xgu yayauxãchiãcüma tóxnamana nanaga ga ãẽ̱xgacü, rü yéma nüxna naca rü ñanagürü: —¿Ta̱xacü yixĩxü̃ i ngẽma chomaxã nüxü̃ quixuxchaü̃xü̃? —ñanagürü.
20 Rü nüma ga ngextü̱xüxü̃ nanangãxü̃, rü ñanagürü: —Ngẽma Yudíugü, rü nügümaxã inaxunetagü nax cuxna naxca̱x nacagüxü̃ca̱x nax moxü̃ Yudíugüarü ãẽ̱xgacügütücumüpe̱xewa nax cunagaxü̃ca̱x i Pauru erü mea nüxü̃ nacua̱xgüchaü̃xü̃ i nachiga.
21 ¡Natürü taxũtáma nüxü̃́ cuyaxõ! Erü 40 arü yexera i yatügü rü marü nügümaxã inaxunetagü, rü ñanagürügü: “Tachixexü̃gugü tá ega ta̱xacü ingõ̱xgügu rüe̱xna ixaxegügu naxü̃pa nax yamáxü̃ i Pauru”, ñanagürügü. Rü ñu̱xma rü marü ínamemaregü nax namagu nana̱i̱xgüaxü̃, rü curü orexicatama nixĩ i ñu̱xma ínangu̱xuxẽẽgüxü̃ —ñanagürü.
22 Rü yexguma ga yema churaragüarü ãẽ̱xgacü rü ínayamu ga yema ngextü̱xüxü̃, rü nüxna naxãga nax taxúemaxã nüxü̃ yaxuxü̃ nax namaxã nüxü̃ yaxuxü̃ ga yemachiga.
Ãẽ̱xgacü ga Férixü̃tawa Pauruxü̃ namu
23 Rü yexguma ga gumá ãẽ̱xgacü rü taxre ga norü capitáü̃ca̱x naca, rü ñanagürü nüxü̃: —¡Penamexẽxẽ i 200 i churaragü i nacutümare ĩxü̃, rü 70 i churaragü i cowarutagu ĩxü̃, rü 200 i churaragü i wocaemaxã ixãxnexü̃ nax 9 arü oragu i chütacü Checharéawa naxĩxü̃ca̱x!
24 ¡Rü ngẽxgumarüxü̃ ta penamexẽxẽ i ñuxre i cowarugü i Pauruca̱x nax tórü ãẽ̱xgacü i Férixü̃tawa naxũxü̃ca̱x rü taxuxü̃ma nüxü̃ üpetüxü̃ca̱x i namawa! —ñanagürü.
25 Rü yema capitáü̃gümaxã yéma nanamu ga wüxi ga popera ga ñaxü̃:
26 “Choma i Cláudiu Líchiu, rü cuxü̃ charümoxẽ Pa Ãẽ̱xgacü ya Mecüxüchi Pa Férix.
27 Rü yimá yatü ya cuxca̱x ngéma chanamucü, rü Yudíugü nayayauxgü rü wixguxüchi taa̱x nayama̱xgü. Natürü yexguma nüxü̃ chacuáchigagu nax Rómacüã̱x nax yixĩxü̃, rü yéma chaxũ chorü churaragümaxã, rü nüxna chanapu.
28 Rü nüxü̃ chacuáxchaü̃ ga ta̱xacü ga chixexü̃maxã nax ínaxuaxü̃güãxü̃, rü yemaca̱x Yudíugüarü ãẽ̱xgacügütücumüpe̱xewa chanaga.
29 Rü yexguma nüxü̃ chacua̱x nax Yudíugüarü mugüchigaca̱xmare nax ínaxuaxü̃güãxü̃. Natürü taxuxü̃ma ga chixexü̃ naxü nax tü̱xcüü̃ yama̱xgüchaü̃ãxü̃ rü napoxcugüãxü̃.
30 Natürü yexguma nüxü̃ chacuáchigagu nax nügümaxã inaxunetaxü̃ ga Yudíugü nax yama̱xgüãxü̃ca̱x, rü yexgumatama nagu charüxĩnü nax cuxü̃tawa chanamuxü̃. Rü yema ínaxuaxü̃güxü̃, rü namaxã tá nüxü̃ chixu nax cuxü̃tawa naxĩxü̃ rü cumaxã nüxü̃ nax yanaxugüxü̃ca̱x nax ta̱xacüca̱x ínaxuaxü̃güãxü̃”,
ñanagürü.
31 Rü yema chütaxü̃gu inaxĩãchi ga yema churaragü, yexgumarüxü̃ ga norü ãẽ̱xgacü namuxü̃rüxü̃. Rü Pauruxü̃ nigagü ñu̱xmata Antípatiwa nangugü.
32 Rü moxü̃ãcü nawoegu ga yema churaragü ga nacutümare ĩxü̃ rü naxpataü̃wa naxĩ. Rü yema churaragü ga cowarutagu ĩxü̃, rü Paurumaxã inaxĩãma.
33 Rü yexguma Checharéawa nangugügu, rü ãẽ̱xgacü ga Férina nanaxã ga yema popera, rü Pauruxü̃ rü ta inamugü.
34 Rü yexguma nüma ga ãẽ̱xgacü ga Férix nüxü̃ daumatügu ga yema popera, rü Pauruna naca ga nge̱xtácüã̱x nax yixĩxü̃. Rü yexguma nüxü̃ nacua̱xgu nax Chiríchiaanecüã̱x yixĩxü̃, rü ñanagürü nüxü̃:
35 —Cuxü̃́ tá icharüxĩnü i ngẽxguma ínangugügu i ngẽma cuxü̃ íxuaxü̃güxü̃ —ñanagürü. Rü yexguma nanamu ga churaragü nax wüxi ga ucapu ga ãẽ̱xgacü ga Eródepatawa yexmaxü̃wa nüxna nax nadaugüxü̃ca̱x.
