Hechos 24:1-27
24 Rü wüxime̱e̱xpü̱x ga ngunexü̃ ngupetügu, rü Yerucharéü̃wa ne naxũ ga chacherdótegüarü ãẽ̱xgacü ga Ananía, namaxã ga ñuxre ga Yudíugüarü ãẽ̱xgacügü rü wüxi ga yatü ga meama dexaxü̃ cuáxü̃ ga Téturu ga naéga. Rü nümagü rü ãẽ̱xgacü ga Férixü̃tawa naxĩ nax namaxã nüxü̃ yanaxugüxü̃ca̱x ga tü̱xcüü̃ Pauruxü̃ nax ínaxuaxü̃güxü̃.
2 Rü yexguma Pauruxü̃ yéma nagagügu, rü inanaxügü ga Téturu ga nüxü̃ nax yaxuxü̃, rü ñanagürü: —Moxẽxü̃chima i cuma, Pa Ãẽ̱xgacü Pa Férix, erü cugagu nixĩ i meama toxü̃ naxüpetüxü̃ i nua. Rü cugagu nixĩ i nua ñoma i nachixü̃anewa toxü̃́ nangẽxmaxü̃ i muxü̃ma i mexü̃gü.
3 Rü moxẽ cuxna taxã erü guxü̃wama guxü̃guma cuxü̃tawa tanayauxgü i guxü̃ma i ngẽma mexü̃gü, Pa Mecü ya Ãẽ̱xgacü, Pa Férix.
4 Natürü tama yexeraãcü cuxü̃ nua chanuxcüxẽẽxchaü̃. Rü ngẽmaca̱x cuxna chaca nax paxaãchi toxü̃́ icurüxĩnüxü̃.
5 Rü marü nüxü̃ tadau nax ñaa yatü rü wüxi i da̱xaweanerüxü̃ nax yixĩxü̃. Erü guxü̃ i naanewa norü ngu̱xẽẽtaemaxã nügü nayatoyexẽxẽ i Yudíugü. Rü nüma rü naeru nixĩ i ngẽma duü̃xü̃gü i nüxü̃́ yaxõgüxü̃ i Ngechuchu i Nacharétucüã̱x.
6 Rü ñaa yatü rü ta̱xacü i chu̱xuxü̃ nawa naxüxchaü̃ ya torü Tupanapata ya taxü̃ne. Rü yemaca̱x tayayaugüama. Rü torü mugü tomaxã nüxü̃ ixuxü̃ãcüma nüxna tacagüchaü̃.
7 Natürü ínangu ga Líchiu ga churaragüarü ãẽ̱xgacü, rü muxü̃ma ga norü churaragümaxã toxna nanapu.
8 Rü ñu̱xma rü marü name i cumatama nüxna cuca i ngẽma Pauru nax nüxü̃ cucuáxü̃ca̱x nax aixcüma yixĩxü̃ i guxü̃ma i ngẽma naxca̱x ítanaxuaxü̃güxü̃ i tomax —ñanagürü.
9 Rü yema Yudíugü ga yéma yexmagüxü̃ rü ta rü: —Aixcüma nixĩ i ngẽma ore —ñanagürügü.
10 Rü yexguma ga gumá ãẽ̱xgacü ga Férix rü naxme̱xmaxã Pauruxü̃ naxuneta nax yadexaxü̃ca̱x. Rü yexguma ga Pauru, rü ñanagürü: —Chorü taãẽmaxã cupe̱xewa chaugüétüwa chidexa, erü nüxü̃ chacua̱x nax mucüma ga taunecü ñoma i nachixü̃anearü ãẽ̱xgacü nax quixĩxü̃.
11 Marü name i cumatama naxca̱x nüxna cuca i duü̃xü̃gü, erü 12 i ngunexü̃xicatama nangupetü nax Yerucharéü̃wa changuxü̃ nax Tupanaxü̃ chayarücua̱xüxü̃xü̃ca̱x.
12 Rü ngẽma Yudíugü rü taguma choxü̃ nadaugü nax texémaxã chiporagacüüxü̃, rü chananuexẽẽxü̃ i duü̃xü̃gü, rü bai ga Tupanapata ga taxü̃newa, rü bai ga ngutaque̱xepataü̃güwa, rü bai ga ĩanewa.
13 Rü ñu̱xma taxucürüwama cuxü̃ nanawe̱xgü nax ta̱xacürü chixexü̃ yixĩxü̃ i ngẽma naxca̱x choxü̃ ínaxuaxü̃güxü̃.
14 Natürü ngẽma ñu̱xma cumaxã nüxü̃ chixuxü̃ nixĩ nax chorü o̱xigüarü Tupanaaxü̃́ chapuracüxü̃ yema Ngechuchu ya Cristu toxü̃ muxü̃ãcü. Rü ngẽma nixĩ i nüma i Yudíugü nüxü̃ ixugügu nax tomare i ore yixĩxü̃. Rü choma rü nüxü̃́ chayaxõ i guxü̃ma i ngẽma mugü ga Moiché ümatüxü̃ rü guxü̃ma i Tupanaarü ore ga nũxcümaü̃güxü̃ ga norü orearü uruü̃gü ümatügüxü̃.
15 Rü choma rü ta yema nũxcümaü̃güxü̃rüxü̃ Tupanaaxü̃́ chayaxõ. Rü naxrüxü̃ chayaxõ rü tá wena nax namaxẽxü̃ i ngẽma yuexü̃ i mexü̃gü rü chixexü̃gü.
16 Rü ngẽmaca̱x nixĩ i guxü̃guma mea chaugüna chadauxü̃ nax chauãẽwa mexü̃gu charüxĩnüxü̃ i Tupanape̱xewa rü duü̃xü̃güpe̱xewa.
17 Rü nawena nax ñuxre ga taunecü togü ga nachixü̃anegu chixũgüxü̃, rü wenaxarü chauchixü̃aneca̱x chataegu nax nua chanangexü̃ca̱x ga diẽru nax namaxã nüxü̃ charüngü̃xẽẽxü̃ i chautanüxü̃ i Yudíugü i nüxü̃́ nataxuxü̃, rü Tupanana chanaxãxü̃ca̱x i chorü ãmaregü.
18 24:18-19 Rü nawena nax chaugü chamexẽẽxü̃ ga Tupanape̱xewa, rü choma rü Tupanapata ya taxü̃newa Tupanana chanaxã ga chorü ãmaregü. Rü tama muxü̃ ga duü̃xü̃gümaxã chayexma, rü tama chananuexẽxẽ ga duü̃xü̃gü. Rü yexguma nixĩ nax ñuxre ga Yudíugü ga Áchiaanecüã̱x choxü̃ daugüxü̃ ga Tupanapata ya taxü̃newa. Rü ngẽmagü chi nixĩ i ñu̱xma nua ĩxü̃ nax choxü̃ ínaxuaxü̃güxü̃ca̱x ega ta̱xacürü chixexü̃ chowa nadaugügu.
19 Nüü̃ nadau 24:18
20 Rü ngẽxguma yema Áchiaanecüã̱x tama ta̱xacü nüxü̃́ ngẽxmagu nax choxü̃ ínaxuaxü̃güxü̃ca̱x, ¡rü ẽcü ñaa nuxmagüxü̃ rü cumaxã nüxü̃ yaxugü nax ta̱xacürü chixexü̃ chowa nadaugüxü̃ ga yexguma Yudíugüarü ãẽ̱xgacügütücumüpe̱xewa chayexmagu!
21 Rü ñaxü̃xicatama nixĩ ga chorü ore ga tagaãcü namaxã chachonagüxü̃ ga yexguma yema ãẽ̱xgacügüpe̱xewa chayexmagu: “Rü ñu̱xma rü choxna pecagü erü choma chayaxõ i wena tá nax namaxẽxü̃ i yuexü̃”, ñacharügü ga yexguma —ñanagürü ga Pauru.
22 Natürü yexguma ãẽ̱xgacü ga Férix nüxü̃ ĩnügu ga yema Pauruarü ore rü ínayachaxãchi nax Pauruna naca̱xaxü̃. Yerü nüma ga Férix rü woetama marü mea nüxü̃ nacua̱x ga yema Cristuaxü̃́ yaxõgüxü̃chiga. Rü ñu̱xũchi yema Yudíugüxü̃ ñanagürü: —Ngẽxguma churaragüarü ãẽ̱xgacü ya Líchiu núma ũxgu, rü tá meama nüxü̃ chacua̱x i ngẽma naxca̱x ípenaxuaxü̃xü̃ —ñanagürü.
23 Rü yexguma ga Férix rü norü capitáü̃xü̃ namu nax Pauruna nadauxü̃ca̱x. Natürü nüxü̃́ nanatauxchaxẽxẽ nax naxü̃tagu naxĩaneãxü̃ ga namücügü, rü nüxü̃ nax nangü̃xẽẽgüxü̃.
24 Rü ñuxre ga ngunexü̃ marü ngupetügu rü wena yéma naxũ ga Férix ngĩmaxã ga naxma̱x ga Drusíla ga Yudíu ixĩcü. Rü Pauruca̱x nayacaxẽxẽ, rü nüxü̃ naxĩnü ga yema ore ga Pauru namaxã nüxü̃ ixuxü̃ ga Cristuaxü̃́ nax yaxõxü̃chiga.
25 Natürü yexguma Pauru namaxã nüxü̃ ixuxgu nax Tupana naxwa̱xexü̃ nax mea imaxü̃xü̃ rü nanaxwa̱xexü̃ nax tórü maxü̃maxã mea icuáxü̃ rü wüxi i ngunexü̃ Tupana tá tüxna naca̱xaxü̃ i tórü maxü̃chiga, rü yexguma ga Férix rü poraãcü naba̱i̱xãchi. Rü ñanagürü nüxü̃: —¡Ẽcü íixũ i ñu̱xmax! Rü ngẽxguma ñuxguacü icharüxã̱ũ̱xmaregu, rü wena táxarü cuxca̱x changema —ñanagürü.
26 Rü yema ñanagürü ga Férix, yerü ínananguxẽxẽ nax Pauru chi diẽru nüxna ixãxü̃ nax yangéãxü̃ca̱x. Rü yemaca̱x muẽ̱xpü̱xcüna naxca̱x nangemaxü̃, nax namaxã yadexaxü̃ca̱x.
27 Rü taxre ga taunecü yemaacü nixĩ. Rü ínanguxuchi ga Férix nax ãẽ̱xgacü yixĩxü̃, rü nachicüü ningucuchi ga Pórchiu ga Féstu. Natürü nüma ga Férix, rü Yudíugümaxã nügü namecümaxẽẽchaü̃, rü yemaca̱x tama Pauruxü̃ ínanguxuchixẽẽ.
