Hechos 25:1-27
25 Rü Checharéawa nangu ga Féstu nax yéma ãẽ̱xgacüxü̃ yaxücuxü̃ca̱x. Rü yexguma marü tomaepü̱x ga ngunexü̃ yéma nayexmagu, rü wenaxarü inaxũãchi, rü Yerucharéü̃wa naxũ.
2 Rü yéma Yerucharéü̃wa rü yema chacherdótegüarü ãẽ̱xgacügü rü Yudíugüarü ãẽ̱xgacügü rü Pauruxü̃ ínaxuaxü̃gü Féstupe̱xewa.
3 Rü naxca̱x ínacagü nax Yerucharéü̃wa Pauruxü̃ namuxü̃ca̱x. Yerü nümagü rü nagu narüxĩnüe nax namagu yacu̱xéü̃güãxü̃ nax yexma yama̱xgüãxü̃ca̱x.
4 Natürü ga Féstu rü nanangãxü̃, rü ñanagürü: —Checharéagu napoxcu i Pauru, rü choma rü tá paxa ngéma Checharéawa chaxũ.
5 Rü ngẽmaca̱x name nixĩ i perü ãẽ̱xgacügü rü chowe narüxĩ i Checharéawa, rü ngẽxguma ta̱xacürü chixexü̃ naxü̱xgu i ngẽma yatü, rü ngéma tá nixĩ i chomaxã nüxü̃ pixugüxü̃ —ñanagürü.
6 Rü 8 rüe̱xna 10 ga ngunexü̃ Yerucharéü̃wa nayexma ga Féstu, rü ñu̱xũchi Checharéaca̱x nataegu. Rü yexguma ínanguxguarü moxü̃ãcü rü yema nachica ga ngextá duü̃xü̃güna ínacaxü̃wa naxũ, rü yéma nayarüto norü tochicaxü̃wa. Rü Pauruca̱x nangema nax yéma nape̱xewa nagagüãxü̃ca̱x.
7 Rü yexguma yexma yaxücuxgu ga Pauru, rü yema Yudíugü ga Yerucharéü̃wa ne ĩxü̃, rü naxca̱x naxĩ. Rü muxü̃ma ga chixexü̃gümaxã ínanaxuaxü̃gü. Natürü yema chixexü̃gü ga namaxã Pauruxü̃ ínaxuaxü̃güxü̃ rü taxuxü̃ma ga yemamaxã inanawe̱xgü nax aixcüma yixĩxü̃.
8 Rü yexguma ga Pauru rü nanangãxü̃, rü ñanagürü: —Pa Ãẽ̱xgacüx, taxuxü̃ma ga chixexü̃ namaxã chixugü ga yema mugü ga Moiché ümatüxü̃, rü bai ga Tupanapata ya taxü̃nemaxã, rü bai ga Rómaarü ãẽ̱xgacü ya Chécharumaxã —ñanagürü.
9 Natürü nüma ga Féstu rü Yudíugümaxã nügü namecümaxẽẽchaü̃, rü yemaca̱x Pauruna naca, rü ñanagürü nüxü̃: —¿Cunaxwa̱xexü̃ nax Yerucharéü̃wa cuxũxü̃ nax ngéma cuxna chacaxü̃ca̱x naxca̱x i guxü̃ma i ngẽma naxca̱x cuxü̃ ínaxuaxü̃güxü̃? —ñanagürü.
10 Rü yexguma ga Pauru rü nanangãxü̃, rü ñanagürü: —Choma rü cupe̱xewa changexma nax cuma choxna cucaxü̃ca̱x, erü cuma nixĩ i cuxü̃ naxunetaxü̃ i Rómaarü ãẽ̱xgacü ya Chécharu nax ãẽ̱xgacü quixĩxü̃ i núma. Rü ngẽmaca̱x chanaxwa̱xe i nua choxna cuca. Erü taxuxü̃ma i chixexü̃ chaxü i Yudíugüpe̱xewa ngẽma i cuma rü meama nüxü̃ cucua̱x.
11 Ngẽxguma chi aixcüma chixexü̃ chaxüxgu rü marü name nax naxca̱x choxü̃ yama̱xgüxü̃, rü tama chaugü chinuxü̃ nax chayuxü̃. Natürü ngẽxguma nataxuxguma i ta̱xacü i aixcüma ixĩxü̃ i ngẽma naxca̱x choxü̃ ínaxuaxü̃güxü̃, rü taxuacüma texé Yudíugüna choxü̃ tamu. Rü naxca̱x íchaca nax nümatama ya Rómaarü ãẽ̱xgacü ya Chécharu choxna naca̱xaxü̃ca̱x —ñanagürü ga Pauru.
12 Rü yexguma ga Féstu rü norü ucu̱xẽruü̃gümaxã nidexa, rü ñu̱xũchi ñanagürü Pauruxü̃: —Marü naxca̱x ícuca nax Rómaarü ãẽ̱xgacü ya Chécharu cuxna caxü̃ca̱x. Ẽcü, ñu̱xma rü naxü̃tawa tá cuxü̃ chamu —ñanagürü.
Ãẽ̱xgacü ga Agrípape̱xewa nayexma ga Pauru
13 Rü ñuxre ga ngunexü̃ ngupetügu, rü Checharéawa nangugü ga Yudíugüarü ãẽ̱xgacü ga Agrípa rü naeya̱x ga Bereníche, nax Féstuxü̃ yanamõxẽgüxü̃ca̱x.
14 Rü marü ñuxre ga ngunexü̃ yéma nayexmagügu, rü yemaca̱x Agrípamaxã nüxü̃ nixu ga Féstu ga Pauruchiga, rü ñanagürü: —Nua nangẽxma i wüxi i yatü i poxcuxü̃ ga Férix tama ínguxuchixẽẽxü̃.
15 Rü yexguma choma Yerucharéü̃wa chayexmagu, rü chacherdótegüarü ãẽ̱xgacügü rü Yudíugüarü ãẽ̱xgacügü rü ínanaxuaxü̃gü, rü naxca̱x ínacagü nax namaxã chanaxueguxü̃ca̱x nax yama̱xgüãxü̃.
16 Rü choma chanangãxü̃, rü tama tocüma nixĩ i toma i Rómacüã̱xgü nax tayamáxü̃ i wüxi i duü̃xü̃ ega tama nügüétüwa yadexaxíragu nape̱xewa i ngẽma ínaxuaxü̃güxü̃.
17 Rü yemaca̱x ga yexguma núma nangugügu ga yema Yudíugü, rü yexgumaarü moxü̃ãcü rü chorü tochicaxü̃wa chitocuchi nax nüxna chacaxü̃ca̱x nachiga ga yema, rü yéma naxca̱x changema ga yema yatü.
18 Natürü ga yema Yudíugü ga ínaxuaxü̃güxü̃, rü taxuxü̃ma ga ta̱xacü ga chixexü̃ ga choma nagu charüxĩnüxü̃maxã ínanaxuaxü̃gü.
19 Natürü norü Tupanachiga rü wüxi ga yatü ga Ngechuchuchiga nixĩ ga yema nagu yadexagüxü̃. Rü nüma ga Yudíugü nüxü̃ nixugü nax nayuxü̃ ga yema Ngechuchu, natürü Pauru nüxü̃ ixuxgu rü marü wena namaxü̃.
20 Rü choma nax tama nüxü̃ chacuáxü̃ nax ñuxãcü tá chanamexẽẽxü̃ ga yema guxchaxü̃, rü yemaca̱x nüxna chaca ga Pauru rü nanaxwa̱xe nax Yerucharéü̃wa naxũxü̃, nax yéma nüxna chacaxü̃ca̱x.
21 Natürü nüma ga Pauru naxca̱x ínaca nax Rómaarü ãẽ̱xgacü ya Chécharupe̱xewa naxũxü̃ nax nümatama ya ãẽ̱xgacü ya Chécharu nüxna caxü̃ca̱x. Rü yemaca̱x chanamu nax mea nüxna nadaugüxü̃ca̱x ñu̱xmata choma Rómaarü ãẽ̱xgacü ya Chécharuxü̃tawa chanamux —ñanagürü.
22 Rü yexguma ga Agrípa rü ñanagürü Féstuxü̃: —Choma rü ta nüxü̃ chaxĩnüchaü̃ i norü ore i ngẽma yatü —ñanagürü. Rü Féstu nanangãxü̃ rü ñanagürü: —Moxü̃ tátama nüxü̃ cuxĩnü —ñanagürü.
23 Rü moxü̃ãcü yema ucapu ga ãẽ̱xgacügü íngutaque̱xegüxü̃wa nangugü ga Agrípa rü Bereníche rü nügü ínatagüãcüma nichocu. Rü namaxã ínangugü ta ga churaragüarü ãẽ̱xgacügü rü yema ĩanecüã̱xgü ga tachigaxü̃. Rü ñu̱xũchi Pauruca̱x nangema ga Féstu nax yema ãẽ̱xgacügüpe̱xewa nagagüãxü̃ca̱x.
24 Rü ñanagürü ga Féstu: —Pa Ãẽ̱xgacü Pa Agrípax, rü Pa Guxãma i Pema ya Nuxmagüxex, ñaa nixĩ i ngẽma yatü i nachigamaxã yadexagüxü̃ i guxü̃ma i Yudíugü. Rü chope̱xewa ínanaxuaxü̃gü ga Yerucharéü̃wa rü núma Checharéawa rü ta. Rü guxü̃guma tagaãcüma choxna naxca̱x nacagü nax nayuxü̃ca̱x.
25 Natürü i choma rü taxuxü̃ma i ta̱xacü i chixexü̃ i naxüxü̃ nawa chadau nax naxca̱x yamáxü̃. Natürü nüma ga Pauru rü naxca̱x ínaca nax Rómaarü ãẽ̱xgacü ya Chécharu nüxna ca̱xaxü̃, rü ngẽmaca̱x nagu charüxĩnü nax ngéma chanamuxü̃.
26 Natürü taxuxü̃ma choxü̃́ nangẽxma i ore i nachiga i aixcüma ixĩxü̃ nax chorü ãẽ̱xgacü ya Chécharuca̱x chanaxümatüxü̃ca̱x. Rü ngẽmaca̱x chanamu nax nua pepe̱xewa nagagüãxü̃ca̱x, rü cuxca̱x nixĩ, Pa Ãẽ̱xgacü Pa Agrípax, nax nüxna cucaxü̃ca̱x, nax nüxü̃ chacuáxü̃ca̱x i ta̱xacü tá chaxümatüxü̃ naxca̱x ya ãẽ̱xgacü ya Chécharu.
27 Erü cha̱u̱xca̱x rü tama name nax ãẽ̱xgacü ya Chécharuxü̃tawa chanamuxü̃ i wüxi i poxcuxü̃ ega tama chanaxümatügu nachiga nax ta̱xacüca̱x ínaxuaxü̃güãxü̃ —ñanagürü.
