Hechos 28:1-31
28 Rü yexguma meama naxãnacüwa tangugügu ga guxãma, rü yexguma nüxü̃ tacua̱xgü nax Málta yixĩxü̃ ga naéga ga yema capaxũ.
2 Rü yema yémacüã̱xgü ga duü̃xü̃gü rü meama toxü̃ nayauxgü ga guxãma. Rü nanangixtagü ga wüxi ga üxü ga taxü̃ne. Rü toxca̱x nacagü ga guxãma nax yéma togü tanaixü̃güxü̃ca̱x, yerü napu rü nagáuane.
3 Rü Pauru nanadetaque̱xe ga ñuxre ga naichacüügü, rü üxüxétüwa nayawocu. Natürü yexguma yéma yawocuãgu, rü üxüarü naiemaxü̃cha̱xwa inayago ga wüxi ga ãxtape. Rü Paurume̱xẽwa nayuxu, rü yéma nayarütuãchi.
4 Rü yexguma yema yémacüã̱xgü nüxü̃ daugügu ga yema ãxtape ga Paurume̱xẽwa nax natuxü̃, rü nügümaxã ñanagürügü: —Ñaa yatü rü maneca wüxi i máẽtaxü̃ nixĩ. Rü woo márwa yuwa nax yañaxü̃, natürü Tupana tama nanamaxẽẽchaü̃ —ñanagürügü.
5 Natürü gumá üxüxétügu nanamaxü̃ ga yema ãxtape, rü taxuxü̃ma nüxü̃ naxüpetü ga Pauru.
6 Natürü guxü̃ma ga yema duü̃xü̃gü rü ínanangu̱xẽẽgü rü tá nacha ya naxme̱x rüe̱xna ngürüãchi nayu̱x. Rü marü nũxcüxürama ga yema nüxü̃ nax nadaunüxü̃ rü taxuxü̃ma nüxü̃ nax üpetüxü̃, rü düxwa togu narüxĩnüe rü inanaxügüe nax ñagüxü̃: —Maneca wüxi ya tupana nixĩ —ñagüxü̃.
7 Rü yema nachicaarü ngaicamana nayexma ga norü naane ga yema capaxũarü ãẽ̱xgacü ga Púbiru ga naéga. Rü nüma meama toxü̃ nayaxu, rü yexma toxü̃ napegüxẽxẽ ga tomaepü̱x ga ngunexü̃. Rü tomaxã namecümaxüchi.
8 Rü guxema Púbiru nanatü rü ngürücarewa tayexma, yerü tixaxüne rü taduü̃. Rü tüxü̃ ínayadau ga Pauru, rü tümamaxã nayumüxẽ, rü tümaétügu naxǘxme̱x, rü tüxü̃ narümexẽxẽ.
9 Rü yexguma yemaxü̃ nadaugügu, rü Pauruca̱x yéma naxĩ ta ga guxü̃ma ga togü ga ida̱xaweexü̃ ga yema capaxũcüã̱x, rü narümexe.
10 Rü nümagü ga yema duü̃xü̃gü ga capaxũcüã̱x rü meama toxna nadau rü toxü̃ narüngü̃xẽẽgü. Rü yexguma itaxĩãchigu, rü toxna nananagü ga guxü̃ma ga tanaxwa̱xexü̃ ga torü namawaxü̃ ga õna.
Rómawa nangu ga Pauru
11 Rü tomaepü̱x ga tauemacü yéma capaxũwa tayexmagü. Rü ñu̱xũchi nagu tichoü̃ ga wüxi ga wapuru ga yema capaxũwa gáuanexü̃ ngupetüxẽxẽ́ne. Rü Areyandríacüã̱x nixĩ ga gumá wapuru. Rü nape̱xewa nayexmagü ga taxre ga norü tupanachicüna̱xãgü ga Cátugu rü Pórugu ãégagüxü̃.
12 Rü Chiracúchaarü türewa tangugü, rü tomaepü̱x ga ngunexü̃ yéma tayexmagü.
13 Rü yéma itaxĩãchi, rü nacutüarü ngaicamagu taxĩ ñu̱xmata Requíuwa tangugü. Rü moxü̃ãcü ínangu ga wüxi ga buanecü ga súrwaama ne bucü rü toxü̃ inicuetaü̃. Rü yemaarü moxü̃ãcüama rü Pochuóriwa tangugü.
14 28:14-15 Rü yexma Pochuórigu nüxü̃ tayangau ga ñuxre ga duü̃xü̃gü ga yaxõgüxü̃. Rü toxna naxu nax wüxi ga yüxü yexma naxü̃tagu tarüchoxü̃ca̱x. Rü marü wüxi ga yüxü ngupetügu rü itaxĩãchi nax namagu Rómawa taxĩxü̃ca̱x. Rü marü toxü̃ nacuáchigagü ga yema yaxõgüxü̃ ga Rómacüã̱x. Rü yema nama ga Ápiugu ãégaxü̃gu naxĩ nax yexma toxü̃ yangaugüxü̃ca̱x. Rü Ápiuarü Ngü̃echicawa rü Tomaepü̱x ga Pechicawa toxü̃ narüngü̃xẽẽgü. Rü yexguma Pauru nüxü̃ da̱u̱xgu ga yema yaxõgüxü̃, rü Tupanana moxẽ naxã rü poraãcü nataãxẽ. Rü yemaacü Rómawa tangugü.
15 Nüü̃ nadau 28:14
16 Rü yexguma Rómawa tangugügu rü wüxi ga ĩpatawa nananguxẽẽgü ga Pauru nüxica namaxã ga wüxi ga churara ga nüxna dauxü̃.
Rómawa nayexma ga Pauru
17 Rü tomaepü̱x ga ngunexü̃ marü yéma nayexmagu, rü Pauru naxca̱x nangema ga yema Yudíugüarü ãẽ̱xgacügü ga Rómawa yexmagüxü̃. Rü yexguma nangutaque̱xegügu, rü ñanagürü ga Pauru nüxü̃: —Chomax, Pa Chauenexẽgüx, rü taxuxü̃ma i chixexü̃ chaxü namaxã i tatanüxü̃, rü bai i nũxcümaü̃güxü̃ i tórü o̱xigücümagümaxã. Natürü Yerucharéü̃gu choxü̃ niyauxgü ga tatanüxü̃, rü Rómacüã̱x ga churaragüna choxü̃ namugü.
18 Rü yexguma marü choxna nacagüegu ga Rómacüã̱xgü, rü choxü̃ ningexgüchaü̃, yerü taxuxü̃ma ga ta̱xacü ga chixexü̃ chowa nadaugü nax choxü̃ yama̱xgüxü̃ca̱x.
19 Natürü yema tatanüxü̃ ga Yudíugü rü nayamuẽtanü nax tama choxü̃ yange̱xgüxü̃ca̱x. Rü yemaca̱x düxwa naxca̱x íchaca nax nümatama ya Rómaarü ãẽ̱xgacü ya Chécharu choxna caxü̃ca̱x. Natürü tama tatanüxü̃xü̃ íchaxuaxü̃xü̃ca̱x nixĩ ga yemaca̱x íchaca̱xaxü̃.
20 Rü ngẽmaca̱x nixĩ i pexca̱x nua changemaxü̃ nax pexü̃ chadauxü̃ca̱x rü pemaxã chidexaxü̃ca̱x. Pema nüxü̃ pecua̱x rü yixema i Iraétanüxü̃ rü ítanangu̱xẽxẽ nax ínanguxü̃ ya Cristu. Rü yimá Cristuca̱x nixĩ i choma i ñu̱xma i daa cadénamaxã chináixü̃ —ñanagürü.
21 Rü nümagü nanangãxü̃gü, rü ñanagürügü: —Toma rü taxuxü̃ma i popera i Yudéawa ne muxü̃ i cuchiga ümatüxü̃ tayauxgü. Rü ngẽma taenexẽgü i ngéma ne ĩxü̃ rü núma ngugüxü̃ rü bai i wüxi i nüxü̃ ixuxü̃ i ta̱xacürü ore i chixexü̃ i cuchiga.
22 Rü cuxü̃tawa nüxü̃ taxĩnüechaü̃ rü ¿ñuxũ ñacuxü̃ i cumax? Erü nüxü̃ tacua̱xgü rü guxü̃wama i Yudíugü rü chixri nachiga nidexagü i ngẽma ore i ngexwaca̱xü̃xü̃ i Ngechuchuchiga —ñanagürügü.
23 Rü yexguma Paurumaxã inaxunetagü ga wüxi ga ngunexü̃, rü napatawa naxĩ ga muxü̃ma ga duü̃xü̃gü. Rü Pauru namaxã nüxü̃ nixu ga Tupanaarü ore ga ñuxãcü ãẽ̱xgacü nax yixĩxü̃ ya Tupana. Rü pa̱xmama inanaxügü, rü ñu̱xmata nachütaxü̃ rü nüxü̃́ nanangúchaü̃xẽxẽ ga yema duü̃xü̃gü nax Ngechuchuaxü̃́ yaxõgüãxü̃ca̱x. Rü yemaca̱x Moiché ümatüxü̃ ga mugüwa rü nũxcümaü̃güxü̃ ga Tupanaarü orearü uruü̃gü ümatüxü̃ ga orewa namaxã nüxü̃ nixu ga Ngechuchuchiga.
24 Rü nümaxü̃ rü nayaxõgü ga yema Pauru namaxã nüxü̃ ixuxü̃, natürü ga togü rü tama nayaxõgü.
25 Rü yexguma tama wüxigu naxĩnüegu ga yema duü̃xü̃gü, rü inanaxügü nax íyaxĩxü̃. Rü yemaca̱x ga Pauru rü ñanagürü nüxü̃: —Mea perü o̱xigümaxã nidexa ga Tupanaãxẽ ya Üünecü ga yexguma Ichaíaxü̃ yadexaxẽẽgu rü ñaxgu:
26 “¡Ngéma naxũ, rü ngẽma duü̃xü̃gümaxã nüxü̃ yarüxu rü ñacurügü tá nüxü̃:‘Rü woo nüxü̃ naxĩnüegu rü taxũtáma nüxü̃ nacua̱xgü nax ta̱xacüchiga yixĩxü̃ i ngẽma nüxü̃ naxĩnüexü̃!Rü woo nüxü̃ nadaugügu rü taxũtáma nüxü̃ nacua̱xgü nax ta̱xacüchiga yixĩxü̃ i ngẽma nüxü̃ nadaugüxü̃.
27 Erü naãxẽ i ngẽma duü̃xü̃gü rü chixexü̃maxã nanapa, rü naxmachixẽ rü narüdüxtagü, rü naxetügü rü ninuxgü.Rü ngẽmaãcü nangupetü nax tama nüxü̃ nadaugüxü̃ca̱x rü tama nüxü̃ naxĩnüexü̃ca̱x rü tama chauga naxĩnüexü̃ca̱x rü tama cha̱u̱xca̱x nawoeguxü̃ca̱x nax ngẽmaãcü choma naxca̱x chayataanexẽẽgüxü̃ca̱x’ ”,
—ñanagürü ga Tupanaãxẽ ya Üünecü.
28 Rü ñanagürü ta ga Pauru: —Rü name nixĩ nax nüxü̃ pecuáxü̃ nax ñu̱xmawena ngẽma tama Yudíugü ixĩgüxü̃maxã nüxü̃ ixuxü̃ i ñaa Tupanaarü ore i tüxü̃ maxẽxẽẽxü̃. Rü nümagü tá nixĩ i aixcüma inaxĩnüexü̃ —ñanagürü.
29 Rü yexguma Pauru yema ñaxgu, rü ínixĩ ga yema Yudíugü, rü poraãcü nügümaxã íniporagatanücüü.
30 Rü taxre ga taunecü ga mecü yéma nayexma ga Pauru nawa ga guma ĩpata ga naxütanüne nax nagu napexü̃ca̱x. Rü yéma meama nanayaxu ga guxü̃ma ga yema duü̃xü̃gü ga naxü̃tawa íyadaugüxü̃.
31 Rü nüxü̃ nixuchiga ga ñuxãcü ãẽ̱xgacü nax yixĩxü̃ ga Tupana. Rü meama nanangúexẽxẽ ga Cori ya Ngechuchu ya Cristuchiga. Rü taxúema nüxü̃́ tanaguxchaxẽxẽ.
