Hechos 6:1-15
6 Rü yema ngunexü̃gügu rü yexeraãcü nimuetanü ga yema duü̃xü̃gü ga yaxõgüxü̃. Rü natanüwa nayexmagü ga Yudíugü ga Griégugawa idexagüxü̃. Rü nayexma ta ga yaxõgüxü̃ ga Yudíugü ga woetama nagawa idexagüxü̃. Rü yema yaxõgüxü̃ ga Griégugawa idexagüxü̃ rü nidexagüecha nachigagu ga yema yaxõgüxü̃ ga Yudiugügawa idexagüxü̃, rü ñanagürügü: —Totanüwa yutegüxe rü tama mea õna tüxna naxãgüxü̃ i ngẽxguma õna inaxãgüü̱̃xgu i wüxichigü i ngunexü̃gu —ñanagürügü.
2 Rü yexguma ga yema 12 ga ngúexü̃gü ga Ngechuchu imugüxü̃ rü guxü̃ma ga yema yaxõgüxü̃xü̃ nangutaque̱xexẽẽgü, rü ñanagürügü nüxü̃: —Tama name nax toma ítanangéxü̃ i Tupanaarü orearü uchiga nax õnamaxã itacuáxü̃ca̱x.
3 Rü ngẽmaca̱x, Pa Tomücügüx, rü ¡Naxca̱x peda̱u̱x i petanüwa ya 7 ya yatügü ya guxãma nüxü̃ ngechaü̃güxü̃, rü mea naãxẽxü̃ cuáxü̃, rü aixcüma Tupanaãxẽ ya Üünecü nawa ngẽxmagüxü̃! Rü toma tá nüxna tanaxã i ngẽma puracü nax nümagü õnamaxã inacua̱xgüxü̃ca̱x.
4 Rü ngẽxguma i toma rü yumüxẽwa rü Tupanaarü orearü uchigawaxicatama tá tapuracüe —ñanagürügü.
5 Rü yexguma ga guxü̃ma ga yema duü̃xü̃gü rü: —Ngü̃ —ñanagürügü naxca̱x ga yema ore. Rü nüxü̃ naxunetagü ga Estébaü̃ ga mea yaxõcü rü aixcüma Tupanaãxẽ ya Üünecü nawa yexmacü, rü Ferípe, rü Pócoro, rü Nicanúru, rü Timóü̃ rü Pármenax, rü Nicuráchi ga Antioquíacüã̱x ga yexguma taxũta Ngechuchuaxü̃́ yaxõõgu rü Yudíugücümagu ixũcü.
6 Rü yema ngúexü̃gü ga Ngechuchu imugüxü̃xü̃tawa nanagagü. Rü nümagü rü naxme̱xgümaxã nüxü̃ yangõgüãcüma namaxã nayumüxẽgü.
7 Rü yema Tupanaarü ore rü yexeraãcü tóxnamana ninguchigü. Rü poraãcü nimuetanü ga yema yaxõgüxü̃ ga Yerucharéü̃wa. Rü woo muxü̃ ga chacherdótegü rü ta nayaxõgü.
Estébaü̃xü̃ niyauxgü
8 Rü Estébaü̃ nixĩ ga wüxi ga yatü ga Tupana poraãcü nüxü̃ rüngü̃xẽxẽcü rü naporaxẽẽcü nax duü̃xü̃gütanüwa naxüaxü̃ca̱x ga mexü̃gü ga taxü̃gü rü cua̱xruü̃gü ga Tupanaarü poramaxã naxüxü̃.
9 Rü wüxi ga ngutaque̱xepataxü̃ ga Ínguxü̃xü̃arü Ngutaque̱xepataü̃gu ãéganearü duü̃xü̃gü, rü wüxigu namaxã ga ñuxre ga duü̃xü̃gü ga Chiréneanewa, rü Areyandríaanewa, rü Chiríchiaanewa, rü Áchiaarü naanewa ne ĩxü̃ rü inanaxügüe nax Estébaü̃maxã iyaporagatanücüüxü̃.
10 Natürü taxuacüma Estébaxü̃xü̃ narüyexeragü, yerü nüma ga Estébaü̃ rü nidexa namaxã ga yema cua̱x ga Tupanaãxẽ ya Üünecü nüxna ãxü̃.
11 Rü yexguma ga yema duü̃xü̃gü rü togüaxü̃́ nanaxütanügü nax Estébaü̃chiga doraxü̃ yaxugüxü̃ca̱x. Rü yema idoraexü̃ rü ñanagürügü: —Toma nüxü̃ taxĩnüegu, rü Moichéchiga rü Tupanachiga chixexü̃ i orexü̃ nixu i Estébaü̃ —ñanagürügü.
12 Rü yemaacü nananuexẽxẽ ga duü̃xü̃gü, rü Yudíugüarü ãẽ̱xgacügü, rü yema ngúexẽxẽruü̃gü ga mugüwa ngu̱xẽẽtaegüxü̃. Rü yemaca̱x ga nümagü rü Estébaü̃ca̱x ínayaxüãchi, rü nayayauxgü, rü Ãẽ̱xgacügüarü Ngutaque̱xewa nanagagü.
13 Rü naxca̱x nadaugü ta ga yatügü ga doraxü̃ ixugüemarexü̃, rü yema rü ñanagürügü: —Ñaa yatü rü taguma ínayachaxãchi nax chixexü̃maxã yadexaxü̃ nachigagu ya daa Tupanapata ya taxü̃ne rü nachigagu i Tupanaarü mugü.
14 Rü toma rü nüxü̃ taxĩnüe rü ñanagürü: “Yimá Ngechuchu ya Nacharétucüã̱x rü tá nanangutaü̃xẽxẽ ya daa Tupanapata ya taxü̃ne, rü tá inayanaxoxẽxẽ i nacümagü ga Moiché tüxna ãxü̃” —ñanagürügü.
15 Rü yexguma Estébaü̃xü̃ nadaunügu ga guxü̃ma ga yema ãẽ̱xgacügü ga yéma rütogüxü̃, rü nüxü̃ nadaugü ga nachametü rü wüxi ga daxũcüã̱x ga orearü ngeruü̃chametürüxü̃ nax yixĩxü̃.
