Romanos 11:1-36
11 Ñu̱xma pexna chaca rü, ¿ẽ̱xna pexca̱x rü Tupana rü marü nüxü̃ naxo i norü duü̃xü̃gü i Iraétanüxü̃gü? Tama nixĩ i nüxü̃ naxoxü̃. Erü choma i Pauru rü Yudíu chixĩ. Rü Abraáü̃tanüxü̃ chixĩ, rü Abraáü̃taxa ya Bẽyamíü̃tanüxü̃ chixĩ.
2 Rü nũxcümamatama Tupana Iraétanüxü̃maxã inaxuneta nax norü duü̃xü̃gü yixĩgüxü̃ca̱x, rü ñu̱xma rü tama Yudíugüxü̃ naxo. ¿Tama ẽ̱xna nüxü̃ pecua̱x nax ñuxũ ñaxü̃ ga Tupanaarü orearü uruxü̃ ga Ería? Rü Tupanaarü orewa nüxü̃ tadaugü rü Ería rü Tupanape̱xewa poraãcü yema Yudíugüxü̃ nixugü.
3 Rü ñanagürü ga Ería:“Pa Corix, ngẽma Iraétanüxü̃ rü marü nanadai i curü orearü uruü̃gü.Rü nagu napogüe i ngẽma nachicagü i ngextá duü̃xü̃gü cuxü̃ ícua̱xüü̃güxü̃wa.Rü chaxicatama íchayaxǘ.Rü choxü̃ rü ta nima̱xgüchaü̃”,
ñanagürü ga Ería.
4 Natürü Tupana nanangãxü̃, rü ñanagürü:“Dücax, choma rü marü choxü̃́ nangẽxma i 7,000 i yatügü i chaugüxü̃́ chidexechixü̃.Rü nümagü rü taguma nüxü̃ nicua̱xüü̃gü i ngẽma tupananetachicüna̱xã i Baá”,
ñanagürü.
5 Rü ngẽxgumarüxü̃ ta nixĩ i ñu̱xmax. Rü woo muxü̃ma i Yudíugü tama nayaxõgü, natürü nangẽxma i ñuxre ya Tupana namaxã mecümaxü̃gagu dexü̃.
6 Rü ñu̱xma nax Tupana tüxü̃ ngechaü̃xü̃gagu tüxü̃ nadexü̃, rü taxucürüwama texé nüxü̃ tixu nax ta̱xacürü mexü̃ nax ixügüxü̃gagu yixĩxü̃ i tüxü̃ nadexü̃. Erü ngẽxguma chi ta̱xacürü mexü̃ ixügüxü̃gagu yixgu nax tüxü̃ nadexü̃, rü natüca̱xmamare chi nixĩ nax nüxü̃́ ingechaü̃tümüxü̃güxü̃.
7 ¿Rü ñuxãcü yixĩxü̃ i ñu̱xmax? Rü ngẽma rümumaexü̃ i Iraétanüxü̃ rü tama nüxü̃ inayangaugü nax Tupanape̱xewa yamexü̃ca̱x. Natürü ngẽma noxretama i Iraétanüxü̃ ya Tupana dexü̃, rü ngẽmagü nixĩ i nüxü̃ iyangaugüxü̃ nax nape̱xewa yamexü̃ca̱x. Rü guxü̃ma ga yema togü ga Iraétanüxü̃ rü tama naga naxĩnüe.
8 Rü ngẽmachiga nixĩ i Tupanaarü ore i ümatüxü̃ i ñaxü̃:“Tupana rü ngẽma duü̃xü̃güca̱x ínanangu̱xẽxẽ i wüxi i naãxẽ i nüxü̃́ naguxchaxẽẽxü̃.Rü ngẽmaca̱x woo nüxü̃ nadaugügu i ngẽma ore i aixcüma ixĩxü̃, rü tama nüxü̃ nacua̱xgüéga.Rü woo nüxü̃ naxĩnüegu i ngẽma ore, rü tama nayaxõgü.Rü ñu̱xma rü ta ngẽmaãcü nixĩ”,
ñanagürü.
9 Rü Dabí rü ta rü ñanagürü:“Ngẽma duü̃xü̃gü rü norü õnagü i taxü̃gagu rü guxchaxü̃gügu tá nayi, rü ngẽmaca̱x tá napoxcue.
10 Rü tá nixogüxetü nax taxuxü̃ma nüxü̃ nadaugüxü̃ca̱x.Rü guxü̃gutáma narümataü̃gü”,
ñanagürü.
Tupana nanamaxẽxẽxẽ i ngẽma tama Yudíugü ixĩgüxü̃
11 Rü pexna chaca, rü ñu̱xma nax Cristuxü̃ naxoexü̃ i ngẽma Yudíugü, ¿rü pexca̱x ẽ̱xna rü ngẽmaca̱x ya Tupana rü tá nüxü̃ naxoxochixü̃? Tama nüxü̃ naxo. Natürü ñu̱xma nax tama Cristuaxü̃́ yaxõgüãxü̃ i ngẽma Yudíugü, rü ngẽmaca̱x ya Tupana rü nüxü̃ narüngü̃xẽxẽ i ngẽma tama Yudíugü ixĩgüxü̃ nax nayauxgüãxü̃ca̱x i maxü̃ i taguma gúxü̃. Rü ngẽmaãcü nanaxü ya Tupana nax yaxãũxãchiexü̃ca̱x i ngẽma Yudíugü.
12 Rü ñu̱xma nax tama yaxõgüãxü̃ i Yudíugü, rü yemaca̱x ga Tupana rü nüxü̃ narüngü̃xẽxẽ ga yema tama Yudíugü ixĩgüxü̃. Natürü ngẽxguma Tupanaca̱x nawoegu̱xgu i guxü̃ma i Yudíugü, rü Tupana rü tá yexeraãcü nüxü̃ narüngü̃xẽxẽ i guxü̃ma i ngẽma duü̃xü̃gü i tama Yudíugü ixĩgüxü̃.
13 11:13-14 Rü ñu̱xma Pa Duü̃xü̃gü i Tama Yudíugü Ixĩgüxü̃x, rü choxü̃́ nangẽxma i wüxi i ore i pemaxã nüxü̃ chixuxchaü̃xü̃. Rü dücax, petanüwa nixĩ i choxü̃ namuxü̃ ya Tupana nax pemaxã nüxü̃ chixuxü̃ca̱x i norü ore. Rü ñu̱xma rü aixcüma mea chayanguxẽxẽ i ngẽma puracü, erü chanaxwa̱xe i ngẽma chautanüxü̃ i Yudíugü nax pexü̃ daugüxü̃ca̱x nax Tupana pexü̃ rüngü̃xẽẽxü̃. Rü ngẽmaca̱x i ñuxre i nümagü, rü tá nüxü̃́ nangúchaü̃ nax Cristuaxü̃́ yaxõgüãxü̃ rü ngẽmaãcü nayauxgüãxü̃ca̱x i maxü̃ i taguma gúxü̃.
14 Nüü̃ nadau 11:13
15 Nüxü̃ tacua̱x rü ngẽma Yudíugü rü tama Cristuaxü̃́ nayaxõgüchaü̃ i ñu̱xmax. Rü ngẽmaca̱x ya Tupana rü nanade i ngẽma tama Yudíugü ixĩgüxü̃. ¿Natürü ñuxãcü tá nixĩ i ngẽxguma Tupana wena nadexgu i ngẽma Yudíugü? Rü wüxi i mexẽchixü̃ tá nixĩ, erü ñoma wüxi i duü̃xü̃ i yuxü̃ rü wenaxarü maxü̃xü̃rüxü̃ tá nixĩgü.
16 Rü ngẽxguma naxüünegu i ngẽma nüxíraxü̃ i paũ i paũcharawa üxü̃ rü Tupanana ixãxü̃, rü ñu̱xũchi guxü̃ma i ngẽma paũchara rü naxüüne. Rü wüxi i nanetü rü ngẽxguma naxüünegu i naxchuma̱xãgü, rü nachacüügü rü ta rü nixüüne.*
17 Tupana nüxü̃ naxo ga yema Yudíugü ga tama yaxõgüchaü̃xü̃. Rü ñoma wüxi i oribuchacüxü i idaexü̃rüxü̃ nixĩ ga yema Yudíugüxü̃ naxoxü̃. Natürü nachicüü Tupana pexü̃ nade woo tama Yudíugü nax pixĩgüxü̃. Rü wüxi i naixnecücüã̱x i oribuchacüxü rü oribu ítoxü̃wa yarüñaxcuchixü̃rüxü̃ pixĩgü. Rü ñu̱xma i pema rü ta pexü̃́ nangẽxma i pechica natanüwa i ngẽma duü̃xü̃gü i Tupanaarü ixĩgüxü̃. Erü Tupana rü pexü̃ narüngü̃xẽxẽ nax penayaxuxü̃ca̱x i maxü̃ i taguma gúxü̃.
18 Natürü pema i tama Yudíugü nax pixĩgüxü̃, rü tama name i pegü picua̱xüü̃gü rü nüxü̃ pixu nax ngẽma Yudíugüarü yexera pixĩgüxü̃. Rü ngẽxguma chi ngẽmaãcü pegü picua̱xüü̃güchaü̃gu, rü name nixĩ i nüxna pecua̱xãchie nax tama petanüwa ne naxũxü̃ ga Cristu ya pexü̃ maxẽxẽẽcü, natürü Yudíugütanüwa nixĩ ga ne naxũxü̃. Rü ngẽma Yudíugügagu nixĩ ya Tupana pexü̃ dexü̃ rü maxü̃ pexna ãxü̃ i ñu̱xmax.
19 Natürü bexmana tá ñaperügügü: “Tupana rü marü nüxü̃ naxo ga yema Yudíugü rü yemaca̱x nachicüü tüxü̃ nade”, ñaperügügü tá.
20 Ngẽmáacü aixcüma nixĩ ga Tupana nüxü̃ oxü̃ ga yema Yudíugü yerü tama nayaxõgü. Rü ngẽma nax peyaxõgüxü̃ca̱xicatama nixĩ i nachicüü Tupana pexü̃ dexü̃ i ñu̱xmax. Rü ngẽmaca̱x tama name i pegü picua̱xüü̃gü. ¡Rü Tupanaxü̃ pemuü̃e nax tama yema Yudíugüxü̃ üpetüxü̃rüxü̃ pexü̃ üpetüxü̃ca̱x!
21 Yerü yema Yudíugü ga noxri Tupanaarü ixĩgüxü̃, rü Tupana nüxü̃ naxo yerü tama nayaxõgü. Rü yexguma yemaacü Tupana nüxü̃ oxgu ga yema duü̃xü̃gü rü pexü̃ rü tá ta naxo ega taxũtáma peyaxõgüechagu.
22 Dücax, aixcüma namecüma ya Tupana. Natürü tama tüxü̃ naxüpetümare ya yíxema tama naga ĩnüxe. Rü nanapoxcue ga yema chixexü̃gu yixü̃, natürü pemaxã namecüma i pema ega naga pexĩnüegu rü aixcüma nüxü̃́ peyaxõgügu. Natürü ngẽxguma tama peyaxõgüechagu rü tama nüma naxwa̱xexü̃ãcüma pemaxẽgu, rü nüma rü pexü̃ rü tá ta naxo.
23 Natürü ngẽxguma yaxõgüãgu i ngẽma Yudíugü, rü Tupana rü wena táxarü nanade, erü nüxü̃́ nangẽxma i pora nax wenaxarü nadeaxü̃ca̱x ega aixcüma yaxõgüãgu.
24 Rü pema nax tama Yudíugü pixĩgüxü̃, rü tama Tupanaarü duü̃xü̃gü pixĩgü ga noxrix. Natürü Tupana pexü̃ nade nax noxrü pixĩgüxü̃ca̱x. Rü ñu̱xma nax yemaacü Tupana pexü̃ dexü̃, rü ngẽxguma yaxõgüãgu i ngẽma Yudíugü, rü Tupana rü pexü̃ nadexü̃arü yexera tá nanade i ngẽma Yudíugü, yerü woetama norü duü̃xü̃güchire̱x nixĩgü ga noxrix.
Wüxi i ngunexü̃ rü guxü̃ma i Yudíugü tá nanayauxgü i maxü̃ i taguma gúxü̃
25 Pa Chauenexẽgü i Yaxõgüxü̃x, nangẽxma i wüxi i ore ga noxri tama duü̃xü̃güxü̃ nüxü̃ nacua̱xẽẽxü̃ ga Tupana. Natürü chanaxwa̱xe i nüxü̃ pecua̱x i ngẽma ore nax tama nagu perüxĩnüexü̃ca̱x nax duü̃xü̃gü i nüxü̃ cua̱xüchixü̃ pixĩgüxü̃, rü pexicatama Tupana pexü̃ dexü̃. Rü dücax, nangẽxmagü i Iraétanüxü̃ i tama yaxõgüchaü̃xü̃. Rü ngẽmaãcü tá nixĩ ñu̱xmatáta yaxõgüã i guxü̃ma i ngẽma tama Yudíu ixĩgüxü̃ ya Tupana dexü̃.
26 Natürü ngẽmawena rü guxü̃táma i Iraétanüxü̃ rü tá ta nayaxõgü, rü tá nanayauxgü i maxü̃ i taguma gúxü̃. Erü Tupanaarü ore i ümatüxü̃wa rü ñanagürü:“Yimá Cristu ya ínanguxü̃xẽẽcü, rü Chióü̃wa tá ne naxũ.Rü nüma rü tá ngẽma Iraétanüxü̃güxü̃ chixexü̃wa ínanguxü̃xẽxẽ.
27 Rü aixcüma norü pecaduwa tá íchananguxü̃xẽxẽ i ngẽma Yudíugü.Rü ngẽxguma tá nixĩ nax chayanguxẽẽxü̃ i ngẽma chorü uneta”,
ñanagürü ga Tupana.
28 Natürü i nüma i Yudíugü rü Tupanamaxã narüxuanügü erü tama nayaxõgü i ngẽma ore i mexü̃. Rü ngẽmaãcü naxüpetü nax pexü̃́ natauxchaxü̃ca̱x nax peyaxõgüxü̃ca̱x i pema i tama Yudíugü nax pixĩgüxü̃. Natürü nüma ya Tupana rü ngẽma Yudíugüxü̃ nangechaü̃ama yerü nũxcümaü̃güxü̃ ga norü o̱xigümaxã nüxü̃ nixu nax nüxü̃ tá nangü̃xẽẽxü̃.
29 Rü ngẽxguma Tupana texémaxã inaxunetagu nax ãmare tüxna naxãxü̃, rü taguma nüxü̃ inayarüngüma i ngẽma. Rü ngẽxgumarüxü̃ ta i ngẽxguma texéca̱x nacaxgu, rü taguma nüxü̃ inayarüngüma.
30 Rü pema nax tama Yudíugü pixĩgüxü̃, rü ü̃pa rü tama Tupanaga pexĩnüe. Natürü i ñu̱xma nax tama Tupanaga naxĩnüexü̃ i ngẽma Yudíugü, rü ngẽmaca̱x Tupanaaxü̃́ pengechaü̃tümüxü̃gü erü peyaxõgü i pemax.
31 Rü ngẽma pexü̃ ngupetüxü̃rüxü̃ nixĩ i ngẽma Yudíugüxü̃ nangupetüxü̃. Nümagü rü tama Tupanaga naxĩnüe i ñu̱xmax, natürü ngẽmaãcü nüxü̃ nangupetü nax Tupanaaxü̃́ pengechaü̃tümüxü̃güxü̃ca̱x, rü nümagü rü ta Tupanaaxü̃́ nangechaü̃tümüxü̃güxü̃ca̱x i ñu̱xmax.
32 Yerü ga Tupana rü nüxü̃ nadau nax guxü̃ma ga duü̃xü̃gü rü wüxigu chixexü̃wa nayexmagüxü̃, rü tama naga naxĩnüe. Rü yemaca̱x ga Tupana rü wüxigu nüxü̃́ nangechaü̃tümüü̃gü i guxü̃ma i duü̃xü̃gü.
33 Rü guxü̃ma i ngẽma Tupanaarü mexü̃gü rü taxúema nüxü̃ tacua̱x i norü mu. Rü ngẽxgumarüxü̃ ta i norü cua̱x rü norü ĩnü rü taxúema nüxü̃ tacua̱x i ngẽma. Rü taxúema nüxü̃ tacua̱x i ngẽma nagu naxĩnüxü̃ rü naxüxü̃.
34 ¿Erü texé i tatanüwa nüxü̃ tacua̱x i guxü̃ma i ngẽma tórü Cori nagu rüxĩnüxü̃? ¿Rü texé nüxü̃ tacua̱x nax tanaxucu̱xẽxü̃?
35 ¿Rü texé ta̱xacü tüxíra tórü Corina taxã, nax yixcaama nüxĩ́ ta̱xacü tüxna naxãxü̃ca̱x?
36 Erü guxü̃ma i ta̱xacü i ngẽxmaxü̃ rü Tupana nanaxü. Rü nagagu nixĩ ga nangóxü̃. Rü nügüca̱x nixĩ ga naxüaxü̃. Rü name nixĩ i guxü̃guma nüxü̃ ticua̱xüü̃gü. Rü ngẽmaãcü yixĩ.
Notas
^ 11:16 Rü Tupana rü wena tá nanade i ngẽma Yudíugü i ngẽxguma yaxõgüãgu. Rü gumá nüxíra Tupana nüxü̃ unetacü rü Abráü̃ nixĩ, rü ngẽmaca̱x i nataagü i Yudíugü rü ta Tupanaarü duü̃xü̃gü nixĩgü.
