Romanos 13:1-14
13 Name nixĩ i mea norü ãẽ̱xgacüga naxĩnüe i guxü̃ma i duü̃xü̃gü. Erü Tupana nixĩ ya nüxü̃ unetacü i guxü̃ma i ãẽ̱xgacügü. Rü nataxuma i ãẽ̱xgacü i tama Tupana ingucuchixẽẽxü̃.
2 Rü ngẽmaca̱x, texé ya tama tümaarü ãẽ̱xgacüga ĩnüchaü̃xe, rü Tupanaga nixĩ i tama taxĩnüxü̃. Rü yíxema tama naga ĩnüechaü̃xü̃, rü tá tapoxcue.
3 Erü ngẽma ãẽ̱xgacügü rü tama ngẽma mexü̃ ügüxü̃arü poxcuruxü̃ nixĩ, natürü ngẽma chixexü̃ ügüxü̃arü poxcuruxü̃ nixĩ. Rü ngẽxguma cunaxwa̱xegu nax tama nüxü̃ cumuü̃xü̃ i wüxi i ãẽ̱xgacü, rü name nixĩ i mea cumaxü̃. Rü nüma i ãẽ̱xgacü rü tá cumaxã nataãxẽ.
4 Erü nüma i ãẽ̱xgacü rü Tupanaarü ngü̃xẽẽruxü̃ nixĩ rü ngẽmaca̱x nanamu nax cuxü̃ nangü̃xẽẽxü̃ca̱x. Natürü ngẽxguma chixexü̃ cuxü̱xgu, rü ngẽxguma tá nixĩ i nüxü̃ cumuü̃xü̃. Erü nüma i ãẽ̱xgacü rü tama natüca̱xma nixĩ nax nüxü̃́ nangẽxmaxü̃ i pora nax cuxü̃ napoxcuxü̃. Erü woetama Tupana nanamu nax napoxcuãxü̃ca̱x i ngẽma duü̃xü̃ i chixexü̃ ügüxü̃.
5 Rü ngẽmaca̱x name nixĩ i naga cuxĩnü i curü ãẽ̱xgacügü. Rü tama ngẽma poxcuxü̃ nax cumuü̃xü̃ca̱xicatama nixĩ i namexü̃ nax naga cuxĩnüxü̃, natürü name nixĩ i naga cuxĩnü erü cuãẽwa nüxü̃ cucua̱x rü ngẽma nixĩ i mexü̃ nax cunaxüxü̃.
6 Rü ngẽma ãẽ̱xgacügü rü Tupanaaxü̃́ nixĩ i napuracüexü̃ i ngẽxguma naxüãgu i ngẽma puracü nax pemaxã inacuáxü̃. Rü ngẽmaca̱x name nax penaxütanüxü̃ i ngẽma diẽru i ãẽ̱xgacügü nagu unetaxü̃.
7 Rü wüxichigü i ngẽma ãẽ̱xgacügü, rü name nixĩ i nüxna penaxã i ngẽma nüxna üxü̃. ¡Rü nüxü̃́ penaxütanü i ngẽma diẽru i perü ãẽ̱xgacügü nagu unetaxü̃ẽ̱xpü̱x nax nüxü̃́ penaxütanüxü̃! ¡Rü penaxü̱x i ngẽma ĩanearü puracü i perü ãẽ̱xgacügü pexü̃ muxü̃ nax penaxüxü̃ca̱x! ¡Rü nüxü̃ pengechaü̃gü rü naga pexĩnüe i ngẽma perü ãẽ̱xgacügü! Erü ngẽma nixĩ i mexü̃ nax penaxüxü̃.
8 Rü tama name i texéaxü̃́ penangetanü. Rü ngẽma nax pegü pengechaxü̃xü̃xicatama nixĩ i perü ngetanü. Rü ngẽmaca̱x ya yíxema aixcüma tümamücüxü̃ ngechaü̃xe rü marü tayanguxẽxẽ i guxü̃ma i ngẽma Tupana tüxü̃ muxü̃.
9 Rü Tupanaarü mugü rü ñanagürü:“¡Taxṹ i nai i ngexü̃maxã cumaxü̃!¡Rü taxṹ i cumáeta!¡Rü taxṹ i cungĩ̱x!¡Rü taxṹ i toguã̱xarü ngẽmaxü̃ cuxü̃́ ngúchaü̃xü̃!”
ñanagürü. Natürü ngẽma mugü rü guxü̃ma i togü i Tupanaarü mugümaxã rü wüxigu nanu nagu i norü ore i ñaxü̃:
“¡Rü nüxü̃ nangechaü̃ i cumücü nax cugütama cungechaü̃xü̃rüxü̃!”
ñaxü̃.
10 Rü yíxema tümamücüxü̃ ngechaü̃xe, rü taxuxü̃ma i chixexü̃ namaxã taxü. Rü ngẽxguma tamücüxü̃ ingechaü̃gu, rü aixcüma tayanguxẽxẽ i Tupanaarü mugü.
11 Rü name nixĩ i penaxü i ngẽma mexü̃ ixĩxü̃ erü paxa naxüpetü i ngẽma ngunexü̃gü i nagu imaxẽxü̃. Rü name nixĩ i pegü ípemexẽxẽ rü paxa penaxü i tórü Coriarü puracü. Erü ñu̱xma rü yema noxri yaxõgüguarü yexera ningaicamachigü i ngẽma ngunexü̃ i nagu tá taxca̱x nataeguxü̃ ya tórü Cori.
12 Rü woo nangẽxmagu i taxü̃ i chixexü̃ i ñoma ẽanexü̃rüxü̃ ixĩxü̃, natürü paxa tá ínangu ya Cristu nax nügüxü̃tawa tüxü̃ nagagüxü̃ca̱x. Rü ngẽmaca̱x name nixĩ i nüxü̃ tarüxoe i guxü̃ma i ngẽma chixexü̃ ixĩxü̃ rü nagu taxĩ i Tupanaarü ore i ñoma omürüxü̃ ixĩxü̃.
13 Rü ngĩxã mexü̃ taxügü rü Tupana naxwa̱xexü̃ãcüma tamaxẽ. Rü tama namaxã taxãmücü i ngẽma duü̃xü̃gü i naxügüxü̃ i taxü̃ i petagü i nawa naxãũgatanüxü̃ rü nangãxexü̃. Rü tama taxünearü ngúchaü̃we tarüxĩ, rü tama to i chixexü̃ taxügü, rü bai nax yigü ichoxü̃gagüxü̃, rü bai i ixauxãchiwa̱xexü̃.
14 Rü name i nacüma pexĩ i tórü Cori ya Ngechuchu ya Cristu. Rü tama name i naxca̱x pedau nax pexenearü ngúchaü̃gu pexĩxü̃.
