Romanos 14:1-23
14 Ngẽxguma petanügu naxãxchaü̃gu i wüxi i pexenexẽ i turaxü̃ i norü õwa, rü name nixĩ i mea penayaxu. Natürü tama name i namaxã pegü pechoxü̃ga naxca̱x i Tupanaarü ore.
2 Rü nangẽxma i ñuxre i taenexẽgü i nagu rüxĩnüexü̃ nax namexü̃ nax guxü̃raü̃xü̃ i õna nangõ̱xgüxü̃. Natürü nangẽxma i togü i taenexẽgü i turaexü̃ i norü õwa i berdúragüxicatama nangõ̱xgüxü̃.
3 Rü pemaxã nüxü̃ chixu rü yíxema guxü̃ma i õna nangṍxe, rü tama name i nüxü̃ taxoo̱x i ngẽma tama guxü̃ i õna ngõ̱xgüxü̃. Rü ngẽxgumarüxü̃ ta ya yíxema tama guxü̃ma i õna ngṍxe, rü tama name nax nüxü̃ tixuxü̃ i ngẽma duü̃xü̃gü i guxü̃ i õna ngõ̱xgüxü̃, erü nümagü rü ta Tupanaarü duü̃xü̃gü nixĩgü.
4 ¿Rü texé quixĩ i cuma rü ngẽmaca̱x nüxü̃ quixu i to i coriarü duü̃xü̃gü? Rü dücax, pemaxã nüxü̃ chixu rü ngẽma norü cori tá nixĩ i nangugüxü̃ rü aixcüma mexü̃ naxü̱x i ngẽma norü duü̃xü̃, rüe̱xna tama. Rü ngẽma duü̃xü̃ rü Tupanape̱xewa rü tá name, erü nüma ya tórü Cori ya Cristu rü nüxü̃́ nangẽxma i pora nax namexẽẽãxü̃ i ngẽma duü̃xü̃.
5 Rü dücax, nangẽxma i ñuxre i duü̃xü̃gü i nagu rüxĩnüexü̃ nax ngü̃xchigaarü ngunexü̃ rü togü i ngunexü̃arü yexera namexü̃ nax nagu Tupanaxü̃ yacua̱xüü̃güxü̃. Rü nangẽxma i togü i duü̃xü̃gü i nagu rüxĩnüexü̃ nax guxü̃ma i ngunexü̃gü rü nawüxiguxü̃ i Tupanape̱xewa. Natürü wüxichigü i yixema rü tanaxwa̱xe i mea taãẽwa nüxü̃ tacua̱x nax aixcüma Tupanape̱xewa namexü̃ i ngẽma tixõxü̃.
6 Rü yíxema duü̃xẽ ya ta̱xacürü ngunexü̃ Tupanaca̱x íxüxüchixe, rü ngẽmaãcü tanaxü nax ngẽma ngunexü̃gu tórü Corixü̃ ticua̱xüü̃xü̃ca̱x. Rü yíxema guxü̃ i õna ngṍxe, rü ngẽmaãcü tanangõ̱x nax tórü Corixü̃ ticua̱xüü̃xü̃ca̱x, rü Tupanana moxẽ taxã naxca̱x i ngẽma tangṍxü̃. Rü yíxema tama guxü̃ i õna ngṍxe, rü ngẽmaãcü tanaxü nax tórü Corixü̃ ticua̱xüü̃xü̃ca̱x, rü tüma rü ta Tupanana moxẽ taxã naxca̱x i ngẽma tangṍxü̃.
7 Rü ñu̱xma nax ñoma i naanewa imaxẽxü̃, rü taxúema tügüca̱xtama tamaxü̃ rüe̱xna tügüca̱xtama tayu.
8 Erü ñu̱xma nax imaxẽxü̃, rü tórü Coriarü ngúchaü̃ nax ixügüxü̃ca̱x nixĩ i imaxẽxü̃. Rü ngẽxguma iyuegu, rü ngẽma rü ta tórü Corime̱xẽwa nangẽxma. Rü ngẽmaãcü nüxü̃ tadau rü woo imaxẽgu rü ẽ̱xna woo iyuegu, rü tórü Coriarü duü̃xü̃gü tixĩgü, rü naxme̱xwa tangexmagü.
9 Rü yemaca̱x nixĩ ga nayuxü̃ ga Cristu rü wenaxarü namaxü̃xü̃ nax tümaarü Cori yixĩxü̃ca̱x ga guxãma ga guxema yaxõgüxe ga marü yuexe rü guxãma ya yíxema yaxõgüxe ya ñu̱xma rü ta maxẽxe.
10 Rü ngẽmaca̱x Pa Chauenexẽx, ¿rü tü̱xcüü̃ i nüxü̃ quixuxü̃ i cuenexẽ i yaxõxü̃? Rü cumax, Pa To i Chauenexẽx, ¿rü tü̱xcüü̃ i nüxü̃ cuxoxü̃ i cuenexẽ? Erü guxãtáma i yixema rü Tupanape̱xewa tá tangugü nax nüma tüxna naca̱xaxü̃ca̱x i torü maxü̃chiga.
11 Erü Tupanaarü ore i ümatüxü̃wa rü ñanagürü ya tórü Cori:“Chorü maxü̃égagu nüxü̃ chixu nax guxü̃táma i duü̃xü̃gü rü tá chopexegu caxã́pü̱xügüxü̃, rü guxü̃táma choxü̃ icua̱xüü̃güxü̃”,
ñanagürü.
12 Rü ngẽmaãcü nüxü̃ tacua̱x nax wüxichigü i yixema rü aixcüma tá Tupanape̱xewa nax ingugüxü̃ nax namaxã nüxü̃ ixuxü̃ca̱x i torü maxü̃chiga rü ta̱xacü ixüxü̃chiga.
Tama name i chixexü̃gu cunanguxẽxẽ i cuenexẽ i yaxõxü̃
13 Rü ngẽmaca̱x, Pa Chauenexẽgüx, rü tama name nax tamücügüxü̃ ixuechaxü̃. Rü narümemae nixĩ i nüxü̃ perüxoe i guxü̃ma i chixexü̃ i peenexẽgüxü̃ pecadugu yixẽẽxü̃ rü ẽ̱xna norü õxü̃ chixexẽẽxü̃.
14 Choma nüxü̃ chacua̱x rü nataxuma i õna i Tupanape̱xewa chixexü̃. Rü aixcümaxü̃chi nüxü̃ chacua̱x i ngẽma erü tórü Cori ya Ngechuchu ya Cristuarü duü̃xü̃ chixĩ, rü nüma choxü̃ nüxü̃ nacua̱xẽxẽ i ngẽma. Natürü ngẽxguma chi texé nagu rüxĩnügu nax tama Tupanape̱xewa namexü̃ i ta̱xacürü õna nax tangṍxü̃, rü name nixĩ i noxtacüma tama nax tanangṍxü̃ ega nagu tarüxĩnügu nax tama namexü̃ i ngẽma.
15 Rü ngẽxguma ngẽma cungṍxü̃gagu tümaãẽwa cunangu̱xẽẽ̱xgu ya cuenexẽ, rü cumaxã nüxü̃ chixu rü tama name i ngẽmagagu chixexü̃gu tüxü̃ cungu̱xẽxẽ rü tüxü̃ icuyarütauxẽxẽ ya yíxema cuenexẽ ya Cristu tümaca̱x yuxe.
16 Rü ngẽmaca̱x, woo cuxca̱x namexgu i ngẽma cuxüxü̃, natürü tama name nax cunaxüamaxü̃ ega ngẽmaca̱x togü cuxü̃ ixuxgu nax pecadu yixĩxü̃ i ngẽma cuxüxü̃.
17 Rü ngẽma Tupanape̱xewa nax imexü̃ca̱x rü tama ta̱xacürü õna nax ingṍxü̃ rüe̱xna ta̱xacürü axexü̃ nax ixaxüxü̃gagu nixĩ. Natürü Tupanape̱xewa nax imexü̃ca̱x rü tanaxwa̱xe i Naãxẽ ya Üünexü̃arü ngü̃xẽẽmaxã tayanguxẽxẽ i ngẽma Tupana naxwa̱xexü̃, rü yigü tangechaü̃gü, rü aixcüma tataãẽgü nape̱xewa ya Tupana.
18 Rü yíxema ngẽmaãcü Cristuca̱x maxü̃́xẽ, rü Tupana rü tümamaxã nataãxẽ, rü duü̃xü̃gü rü ta tümamaxã nataãẽgü.
19 Rü ngẽmaca̱x, ¡ngĩxã pora taxü nax yigü ingechaxügüxü̃ca̱x rü yigü rüngü̃xẽẽgüxü̃ca̱x nax yexeraãcü Cristuaxü̃́ yaxõgüxü̃ca̱x rü naxügüxü̃ca̱x i ngẽma norü ngúchaü̃ ixĩxü̃!
20 Rü tama name i õna cungṍxü̃gagu icuyanaxoxẽxẽ i Tupanaarü puracü i cuenexẽarü maxü̃wa. Rü aixcüma nixĩ i guxü̃ma i õnagü i namexü̃ i Tupanape̱xewa. Natürü wüxi i chixexü̃ nixĩ ega ngẽma õna i ingṍxü̃gagu chixexü̃gu nayixẽẽgu i taenexẽgü.
21 Rü ngẽmaca̱x tama name i cunangõ̱x i namachi, rüe̱xna cuyaxaxü ya bínu, rüe̱xna cunaxü i ta̱xacü i to, ega ngẽmagagu chixexü̃gu cunangu̱xẽẽ̱xgu i cuenexẽ i yaxõxü̃.
22 Rü ngẽxguma cuma nagu curüxĩnügu nax namexü̃ nax cunangṍxü̃ i ngexü̃rüüxü̃mare i õna, rü Tupanape̱xewa rü name nixĩ i cuxicatama nüxü̃ cucua̱x i ngẽma. Rü tataãxẽ ya yíxema tümaãẽwa nüxü̃ cuáxe nax Tupanape̱xewa namexü̃ i ngẽma taxüxü̃.
23 Natürü ngẽxguma wüxíe nagu rüxĩnügu nax tama namexü̃ i Tupanape̱xewa nax ta̱xacürü õna nax tangṍxü̃, rü pemaxã nüxü̃ chixu rü chixexü̃ taxü ega tanangõ̱xomagu, erü tümaãẽwa nagu tarüxĩnü nax tama aixcüma namexü̃ i ngẽma taxüxü̃. Rü guxü̃ma i ngẽma tümaãẽwa nagu tarüxĩnüxü̃ nax nachixexü̃ rü aixcüma pecadu taxü ega tanaxüamagu.
