Romanos 3:1-31
3 ¿Rü ñu̱xma rü ta̱xacüwa tüxü̃́ namexü̃ nax Yudíugü ixĩgüxü̃? ¿Rü ta̱xacüwa namexü̃ nax íiwíecha̱xmüpe̱xechiraü̃güxü̃?
2 Rü poraãcüxüchima tüxü̃́ name nax Yudíugü ixĩgüxü̃. Yerü nüma ga Tupana rü tüxnaxíra nixĩ ga naxããxü̃ ga norü ore.
3 ¿Rü ta̱xacü tá ngupetüxü̃ i ñu̱xmax ega ñuxre i tatanüxü̃ i Yudíugü rü tama mea yanguxẽxẽgüãgu i ngẽma Tupana tüxü̃ muxü̃? ¿Rü pexca̱x rü ngẽmaca̱x taxũtáma yanguxẽẽãxü̃ ya Tupana i ngẽma tamaxã inaxunetaxü̃?
4 Rü tama ngẽmaãcü nixĩ. Erü woo guxü̃ i duü̃xü̃gü rü yadorata̱a̱xgügu, natürü Tupana rü taguma nidora rü guxü̃guma nayanguxẽxẽ i ngẽma nüma tamaxã inaxunetaxü̃. Rü yemaca̱x norü ore ga Dabí ümatüxü̃wa rü ñanagürü:“Cumax, Pa Tupanax, rü aixcüma nixĩ i curü ore i nüxü̃ quixuxü̃.Rü ngẽxguma cuxü̃ tangugügu rü nüxü̃ tadaugü nax aixcüma cuyanguxẽẽxü̃ i ngẽma nüxü̃ quixuxü̃”,
ñanagürü.
5 Natürü duü̃xü̃gü rü ínatüe erü ñanagürügü: “Rü nüetama nixĩ nax chixexü̃ ixügüxü̃ erü ngẽmaãcü nango̱x nax namecümaxü̃ ya Tupana”, ñanagürügü. Rü ñanagürügü ta: “Rü ngẽxguma chi tórü chixexü̃gagu nango̱xgu nax aixcüma namecümaxü̃ ya Tupana, rü tama name ya Tupana ega tórü chixexü̃ca̱x tüxü̃ napoxcuegu”, ñanagürügü.
6 Natürü ngẽma ñaxü̃gu nax naxĩnüexü̃ i duü̃xü̃gü rü poraãcü ínatüe, erü tama ngẽmaãcü nixĩ. Erü ngẽxguma chi tama yaxaixcümagu ya Tupana, ¿rü ñuxãcü chi i duü̃xü̃güna yacagüxü̃ i naanearü gu̱xgu?
7 Natürü i duü̃xü̃gü rü ñanagürügü: “Rü ngẽxguma chi chorü chixexü̃gagu nango̱xgu nax aixcüma namecümaxü̃ ya Tupana, ¿rü tü̱xcüü̃ yixĩxü̃ i choxna naca̱xaxü̃ naxca̱x i chorü chixexü̃ rü choxü̃ napoxcuxü̃ naxca̱x i chorü pecadugü?” ñanagürügü.
8 Natürü ngẽma ñaxü̃gu nax naxĩnüexü̃ i duü̃xü̃gü rü poraãcü ínatüe. Erü ngẽxguma chi aixcüma yixĩxgu i ngẽma nagu naxĩnüexü̃ i duü̃xü̃gü, rü chi narümemae nixĩ nax yexeraãcü chixexü̃ naxügüxü̃ nax yexeraãcü mexü̃ nax ínguxuchixü̃ca̱x. Rü dücax, Pa Chauenexẽgüx, nangẽxma i chixexü̃ i duü̃xü̃gü i choxü̃ ügagümarexü̃ i nüxü̃ ixugüexü̃ nax ngẽma yixĩxü̃ i chorü ngu̱xẽẽtae. Natürü ngẽma duü̃xü̃gü i ngẽma ñagüxü̃ rü nagagu tátama napoxcue.
Guxãma i yixema rü tipecaduã̱xgü
9 ¿Rü ñuxãcü nixĩ i ñu̱xmax? ¿Pexca̱x rü yixema i Yudíugü rü togü i duü̃xü̃güarü yexera Tupanape̱xewa imexü̃? Pemaxã nüxü̃ chixu rü tama ngẽmaãcü nixĩ. Erü guxãma i yixema i Yudíugü rü guxü̃ma i ngẽma tama Yudíugü ixĩgüxü̃, rü tipecaduã̱xgü.
10 Erü Tupanaarü ore i ümatüxü̃wa rü ñanagürü:“Rü tataxuma ya texé ya aixcüma Tupanape̱xewa mexẽ, rü bai ya wüxíe.
11 Rü tataxuma ya texé ya aixcüma tümaãẽxü̃ cuáxe.Rü tataxuma ya texé ya aixcüma Tupanaca̱x dauxe.
12 Rü guxü̃ma i duü̃xü̃gü rü chixexü̃waama naxĩ, rü guxü̃ma wüxigu chixexü̃gu narüxĩnüe.Rü nataxuma ya texé ya mexü̃ üxe, rü bai i wüxi.
13 Rü tümaã̱x rü ñoma yuetamaxü̃ ingenaxü̃rüxü̃ nixĩ nax nawa ínaxũxũxü̃ i chixexü̃.Rü tümaarü conümaxã rü poraãcü tidorae.Rü ngẽma tümaarü dexa rü ñoma ãxtapeguchatarüxü̃ nixĩ nax togüxü̃ nachixexẽẽxü̃.
14 Rü tümaã̱x rü chixexü̃ i oremaxã rü numaxã nanapa.
15 Rü ítamemare nax duü̃xẽxü̃ timáxü̃.
16 Rü ngextá ítaxũxü̃wa rü duü̃xü̃güxü̃ tachixexẽxẽ rü tanangechaü̃xẽxẽ.
17 Rü tama nüxü̃ tacua̱x nax duü̃xü̃gümaxã tataãẽxü̃ rü nüxü̃ tangechaxü̃xü̃.
18 Rü tama nüxü̃ tacua̱x nax Tupanaxü̃ tamuü̃xü̃”,
ñanagürü i ngẽma ore i ümatüxü̃wa.
19 Rü nüxü̃ tacua̱x rü guxü̃ma i ngẽma Tupanaarü mugü nüxü̃ ixuxü̃ rü guxü̃ma i duü̃xü̃güca̱x nixĩ erü guxü̃ma rü Tupanaarü mugütüxü̃wa nangẽxmagü. Rü ngẽmaca̱x taxucürüwa texé tügüétüwa tachogü i ngẽxguma Tupana tüxü̃ icagügu i tümaarü pecaduchiga.
20 Rü ñu̱xma nax taxúema aixcüma naga ĩnüexü̃ i ngẽma mugü, rü ngẽmaca̱x taxucürüwama texé tügü tixu nax ngẽma mugü taxaurexü̃gagu Tupanape̱xewa tamexü̃. Erü ngẽma mugü tüxü̃ nüxü̃ cua̱xẽẽxü̃ nixĩ nax ipecaduã̱xgüxü̃.
Tórü õgagu nixĩ i Tupana tüxna naxãxü̃ i maxü̃
21 3:21-22 Rü ñu̱xma nax taxucürüwama Tupanape̱xewa tüxü̃ yamexẽẽxü̃ i ngẽma mugü, rü ngẽmaca̱x ya Tupana rü tüxü̃ nüxü̃ nacua̱xẽxẽ nax Cristuaxü̃́ yaxõgüxü̃gagu nixĩ i tüxü̃ yamexẽẽgüxü̃. Rü yema mugü ga Moiché ümatüxü̃ rü yema ore ga nũxcümaü̃güxü̃ ga orearü uruü̃gü ümatüxü̃ rü nüxü̃ nixu nax Tupanape̱xewa yamexü̃ i guxü̃ma i ngẽma Ngechuchu ya Cristuaxü̃́ yaxõgüxü̃ woo Yudíugü rü woo ngẽma tama Yudíugü ixĩgüxü̃. Erü Tupanape̱xewa rü nawüxigumare.
22 Nüü̃ nadau 3:21
23 Rü guxãma rü pecadu taxü rü ngẽmaca̱x nüxna tayáxü̃gugü ya Tupana ya üünecü.
24 Natürü Tupana rü tamaxã namecüma rü yemaca̱x tüxü̃́ nangetanüãcüma tüxü̃ nimexẽẽgü nax nape̱xewa imexü̃ca̱x. Erü Ngechuchu ya Cristu marü tüxü̃́ nanaxütanü ga tórü pecadugü nax tama ipoxcuexü̃ca̱x.
25 3:25-26 Rü Tupana nanamu ga Cristu nax nayuxü̃ca̱x rü yemaacü tórü pecadu naxütanüxü̃ca̱x. Rü ngẽxguma Cristuaxü̃́ yaxõgügu rü Tupana tüxü̃́ nüxü̃ narüngüma i tórü pecadugü. Rü ngẽmaãcü Tupana tüxü̃ nüxü̃ nadauxẽxẽ nax Cristugagu yixĩxü̃ i tüxü̃ yamexẽẽgüxü̃. Rü nüma ya Tupana rü tüxü̃́ nüxü̃ narüngüma ga tórü pecadugü ga ü̃pa ixügüxü̃ yerü yáxna tamaxã naxĩnü. Rü ñu̱xma rü tüxü̃ nanawéxchaü̃ nax Cristugagu yixĩxü̃ nax tüxü̃ yamexẽẽgüxü̃ nax nape̱xewa imexü̃ca̱x. Nüma rü aixcüma mecü nixĩ rü tüxü̃ nimexẽẽgü ya guxãma ya yíxema Ngechuchuaxü̃́ yaxõgüxe.
26 Nüü̃ nadau 3:25
27 Rü ngẽmaca̱x i ñu̱xma rü taxucürüwama yigü ticua̱xüü̃gü rü nüxü̃ tixu nax yigütama imexẽẽgüxü̃ i Tupanape̱xewa. Rü tama ngẽma nax naxauregüxü̃ca̱x i ngẽma mugü nixĩ i imexü̃, natürü Tupanape̱xewa time i ñu̱xma, erü Cristuaxü̃́ tayaxõgü.
28 Rü yixema nüxü̃ tacua̱x rü ngẽxguma Cristuaxü̃́ yaxõgügu nixĩ i Tupanape̱xewa imexü̃, rü tama ngẽma mugü nax ixauregüxü̃ca̱x nixĩ i nape̱xewa imexü̃.
29 ¿Ẽ̱xna Tupana rü Yudíugüarü Tupanaxicatama nixĩ? ¿Ẽ̱xna tama ngẽma togü i duü̃xü̃gü i tama Yudíugü ixĩgüxü̃arü Tupana yixĩxü̃? Aixcüma pemaxã nüxü̃ chixu rü ngẽma togü i duü̃xü̃gü i tama Yudíugü ixĩgüxü̃arü Tupana rü ta nixĩ.
30 Nüxü̃ tacua̱x nax wüxitama yixĩxü̃ ya Tupana. Rü nüma nixĩ i nügüpe̱xewa yamexẽẽgüãxü̃ i guxü̃ma i duü̃xü̃gü i Cristuaxü̃́ yaxõgüxü̃ woo Yudíugü rü woo i tama Yudíugü ixĩgüxü̃.
31 Rü ñu̱xma nax Cristuaxü̃́ yaxõgüxü̃, rü bexmana nagu perüxĩnüe nax taxuwama namexü̃ i ngẽma mugü ga Moiché ümatüxü̃. Natürü tama ngẽmaãcü nixĩ. Erü ñu̱xma nax Cristuaxü̃́ yaxõgüxü̃ rü aixcüma tayanguxẽxẽ i ngẽma mugü.
