Romanos 4:1-25
4 ¿Rü ñu̱xma rü ñuxũ ñagüxü̃ tá i nachiga ga nũxcümaü̃cü ga tórü o̱xi ga Abráü̃? ¿Rü tü̱xcüü̃ yixĩxü̃ ga Tupana nüxü̃ ixuxü̃ ga Abraáü̃ rü mecü nax yixĩxü̃?
2 4:2-3 Rü dücax, yexguma chi ta̱xacürü mexü̃ nax naxüxü̃ca̱x Tupanape̱xewa namexgu ga Abraáü̃ rü chi yemaca̱x nügü nicua̱xüxü̃, natürü tama yemaca̱x Tupanape̱xewa name. Erü Tupanaarü ore i ümatüxü̃wa rü ñanagürü:“Abraáü̃ rü Tupanaaxü̃́ nayaxõ, rü yemaca̱x Tupana nüxü̃ nixu nax namexü̃”,
ñanagürü i ngẽma ore.
3 Nüü̃ nadau 4:2
4 Rü ngẽxguma texéaxü̃́ wüxi i puracü ütanügu rü tümaarü puracütanü nixĩ i ngẽma, rü tama tümaarü ãmare nixĩ.
5 Rü ngẽmaca̱x ngẽxguma texé yaxõ̱xgu, rü tama ta̱xacürü mexü̃ nax naxüxü̃ca̱x nixĩ i Tupanape̱xewa tamexü̃, natürü Tupanape̱xewa tame erü tayaxõ. Rü ngẽmaãcü Tupana tüxü̃ nayaxu ya yíxema yaxṍxe woo taxuxü̃ma i ta̱xacürü mexü̃ taxü̱xgu.
6 Rü nũxcümaü̃cü ga ãẽ̱xgacü ga Dabí rü nüxü̃ nixu nax tataãẽxü̃ ga guxema duü̃xẽ ga Tupana tümaarü õgagu tüxü̃ ixuxe nax tamexü̃ woo tama ta̱xacürü mexü̃ taxü̱xgu nax Tupanape̱xewa tamexü̃ca̱x.
7 Rü nüma ga Dabí rü ñanagürü:“Tataãẽgü ya yíxema duü̃xẽgü ya Tupana tümaarü chixexü̃güxü̃ yanangü̃maxẽ rü tama tümaarü pecadugügu naxĩnügüxe.
8 Rü aixcüma tataãxẽ ya yíxema duü̃xẽ ya Tupana tama tüxü̃́ nagu naxĩnüxẽ i tümaarü pecadu”,
ñanagürü ga Dabí.
9 Rü dücax, ¿pexca̱x rü ngẽma taãxẽ rü Yudíugüca̱xicatama yixĩxü̃, rüe̱xna ngẽma togü i duü̃xü̃güca̱x rü ta yixĩxü̃? Rü marü pemaxã nüxü̃ tixu rü Tupanape̱xewa name ga Abraáü̃ yerü nayaxõ. Rü yemaca̱x Tupana nüxü̃ nixu nax namexü̃.
10 ¿Natürü ñuxgu nixĩ ga Abraáü̃xü̃ nayaxuxü̃? ¿Ẽ̱xna marü ínawíecha̱xmüü̃pe̱xechiraü̃guwena, rüe̱xna naxü̃pa ga nax ínawíecha̱xmüü̃pe̱xechiraü̃xü̃? Rü pemaxã nüxü̃ chixu rü naxü̃pa nixĩ nax Tupana nayaxuxü̃ ga Abráü̃.
11 Rü Tupana nayaxuxguwena nixĩ ga ínawíecha̱xmüü̃pe̱xechiraü̃xü̃ ga Abráü̃. Rü yema nixĩ ga norü cua̱xruxü̃ ga nawa nüxü̃ nacuáxü̃ nax aixcüma Tupana marü nayaxuxü̃ rü nüxü̃ nadauxü̃ nax namexü̃ yerü nüxü̃́ nayaxõ. Rü ngẽmaca̱x i ñu̱xma ya Abráü̃ rü tümanatü yixĩxü̃ ya guxãma ya yíxema yaxõgüxe woo tama ítawíecha̱xmüü̃pe̱xechiraü̃gügu. Rü ngẽmaãcü ya Tupana rü tüxü̃ nayaxu ya guxãma ya yíxema yaxõgüxe, rü tüxü̃ nadau nax timexü̃ erü tayaxõgü.
12 Rü ngẽxgumarüxü̃ ta ya Abráü̃ rü tümanatü nixĩ ya guxãma ya yíxema íwíecha̱xmüü̃pe̱xechiraü̃güxe rü Abraáü̃rüxü̃ yaxõgüxe. Natürü tama ngẽma nax tügü ítawíecha̱xmüü̃pe̱xechiraü̃güxü̃ca̱x nixĩ i tümanatü yixĩxü̃. Natürü tümanatü nixĩ erü tayaxõgü yexgumarüxü̃ nax yaxõõxü̃ ga nüma ga tanatü ga Abráü̃ naxü̃pa nax ínawíecha̱xmüü̃pe̱xechiraü̃xü̃.
Abraáü̃ rü Tupanaaxü̃́ nayaxõ rü yemaca̱x Tupana nayanguxẽxẽ ga norü uneta ga Abraáü̃maxã nüxü̃ yaxuxü̃
13 Rü Tupana rü Abraáü̃maxã inaxuneta nax nüma ya Abraáü̃ rü guxü̃ma i nataagü rü tá nax nayauxgüãxü̃ i ñoma i naane nax noxrü yixĩxü̃ca̱x. Natürü tama yema nax Abráü̃ mugü inguxẽẽxü̃ca̱x nixĩ ga Tupana Abraáü̃maxã ixunetaxü̃. Natürü namaxã inaxuneta yerü Abraáü̃ nayaxõ, rü yemaca̱x Tupanape̱xewa name.
14 Natürü ngẽxguma chi ngẽma duü̃xü̃gü i mugü auregüxü̃ca̱xicatama yixĩxgu i ngẽma Tupanaarü uneta, rü natüca̱xmamare chi nixĩ i ngẽma nax yaxõgüxü̃, rü chi ngẽma Tupanaarü uneta rü taxuwama name.
15 Nüxü̃ tacua̱x rü ngẽma mugü ga Moiché ümatüxü̃ rü poxcuwa tüxü̃ naga erü taxúema aixcüma mea tayanguxẽxẽ. Natürü yexguma chi nataxuxguma ga yema mugü rü tataxuchima nax texé chixri yanguxẽẽxü̃.
16 Rü yexguma Tupana Abraáü̃maxã ixunetagu nax nüxü̃ tá nangü̃xẽẽxü̃, rü Abraáü̃arü õgagu nixĩ ga namaxã inaxunetaxü̃. Rü ngẽmaca̱x i guxãma i yixema nax Abraáü̃rüxü̃ yaxõgüxü̃ rü taxca̱x ta nixĩ ga yema Tupanaarü uneta ga Abraáü̃maxã nüxü̃ yaxuxü̃. Rü ngẽmawa nüxü̃ tacua̱x rü tama yíxema mugü auregüxeca̱xicatama nixĩ i ngẽma Tupanaarü uneta, natürü guxãma ya yíxema Abraáü̃rüxü̃ Tupanaaxü̃́ yaxõgüxeca̱x ta nixĩ. Rü ñu̱xma rü guxãma i yixema nax Abraáü̃rüxü̃ mea yaxõgüxü̃ rü Abraáü̃xacügü tixĩgü rü nüma rü tanatü nixĩ i Tupanape̱xewa yerü nüxíra nayaxõ.
17 Rü Tupanaarü ore i ümatüxü̃wa rü Abraáü̃chigaxü̃ nixu rü ñanagürü:“Muxü̃ma i duü̃xü̃günatü tá cuxü̃ chixĩxẽxẽ”,
ñanagürü. Rü Abraáü̃ rü Tupanaaxü̃́ nayaxõ, rü yemaca̱x Tupana nayanguxẽxẽ ga norü uneta ga namaxã nüxü̃ yaxuxü̃. Rü yimá Tupana nixĩ ya wena namaxẽxẽẽcü i yuexü̃. Rü yimátama nixĩ ya naxücü i ngẽma woo ñu̱xma taxuxü̃.
18 Rü nüma ga Abraáü̃ rü aixcüma nayaxõ ga yexguma Tupana nüxü̃ ñaxgu:“Tá namuxũchi i cutaagü”,
ñaxgu. Rü woo ga Abraáü̃ ga marü yaxguã̱xü̃chichire̱x nax yixĩxü̃ rü nax nangexacüxü̃, natürü nayaxõõma ga yema Tupanaarü uneta rü mea ínanangu̱xẽxẽ nax wüxi ga nane tá nüxü̃́ yexmaxü̃. Rü yemaacü ningu nax muxü̃ma i duü̃xü̃günatü yixĩxü̃, yema Tupana namaxã nüxü̃ ixuxü̃rüxü̃.
19 Rü Abraáü̃ rü wixguxüchi 100 ga taunecü nüxü̃́ nayexma ga yexguma. Natürü tama inayarümaãchi ga nax yaxõõxü̃ woo nüxü̃ nax nacuáxü̃ ga paxa tá nax nayuexü̃ ga nüma rü nama̱x ga Chára rü marü poraãcü nangupetüarü taunecüã̱xgüxü̃ nax naxãxacügüxü̃ca̱x.
20 Rü yemaacü ga Abraáü̃ rü nayaxõõma nax nüxü̃́ tá nayexmaxü̃ ga wüxi ga nane yema Tupana namaxã ixunetaxü̃rüxü̃. Rü tama nagu narüxĩnü nax Tupana ngürüãchi nawomüxẽẽxü̃. Natürü yexeraãcü Tupanaaxü̃́ nayaxõõma, rü nüxü̃ nicua̱xüxü̃.
21 Rü aixcümaxü̃chi nayaxõ nax naporaxü̃ ya Tupana nax yanguxẽẽãxü̃ca̱x i guxü̃ma i ngẽma norü uneta.
22 Rü yemaca̱x ga Tupana rü nüxü̃ nixu nax nape̱xewa namexü̃ ga Abraáü̃. Yerü Tupana nüxü̃ nadau nax aixcüma nüxü̃́ yaxõõxü̃.
23 Rü tama Abraáü̃chigaxicatama nixĩ ga naxümatüxü̃ ga Tupanaarü ore ga ñaxü̃:“Tupana rü nüxü̃ nixu nax nape̱xewa namexü̃ ga Abraáü̃, yerü nüxü̃ nadau nax aixcüma nüxü̃́ nax yaxõõxü̃”,
ñaxü̃.
24 Natürü guxãma i yixema nax yaxõgüxü̃chiga ta nixĩ i ngẽma ore. Erü Tupana rü tórü õgagu tüxü̃ nade nax nape̱xewa imexü̃ i yixema i nüxü̃́ nax yaxõgüxü̃ ya yimá yuwa tórü Cori ya Ngechuchuxü̃ írüdaxẽẽcü.
25 Rü Ngechuchuxü̃ nixĩ ga namuxü̃ ga Tupana nax tórü pecaduca̱x nayuxü̃ca̱x. Rü ñu̱xũchi nüma ga Tupana rü wenaxarü Ngechuchuxü̃ ínarüdaxẽxẽ nax nagagu imexü̃ca̱x i Tupanape̱xewa.
