Romanos 5:1-21
5 Rü ñu̱xma rü Tupanape̱xewa time erü tayaxõgü. Rü ngẽmaca̱x marü tama Tupanamaxã taxuanüã̱xgü i ñu̱xmax, erü tórü Cori ya Ngechuchu ya Cristu rü marü tamaxã nanangüxmüexẽxẽ ya Tupana.
2 Rü Cristugagu nixĩ nax tamaxã namecümaxü̃ ya Tupana i ñu̱xmax erü tayaxõgü. Rü nüxü̃ tacua̱x rü guxü̃gutáma tamaxã namecüma. Rü tataãẽgü erü nüxü̃ tacua̱x nax tüxü̃́ tá nangẽxmaxü̃ i tachica i mexü̃ i Tupanaxü̃tawa.
3 Rü ngẽxgumarüxü̃ ta tataãẽgü i woo ngúxü̃ ingegügu. Erü nüxü̃ tacua̱x rü ngẽma ngúxü̃ rü tüxü̃ narüngü̃xẽxẽ nax yexeraãcü iporaexü̃ rü yáxna namaxã ixĩnüexü̃ca̱x.
4 Rü ngẽxguma yáxna namaxã ixĩnüegu i ngẽma ngúxü̃ rü Tupana rü tamaxã nataãxẽ. Rü ngẽma nax tamaxã nataãẽxü̃ rü ngẽmaca̱x mea ítanangu̱xẽxẽ nax tüxü̃́ tá nangẽxmaxü̃ i tachica i mexü̃ i Tupanaxü̃tawa.
5 Rü ñu̱xma nax ínangu̱xẽẽxü̃ nax tüxü̃́ tá nangẽxmaxü̃ i tachica i Tupanaxü̃tawa, rü ngẽmaca̱x taxuca̱xma tangechaü̃gü. Erü Tupana rü poraãcü tüxü̃ nangechaü̃. Rü ngẽma Naãxẽ ya Üünexü̃ i tüxna namuxü̃ nixĩ i tüxü̃ nüxü̃ cua̱xẽẽxü̃ i ngẽma.
6 Rü yexguma taxucürüwama yigütama imaxẽxẽẽgu, rü nawa nangu nax Tupana yanguxẽẽxü̃ ga yema norü uneta. Rü yexguma nixĩ ga ñoma ga naanewa namuaxü̃ ga Cristu nax pecaduã̱xgüxü̃ca̱x nayuxü̃ca̱x.
7 Rü tama natauxcha nax wüxíe rü to i duü̃xü̃ca̱x tayuxü̃, woo wüxi i duü̃xü̃ i mexü̃ca̱x yixĩxgu. Rü woo tangexmagu ya texé ya naxca̱x yuchaü̃chiréxe i wüxi i duü̃xü̃ i aixcüma mexẽchixü̃, natürü tama tüxü̃́ natauxcha i ngẽma.
8 Natürü Tupana tüxü̃ nüxü̃ nadauxẽxẽ nax tüxü̃ nangechaü̃xü̃ yerü yexguma ipecaduã̱xgügu nixĩ ga taxca̱x nayuxü̃ ga Cristu.
9 Rü ñu̱xma rü Tupanape̱xewa time yerü taxca̱x nayu ga Cristu. Rü ngẽmaca̱x meama nüxü̃ tacua̱x nax nüma rü aixcüma tá tüxü̃ ínanguxü̃xẽxẽxü̃ nax tama ipoxcuexü̃ca̱x.
10 Rü yexguma norü uanügü ixĩgügu, rü nümatama ga Tupana rü nügümaxã tüxü̃ inarüngü̃xmüexẽxẽ ga yexguma nayu̱xgu ga Nane. Rü ñu̱xma nax marü namaxã irüngüxmüexü̃, rü yexeraãcü nüxü̃ tacua̱x nax tüxü̃́ nangẽxmaxü̃ i maxü̃ i taguma gúxü̃ nagagu nax namaxü̃xü̃ i nüma ya Nane.
11 Rü tama ngexicatama nixĩ. Natürü i ñu̱xma rü tórü Cori ya Ngechuchu ya Cristugagu rü Tupanamaxã tataãẽgü, yerü Cristugagu nixĩ ga Tupana ga tamaxã nangüxmüxü̃.
Adáü̃chiga rü Cristuchiga
12 Rü nüxíraü̃cü ga yatü ga Adáü̃gagu nixĩ ga guxü̃ma ga duü̃xü̃güwa nanguxü̃ ga pecadu. Rü pecadugagu ínangu i yu. Rü yemaacü guxü̃ma ga duü̃xü̃güwa naxüe nax nayuexü̃, yerü guxü̃ma nipecaduã̱x.
13 Rü naxü̃pa nax Tupana Moichéna naxãxü̃ ga yema mugü ga naxümatüxü̃, rü woetama marü nipecaduã̱xgü ga duü̃xü̃gü. Natürü yexguma tauta nayexmagu ga yema mugü, rü taxucürüwa texé duü̃xü̃güxü̃ tixu nax tama naga naxĩnüexü̃ ga yema mugü.
14 Natürü yema duü̃xü̃gü ga Adáü̃wena buexü̃ ñu̱xmata Tupana Moichéna naxãxgu ga yema mugü rü nayue yerü pecadu naxügü. Rü naxü̃pa nax nayexmaxü̃ ga yema Moichéarü mugü rü napecaduã̱xgü ga duü̃xü̃gü rü yemaca̱x Adáü̃rüxü̃ nayue. Rü Adáü̃wa inaxügü nax nayuexü̃ ga duü̃xü̃gü, natürü Cristuwa inaxügü nax nayaxuxü̃ i maxü̃ i taguma gúxü̃.
15 Natürü yema chixexü̃ ga Adáü̃ üxü̃ rü tama namaxã nawüxigu i ngẽma ãmare ga Tupana tüxna ãxü̃. Rü aixcüma nixĩ ga wüxi ga yatüarü chixexü̃gagu nax nayuexü̃ i guxü̃ma i duü̃xü̃gü. Natürü aixcüma ta nixĩ i wüxi ya yatügagu Tupana ngetanüãcüma tüxna naxãxü̃ i wüxi i ãmare i yexera rümemaexü̃chixü̃. Rü ngẽma nixĩ nax Ngechuchu ya Cristugagu Tupana nüxü̃ irüngümaxẽ i duü̃xü̃güarü pecadugü.
16 Rü yema pecadu ga Adáü̃ üxü̃ rü tama namaxã nawüxigu i ngẽma ãmare ga Tupana tüxna ãxü̃. Yerü wüxitama ga pecadugagu, Tupana poxcu namaxã naxuegu i guxü̃ma i duü̃xü̃gü. Natürü Ngechuchu ya Cristugagu rü Tupana duü̃xü̃güaxü̃́ nüxü̃ narüngüma i norü pecadugü woo namuxũchigu. Rü ngẽmaãcü nape̱xewa nime.
17 Rü wüxitama ga yatü ga Adáü̃arü pecadugagu rü ngẽma yu rü guxü̃ma i duü̃xü̃gümaxã inacua̱x. Natürü Tupana rü ngẽmaarü yexera tamaxã namecüma rü tüxü̃́ nangetanüãcüma tüxü̃ narüngü̃xẽxẽ nax nape̱xewa imexü̃ca̱x. Rü ñu̱xma guxü̃ma i duü̃xü̃gü ya Tupana imexẽẽxü̃, rü ngẽxguma Ngechuchu ya Cristuaxü̃́ yaxõgüãgu rü nüxü̃́ nangẽxma i maxü̃ i taguma guxü̃.
18 Rü yema Adáü̃arü pecadu rü poxcuwa nanagagü ga guxü̃ma ga duü̃xü̃gü. Natürü yema mexü̃ ga Ngechuchu ya Cristu üxü̃ rü pecaduwa ínananguxü̃xẽxẽ i guxü̃ma i duü̃xü̃gü i yaxõgüxü̃, rü nüxna nanaxã i maxü̃ i taguma gúxü̃.
19 Rü gumá nüxíraü̃cü ga yatü ga Adáü̃ rü tama Tupanaga naxĩnü. Rü yemaacü wüxitama ga yatügagu rü muxü̃ma ga duü̃xü̃gü rü nipecaduã̱x. Natürü gumá yatü ga Ngechuchu, rü mea Tupanaga naxĩnü. Rü gumágagu rü muxü̃ma i duü̃xü̃gü rü tá nime i Tupanape̱xewa.
20 Rü Tupana rü Moichéna nanaxã ga norü mugü nax duü̃xü̃güxü̃ nüxü̃ nacua̱xẽẽxü̃ca̱x nax poraãcü yapecaduã́xü̃. Natürü yexguma yexeraãcü pecadu naxügügu ga duü̃xü̃gü, rü yexeraãcü Tupanaaxü̃́ nangechaü̃tümüü̃gü.
21 Rü ñu̱xma woo pecadugagu nax iyuexü̃, natürü guxü̃guma Tupanaaxü̃́ tangechaü̃tümüü̃gü. Rü ngẽmaãcü pecaduwa tüxü̃ ínanguxü̃xẽxẽ nax nape̱xewa imexü̃ca̱x rü tórü Cori ya Ngechuchu ya Cristugagu tüxü̃́ nangẽxmaxü̃ca̱x i maxü̃ i taguma gúxü̃.
