Romanos 8:1-39
8 Rü ñu̱xma ya Tupana rü marü taxuca̱xma nanapoxcue i ngẽma duü̃xü̃gü ya Ngechuchu ya Cristuarü duü̃xü̃gü ixĩgüxü̃.
2 Erü Tupanaãxẽ ya Üünecü ya Ngechuchu ya Cristugagu tüxü̃ maxẽxẽẽxü̃, rü nüxna tüxü̃ ínanguxü̃xẽxẽ i pecadu nax tama yuwa tüxü̃ nagagüxü̃ca̱x.
3 Rü yemaacü Tupana nanaxü ga yema taxucürüwa naxüxü̃ ga yema mugü ga Moiché ümatüxü̃. Erü taxúema namaxã tapora i tümaarü ngúchaü̃ nax chixexü̃ taxüxü̃. Rü yemaca̱x ga Tupana rü ñoma ga naanewa nanamu ga Nane, rü duü̃xü̃ i pecaduã́xü̃rüxü̃ nixĩ ga naxü̃ne nax yemaacü pecadugagu nayuxü̃ca̱x nax tama tamaxã naporaxü̃ca̱x i ngẽma pecadu.
4 Rü yemaacü Tupana Nanemaxã nanaxü nax tüxü̃ nangü̃xẽẽxü̃ca̱x nax yanguxẽẽxü̃ca̱x i ngẽma tüxü̃ namuxü̃ i ngẽma mugü. Rü ñu̱xma rü tama ñoma i taxü̃ne naxwa̱xexü̃ãcüma tamaxẽ, natürü Tupanaãxẽ ya Üünecü naxwa̱xexü̃ãcüma nixĩ i imaxẽxü̃.
5 Rü yíxema tümaxü̃ne naxwa̱xexü̃ãcüma maxẽxe, rü naxca̱x tadaugü i ñoma i naanearü ngúchaü̃gü. Natürü yíxema Tupanaãxẽ ya Üünecü naxwa̱xexü̃ãcüma maxẽxe, rü ngẽma Tupanaãxẽ ya Üünecü naxwa̱xexü̃ nixĩ i naxca̱x tadaugüxü̃.
6 Rü ngẽma nax ñoma i naanearü ngúchaü̃ca̱x idaugüxü̃ rü yuwa tüxü̃ nagagü. Natürü yíxema Tupanaãxẽ i Üünecüarü ngúchaü̃ca̱x daugüxe rü tataãẽgü, rü tá tüxü̃́ nangẽxma i maxü̃ i taguma gúxü̃.
7 Rü yíxema tümaxü̃nearü ngúchaü̃ca̱x daugüxe rü Tupanamaxã tarüxuanügü. Erü tama Tupanaarü mugüga taxĩnüe rü tama tayanguxẽxẽ.
8 Rü ngẽmaca̱x ya yíxema tümaxü̃nearü ngúchaü̃we rüxĩxe, rü taxucürüwa Tupanaarü ngúchaü̃ taxügü.
9 Natürü i pemax, rü tama pexenearü ngúchaü̃gu pemaxẽ, erü Naãxẽ ya Üünecüarü ngúchaü̃gu nixĩ i pemaxẽxü̃ erü pewa namaxü̃ i Tupanaãxẽ ya Üünecü. Rü yíxema tama tüxü̃́ nangẽxmaxe i Cristuãxẽ rü tama Cristuarü duü̃xü̃ tixĩ.
10 Natürü ngẽxguma pewa namaxü̃xgu ya Cristu, rü peãxẽ rü namaxü̃ erü Cristugagu Tupana pexü̃́ nüxü̃ inayarüngüma i perü pecadugu. Rü woo i pexene rü pecadugagu tá nayuama, natürü peãxẽ rü Cristugagu tá namaxü̃, erü Tupana pexü̃ nadau nax pimexü̃.
11 Rü ngẽxguma pewa namaxü̃xgu i Naãxẽ ya yimá Tupana ga Ngechuchu ya Cristuxü̃ írüdaxẽẽcü, rü nümatama ya yimá Cristuxü̃ írüdaxẽẽcü tá wena nanamaxẽxẽ i pexene i yuxwa̱xexü̃. Rü Naãxẽ ya Üünexü̃ i pewa maxü̃xü̃ tá nixĩ i wena pexene maxẽẽxü̃.
12 Rü ngẽmaca̱x, Pa Chauenexẽgüx, rü tanaxwa̱xe i Tupanaarü ngúchaü̃ taxü, rü tama taxü̃ne i pecaduã́xü̃arü ngúchaü̃ taxü.
13 Erü ngẽxguma chi pexenearü ngúchaü̃ pexü̱xgu rü tá ipeyarütauxe. Natürü ngẽxguma Tupanaãxẽ ya Üünecüarü ngü̃xẽẽmaxã ipeyanaxoxẽẽgu i ngẽma pexenearü ngúchaü̃, rü aixcüma tá pexü̃́ nangẽxma i maxü̃ i taguma gúxü̃.
14 Erü guxãma ya yíxema Tupanaãxẽ ya Üünecü tümamaxã icuáxe, rü aixcüma Tupanaxacügü tixĩgü.
15 Yerü pema rü tama penayauxgü ga wüxi ga naãxẽ i pexü̃ muü̃ẽẽxü̃. Natürü yema Naãxẽ ga peyauxgüxü̃ rü Tupanaxacügü pexü̃ nixĩgüxẽxẽ. Rü ngẽmatama Naãxẽ ya Üünexü̃ nixĩ i tüxü̃ rüngü̃xẽẽxü̃ nax Tupanaxü̃ ñagüxü̃: “Pa Papax”, ñagüxü̃ nüxü̃.
16 Rü ngẽmatama Naãxẽ ya Üünexü̃ nixĩ i aixcüma taãxẽwa tüxü̃ nüxü̃ cua̱xẽẽxü̃ nax Tupanaxacügü ixĩgüxü̃.
17 Rü yixema nax Tupanaxacügü ixĩgüxü̃, rü nüxü̃ tacua̱x rü daxũguxü̃ i naanewa tá tanayaxu i ngẽma mexü̃gü ya Tupana tá tüxna ãxü̃. Rü aixcüma Cristurüxü̃ tá tanayaxu i ngẽma mexü̃gü, erü naxrüxü̃ ngúxü̃ tingegü nax wüxigu nüma ínangexmaxü̃wa ingexmagüxü̃ca̱x.
Ngẽma mexü̃ i yixcüra tá nüxü̃ idauxü̃chiga
18 Rü choma nagu charüxĩnü rü ngẽma ngúxü̃ i ñu̱xma ñoma i naanewa ingegüxü̃, rü taxuxü̃ma nixĩ i ngẽxguma nagu nanguxgu i ngẽma mexü̃ i yixcüra tá nüxü̃ idauxü̃ i ngẽxguma Cristumaxã ingẽxmagügu i daxũguxü̃ i naanewa.
19 Rü ñu̱xma rü guxü̃ma i ta̱xacü ya Tupana üxü̃ rü nanuãẽãcüma ínanangu̱xẽxẽ i ngẽma ngunexü̃ i nagu Tupana tá guxü̃pe̱xewa inawéxü̃ nax naxacügü ixĩgüxü̃.
20 Rü nüxü̃ tacua̱x rü yexguma pecadu naxü̱xgu ga gumá nüxíraü̃cü ga yatü rü yexguma nixĩ ga nachixexü̃ ga guxü̃ma ga yema Tupana üxü̃. Rü tama yema Tupana üxü̃arü ngúchaü̃ nixĩ ga yema, natürü yemaacü nüxü̃ naxüpetü yerü ga Tupana rü yemaacü namaxã nanaxuegu ga yexguma pecadu naxü̱xgu ga gumá nüxíraü̃cü ga yatü. Natürü i ñu̱xma rü guxü̃ma ga yema Tupana üxü̃ rü ínanangu̱xẽxẽ i ngẽma ngunexü̃ i nagu Tupana tá namexẽẽxü̃ i guxü̃ma.
21 Erü ngẽma ngunexü̃ ya Tupana tá nagu nadexü̃ i naxacügü nax naxü̃tawa nangẽxmagüxü̃ca̱x, rü ngẽxguma tá ta nixĩ i chixexü̃wa ínanguxü̃xẽẽãxü̃ i guxü̃ma ga yema nümatama naxüxü̃. Rü ngẽmaãcü wenaxarü noxrirüxü̃ tá name i guxü̃ma.
22 Rü nüxü̃ tacua̱x rü ñaa naane rü guxü̃ma i nawa ngẽxmaxü̃ rü ñoma wüxi i nge i íxraxacüchaü̃cürüxü̃ poraãcü ngúxü̃ ninge ñu̱xmatáta nawa nangu i ngẽma ngunexü̃ i nagu Tupana wena nangexwacaxü̃xẽẽxü̃ i guxü̃ma.
23 Rü tama ñaa naanexicatama nixĩ i ngúxü̃ ingexü̃ i ñu̱xma, natürü yixema i tüxü̃́ ngẽxmaxü̃ i Tupanaãxẽ ya Üünexü̃ rü ta ngúxü̃ tingegü. Rü ñu̱xma nax tüxü̃́ nangẽxmaxü̃ i Naãxẽ ya Üünexü̃ ya Tupana tüxna muxü̃, rü ngẽma nixĩ i norü ügü i ngẽma mexü̃gü ya Tupana tüxna ãxchaü̃xü̃ i daxũguxü̃ i naanewa. Rü ñu̱xma rü ítanangu̱xẽxẽ nax Tupana tüxü̃ dexü̃ rü ngexwaca̱xü̃xü̃ i taxü̃negü tüxna naxãxü̃.
24 Tupana rü marü tüxna nanaxã i maxü̃ i taguma gúxü̃ rü ñu̱xma ítanangu̱xẽxẽ nax naxü̃tawa ingugüxü̃. Natürü nüxü̃ tacua̱x rü ngẽxguma chi marü nüxü̃ idaugügu i ngẽma írüngu̱xẽẽgüxü̃, rü taxuca̱xma tü̱xcüü̃ ítanangu̱xẽẽgü. Erü ngẽma marü nüxü̃ idauxü̃, rü taxuca̱xma ítanangu̱xẽxẽ.
25 Natürü ngẽxguma tauta nüxü̃ idaugügu i ngẽma írüngu̱xẽẽgüxü̃, rü name nax mea ínangu̱xẽẽgüxü̃ ñu̱xmata nüxü̃ idaugü woo ngúxü̃ ingegügu.
26 Rü ngẽxgumarüxü̃ ta Tupanaãxẽ tüxü̃ narüngü̃xẽxẽ nax iporaexü̃ca̱x i ngẽxguma yarüturaegu nax ínangu̱xẽẽgüxü̃. Rü yixema rü tama nüxü̃ tacua̱x nax mea Tupanamaxã idexagüxü̃ rü ta̱xacüca̱x iyumüxẽgüxü̃. Natürü Naãxẽ ya Üünecü rü naxauxãcüma naga i tama nüxü̃ icuáxü̃maxã Tupanamaxã nidexa rü taxca̱x nayumüxẽ.
27 Rü Tupana ya mea nangugücü i torü ĩnü rü nüxü̃ nacua̱x nax ñuxũ ñaxü̃chiga yixĩxü̃ i ngẽma Naãxẽ ya Üünecü nüxü̃ ixuxü̃. Erü ngẽma Naãxẽ ya Üünecü rü Tupanaarü ngúchaxü̃ãcüma nüxü̃ naca̱a̱xü̃ tümaca̱x ya yíxema norü duü̃xü̃gü ixĩgüxe.
Cristu rü tüxü̃ naporaexẽxẽ nax taxuxü̃ma i guxchaxü̃gü tüxü̃ rüyexeraxü̃ca̱x
28 Rü nüxü̃ tacua̱x rü tümaarü mexü̃ca̱x nixĩ ya Tupana ínangu̱xẽẽxü̃ i guxü̃ma i ngẽma tüxü̃ üpetüxü̃ ya yíxema nüxü̃ ngechaü̃güxe ga nüma nagu naxĩnüxü̃ca̱x tüxü̃ nadexe.
29 Rü woetama nũxcümama ga Tupana rü marü tüxü̃ nacua̱x nax texégü tá tixĩgüxü̃ ya yíxema noxrü ixĩgüxe. Rü woetama nũxcümama tüxü̃ nade nax Nanerüxü̃ timexü̃ca̱x, rü Nane yixĩxü̃ ga nüxíra írüdacü natanüwa i muxü̃ma i yaxõgüxü̃.
30 Rü guxema woetama nũxcümama Tupana tüxü̃ dexe, rü tümaca̱x naca nax noxrü tixĩgüxü̃ca̱x. Rü guxema tümaca̱x naca̱xaxe, rü nügüca̱x tüxü̃ nimexẽẽgü. Rü guxema nügüca̱x tüxü̃ yamexẽẽgüxe, rü tüxna nanaxã i tümachica i nügüxü̃tawa.
31 ¿Rü ñuxũ ñagüxü̃ tá i ñu̱xma i ngẽmachiga? Rü ngẽxguma Tupana taétüwa üxgu, ¿rü texé tá nüxü̃ tarüyexera nax chixexü̃ tamaxã taxüxü̃ca̱x?
32 Nüma ga Tupana rü tama tüxna nayanuxũ ga Nanexü̃chi, natürü taxca̱x inanamu ga Nane nax taxca̱x nayuxü̃ca̱x i guxãma i yixema. Rü ñu̱xma nax taxca̱x inamuãxü̃ ga Nane nax taxca̱x nayuxü̃ca̱x, ¿rü taux ẽ̱xna tüxna naxããxü̃ i guxü̃ma i ngẽma inaxwa̱xexü̃ nax mea naxca̱x imaxẽxü̃ca̱x?
33 ¿Rü ñu̱xma rü texé tá Tupanape̱xewa tüxü̃ tixugü nax ichixexü̃? Erü Tupanatama nixĩ ya nügüpe̱xewa tüxü̃ imexẽẽcü.
34 ¿Rü texé tá poxcu tamaxã ueguxü̃ i ñu̱xmax? Yerü Ngechuchu ya Cristu nixĩ ga taxca̱x yucü nax tüxü̃ yamexẽẽgüxü̃ca̱x. Rü naétü yuwa ínarüda rü ñu̱xma rü Tupanaarü tügünecüwawa nangẽxma. Rü ngéma taétüwa nachogü.
35 ¿Rü ñu̱xma rü ta̱xacü tá Cristuna tüxü̃ ixĩgachixẽẽxü̃ nax tama tüxü̃ nangechaü̃xü̃ca̱x? Rü Cristu rü taxũtáma nüxü̃ narüchau nax tüxü̃ nangechaü̃xü̃ woo ngúxü̃ ingegügu, rüe̱xna guxchaxü̃gü tüxü̃́ ngẽxmagu, rüe̱xna duü̃xü̃gü Cristugagu taxchi aiegu, rüe̱xna itaiyaegu, rüe̱xna ingexchirugügu, rüe̱xna ãũcümaxü̃wa ingẽxmagügu, rüe̱xna duü̃xü̃gü tüxü̃ daixchaü̃gu.
36 Rü guxü̃guma ãũcümaxü̃wa tangexmagü, ngẽma Tupanaarü ore i ümatüxü̃ nüxü̃ ixuxü̃rüxü̃. Erü ngẽma ore rü ñanagürü:“Rü cugagu duü̃xü̃gü toxü̃ nadaixchaü̃ rü duü̃xü̃güpe̱xewa rü ñoma carnérugü i daiwa nagagüxü̃rüxü̃ tixĩgü”,
ñanagürü i ngẽma ore.
37 Natürü woo guxü̃ma i ngẽma tüxü̃ nax ngupetüxü̃, rü Ngechuchu ya Cristu ya tüxü̃ ngechaü̃cü, rü tüxü̃ naporaexẽẽãma nax taxuxü̃ma i guxchaxü̃gü tüxü̃ rüyexeraxü̃ca̱x.
38 8:38-39 Rü ngẽmaca̱x aixcüma chayaxõ nax taxuxü̃ma i ta̱xacü tá Tupanana tüxü̃ ixĩgachixẽẽxü̃ nax tama tüxü̃ nangechaü̃xü̃ca̱x. Rü woo iyuegu rü woo imaxẽgu, rü woo i orearü ngeruü̃gü i daxũcüã̱x, rü woo ngo̱xogü, rü woo naãxẽ i chixexü̃gü, rü woo ngẽma ñu̱xma nüxü̃ idauxü̃, rü woo ngẽma yixcüra tá nüxü̃ idauxü̃, rü woo i ngẽma daxũwa ngẽxmagüxü̃, rü woo i ngẽma naanetüü̃wa ngẽxmagüxü̃, rü woo i ta̱xacü Tupana üxü̃, rü taxũtáma Tupanana tüxü̃ nixĩgachixẽxẽ nax tama tórü Cori ya Ngechuchu ya Cristugagu tüxü̃ nangechaü̃xü̃ca̱x.
39 Nüü̃ nadau 8:38
