Romanos 9:1-33
9 Pa Chauenexẽgüx, pemaxã tá nüxü̃ chixu i wüxi i ore i aixcüma ixĩxü̃, erü Cristuarü duü̃xü̃ chixĩ. Rü tama chidora. Rü chauãẽwatama nüxü̃ chacua̱x nax aixcüma nax yixĩxü̃ i ngẽma ore, erü Tupanaãxẽ ya Üünecü nixĩ i chauãẽmaxã icuáxü̃.
2 Rü poraãcü changechaü̃, rü chorü maxü̃newa nangúecha, erü tama nayaxõgü i chautanüxü̃ i Iraétanüxü̃.
3 Rü aixcüma pemaxã nüxü̃ chixu rü guxü̃guma ngẽma chautanüxü̃gu charüxĩnü, rü poraãcü chanaxwa̱xe nax Cristuaxü̃́ yaxõgüãxü̃. Rü choma rü aixcüma íchamemare nax poxcuwa choxü̃ namuxü̃ ya Tupana rü Cristuna choxü̃ yaxũgachixẽẽxü̃ ega ngẽmaãcü chi nüxü̃ chayaxõgüxẽẽgu rü chanamaxẽxẽẽgu i ngẽma chautanüxü̃ i Iraétanüxü̃.
4 Rü nümagü rü chauxrüxü̃ Iraétanüxü̃ nixĩgü. Rü Tupana rü nũxcümaxü̃chima namaxã inaxuneta nax naxacügü yixĩgüxü̃ca̱x. Rü Tupana rü norü üünemaxã natanüwa nayexma rü namaxã inaxuneta rü tá nüxü̃ narüngü̃xẽxẽ ega naga naxĩnüegu. Rü nüxna nanaxã ga yema mugü ga Moiché ümatüxü̃. Rü nanangúexẽxẽ nax nüxü̃ yacua̱xüü̃güxü̃ca̱x. Rü namaxã inaxuneta ga norü unetagü.
5 Rü yema Moiché namaxã ixũxü̃ ga Iraétanüxü̃ rü yemataagü nixĩgü i ngẽma Yudíugü i ñu̱xma maxẽxü̃. Rü ngẽma Yudíugütanügu nixĩ ga nabuxü̃ ga Cristu ya Tupanaxü̃chi ixĩcü ya Guxü̃étüwa Ngẽxmacü. Rü tanaxwa̱xe i guxü̃guma nüxü̃ ticua̱xüü̃gü. Rü ngẽmaãcü yixĩ.
6 Rü ñu̱xma rü woo tama guxü̃ i Yudíugü nax yaxõgüxü̃, natürü taxucürüwama texé nüxü̃ tixu nax Tupana rü tama yangu̱xẽẽãxü̃ i norü uneta. Erü tama guxü̃ma i Yudíugü rü aixcüma Tupanaarü duü̃xü̃gü nixĩgü.
7 Rü tama guxü̃ma i Abraáü̃taagü rü aixcüma Tupanape̱xewa Abraáü̃tanüxü̃ nixĩgü. Yerü ga Tupana rü Abraáü̃maxã nüxü̃ nixu, rü ñanagürü:“Cune ya Ichaátaagü tá nixĩ i aixcüma cutanüxü̃ ixĩgüxü̃ i chope̱xewa”,
ñanagürü.
8 Rü ngẽmawa meama nüxü̃ tacua̱x rü tama ngẽma nax Abraáü̃taagü tixĩgüxü̃ca̱x nixĩ i Tupanaxacügü tixĩgüxü̃. Natürü yíxema Tupanaarü uneta nüxü̃ ixuxü̃ãcüma yaxõgüxe, rü yíxema tixĩ ya aixcüma Abraáü̃taagü ixĩgüxe i Tupanape̱xewa.
9 Yerü naxü̃pa ga nax nabuxü̃ ga Abraáü̃ nane ga Ichaá, rü yema Tupanaarü uneta ga Abraáü̃maxã nüxü̃ yaxuxü̃, rü ñanagürü:“Nai ya taunecüarü ñúxgumaãcü tá wena nua chaxũ, rü cuxma̱x i Chára rü tá ixãxacü i ngẽxguma”,
ñanagürü.
10 Natürü tama Abraáü̃maaxicatama nixĩ ga yadexaxü̃ ga Tupana. Yerü tórü o̱xi ga Ichaá naxma̱x ga Rebéca rü ngĩteaxü̃́ ixãxãcü rü nataxree̱xpü̱x ga ngĩne.
11 9:11-13 Natürü yexguma tauta nabuegu rü taxuxü̃ma ga mexü̃ rü ẽ̱xna chixexü̃ naxüegu ga yema ngĩnegü, rü Rebécamaxã nidexa ga Tupana, rü ñanagürü:“Rü ngẽma nüxíra buxü̃ i cune, rü ngẽma wixweama buxü̃arü duü̃xü̃ tá nixĩ”,
ñanagürü ngĩxü̃. Rü yema dexa rü namaxã nawüxigu i Tupanaarü ore i ümatüxü̃ i ñaxü̃:“Marü chanayaxu ya Acóbu, natürü nüxü̃ chaxo ya Echaú”,
ñaxü̃. Rü yemaacü ga Tupana rü ngĩmaxã nanango̱xẽxẽ nax naxme̱xwa nangẽxmaxü̃ nax tüxü̃ nayaxuxü̃ ya yíxema woetama nüxü̃́ ngúchaü̃xẽ nax tümaca̱x naca̱xaxü̃, tama nagu naxĩnüãcüma i ta̱xacürü mexü̃ rü ẽ̱xna ta̱xacürü chixexü̃ nax taxüxü̃.
12 Nüü̃ nadau 9:11
13 Nüü̃ nadau 9:11
14 ¿Rü ñuxũ ñagüxü̃ i ñu̱xmax? ¿Pexca̱x rü Tupana rü chixexü̃ naxüxü̃?* Rü dücax, tama chixexü̃ naxü.
15 Yerü norü orewa rü Tupana rü Moichéxü̃ ñanagürü:“Ngẽxguma chi texémaxã chamecümachaü̃gu, rü tümamaxã tá chamecüma.Rü choxü̃́ tá tangechaü̃tümüxü̃ ya yíxema choxü̃́ ngechaü̃tümüü̃chaü̃xẽ”,
ñanagürü.
16 Rü ngẽmaãcü tama ngẽma tümatama tanaxwa̱xexü̃gagu rü ẽ̱xna ngẽma taxüxü̃gagu nixĩ ya Tupana tüxü̃ yaxuxü̃ ya texé. Natürü tüxü̃ nayaxu erü nüxü̃́ tangechaü̃tümüxü̃.
17 Rü yexgumarüxü̃ ta ga Tupana rü norü ore i ümatüxü̃wa rü ñanagürü nüxü̃ ga Equítuanearü ãẽ̱xgacü:“Choma rü ãẽ̱xgacüxü̃ cuxü̃ chingucuchixẽxẽ nax cuwa duü̃xü̃güxü̃ nüxü̃ chadauxẽẽxü̃ca̱x i chorü pora.Rü ngẽmaãcü chanaxü nax guxü̃ i duü̃xü̃gü i guxü̃ i naanewa ngẽxmagüxü̃, nüxü̃ cuáxü̃ca̱x i chauchiga”,
ñanagürü.
18 Rü ngẽmaãcü ya Tupana rü nüxü̃́ tangechaü̃tümüxü̃ ya yíxema nüxü̃́ ngechaü̃tümüü̃chaü̃xẽ. Rü ngẽxguma tüxü̃ nataiãchiarü maxü̃ã̱xẽẽchaü̃gu rü tüxü̃ nanataiãchiarü maxü̃ã̱xẽxẽ.
19 Natürü bexmana tá ñacurügü choxü̃: “Rü ngẽxguma chi ngẽmaãcü yixĩxgu ya Tupana, ¿rü tü̱xcüü̃ nüxü̃ nixu nax tagagu yixĩxü̃ nax chixexü̃ ixügüxü̃? ¿Rü texé tapora nax itayanaxoxẽẽxü̃ca̱x i Tupanaarü ngúchaü̃?” ñacurügü tá.
20 Natürü Pa Yatüx, ¿texé quixĩ i cumax rü ngẽmaca̱x ngẽmaãcü Tupanaxü̃ cuyaxũgaxü̃? ¿Cuxca̱x rüe̱xna wüxi i tü̃xü̃ i waixü̃müwa üxü̃ rü namexü̃ i ngẽma norü üruü̃maxã nax ñaxü̃? “¿Rü tü̱xcüü̃ ngẽmaãcü choxü̃ cuxü nax ngẽmaãcü chixĩxü̃ca̱x i ñu̱xmax?” ñaxü̃.
21 Rü ngẽma üwechiruxü̃ rü waixü̃müwa nanaxü i ta̱xacü i nüma naxüxchaü̃xü̃. Rü ngẽxguma nanaxwa̱xegu, rü ngẽma waixü̃müwa nanaxü i wüxi i nawechi nax norü meruxü̃ yixĩxü̃ca̱x. Rü ngẽxguma nanaxwa̱xegu, rü ngẽmatama waixü̃müwa nanaxü i wüxi i nawechi nax norü guxchirepáü̃ yixĩxü̃ca̱x.
22 Rü Tupana rü woo tüxü̃ nanawéxchaü̃ nax naporaxü̃ rü napoxcueãxü̃ i ngẽma chixexü̃ ügüxü̃, natürü poraãcü yáxna namaxã naxĩnü, rü ngẽmaca̱x tama paxa nanapoxcue i ngẽma ímemaregüxü̃ nax napoxcuexü̃.
23 Natürü ga Tupana rü inanawéxchaü̃ nax poraãcü tamaxã namecümaxü̃ i yixema nax yaxõgüxü̃. Rü ngẽmaca̱x nixĩ i nüxü̃́ ingechaü̃tümüxü̃güxü̃, rü nũxcümamatama tüxü̃ nadexü̃ nax naxü̃tawa ingexmagüxü̃ca̱x i daxũguxü̃ i naanewa i ngextá ínamexechixü̃wa.
24 Rü ngẽmaãcü i yixema nax Yudíugü ixĩgüxü̃, rü tatanüwa Tupana tüxü̃ nidexechi ya ñuxre nax norü duü̃xü̃gü tixĩgüxü̃ca̱x. Rü ngẽxgumarüxü̃ ta i ngẽma tama Yudíugü ixĩgüxü̃tanüwa rü nayadexechi i togü.
25 Rü ngẽmaca̱x rü Tupanaarü ore ga Ochéa ümatüxü̃wa rü ñanagürü:“Rü ngẽma tama chorü duü̃xü̃güchire̱x ixĩgüxü̃, rü:‘Pema rü chorü duü̃xü̃gü pixĩgü i ñu̱xmax’, ñacharügü tá nüxü̃.Rü ngẽma tama Yudíugürüxü̃ nüxü̃ changechaü̃chiréxü̃, rü:‘Pexü̃ changechaü̃ i ñu̱xmax’, ñacharügü tá nüxü̃.
26 Rü noxri ga Tupana rü yema duü̃xü̃gü ga tama Yudíugü ixĩgüxü̃maxã nüxü̃ nixu, rü ñanagürü nüxü̃:‘Pema rü tama chorü duü̃xü̃gü pixĩgü’, ñanagürü nüxü̃.Natürü yematama nachica ga ngextá nüxü̃ íyemañaxü̃wa, rü wenaxarü yema duü̃xü̃gü ga tama Yudíugü ixĩgüxü̃maxã nidexa ga Tupana ya Maxẽxẽẽruxü̃, rü ñanagürü nüxü̃:‘Pema rü chauxacügü tá pixĩgü’, ñanagürü nüxü̃”.
Rü yema nixĩ ga Tupanaarü ore ga Ochéa ümatüxü̃.
27 9:27-28 Rü Iraétanüxü̃chiga rü ta nidexa ga Tupanaarü orearü uruxü̃ ga Ichaía rü ñanagürü:“Rü woo namuxũchichire̱x i Yudíugü yimá naxnücü ya márpechinüwa yimácürüxü̃, natürü noxre tátama nixĩ i aixcüma nayauxgüxü̃ i maxü̃ i taguma gúxü̃.Rü paxa tá ínangu ya tórü Cori nax napoxcueãxü̃ca̱x i guxü̃ma i ngẽma tama noxrü ixĩgüxü̃”,
ñanagürü ga Ichaía.
28 Nüü̃ nadau 9:27
29 Rü nümatama ga Ichaía, rü ñanagürü ga ü̃pa:“Ngẽxguma chi nüma ya tórü Cori ya Guxü̃étüwa Ngẽxmacü rü taxũchima íyaxügüxẽẽãgu i ñuxre i tatanüxü̃ i Yudíugü,rü chi itayarüxoxochi, yexgumarüxü̃ nax iyanaxogüxü̃ ga gumá ĩanegü ga Chodóma rü Gomóra namaxã ga guxü̃ma ga yema duü̃xü̃gü ga yéma yexmagüxü̃”,
ñanagürü ga Ichaía.
Yudíugü rü tama nayaxõgüchaü̃ i ore i mexü̃ i Cristuchiga
30 ¿Rü ñuxũ ñagüxü̃ i ñu̱xmax? Rü pemaxã nüxü̃ chixu rü ngẽma duü̃xü̃gü i tama Yudíugü ixĩgüxü̃ ga tama Tupanaca̱x daugüxü̃ ga noxrix, rü ngẽmatama duü̃xü̃gü nixĩ i ñu̱xma Tupanape̱xewa imexü̃ yerü nayaxõgü.
31 Natürü yema Iraétanüxü̃ ga nagu ĩxü̃ ga yema Moichéarü mugü nax Tupanape̱xewa yamexü̃ca̱x, rü tama aixcüma nape̱xewa nayamexẽxẽ ga norü maxü̃.
32 ¿Rü ta̱xacüca̱x tama aixcüma Tupanape̱xewa nayamexẽxẽ ga norü maxü̃? Yerü nümagü rü yema mugüguama naxĩ nax Tupanape̱xewa yamexü̃ca̱x, rü tama Tupanaaxü̃́ nayaxõgüchaü̃. Rü yemaacü nagu nayarüpucütü ga gumá nuta ya caixpetüruxü̃.*
33 Rü ngẽmachiga nixĩ i Tupanaarü ore i ümatüxü̃ i ñaxü̃:“Choma rü Chióü̃gu chanaxǘ ya wüxi ya nuta ya Yudíugüarü guxcharuxü̃ ixĩcü.Rü ngẽma duü̃xü̃gü i nüxü̃́ yaxõgüxü̃,rü aixcüma tá namaxẽ”,
ñanagürü.
