Hageo 1:1-15
1 Rü yexguma taxre ga taunecü ãẽ̱xgacü yixĩxgu ga Daríu, rü norü 6 ga tauemacüarü ügügu, rü nüma ga Cori ya Tupana rü norü orearü uruxü̃ ga Aguéuwa nidexa. Rü nüxna nanaxã ga ore ga Yudáanecüã̱xarü ãẽ̱xgacü ga Chorobabé ga Charatié naneca̱x ixĩxü̃ rü chacherdótegüarü ãẽ̱xgacü ga Yochué ga Yochadáx naneca̱x ixĩxü̃.
2 1:2-3 Rü ñaa nixĩ ga yema ore ga Aguéuwa nüxü̃ yaxuxü̃ ga nüma ga Cori ya Tupana ya Guxü̃étüwa Ngẽxmacü, rü ñanagürü: —Ñaa duü̃xü̃gü rü nüxü̃ nixugüe nax taxũta nawa nanguxü̃ i ngẽma ngunexü̃ nax wena naxügüã̱xü̃ca̱x ya chopata ya taxü̃ne.
3 Nüü̃ nadau 1:2
4 ¿Ẽ̱xna pexicatama penaxwa̱xexü̃ nax mexü̃ne ya ĩpatawa pemaxẽxü̃, rü yoxni ya yima chopata ya taxü̃ne rü naxtapü̱x nügüétügu yixü̃ nax nachixexü̃?
5 Rü chomax ya Cori ya Tupana ya Guxãétüwa Ngẽxmacü rü pemaxã nüxü̃ chixu: “¡Mea nagu perüxĩnüe i pecümagü!”
6 Rü pema rü muxü̃ma i penetü petogü natürü noxretama i norü o pibuxgü. Pechibüe natürü tama pexü̃́ ningu, rü pexaxegü natürü pita̱xawaeama. Rü pegü pidüxgü natürü taguma penaiwe. Rü yíxema puracüxe rü tanayauxtanü i tümaarü puracü natürü paxãma tüxü̃́ nagu. Rü ñoma choca irügáuxü̃gu tananúcuxü̃rüxü̃ nixĩ.
7 Rü choma ya Cori ya Tupana ya Guxãétüwa Ngẽxmaxe, rü pemaxã nüxü̃ chixu: “¡Mea nagu perüxĩnüe i pecümagü!”
8 ¡Rü dauxchitawa pexĩ rü ngéma mürapewa pede! ¡Rü nua penana rü ngẽmamaxã wena penaxü̱x ya yima chopata ya taxü̃ne! Rü choma rü tá taãẽãcü ngéma changexma rü ngéma tá ichanawe̱x i chorü üüne.
9 Rü pemax rü poraãcü pepuracüe nax pexü̃́ nangẽxmaxü̃ca̱x i muxü̃ i perü nanetüarü o, natürü noxretama nixĩ i ngẽma pibuxgüxü̃. Rü ngẽma penetüarü o i pechiü̃gu namaxã penguxü̃xü̃ rü wüxi i cue ñaxü̃maxã ichayanatauxẽxẽ. ¿Rü tü̱xcüü̃ ngẽmaãcü nixĩ? Erü yima chopata rü naxtapü̱xica nügüétü nayi nax nachixexü̃ rü pemax rü pepataca̱xica pexoegaãxẽ. Rü choma ya Cori ya Tupana nixĩ i nüxü̃ chixuxü̃ i ngẽma.
10 Rü ngẽmaca̱x nixĩ i tama pexca̱x chanapuxẽẽxü̃ rü ngẽma waixü̃mü rü tama mea pexü̃́ nayaxẽẽxü̃ i penetügü.
11 Rü choma nixĩ ga íchananguxẽẽxü̃ ga yema guxchaxü̃ nax yapagüanexü̃ ga peanegüwa rü ma̱xpǘnegüwa, rü trigunecüwa, rü úbanecüwa, rü oribunecüwa rü guxü̃ma ga ta̱xacü ga petogüxü̃necüwa. Rü yema nax yapagüanexü̃gagu rü pexca̱x ínangu ga taiya rü perü wocagüca̱x rü ta —ñanagürü ga Tupana.
12 Rü nüma ga Chorobabé rü Yochué rü guxü̃ma ga togü ga duü̃xü̃gü rü aixcüma Tupanaga naxĩnüe yerü namuü̃e ga yexguma nüxü̃ naxĩnüegu ga yema ore ga Cori ya Tupana Aguéuwa nüxü̃ ixuxü̃.
13 Rü yexguma ga nüma ga Aguéu ga Cori ya Tupanaarü orearü uruxü̃, rü Cori ya Tupanaégagu duü̃xü̃gümaxã nidexa rü ñanagürü: —Nüma ya Cori ya Tupana rü ñanagürü pexü̃: “Choma ya Cori ya Tupana rü pexü̃tawa changexma” —ñanagürü.
14 Rü yemaacü nüma ga Cori ya Tupana rü nanataãẽxẽxẽ ga Chorobabé ga Yudáanecüã̱xarü ãẽ̱xgacü, rü Yochué ga chacherdótegüarü ãẽ̱xgacü rü guxü̃ma ga yema togü ga duü̃xü̃gü. Rü yexguma ga nümagü rü yéma naxĩ rü inanaxügüe nax naxügüãxü̃ ga guma napata ga taxü̃ne ga Cori ya Tupana ya Guxãétüwa Ngẽxmacü.
15 Rü yexguma taxre ga taunecü Pérchiaarü ãẽ̱xgacü yixĩxgu ga Daríu, rü meama norü 6 ga tauemacüarü* 24 ga ngunexü̃gu nixĩ ga inaxügüãxü̃ ga nax wena namexẽẽgüãxü̃ ga guma Tupanapata.
Notas
^ 1:15 Setiémbre.
