Hageo 2:1-23
2 Rü guma 7 ga tauemacü* rü norü 21 ga ngunexü̃gu, rü nüma ga Cori ya Tupana rü wenaxarü norü orearü uruxü̃ ga Aguéumaxã nidexa.
2 Rü nanamu nax Chorobabémaxã, rü Yochuémaxã, rü guxü̃ma ga yema togü ga duü̃xü̃gümaxã nüxü̃ yaxuxü̃ca̱x ga norü ore ga ñaxü̃:
3 —¿Texé i petanüwa rü nüxna cua̱xãchixü̃ ga nax nañuxraxü̃xü̃ ga chopata ga taxü̃ne ga noxrix? Rü guma rü namexẽchi. Natürü ñu̱xma nax nüxü̃ pedauxü̃ rü taxuwama name.
4 ¡Natürü nataãxẽ, Pa Chorobabé! ¡Rü nataãxẽ, Pa Yochué ya Chacherdótegüarü Ãẽ̱xgacüx! ¡Rü petaãẽgü Pa Guxü̃ma i Duü̃xü̃güx! ¡Rü pora pexüe rü pepuracüe! Erü choma ya perü Cori ya Tupana rü pexü̃tawa changexma.
5 Rü yexguma Equítuanewa ínachoxü̃gu ga perü o̱xigü rü ichaxuneta rü ngẽma Chauãxẽ rü guxü̃gutáma pexü̃ naxümücü. Rü ngẽmaca̱x taxuca̱xma pemuü̃e i ñu̱xmax.
6 2:6-8 Erü íxraxü̃ nataxu nax chanaxĩã̱xãchixẽẽxü̃ i daxũguxü̃ i naane, rü ñoma i naane, rü ngẽma már, rü ngẽma waixü̃müane. Rü ngẽmaãcü tá chanamuü̃exẽxẽ i guxü̃ma i nachixü̃anegü. Rü ngẽma togü i nachixü̃anegüarü duü̃xü̃gü rü nua tá nanana i norü diẽrugü rü úirugü. Rü ngẽmaãcü ya daa chopata ya taxü̃ne rü tá namexẽchi. Rü choma ya Cori ya Tupana ya Guxãétüwa Ngẽxmacü nixĩ i nüxü̃ chixuxü̃ i ngẽma erü choxrü nixĩ i guxü̃ma i diẽrugü rü úirugü.
7 Nüü̃ nadau 2:6
8 Nüü̃ nadau 2:6
9 Rü ñu̱xma nax wena namexẽẽxü̃ ya daa chopata ya taxü̃ne rü yexguma noxri naxü̱xguarü yexera tá namexẽchi. Rü ngẽxguma rü tá ichayanaxoxẽxẽ i guxü̃ma i nu i ñaa nachicawa, rü nua tá petaãẽgü. Rü choma ya Cori ya Tupana ya Guxãétüwa Ngẽxmacü nixĩ i nüxü̃ chixuxü̃ i ngẽma —ñanagürü.
Tupana rü nayangagü ga yema duü̃xü̃gü ga chixri maxẽxü̃
10 2:10-12 Rü gumátama norü taxre ga taunecü ga nagu ãẽ̱xgacü yixĩxgu ga Daríu, rü norü 9 ga tauemacüarü 24 ga ngunexü̃gu, rü nüma ga Cori ya Tupana rü norü orearü uruxü̃ ga Aguéumaxã nidexa. Rü nüma ga Cori ya Tupana ya Guxãétüwa Ngẽxmacü rü Aguéuxü̃ namu nax naégagu chacherdótegüna naca̱xaxü̃ca̱x nachiga ga yema norü mugü, rü ñanagürü: —Rü ngẽxguma chi wüxi ya yatü rü naxchirumaxã nuquexãcüma yangeãgu i namachi i Tupanana naxãgüxü̃, rü chi ngẽma naxchiru i nagu yangeãxü̃ rü paũmaxã, rüe̱xna namachimaxã, rüe̱xna bínumaxã, rüe̱xna chíxü̃maxã rüe̱xna ngexü̃rüü̃xü̃ i tomare i õnamaxã yanañagu i ngẽma naxchiru, ¿rü chi ngẽmaca̱x marü naxüünexü̃ i ngẽma õna? —ñanagürü. Rü yema chacherdótegü nanangãxü̃gü rü ñanagürügü: —Tama —ñanagürügü.
11 Nüü̃ nadau 2:10
12 Nüü̃ nadau 2:10
13 Rü yexguma ga nüma ga Aguéu rü nüxna nicachigüama rü ñanagürü: —¿Rü ngẽxguma chi texe wüxi i yuxü̃xü̃ ingógügu rü ngẽmaca̱x Tupanape̱xewa taxãũãchigu rü ngẽxguma chi nawena nüxü̃ tingõgügu i ngexü̃rüü̃xü̃ i Tupanapataarü ngẽmaxü̃gü rü tama ẽ̱xna Tupanape̱xewa naxãũãchi i ngẽma ngẽmaxü̃gü? —ñanagürü. Rü nümagü ga yema chacherdótegü rü nanangãxü̃gü rü ñanagürügü: —Ngẽmaãcü —ñanagürügü.
14 Rü yexguma ga nüma ga Aguéu rü ñanagürü: —Cori ya Tupana rü ñanagürü: “Rü ngẽmatama nüxü̃ nangupetü i ñaa duü̃xü̃gü i chope̱xewa ixãũãchixü̃. Rü guxü̃ma i ngẽma choxna naxãgüxü̃ rü guxü̃ma i ta̱xacü i naxügüxü̃ rü chope̱xewa rü nixãũãchi.
15 Rü ñu̱xma rü name nixĩ i nagu perüxĩnüexü̃ nax chope̱xewa pegü pimexẽẽgüxü̃ naxü̃pa nax ipenaxügüxü̃ nax wena penamexẽẽxü̃ ya yimá chopata ya taxü̃ne.
16 ¿Rü ta̱xacü yixĩxü̃ ga yema pexü̃ ngupetüxü̃? Rü yexguma texé petanüwa nagu rüxĩnügu rü tümaanewa rü 20 pü̱xü ga trigu tá tüxü̃́ ínanguxuchi, natürü yexguma tanabuxugu rü 10 püxü̃xicatama tüxü̃́ ínanguxuchi. Rü yexguma texé petanüwa nagu rüxĩnügu rü tümaanewa rü 50 ga tüxü̃ ga bínu tá tüxü̃́ ínanguxuchi natürü yexguma bínu taxü̱xgu rü 20 ga tüxü̃xicatama tüxü̃́ ínanguxuchi.
17 Rü yemaacü pexü̃ nangupetü yerü choma rü da̱xaweanegümaxã rü gáuxü̃pü̱xümaxã chanadai ga yema perü nanetügüarü o ga poraãcü naxca̱x pepuracüexü̃. Natürü ga pemax rü tama cha̱u̱xca̱x pewoegu ga yexguma. Rü choma ya Cori ya Tupana nixĩ i pemaxã nüxü̃ chixuxü̃ i ngẽma.
18 2:18-19 Rü ñu̱xma daa taunecüarü 9 ya tauemacüarü 24 i ngunexü̃gu nixĩchire̱x i ipenaxügüxü̃ nax penanucuxü̃ ya yimá nutagü ya namaxã inaxügüne ya chopata ya taxü̃ne. ¡Rü dücax, rü mea penangugü! Rü woo i ñu̱xmax rü tama mea nixo i perü trigu, rü úbagü, rü igunecü, rü boxragü rü oribugü, natürü i ñu̱xmawena rü tá pexü̃ charüngü̃xẽxẽxü̃ rü tagutáma pexü̃́ nataxu i ngẽma penetügüarü o” —ñanagürü ya Tupana.
19 Nüü̃ nadau 2:18
Cori ya Tupana rü mexü̃ Chorobabémaxã naxuegu
20 2:20-21 Rü gumatama tauemacüarü 24 ga ngunexü̃gu rü Cori ya Tupana rü wena Aguéumaxã nidexa rü ñanagürü: —¡Chorobabé i Yudáanearü ãẽ̱xgacü ixĩcümaxã nüxü̃ ixu i ñaa ore i ñaxü̃! “Choma rü tá chanaxĩã̱xãchixẽxẽ i daxũguxü̃ i naane rü ñoma i naane.
21 Nüü̃ nadau 2:20
22 Rü guxü̃ma i ñoma i naanewa ngẽxmagüxü̃ i nachixü̃anegüarü ãẽ̱xgacügü rü tá ichayanaxoxẽxẽ i norü pora. Rü tá nagu chapogü i ngẽma ãẽ̱xgacügüarü tochicaxü̃gü. Rü tá chanangüegutanü i norü carugü i daiwexü̃ wüxigu namaxã i norü ũxẽẽruü̃gü. Rü tá nayue i norü cowarugü wüxigu namaxã i ngẽma nagu ĩxü̃. Rü wüxichigü rü tá naenexẽarü taragu tátama nayu.
23 Natürü i cuma nax chorü duü̃ quixĩxü̃, Pa Chorobabé i Charatié Nanex, rü ngẽma ngunexü̃gu rü choma rü tá cuxna chadau ngẽma chorü ãnera i chauéga nawa ngẽxmaxü̃rüxü̃, yerü choma nixĩ ga cuxü̃ chaxunetaxü̃. Rü choma i Cori ya Tupana ya Guxãétüwa Ngẽxmacü nixĩ i cumaxã nüxü̃ chixuxü̃ i ngẽma” —ñanagürü.
Notas
^ 2:1 Octúbre.
