Daniel 1:1-21
1 Rü yexguma marü tomaepü̱x ga taunecü ãẽ̱xgacü yixĩxgu ga Yoaquíü̃ ga Yudáanewa, rü nüma ga Nabucudonochó ga Babiróniaanearü ãẽ̱xgacü rü Yerucharéü̃ca̱x ínayagoõchi norü churaragümaxã.
2 Rü nüma ga Cori ya Tupana rü Nabucudonochóaxü̃́ nanatauxchaxẽxẽ nax Yoaquíü̃xü̃ yayaxuxü̃ rü Babiróniaanewa nagaaxü̃ muxü̃ma ga natanüxü̃maxã. Rü yexgumarüxü̃ ta nayana ga Tupanapata ga taxü̃nearü yemaxü̃gü ga üünexü̃, rü norü tupanapatagu nananucu ga Babiróniaanewa.
Daniéxü̃ nigagü nax ãẽ̱xgacüarü ngü̃xẽẽruxü̃ yixĩxü̃ca̱x
3 Rü ñu̱xũchi nüma ga Nabucudonochó rü norü ngü̃xẽẽruxü̃ ga Apenáxü̃ namu nax yema Iraéanearü ãẽ̱xgacütanüwa yadexechiãxü̃ca̱x ga ñuxre ga ngextü̱xüxü̃gü ga Yudíugü nax norü ngü̃xẽẽruü̃gü yixĩgüxü̃ca̱x.
4 Rü yema ngextü̱xüxü̃gü ga yadexechixü̃ rü nimechametü rü naxü̃newa taxuwama nichixe, rü meama naãẽxü̃ nicua̱x, rü meama poperaxü̃ icuáxü̃ nixĩgü nax yemaacü guxü̃wama yamexü̃ nax ãẽ̱xgacüpatawaarü ngü̃xẽẽruxü̃ yixĩgüxü̃ca̱x. Rü ñu̱xũchi nüma ga Apená rü yema ngextü̱xüxü̃güxü̃ nangúexẽxẽ ga naga ga Babiróniacüã̱x rü nacümagü ga poperagu ümatüxü̃.
5 Rü nüma ga Nabucudonochó rü norü duü̃xü̃güxü̃ namu nax guxü̃ma ga ngunexü̃gügu yema ngextü̱xüxü̃güna naxãgüãxü̃ca̱x ga yematama õna ga nümatama nangṍxü̃ rü bínu ga nümatama yaxaxãcü. Rü yemaacü tomaepü̱x ga taunecü meama nanangúexẽxẽ nax yemawena ãẽ̱xgacüaxü̃́ napuracüexü̃ca̱x.
Danié rü namücügü rü ãẽ̱xgacüpatawa napuracüe
6 Rü yema ngextü̱xüxü̃gütanüwa nayexmagü ga Danié rü Ananía rü Michaé rü Acharía. Rü nümagü rü Yudátanüxü̃ nixĩgü.
7 Rü nüma ga yema ãẽ̱xgacüarü duü̃xü̃güeru rü nanaxüchicüxü ga Daniééga rü Betachágu nanaxüéga, rü ga Ananía rü Chadrágu nanaxüéga, rü ga Michaé rü Mechágu nanaxüéga, rü ga Acharía rü Abex-negó nanaxüéga.
8 Natürü nüma ga Danié rü tama nanangṍxchaü̃ ga yema õna rü tama nayaxaxchaü̃ ga gumá bínu ga ãẽ̱xgacü nüxna naxãcü, yerü nagu narüxĩnü nax tama Tupanape̱xewa namexü̃ ga yema. Rü yemaca̱x ãẽ̱xgacüarü duü̃xü̃güeruna naca nax tama yema õna ga ãẽ̱xgacü nüxna ãxü̃ nüxü̃ nangõ̱xẽẽxü̃ca̱x.
9 Rü Tupana rü yema ãẽ̱xgacüarü duü̃xü̃güeruãẽwa nananguxẽxẽ nax Daniémaxã namecümaxü̃ca̱x.
10 Natürü yema ãẽ̱xgacüarü duü̃xü̃güeru rü Daniéxü̃ ñanagürü: —Nüxü̃ chamuü̃ ya yimá chorü ãẽ̱xgacü. Rü nüma rü marü chomaxã nüxü̃ nixu nax ta̱xacürü õna rü axexü̃ tá pexna chaxãxü̃. Rü ngẽxguma nüma tá pexü̃ nada̱u̱xgu rü ngẽma togü i ngextü̱xüxü̃güarü yexera tá pixaegux rü nüma ya ãẽ̱xgacü rü tá choxü̃ nima̱x —ñanagürü.
11 Rü nüma ga ãẽ̱xgacüarü duü̃xü̃güeru rü nüxü̃ naxuneta ga wüxi ga duü̃xü̃ nax nüxna nadauxü̃ca̱x ga Danié rü Ananía rü Michaé rü Acharía. Rü nüma ga Danié rü yema norü dauruü̃maxã nidexa rü ñanagürü nüxü̃:
12 —Toma i curü duü̃xü̃gü rü cuxna taca nax 10 i ngunexü̃ towa nüxü̃ cuxüxü̃ nax toxü̃ cunangõ̱xẽẽxü̃ i nanetü i berdúragüxicatama rü ñu̱xũchi dexá.
13 ¡Rü ngẽma 10 i ngunexü̃güwena rü toxü̃ nangugü namaxã i ngẽma togü i ngextü̱xüxü̃gü i nangõ̱xgüxü̃ i ngẽma ãẽ̱xgacüwemü! Rü ñu̱xũchi i cuma rü tá nüxü̃ cucua̱x i ta̱xacürü õna tá toxna cuxãxü̃ —ñanagürü.
14 Rü nüma ga yema norü dauruxü̃ rü: —Ngü̃ —ñanagürü. Rü 10 ga ngunexü̃gu rü nanetü i berdúragüxicatama rü dexámare nixĩ ga nüxna naxãxü̃.
15 Rü yexguma 10 ga ngunexü̃gü marü ngupetügu rü nümagü ga yema ãgümücü ga ngextü̱xüxü̃gü rü tama nida̱xawee rü narüporamaegü nüxü̃ ga yema togü ga ngextü̱xüxü̃gü ga ãẽ̱xgacüwemü ngõ̱xgüxü̃.
16 Rü nüma ga yema norü dauruxü̃ rü nügüxü̃́ nayange ga yema ãẽ̱xgacüwemü rü gumá bínu ga yema ãgümücü ga ngextü̱xüxü̃güca̱xchire̱x ixĩcü. Rü ñu̱xũchi nanetü ga berdúragüxicatama nüxna naxã.
17 Rü yema ãgümücü ga ngextü̱xüxü̃gü, rü Tupana rü cua̱x nüxna naxã nax nüxü̃ nacua̱xgüxü̃ca̱x ga naguxü̃raü̃xü̃ ga cua̱x ga poperagu ümatüxü̃. Rü nüma ga Tupana rü naétü Daniéxü̃ narüngü̃xẽxẽ nax nüxü̃ nacuáxü̃ca̱x nax ta̱xacüchiga yixĩxü̃ ega texé ngo̱xetügu rüe̱xna ãnegügu.
18 Rü yexguma marü yanguxgu ga yema uenü ga ãẽ̱xgacü ga Nabucudonochó nagu unetaxü̃ nax nape̱xewa nagagüãxü̃ca̱x ga guxü̃ma ga yema ngextü̱xüxü̃gü ga ãẽ̱xgacüarü puracüca̱x ngúexü̃, rü nüma ga yema ãẽ̱xgacüarü duü̃xü̃güeru rü ãẽ̱xgacüpe̱xewa nanagagü ga yema ngextü̱xüxü̃gü.
19 Rü nüma ga ãẽ̱xgacü rü namaxã nidexa ga guxü̃ma ga yema ngextü̱xüxü̃gü. Rü natanüwa rü nataxuma ga texe ga Daniémaxã, rü Ananíamaxã, rü Michaémaxã, rü Acharíamaxã wüxiguxü̃ ga norü cua̱xwa. Rü yemaca̱x ga nüma ga ãẽ̱xgacü rü nanade ga yema ãgümücü ga ngextü̱xüxü̃gü nax norü ngü̃xẽẽruü̃gü yixĩgüxü̃ca̱x.
20 Rü nüma ga ãẽ̱xgacü rü yexguma norü ucu̱xẽca̱x nüxna nacaxgu nax mea nachixü̃anemaxã inacuáxü̃ca̱x, rü Daniéwa rü namücügüwa nüxü̃ inayangau nax 10 e̱xpü̱xcüna guxü̃ma ga yema norü ucu̱xẽruü̃gü ga yuüexü̃arü yexera nüxü̃ yacua̱xüchixü̃.
21 Rü nüma ga Danié rü yexma Babiróniaanegu narüxã̱ũ̱x ñu̱xmata wüxi ga taunecü nüxü̃́ ingu ga Chíru nax Pérchiaanearü ãẽ̱xgacü yixĩxü̃.
