Daniel 12:1-13
12 Rü ñanagürü ta: —Rü tá ínangugü i ngunexü̃gü i nagu tá nangẽxmaxü̃ i taxü̃ i guxchaxü̃gü i taguma ñuxgu nüxü̃ idauxü̃ ga yexguma noxritama nangóegu ga nachixü̃anegü. Rü ngẽxguma ngẽma ngunexü̃güwa nanguxgu rü tá nango̱x ya Miguére ya dauxü̃cüã̱xarü ãẽ̱xgacü ya curü duü̃xü̃gü i Iraétanüxü̃xü̃ ípoxü̃cü. Rü ngẽxguma ngẽma ngunexü̃güwa nanguxgu rü guxü̃ma i ngẽma curü duü̃xü̃gü i Iraétanüxü̃ i Tupanaarü poperagu ümatüégaxü̃ rü tá namaxẽ naétüwa i ngẽma guxchaxü̃gü.
2 Rü guxü̃ma i marü yuexü̃ rü tá ínarüdagü. Rü nümaxü̃ rü maxü̃ i taguma gúxü̃ca̱x tá ínarüdagü, rü togü rü ãneca̱x rü poxcuca̱x tá ínarüdagü.
3 Rü ngẽma naãẽxü̃ icuáxü̃ i Tupanaga ĩnüexü̃ rü ñoma ngóonexü̃rüxü̃ tá nanangóonexẽẽgü. Rü ngẽma to̱xguexü̃ ngúexẽẽxü̃ nax Tupanawe tarüxĩxü̃ca̱x rü ñoma woramacurigürüxü̃ tá ngéma nanaitanü.
4 ¡Natürü i cumax, Pa Daniéx, rü cuxicatama nüxü̃ nacua̱x i ngẽma ore i cumaxã nüxü̃ chixuxü̃! ¡Rü ñu̱xũchi nañaxtachipe̱xe i ngẽma popera ñu̱xmatáta nawa nangu i ngẽma ngunexü̃ i nagu yacuáxü̃ i ngẽma guxchaxü̃gü! Rü muxü̃tama i duü̃xü̃gü rü guxü̃wama tá naxca̱x nadaugü i cua̱x nax ngẽmaãcü yexera nüxü̃ nacua̱xgüxü̃ca̱x i ngẽma tá ngupetüxü̃ —ñanagürü.
5 Rü choma i Danié rü nüxü̃ chadau ga to ga taxre ga yatü. Rü wüxi rü yema natüarü tocutügu nachi rü yema to rü norü toxpechinügu nachi.
6 Rü wüxi ga yema yatü rü yema línuchimaxã ãxchiruxü̃ ga natüétügu chixü̃na naca rü ñanagürü nüxü̃: —¿Ñuxgu tá nixĩ i yaguxü̃ i ngẽma taxü̃ i tá ngupetüxü̃? —ñanagürü.
7 Rü yexguma ga yema yatü ga línuchimaxã ãxchiruxü̃ ga natüétügu chíxü̃ rü naxunagütanü ga naxme̱x rü Tupana ya Maxü̃cüégagu nanaxuegu rü ñanagürü: —Tomaepü̱x ya taunecüarü ngãxü̃ nataxu. Rü ngẽxguma marü íyachaxãchigügu nax nadaigüãxü̃ i Tupanaarü duü̃xü̃gü, rü ngẽxguma tá nixĩ i yaguxü̃ i ngẽma nüxü̃ chixuxü̃ —ñanagürü.
8 Choma rü nüxü̃ chaxĩnü ga yema nüxü̃ yaxuxü̃, natürü tama nüxü̃ chacua̱xéga nax ta̱xacüchiga yixĩxü̃. Rü yemaca̱x nüxna chaca rü ñachagürü: —Pa Corix ¿ta̱xacü tá nangupetü nawena i guxü̃ma i ngẽma? —ñachagürü.
9 Rü nüma rü choxü̃ nangãxü̃ rü ñanagürü: —Name i aixrügumarüxü̃ mea cumaxü̃, Pa Danié. Natürü cunaxwa̱xe nax taxúetama nüxü̃ cuáxü̃ i ngẽma ore ñu̱xmatáta nawa nangu i ngẽma ngunexü̃ i nagu yacuáxü̃.
10 Rü muxü̃tama nawa nachopetü i ngẽma ngúxü̃gü i nüxü̃ chixuxü̃, natürü ngẽmawena rü Tupanape̱xewa rü mexü̃ i duü̃xü̃gü tá nixĩgü rü nataxutáma i chixexü̃ i nagu naxĩnüexü̃. Natürü ngẽma chixexü̃gu maxẽxü̃ i duü̃xü̃gü rü chixexü̃ tá naxügüama rü taxũtáma nüxü̃ nicua̱xãchi i ngẽma ngupetüxü̃. Natürü ngẽma yatügü i aixcüma cua̱x nüxü̃́ ngẽxmagüxü̃ rü tá meama nüxü̃ nacua̱xgü i guxü̃ma i ngẽma ngupetüxü̃.
11 Rü ngẽma ngunexü̃ i ngẽxguma tá íyanaxoxẽẽgüãgu nax Tupanaca̱x wüxichigü i ngunexü̃ ãmare yagugüxü̃ rü ñu̱xmata nawa nangu i ngẽma ngunexü̃ i Tupanapata ya taxü̃newa chixexü̃ i ãmare yagugüxü̃ rü 1,290 i ngunexü̃gü tá ningu.
12 Rü tataãxẽ ya yíxema tayaxõõcüma yáxna ĩnüxe ñu̱xmata nangupetü i ngẽma 1,335 i ngunexü̃gü.
13 Natürü i cumax, Pa Danié rü name i cutaãxẽ ñu̱xmata nawa nangu i ngẽma ngunexü̃ i nagu curüngü̃xü̃. Rü ngẽxguma tá nawa nanguxgu nax ícurüdaxü̃ rü tá cunayaxu i curü ãmare ya Tupana tá cuxna ãxü̃ —ñanagürü.
