Daniel 3:1-30
3 Rü nüma ga ãẽ̱xgacü ga Nabucudonochó rü norü duü̃xü̃güxü̃ namu nax naxügüã̱xü̃ca̱x ga wüxi ga naxchicüna̱xã ga úirunaxca̱x. Rü yema naxchicüna̱xã rü nüxü̃́ nayexma ga 30 metru ga norü máchane, rü norü taxü̃ne rü 3 metru nixĩ. Rü ñu̱xũchi nüma ga ãẽ̱xgacü rü norü duü̃xü̃güxü̃ namu nax metachinüxü̃ ga Dúragu ãégaxü̃gu nachixẽẽgüãxü̃ca̱x ga Babiróniaanewa.
2 Rü yemawena rü naxca̱x nangema ga guxü̃ma ga ãẽ̱xgacügü ga wüxichigü ga naaneétüwa yexmagüxü̃. Rü naxca̱x nangema ta ga norü churaragüerugü, rü wüxichigü ga ĩanearü ãẽ̱xgacügü, rü ãẽ̱xgacügü ga ucu̱xẽruü̃gü, rü ãẽ̱xgacügü ga diẽrumaxã icua̱xgüxü̃, rü ãẽ̱xgacügü ga nachixü̃anearü mugümaxã icua̱xgüxü̃, rü togü ga ãẽ̱xgacügü ga wüxichigü ga ĩanewa yexmagüxü̃. Rü yema ãẽ̱xgacügü nixĩ ga naxca̱x nangemaxü̃ nawa ga norü ãxü̃chichiga ga yema naxchicüna̱xã ga ãẽ̱xgacü norü duü̃xü̃güxü̃ üxẽẽxü̃.
3 Rü guxü̃ma ga yema ãẽ̱xgacügü ga yema nachixü̃anecüã̱x rü nangutaque̱xegü nape̱xegu ga yema naxchicüna̱xã nax naxüchigagüãxü̃ca̱x ga norü ãxü̃chi.
4 Rü yema namaxã icuáxü̃ ga yema ãxü̃chichigaarü ügü rü tagaãcü duü̃xü̃güxü̃ ñanagürü: —¡Iperüxĩnüe Pa Duü̃xü̃gü i Guxü̃ i ĩanecüã̱xgü, rü Guxü̃ i Nachixü̃anecüã̱xgü, rü Guxãma i Pemax i To i Nagawa Idexagüchigüxex!
5 Rü ngẽxguma tá nüxü̃ pexĩnüegu nax yacuegüãxü̃ rü napaxgüãxü̃ i ngẽma paxetaruü̃gü rü pemax, Pa Duü̃xü̃güx, rü tá nape̱xegu pecaxã́pü̱xügü i ngẽma naxchicüna̱xã i ãẽ̱xgacü ya Nabucudonochó duü̃xü̃güxü̃ üxẽẽxü̃.
6 Rü guxãma ya texé ya tama nape̱xegu caxã́püxügüxe, rü nüxü̃ icua̱xüü̃güxe, rü noxtacüma tá ngẽma poxcuchicaxü̃ i íya̱u̱xraxü̃gu tawocu —ñanagürü.
7 Rü yemaacü ga yexguma nüxü̃ naxĩnüegu ga yema paxetaruü̃gü ga nax yacuegüãxü̃ rü guxü̃ma ga yema muxü̃ma ga duü̃xü̃gü ga yexma ngutaque̱xexü̃ rü nape̱xegu nacaxgüã́pü̱xü, rü nüxü̃ nicua̱xüü̃gü ga yema naxchicüna̱xã ga úirunaxca̱x.
8 Natürü ñuxre ga Cadéuanecüã̱xgü rü ãẽ̱xgacü ga Nabucudonochóxü̃tawa naxĩ nax Yudíugüxü̃ ínaxuaxü̃güxü̃ rü ñanagürügü:
9 —¡Guxü̃guma cumaxü̱̃x, Pa tórü Ãẽ̱xgacü, rü ngẽma cuéga rü guxü̃guma nüxna nacua̱xãchie!
10 3:10-11 Rü cumax, Pa Ãẽ̱xgacü, rü guxãxü̃ma cumu nax nape̱xegu tacaxã́pü̱xügüxü̃ca̱x, rü nüxü̃ ticua̱xüü̃güxü̃ca̱x i ngẽma úirunaxca̱x i naxchicüna̱xã i ngẽxguma yacuegüãgu rü napaxgüãgu i ngẽma paxetaruü̃gü. Rü ñu̱xũchi nüxü̃ quixu rü yíxema tama nape̱xegu caxã́pü̱xügüxe, rü nüxü̃ icua̱xüü̃güxe, rü noxtacüma tá ngẽma poxcuchica i íya̱u̱xraxü̃gu tawocu.
11 Nüü̃ nadau 3:10
12 Dücax, Pa Ãẽ̱xgacüx, rü nangẽxma i ñuxre i Yudíugü i cumax ãẽ̱xgacüxü̃ cumucuxü̃ nawa ya Babirónia. Rü ngẽmagü rü tama cuga naxĩnüechaü̃, Pa Ãẽ̱xgacüx, rü ngẽmaca̱x tama nüxü̃ nicua̱xüü̃gü i ngẽma tórü tupanagü rü woo i ngẽma naxchicüna̱xã i úirunaxca̱x i cumax duü̃xü̃güxü̃ cuxüxẽẽxü̃. Rü ngẽma yatügü rü Chadrá, rü Mechá rü Abex-negó nixĩ —ñanagürügü.
13 Rü nüma ga Nabucudonochó rü poraãcü nanu. Rü yemaca̱x norü duü̃xü̃güxü̃ namu nax naxü̃tawa nagagüãxü̃ca̱x ga Chadrá, rü Mechá, rü Abex-negó. Rü yexguma marü naxü̃tawa nangugügu rü nüxna naca rü ñanagürü:
14 —¿Aixcüma yixĩxü̃ i pemax i tama nüxü̃ picua̱xüxü̃güxü̃ i ngẽma chorü tupanachicüna̱xãgü rü woo i ngẽma naxchicüna̱xã i máchanexü̃ i choma duü̃xü̃güxü̃ chaxüxẽxẽxü̃?
15 Rü ngẽxguma yacuegüã̱xgu i ngẽma paxetaruü̃gü ¿rü pemax rü ípememarexü̃ nax nape̱xegu pecaxã́pü̱xügüxü̃ rü nüxü̃ picua̱xüxü̃güxü̃ i ngẽma naxchicüna̱xã i choma duü̃xü̃güxü̃ chaxüxẽxẽxü̃? Erü ngẽxguma taxũtáma ñu̱xmatama nüxü̃ picua̱xüxü̃gügu, rü ngẽma poxcuchicaxü̃ i íya̱u̱xraxü̃gu tá pexü̃ chawocu. ¿Rü ta̱xacürü tupana tá pexü̃ nawa ínanguxü̃xẽxẽ i ngẽma? —ñanagürü.
16 Rü yexguma ga yema tomaepü̱x ga ngextü̱xüxü̃gü rü nanangãxü̃gagü rü ñanagürügü: —Pa Ãẽ̱xgacüx, rü taxuca̱xma tü̱xcüü̃ yigü naxca̱x tachoxü̃gagü i ngẽma.
17 Rü yimá torü Tupana ya nüxü̃ ticua̱xüü̃gücü rü nüxü̃́ natauxcha nax toxü̃ ínanguxü̃xẽxẽxü̃ nawa ya yima üxü rü nawa i guxü̃ma i ngẽma poxcu i tomaxã cuxueguxü̃, Pa Ãẽ̱xgacüx.
18 Natürü ngẽxguma chi woo taxũchima toxü̃ nangü̃xẽxẽgu rü cumaxã nüxü̃ tixu, Pa Ãẽ̱xgacüx, rü toma rü taxũtáma nüxü̃ ticua̱xüxü̃gü i ngẽma curü tupanagü, rü taxũtáma nape̱xegu tacaxã́pü̱xügü i ngẽma naxchicüna̱xã i úirunaxca̱x —ñanagürügü.
Yema tomaepü̱x ga ngextü̱xüxü̃gü rü tama nixae nawa ga guma üxü ga nawa yawocune
19 Rü yema orexü̃ naxĩnügu ga Nabucudonochó, rü nanadeãchichiwe yerü yema tomaepü̱x ga ngextü̱xüxü̃gümaxã poraãcü nanu. Rü norü duü̃xü̃güxü̃ namu nax 7 e̱xpü̱xcüna naxüxüxü̃güãxü̃ca̱x ga yema poxcuchicaxü̃ ga iya̱u̱xraxü̃ nax yemaacü nanaxichixü̃ca̱x.
20 Rü ñu̱xũchi norü churaragü ga rüporamaegüxü̃xü̃ namu nax Chadrá rü Mechá rü Abex-negóxü̃ yana̱i̱xgüxü̃ca̱x, rü yemaacü yema poxcuchicaxü̃ ga iya̱u̱xraxü̃wa yawocuãxü̃ca̱x.
21 Rü yema tomaepü̱x ga ngextü̱xüxü̃gü rü yematama norü ãẽ̱xgacüchiru ga nagu yacu̱xgüxü̃maxã nayana̱i̱xgü rü yema poxcuchicaxü̃ ga iya̱u̱xraxü̃gu nanawocu.
22 Rü yema poxcuchicaxü̃ rü poraãcü nanaxichi yerü yemaacü norü duü̃xü̃güxü̃ namu ga ãẽ̱xgacü. Rü yemaca̱x ga yema churaragü ga yema tomaepü̱x ga ngextü̱xügüxü̃xü̃ yéma iwocuxü̃ rü nixae rü nayue.
23 Rü nümagü ga Chadrá rü Mechá rü Abex-negó rü ina̱i̱xgüxü̃ yexma nawocu nagu ga yema poxcuchicaxü̃ ga iya̱u̱xraxü̃.
24 Rü yexguma nüxü̃ nada̱u̱xgu ga nüma ga Nabucudonochó, rü paxa inachi rü poraãcü naba̱i̱xãchiãxẽ. Rü yema norü ucu̱xẽruü̃güna naca rü ñanagürü: —¿Tama ẽ̱xna yima üxüxétüwa yawocuxü̃ i tomaepü̱x i yatü i na̱i̱xgüxü̃? —ñanagürü. Rü yema norü ucu̱xẽruü̃gü nanangãxü̃gü rü: —Ngẽmáacüx, tomaepü̱x nixĩ —ñanagürügü.
25 Rü ñu̱xũchi ga nüma ga ãẽ̱xgacü rü ñanagürü: —Natürü ngéma nüxü̃ chadau i ãgümücü i yatü iwẽgüxü̃ i üxüxétügu ixĩĩĩxü̃ rü taxuxü̃ma nüxü̃ ngupetüxü̃. Rü ngẽma norü ãgümücü i yatü rü nanadauxü̃cüã̱xraxü̃ —ñanagürü.
26 Rü yema ñaxguwena rü nüma ga Nabucudonochó rü yema poxcuchicaxü̃ ga íya̱u̱xraxü̃ca̱x nixũ rü yéma tagaãcü ñanagürü: —Pa Chadrá, rü Mechá, rü Abex-negó ya Tupana ya Guxãétüwa Ücüarü Duü̃xü̃gü Ixĩgüxü̃x, rü ¡ípechoxü̃ rü nua pexĩ! —ñanagürü. Rü yema tomaepü̱x rü ínachoxü̃ nawa ga guma üxü.
27 Rü guxü̃ma ga yema ãẽ̱xgacügü ga yéma yexmagüxü̃ rü naxca̱x naxĩ ga yema tomaepü̱x ga yatügü. Rü nüxü̃ nadaugü ga taxuwama nax yaxaexü̃ ga naxü̃newa, rü woo ga nayae rü naxchiru rü tama nax yaxaxü̃ rü bai ga nax natauacaemagüxü̃.
28 Rü yexgumatama ga nüma ga Nabucudonochó rü ñanagürü: —¡Ngĩxã nüxü̃ ticua̱xüü̃gü ya norü Tupana i Chadrá rü Mechá rü Abex-negó ya núma namucü i ngẽma dauxü̃cüã̱x nax íyapoxü̃ãxü̃ca̱x i norü duü̃xü̃gü i tama ãẽ̱xgacüga ĩnüechaü̃xü̃! Yerü yema tomaepü̱xca̱x rü narümemae nax nayuexü̃ naxü̃pa nax togümare ga tupanaxü̃ yacua̱xüü̃güxü̃.
29 Rü ngẽmaca̱x i ñu̱xma rü chanaxunagü rü ngexerüxüxe ya duü̃xẽ ya nachiga chixri idexaxe ya norü Tupana i ñaa tomaepü̱x i ngextü̱xüxü̃gü rü noxtacüma ãgümücügu tá tüxü̃ tarüchexte, rü tümapata rü tá nagu napogü rü natüchixica tá ngéma ninuagü. Rü nüetama ega woo ngexnerüxünemare ya ĩanecüã̱x tixĩxgu, rü ngexü̃rüüxü̃ i nachixü̃anecüã̱x tixĩxgu, rü ngexü̃rüüxü̃ i nagawa tidexagux. Erü nataxuma i to i tupana i ngẽmaãcü norü duü̃xü̃güxü̃ ípoxü̃xü̃ —ñanagürü.
30 Rü yemawena ga nüma ga ãẽ̱xgacü rü yexera rümemaexü̃ ga puracü yema tomaepü̱x ga ngextü̱xüxü̃güna naxã ga Babiróniaanewa.
