Daniel 4:1-37
4 —Choma i ãẽ̱xgacü i Nabucudonochó rü taãẽãcüma pexü̃ charümoxẽ, Pa Guxü̃ma i Nachixü̃anecüã̱xgü i Ñoma i Naanewa Maxẽxü̃ rü To i Nagawa Idexagüxü̃x. Rü chanaxwa̱xe i mea pexü̃ nangupetü.
2 Rü chanaxwa̱xe i pema rü nüxü̃ nax pecuáxü̃ i ngẽma taxü̃ i ngü̃xẽxẽ i poraãcü mexü̃ ya Tupana ya poracü cha̱u̱xca̱x üxü̃.
3 Rü nataxüchi i ngẽma mexü̃gü i norü poramaxã naxüxü̃ rü ngẽma cua̱xruü̃gü i tüxü̃ nawéxü̃. Rü nüma rü guxü̃guma ãẽ̱xgacü nixĩ, rü ngẽma norü pora rü tataagüwa ninguchigü.
4 Rü choma i Nabucudonochó rü chataãxẽ ga chopatawa rü poraãcü mexü̃ choxü̃ naxüpetü.
5 Natürü wüxi ga chütaxü̃gu ga yexguma marü chapexgu rü chaxãnegü. Rü namaxã chaba̱i̱xãchi ga yema nagu chaxãnegüxü̃ yerü yema chaunegüwa nüxü̃ chadauxü̃ rü naxãũcümaxü̃chi, rü yemaca̱x poraãcü chamuü̃.
6 Rü yemaca̱x naxca̱x changema ga guxü̃ma ga chorü ucu̱xẽruü̃gü ga Babiróniaanecüã̱x nax nua choxü̃ íyadaugüxü̃ca̱x rü chomaxã nüxü̃ yaxugüxü̃ca̱x nax ta̱xacüchiga yixĩxü̃ ga yema nagu chaxãnegüxü̃.
7 Rü guxü̃ma ga yema yuüxü̃gü rü yema ẽxü̃guxü̃ cua̱xgüxü̃ rü yema nüxü̃ icua̱xüchixü̃ rü yema woramacuriwa ngúexü̃ ga Babiróniaanecüã̱x rü chauxü̃tawa naxĩ. Rü choma rü namaxã nüxü̃ chixu ga yema nagu chaxãnegüxü̃, natürü tama nüxü̃ nacua̱xgü nax ta̱xacüchiga yixĩxü̃ ga yema nagu chaxãnegüxü̃.
8 Rü Daniéwa nixĩ ga iyacuáxü̃ nax chauxü̃tawa naxũxü̃. Rü nüma rü chorü tupanaégagu Betachágu chanaxüéga. Rü nüma i Danié rü Tupana ya Üünecüãxẽ namaxã inacua̱x. Rü namaxã nüxü̃ chixu ga yema nagu chaxãnegüxü̃ rü ñachagürü:
9 “Pa Betachá i Guxü̃ i Chorü Ucu̱xẽruü̃güerux, rü choma nüxü̃ chacua̱x rü yimá Tupana ya Üünecüãxẽ cumaxã inacua̱x rü ngẽmaca̱x nüxü̃ cucua̱x i guxü̃ma i ẽxü̃guxü̃. Rü chanaxwa̱xe i ícurüxĩnü i ngẽma cumaxã tá nüxü̃ chixuxü̃ i chaunegüwa nüxü̃ chadauxü̃ rü ñu̱xũchi chanaxwa̱xe i chomaxã nüxü̃ quixu nax ta̱xacüchiga yixĩxü̃.
10 Rü ñaa nixĩ ga chaunegüwa nüxü̃ chadauxü̃ ga yexguma ichacayane. Rü nüxü̃ chadau ga wüxi ga nai ga máchanexü̃chixü̃ ga meama ñaa naanearü ngãxü̃wa rüxüxü̃.
11 Rü yema nai rü naya rü natamena̱xãxü̃chi, rü natanügü rü daxũguxü̃ ga naanewa nangu rü yáxü̃gu nüxü̃ tadau i ñaa naanewa.
12 Rü naatügü rü nimexẽchi rü yema nax namuxü̃ ga norü o rü guxü̃ma ga duü̃xü̃güca̱x rü ningu. Rü norü gáuxchipetaxü̃ca̱x natüü̃gu nayacagü ga naxü̃nagü, rü werigü rü nachacüügügu nixüxchiãü̃gü. Rü guxü̃ma i ñoma i naanecüã̱x i duü̃xü̃güca̱x ningu ga norü o.
13 Rü ngürüãchi nüxü̃ chadau ga wüxi ga dauxü̃cüã̱x ga dauxü̃taeruxü̃ ixĩxü̃ ga dauxü̃guxü̃ ga naanewa írüxĩxü̃.
14 Rü yema rü tagaãcü ñanagürü: ‘¡Rü penatuxu̱x i ngẽma nai rü penadaü̃chacüxü̱x, rü penabuxatü, rü ngẽma norü o rü namaxã penawoone nax ngẽmaãcü yabuxmüxü̃ca̱x i ngẽma naxü̃nagü i norü gáuxpechitaca̱x natüü̃gu rüchoxü̃ rü ngẽma werigü i nachacüügu ixüachiãü̃xü̃!
15 ¡Natürü ngẽma nachime rü naxchúma̱xã rü ngéma waixü̃müwa penaxüxẽxẽ! ¡Rü fierunaxca̱x rü bróũchenaxca̱x ya cadénamaxã peyachota! Rü ngéma naanearü maxẽẽtawa penata̱x nax ngẽmaãcü cherena nagu nguxü̃ca̱x rü wüxigu naxü̃nagümaxã maxẽẽtawa nangẽxmaxü̃ca̱x.
16 Rü tá naxãũãxẽ rü ñoma wüxi i naeü̃rüü̃ãcü tá namaxü̃. Rü ngẽmaãcü tá nixĩ i 7 ya taunecü.
17 Rü yema nixĩ ga yema naimaxã naxuegugüxü̃ ga yema ixüünexü̃ ga dauxü̃cüã̱x ga dauruü̃gü ixĩgüxü̃. Yerü nanaxwa̱xegü nax guxü̃ma i duü̃xü̃gü nüxü̃ cua̱xgüxü̃ nax nüma ya Tupana ya Guxãétüwa Ngẽxmacü rü nüxü̃́ nangẽxmaxü̃ i pora nax namaxã inacuáxü̃ i ngẽma nachixü̃anegüarü ãẽ̱xgacügü i ñoma i naanewa ngẽxmagüxü̃. Rü nüma nixĩ i nüxü̃ naxunetaxü̃ i ngẽma nüma nanaxwa̱xexü̃ nax ãẽ̱xgacügü yixĩgüxü̃. Rü nüma rü nüxü̃́ nangẽxma i pora nax nachixü̃anearü ãẽ̱xgacüxü̃ yangucuchixẽẽãxü̃ i ngẽma duü̃xü̃ i noxri taxuxü̃ma ixĩxü̃’, ñanagürü ga yema dauxü̃cüã̱x.
18 Rü yema nixĩ, Pa Betacháx, ga yema chaunegü ga choma i ãẽ̱xgacü ya Nabucudonochó nagu chaxãnegüxü̃. ¡Rü ñu̱xma rü chomaxã nüxü̃ ixu nax ta̱xacüchiga yixĩxü̃ ga yema chaunegü! Erü taxuxü̃ma i ngẽma togü i chorü ucu̱xẽruü̃gü i nüxü̃ cua̱xüchichiréxü̃ nüxü̃ nacua̱xgü i ngẽma. Natürü i cumax rü tá nüxü̃ cucua̱x nax ta̱xacüchiga yixĩxü̃ erü cuwa nangẽxma i naãxẽ ya yimá Tupana ya Üünecü”, ñachagürü.
19 Rü yexguma ga nüma ga Danié ga Betachámaxã naxugüãcü rü paxaãchi yexma narüchiane yerü poraãcü namuü̃ naxca̱x ga yema ĩnü ga naãẽwa nguxü̃. Natürü chomax i ãẽ̱xgacü rü ñachagürü nüxü̃: “Pa Betacháx ¡taxṹ i cuxoegaãẽxü̃ naxca̱x i ngẽma chaunegü rü ta̱xacüchiga yixĩxü̃!” ñachagürü. Rü nüma ga Betachá rü nanangãxü̃ rü ñanagürü choxü̃: “Pa Ãẽ̱xgacüx, chierüx guxü̃ma ga yema cunegüwa nüxü̃ cudauxü̃, rü curü uanügüca̱x yixĩxgux.
20 4:20-21 Rü yema nüxü̃ cudauxü̃ ga nai ga máchanexü̃ rü tanexü̃ ga dauxü̃guxü̃ ga naanewa ngutanüxü̃ ga yáxü̃anewa duü̃xü̃gü nüxü̃ dauxü̃ ga meátüxüchixü̃ rü yemaca̱x norü gáuxpechitaca̱x natüü̃gu narücho ga naeü̃gü, rü werigü rü nachacüügügu nixãxchiãü̃. Rü norü o rü namuxũchi, rü meama ningu nax guxü̃ma nangṍxü̃.
21 Nüü̃ nadau 4:20
22 Rü yema nai ga taxüchixü̃ ga cunegüwa nüxü̃ cudauxü̃, rü cuchiga nixĩ, Pa Ãẽ̱xgacüx. Rü cuma i ñu̱xmax rü cuporaxüchi rü ngẽma curü ngẽmaxü̃gü rü cunanutaque̱xe ñu̱xmata dauxü̃guxü̃ i naanewa nangu, rü ngẽmaãcü guxü̃ i nachixü̃anegümaxã icucua̱x.
23 Pa Ãẽ̱xgacüx, rü yema to ga nüxü̃ cudauxü̃ ga yema cunegüwa, rü nüxü̃ cudau ga wüxi ga üünexü̃ ga dauxü̃cüã̱x ga dauruxü̃ ixĩxü̃ ga dauxü̃guxü̃ ga naanewa írüxĩxü̃ ga ñaxü̃: ‘¡Rü penatuxu̱x ya yimá nai rü nagu pechexgü! ¡Natürü ngẽma nachime rü naxchúma̱xãgü rü nüetama ngéma waixü̃müwa nangexma̱x! ¡Rü fierunaxca̱x rü bróũchenaxca̱x ya cadénamaxã penangãxü̃ rü ngéma naanearü maxẽanewa penata̱x nax cherena nagu nguxü̃ca̱x! Rü wüxigu naxü̃nagümaxã maxẽ nangṍxü̃ca̱x i 7 ya taunecü’, ñaxü̃.
24 Rü yema cunegüwa nüxü̃ cudauxü̃, Pa Ãẽ̱xgacüx, rü cuchiga nixĩ. Rü ngẽmawa yimá Tupana ya Guxãétüwa Ngẽxmacü cuxü̃ nanawe̱x i ngẽma poxcu i cumaxã naxueguxü̃.
25 Erü cumax, Pa Ãẽ̱xgacüx, rü taxũtáma duü̃xü̃gütanüwa cungexma, rü naxü̃nagütanüwa tá cumaxü̃ rü wocagürüxü̃ tá maxẽ cunangõ̱x, rü cherena rü tá cuxü̃ niwaixẽxẽ. Rü ngẽmaãcü tá cumaxü̃ i 7 ya taunecü ñu̱xmatáta naxca̱x íquicuáx nax texé yixĩxü̃ ya yimá namaxã icuácü i guxü̃ma i ãẽ̱xgacügü i ñoma i naanewa ngẽxmagüxü̃. Erü nüma nixĩ i tüxü̃ yamucuchixü̃ ya yíxema nüma natümawa̱xéxe nax ãẽ̱xgacü tixĩxü̃ca̱x.
26 Rü yema dauxü̃cüã̱xarü ore nax yema nachime rü naxchúma̱xã yéma waixü̃müanewa yaxǘgüxẽẽxü̃ rü ngẽma rü nüxü̃ nixu, Pa Ãẽ̱xgacüx, nax wena táxarü cuchixü̃anemaxã icucuáxü̃ i ngẽxguma nüxna cucua̱xãchigu nax nüma ya Tupana yixĩxü̃ ya guxãétüwa ngẽxmacü.
27 Rü ngẽmaca̱x Pa Ãẽ̱xgacüx, ¡irüxĩnü i ñaa chorü ucu̱xẽ rü mea namaxã inacua̱x i duü̃xü̃gü! ¡Rü taxṹ i pecadu cuxüxü̃ rü ngẽxmatama yacua̱xẽxẽ nax cunaxüxü̃ i ngẽma chixexü̃ i cuãẽwa ínguxü̃! ¡Rü nagu rüxĩnü nax nüxü̃ curüngü̃xẽxẽxü̃ i ngẽma duü̃xü̃gü i ngearü ngẽmaxü̃ã̱xgüxü̃! Rü bexmana ngẽmaãcü ya Tupana i taxũtáma cuxna nanguxẽẽãxü̃ i ngẽma chixexü̃ i cumaxã naxueguxü̃” —ñanagürü ga Danié.
Yema nagu naxãnegüxü̃ rü ningu
28 Rü guxü̃ma ga yema ãẽ̱xgacü ga Nabucudonochómaxã ueguxü̃ rü ningu.
29 4:29-30 Rü wüxi ga taunecü nawena ga yema rü nüma ga ãẽ̱xgacü rü napataétügu ínixũãchixü̃ ga ĩane ga Babiróniawa, rü nügümaxã ñanagürü: —Dücax nax aixcüma nataxü̃ ya daa Babirónia ga choma chorü cua̱xmaxã chaxüxü̃ne nax nawa ãẽ̱xgacü chixĩxü̃ca̱x, rü ngẽmawa duü̃xü̃gü nüxü̃ daugüxü̃ca̱x nax cua̱x choxü̃́ ngẽxmaxü̃ —ñanagürü.
30 Nüü̃ nadau 4:29
31 Rü yexguma íyadexayanetama ga nüma ga ãẽ̱xgacü rü nüxü̃ naxĩnü ga wüxi ga naga ga dauxü̃wa ínaxũxü̃ ga ñaxü̃: —¡Dücax, irüxĩnü, Pa Ãẽ̱xgacü Pa Nabucudonochóx! Rü ngẽma nax ãẽ̱xgacü quixĩxü̃ rü ñu̱xma rü ngẽxma nayacua̱x.
32 Rü duü̃xü̃güna tá quixũgachi rü naxü̃natanüwa tá cumaxü̃, rü wocagürüxü̃ tá maxẽmaxã cuxãwemü i 7 ya taunecü. Rü ngẽmaãcü tá quixĩ ñu̱xmatáta nüxna cucua̱xãchi nax Tupana yixĩxü̃ ya yimá nüxü̃́ nangẽxmacü i pora nax namaxã inacuáxü̃ i guxü̃ma i nachixü̃anegü i ñoma i naanewa ngẽxmagüxü̃. Rü nüma nixĩ i tüxü̃ yangucuchixẽẽxü̃ nax ãẽ̱xgacü tixĩxü̃ ya yíxema nüma norü me ixĩxẽ —ñanagürü.
33 Rü yexgumatama ningu ga yema Tupana namaxã ueguxü̃. Rü nüma ga Nabucudonochó rü naxãũãxẽ. Rü duü̃xü̃güna nixũgachi rü wocagürüxü̃ maxẽ nanangõ̱x rü cherenamaxã niwaxine. Rü nayae rü narüxü, rü ñoma dawüã̱xmürüxü̃ nixĩ, rü napatü rü ñoma dawüpatürüxü̃ nixĩ.
Nabucudonochóca̱x nitaane
34 —Rü yexguma marü yanguxgu ga gumá 7 ga taunecü nax Tupana choxü̃ poxcuxü̃, rü choma ga Nabucudonochó rü dauxü̃gu chadawenü rü nüxü̃ chicua̱xãchi nax cha̱u̱xca̱x mea yataanexü̃ nawa ga nax chaxãũãẽxü̃. Rü ñu̱xũchi mexü̃ nachigaxü̃ chixu ya yimá Tupana ya Guxãétüwa Ngẽxmacü ya guxü̃guma maxü̃cü. Rü ñaa dexamaxã nüxü̃ chicua̱xüxü̃ rü ñachagürü: “Pa Tupanax, curü pora rü taguma inayacua̱x rü cuma rü guxü̃gutáma ãẽ̱xgacü quixĩ.
35 Rü ngẽma duü̃xü̃gü i ñoma i naanewa maxẽxü̃ rü cupe̱xewa, Pa Tupanax, rü taxuxü̃ma nixĩgü. Rü cuma cunaxwa̱xexü̃ãcü namaxã icucua̱x i dauxü̃guxü̃ i naane rü ñoma i naane. Rü tataxuma ya texé ya curü poraxü̃ rüyexeraxe. Rü tataxuma ya texé ya tüxü̃́ nangẽxmaxe i pora nax cuxna taca̱xaxü̃ rü ‘¿tü̱xcüü̃ cunaxü i ngẽma cuxüxü̃?’ ñachagürü.
36 Rü yexgumatama chauãẽxü̃ chicua̱xãchi rü wenaxarü Tupana choxü̃ narüngü̃xẽxẽ rü chauchicaca̱xtama choxü̃ nataeguxẽxẽ nax ãẽ̱xgacü chixĩxü̃. Rü duü̃xü̃gü rü chomaxã nataãẽgü, rü noxrirüü̃tama namaxã ichacua̱x rü chapora. Rü yema chorü ucu̱xẽruü̃gü rü chorü ngü̃xẽẽruü̃gü rü cha̱u̱xca̱x nayadaugü nax wenaxarü chauchixü̃anearü ãẽ̱xgacüxü̃ choxü̃ yangucuchixẽẽgüxü̃ca̱x. Rü noxriarü yexera pora choxü̃́ nayexma.
37 Rü ngẽmaca̱x i ñu̱xmax i chomax i Nabucudonochó rü nüxü̃ chicua̱xüxü̃ rü chanataxẽxẽ ya yimá Tupana i dauxü̃guxü̃ i naanewa ãẽ̱xgacü ixĩcü. Erü guxü̃ma i ngẽma naxüxü̃ rü aixcüma name, rü nüxü̃́ natauxcha nax tüxü̃ naxãnexẽẽxü̃ ya yíxema tügü írütagüxe” —ñachagürü.
